ਸਾਊਦੀ ਅਰਬ ਦੇ ਤੇਲ ਪਾਈਪਲਾਈਨ ’ਤੇ ਡ੍ਰੋਨ ਹਮਲਾ, ਟਰੰਪ ਦਾ ਇਸ਼ਾਰਾ ਈਰਾਨ ਵੱਲ; ਤੇਲ ਸਪਲਾਈ ਅਸਥਾਈ ਤੌਰ ’ਤੇ ਬੰਦ

ਅਦਨ (ਰਾਇਟਰ) : ਸਾਊਦੀ ਅਰਬ ਨੇ ਤੇਲ ਪਾਈਪਲਾਈਨ ’ਤੇ ਡ੍ਰੋਨ ਹਮਲੇ ਮਗਰੋਂ ਪੂਰਬ-ਪੱਛਮ ਪਾਈਪਲਾਈਨ ਨੂੰ ਅਸਥਾਈ ਤੌਰ ’ਤੇ ਬੰਦ ਕਰ ਦਿੱਤਾ ਹੈ। ਹਮਲਿਆਂ ਦੀ ਤੁਰੰਤ ਕਿਸੇ ਨੇ ਜ਼ਿੰਮੇਵਾਰੀ ਨਹੀਂ ਲਈ ਹੈ। ਹਾਲਾਂਕਿ, ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਕਿਹਾ ਕਿ ਸ਼ਾਇਦ ਈਰਾਨ ਇਸ ਲਈ ਜ਼ਿੰਮੇਵਾਰ ਹੈ।

ਇਸ ਦੇ ਨਾਲ, ਬਗਦਾਦ ਅਤੇ ਰਿਆਦ ਦੋਵਾਂ ਦਾ ਕਹਿਣਾ ਹੈ ਕਿ ਇਹ ਹਮਲਾ ਇਰਾਕ ਤੋਂ ਕੀਤਾ ਗਿਆ ਸੀ, ਜਿੱਥੇ ਈਰਾਨ-ਸਮਰਥਿਤ ਮਿਲੀਸ਼ੀਆ ਸਰਗਰਮ ਹਨ। ਈਰਾਕ ਦੇ ਪ੍ਰਧਾਨ ਮੰਤਰੀ ਅਤੇ ਹਥਿਆਰਬੰਦ ਬਲਾਂ ਦੇ ਕਮਾਂਡਰ-ਇਨ-ਚੀਫ ਅਲੀ ਅਲ-ਜੈਦੀ ਨੇ ਸ਼ਨੀਵਾਰ ਨੂੰ ਮੈਸਾਨ ਓਪਰੇਸ਼ਨਸ ਕਮਾਂਡਰ ਨੂੰ ਬਰਖਾਸਤ ਕਰ ਦਿੱਤਾ। ਹਮਲੇ ਮੈਸਾਨ ਸੂਬਾ ਤੋਂ ਕੀਤੇ ਗਏ ਸਨ। ਇਸ ਦੇ ਨਾਲ ਹੀ, ਡ੍ਰੋਨ ਹਮਲਿਆਂ ਦੇ ਲਾਂਚਿੰਗ ਪੈਡ ਦੀ ਭਾਲ ਲਈ ਸੰਯੁਕਤ ਜਾਂਚ ਦੇ ਈਰਾਨ ਦੀ ਬੇਨਤੀ ਨੂੰ ਸਵੀਕਾਰ ਕਰ ਲਿਆ ਗਿਆ। ਸਾਊਦੀ ਅਰਬ ਨੇ ਵੀ ਇਰਾਕੀ ਪ੍ਰਧਾਨ ਮੰਤਰੀ ਦੀ ਬੇਨਤੀ ਮਗਰੋਂ ਹੁਣ ਤੱਕ ਜਵਾਬੀ ਕਾਰਵਾਈ ਨਹੀਂ ਕੀਤੀ ਹੈ।

ਲਾਲ ਸਾਗਰ ’ਤੇ ਹੂਤੀ ਮਜ਼ਬੂਤ ਕਰ ਰਹੇ ਪਕੜ

ਯਮਨ ਦੇ ਲਾਲ ਸਾਗਰ ਤਟ ’ਤੇ ਹਾਊਤੀ ਮਜ਼ਬੂਤ ਬੜਤ ਬਣਾ ਰਹੇ ਹਨ। ਇਹ ਈਰਾਨ ਦੇ ਰੈਵੋਲਿਊਸ਼ਨਰੀ ਗਾਰਡਾਂ ਦੇ ਸਿੱਧੇ ਨਿਰਦੇਸ਼ਾਂ ’ਤੇ ਹੋ ਰਿਹਾ ਹੈ। ਦੋ ਈਰਾਨੀ ਸੂਤਰਾਂ ਅਨੁਸਾਰ, ਈਰਾਨ ਨੇ ਪਿਛਲੇ ਹਫ਼ਤੇ ਉਨ੍ਹਾਂ ਨੂੰ ਸਾਊਦੀ ’ਤੇ ਹਮਲੇ ਤੇਜ਼ ਕਰਨ ਲਈ ਕਿਹਾ ਸੀ ਅਤੇ ਮਦਦ ਲਈ ਵੱਧ ਪੈਸੇ, ਹਥਿਆਰ ਅਤੇ ਅਧਿਕਾਰੀਆਂ ਦਾ ਵਾਅਦਾ ਕੀਤਾ ਸੀ। ਇਸ ਦੌਰਾਨ, ਹੂਤੀ ਫੌਜੀ ਬੁਲਾਰੇ ਯਾਹਿਆ ਸਰੀ ਨੇ ਕਿਹਾ ਕਿ ਪਹਿਲਾਂ ਤੋਂ ਐਲਾਨੀਆਂ ਰੋਕਾਂ ਦੇ ਅਧੀਨ ਸਾਊਦੀ ਜਹਾਜ਼ਾਂ ਨੂੰ ਛੱਡ ਕੇ ਸਾਰੇ ਜਹਾਜ਼ਾਂ ਲਈ ਸਮੁੰਦਰੀ ਆਵਾਜਾਈ ਸੁਰੱਖਿਅਤ ਹੈ।

ਹੂਤੀ ਹਮਲੇ ਤੋਂ ਬਚਾਉਣ ’ਚ ਅਮਰੀਕਾ ਸਿੱਧੀ ਦਖਲ ਨਹੀਂ ਕਰੇਗਾ

ਵਾਸ਼ਿੰਗਟਨ ਇਸ ਦੂਵਿਧਾ ਵਿਚ ਹੈ ਕਿ ਕੀ ਉਹ ਸਾਊਦੀ ਅਰਬ ਨੂੰ ਹੂਤੀ ਨਾਲ ਲੜਨ ਵਿਚ ਮਦਦ ਕਰੇ, ਜਿਸ ਨਾਲ ਯੁੱਧ ਦੇ ਹੋਰ ਫੈਲਣ ਦਾ ਖ਼ਤਰਾ ਹੈ। ਤਿੰਨ ਸੂਤਰਾਂ ਨੇ ਦੱਸਿਆ ਕਿ ਸਾਊਦੀ ਅਰਬ ਦੇ ਅਸਲ ਸ਼ਾਸਕ, ਕ੍ਰਾਊਨ ਪ੍ਰਿੰਸ ਮੁਹੰਮਦ ਬਿਨ ਸਲਮਾਨ ਨੇ ਵੀਰਵਾਰ ਨੂੰ ਟਰੰਪ ਨੂੰ ਫੋਨ ਕੀਤਾ ਅਤੇ ਹੂਤੀ ਨਾਲ ਲੜਨ ਲਈ ਫੌਜੀ ਸਹਾਇਤਾ ਮੰਗੀ। ਪ੍ਰਿੰਸ ਨੂੰ ਕਿਹਾ ਗਿਆ ਕਿ ਵਾਸ਼ਿੰਗਟਨ ਇਸ ਸਮੇਂ ਸਿੱਧਾ ਦਖਲ ਨਹੀਂ ਕਰੇਗਾ, ਪਰ ਖੁਫੀਆ ਜਾਣਕਾਰੀ ਇਕੱਠੀ ਕਰਨ ਵਿਚ ਮਦਦ ਕਰੇਗਾ। ਟਰੰਪ ਨੇ ਸ਼ਨੀਵਾਰ ਨੂੰ ਪੁਸ਼ਟੀ ਕੀਤੀ ਕਿ ਉਨ੍ਹਾਂ ਨੇ ਕ੍ਰਾਊਨ ਪ੍ਰਿੰਸ ਨਾਲ ਗੱਲ ਕੀਤੀ ਸੀ ਅਤੇ ਕਿਹਾ ਕਿ ਹੂਤੀ ਨੇ ਵੀ ਉਨ੍ਹਾਂ ਦੇ ਪ੍ਰਸ਼ਾਸਨ ਨੂੰ ਫੋਨ ਕੀਤਾ ਸੀ ਅਤੇ ਵਾਸ਼ਿੰਗਟਨ ਤੋਂ ਬੇਨਤੀ ਕੀਤੀ ਸੀ ਕਿ ਉਹ ਇਸ ਸੰਘਰਸ਼ ’ਚ ਸਿੱਧਾ ਸ਼ਾਮਲ ਨਾ ਹੋਵੇ।