ਸੜ ਰਹੀਆਂ ਸਨ ਲਾਸ਼ਾਂ, ਅਧਿਕਾਰੀ ਲੈ ਰਹੇ ਸਨ ਸੈਲਫੀ... ਵੈਨੇਜ਼ੁਏਲਾ 'ਚ ਭੂਚਾਲ ਤੋਂ ਬਾਅਦ ਸਰਕਾਰੀ ਸੰਵੇਦਨਹੀਣਤਾ ਦੇਖ ਕੇ ਭੜਕੇ ਲੋਕ

ਡਿਜੀਟਲ ਡੈਸਕ, ਕਰਾਕਾਸ : ਵੈਨੇਜ਼ੁਏਲਾ ਵਿੱਚ ਪਿਛਲੇ ਦਿਨੀਂ ਆਏ 7.2 ਅਤੇ 7.5 ਤੀਬਰਤਾ ਦੇ ਵਿਨਾਸ਼ਕਾਰੀ ਭੂਚਾਲ ਨੇ ਭਿਅੰਕਰ ਤਬਾਹੀ ਮਚਾਈ ਹੈ। ਇੱਥੇ ਮਰਨ ਵਾਲਿਆਂ ਅਤੇ ਜ਼ਖਮੀਆਂ ਦਾ ਅੰਕੜਾ ਲਗਾਤਾਰ ਵਧਦਾ ਜਾ ਰਿਹਾ ਹੈ। ਇਸ ਹਾਦਸੇ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ ਵਧ ਕੇ 1,430 ਹੋ ਗਈ ਹੈ, ਜਦਕਿ 3,200 ਤੋਂ ਵੱਧ ਲੋਕ ਜ਼ਖਮੀ ਹਨ ਅਤੇ ਲਗਪਗ 50,000 ਲੋਕ ਅਜੇ ਵੀ ਲਾਪਤਾ ਹਨ।

ਇਸ ਵਿਨਾਸ਼ਕਾਰੀ ਭੂਚਾਲ ਵਿੱਚ ਸਭ ਤੋਂ ਵੱਧ 'ਲਾ ਗੁਆਇਰਾ' ਰਾਜ ਪ੍ਰਭਾਵਿਤ ਹੋਇਆ ਹੈ। ਇੱਥੇ ਹਰ ਪਾਸੇ ਮਲਬੇ ਅਤੇ ਸੜਦੀਆਂ ਲਾਸ਼ਾਂ ਦੀ ਬਦਬੂ ਫੈਲੀ ਹੋਈ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਕੁਦਰਤੀ ਆਫ਼ਤਾਂ ਤੋਂ ਬਾਅਦ ਪਹਿਲੇ 72 ਘੰਟੇ ਜ਼ਿੰਦਾ ਲੋਕਾਂ ਨੂੰ ਲੱਭਣ ਲਈ ਸਭ ਤੋਂ ਮਹੱਤਵਪੂਰਨ ਹੁੰਦੇ ਹਨ ਪਰ ਉਹ ਸਮਾਂ ਹੁਣ ਖ਼ਤਮ ਹੋ ਚੁੱਕਾ ਹੈ। ਜ਼ਿੰਦਾ ਲੋਕਾਂ ਦੀ ਭਾਲ ਹੁਣ ਲਾਸ਼ਾਂ ਦੀ ਭਾਲ ਵਿੱਚ ਬਦਲ ਗਈ ਹੈ।

ਸੈਲਫੀ ਲੈਂਦੇ ਨਜ਼ਰ ਆਏ ਅਧਿਕਾਰੀ

ਭੂਚਾਲ ਦੇ ਵਿਚਕਾਰ ਸਰਕਾਰੀ ਸੰਵੇਦਨਹੀਣਤਾ ਦੀ ਇੱਕ ਬੇਹੱਦ ਸ਼ਰਮਨਾਕ ਤਸਵੀਰ ਸਾਹਮਣੇ ਆਈ ਹੈ। ਇੱਕ ਪਾਸੇ ਜਿੱਥੇ ਹਜ਼ਾਰਾਂ ਲੋਕ ਮਲਬੇ ਹੇਠਾਂ ਦੱਬੇ ਹੋਏ ਹਨ ਅਤੇ ਲਾਸ਼ਾਂ ਸੜ ਰਹੀਆਂ ਹਨ, ਉੱਥੇ ਹੀ ਦੂਜੇ ਪਾਸੇ ਆਫ਼ਤ ਪ੍ਰਭਾਵਿਤ ਇਲਾਕਿਆਂ ਦਾ ਦੌਰਾ ਕਰਨ ਆਏ ਸਰਕਾਰੀ ਕਰਮਚਾਰੀ ਅਤੇ ਅਧਿਕਾਰੀ ਢਹਿ-ਢੇਰੀ ਹੋਈਆਂ ਇਮਾਰਤਾਂ ਦੇ ਸਾਹਮਣੇ ਖੜ੍ਹੇ ਹੋ ਕੇ 'ਸੈਲਫੀ' ਖਿੱਚਦੇ ਨਜ਼ਰ ਆਏ।

ਰਾਹਤ ਕਾਰਜਾਂ ਵਿੱਚ ਸਰਕਾਰ ਦੀ ਢਿੱਲਮੱਠ ਦਰਮਿਆਨ ਹੱਦ ਤਾਂ ਉਦੋਂ ਹੋ ਗਈ ਜਦੋਂ ਸਰਕਾਰ ਨੇ ਸਭ ਤੋਂ ਵੱਧ ਪ੍ਰਭਾਵਿਤ 'ਲਾ ਗੁਆਇਰਾ' ਖੇਤਰ ਵਿੱਚ ਆਮ ਲੋਕਾਂ ਦੇ ਜਾਣ 'ਤੇ ਪਾਬੰਦੀ ਲਗਾ ਦਿੱਤੀ ਅਤੇ ਮਲਬੇ ਵਿੱਚੋਂ ਆਪਣਿਆਂ ਦੀ ਜਾਨ ਬਚਾਉਣ ਲਈ ਜੁਟੇ ਸਥਾਨਕ ਵਾਲੰਟੀਅਰਾਂ ਲਈ ਵੀ 'ਸੁਰੱਖਿਅਤ ਐਂਟਰੀ ਪਾਸ' ਲੈਣਾ ਲਾਜ਼ਮੀ ਕਰ ਦਿੱਤਾ। ਇਸ ਕਦਮ ਕਾਰਨ ਸਥਾਨਕ ਲੋਕਾਂ ਦਾ ਗੁੱਸਾ ਭੜਕ ਉੱਠਿਆ ਅਤੇ ਉਨ੍ਹਾਂ ਨੇ ਕਿਹਾ ਕਿ ਇੱਥੇ ਅਧਿਕਾਰੀ ਮਦਦ ਕਰਨ ਦੀ ਬਜਾਏ ਸੈਲਫੀ ਲੈਣ ਆਏ ਸਨ।

ਸੜਦੀਆਂ ਲਾਸ਼ਾਂ ਦੀ ਬਦਬੂ

ਭਿਅੰਕਰ ਗਰਮੀ ਵਿੱਚ ਸੜ ਰਹੀਆਂ ਲਾਸ਼ਾਂ ਦੀ ਬਦਬੂ ਫੈਲਣ ਕਾਰਨ ਜ਼ਿਆਦਾਤਰ ਲੋਕਾਂ ਨੇ ਮਾਸਕ ਪਹਿਨੇ ਹੋਏ ਹਨ। ਜਿਹੜੇ ਲੋਕ ਬਚ ਗਏ, ਉਨ੍ਹਾਂ ਦੀਆਂ ਕਹਾਣੀਆਂ ਦਰਦਨਾਕ ਹਨ-ਇੱਕ ਮਾਂ ਨੂੰ ਆਪਣੀ ਧੀ ਦੀ ਲਾਸ਼ ਕਰਾਕਾਸ ਦੇ ਮੁਰਦਾਘਰ ਤੱਕ ਲਿਜਾਣ ਲਈ ਮਜਬੂਰ ਹੋਣਾ ਪਿਆ।

ਬੁੱਧਵਾਰ ਨੂੰ 'ਲਾ ਗੁਆਇਰਾ' ਵਿੱਚ ਉਨ੍ਹਾਂ ਦੇ ਘਰ ਦਾ ਮਲਬਾ ਡਿੱਗਣ ਕਾਰਨ ਉਨ੍ਹਾਂ ਦੀ ਧੀ ਅਤੇ ਜਵਾਈ ਦੀ ਮੌਤ ਹੋ ਗਈ ਸੀ। ਉਨ੍ਹਾਂ ਨੇ ਏ.ਐੱਫ.ਪੀ. ਨੂੰ ਦੱਸਿਆ, "ਅਸੀਂ ਉਨ੍ਹਾਂ ਨੂੰ ਖੁਦ ਬਾਹਰ ਕੱਢਿਆ, ਕੋਈ ਮਦਦ ਨਹੀਂ ਆਈ।" ਲਾਸ਼ਾਂ ਦੇ ਤੇਜ਼ੀ ਨਾਲ ਸੜਨ ਕਾਰਨ ਇਸ ਜੋੜੇ ਦਾ ਅੰਤਿਮ ਸੰਸਕਾਰ ਬਿਨਾਂ ਕਿਸੇ ਸੋਗ ਸਭਾ ਦੇ ਕੀਤਾ ਜਾਵੇਗਾ।

ਆਖਰ ਉਹ ਕਿਸ ਗੱਲ ਦਾ ਇੰਤਜ਼ਾਰ ਕਰ ਰਹੇ ਹਨ

ਵੈਨੇਜ਼ੁਏਲਾ ਵਿੱਚ ਆਏ ਵਿਨਾਸ਼ਕਾਰੀ ਭੂਚਾਲ ਤੋਂ ਬਾਅਦ ਜਿੱਥੇ ਇੱਕ ਪਾਸੇ ਲੋਕ ਆਪਣਿਆਂ ਨੂੰ ਖੋਹਣ ਦੇ ਗ਼ਮ ਵਿੱਚ ਡੁੱਬੇ ਹੋਏ ਹਨ, ਉੱਥੇ ਹੀ ਦੂਜੇ ਪਾਸੇ ਸਰਕਾਰ ਅਤੇ ਪ੍ਰਸ਼ਾਸਨ ਦੀ ਸੁਸਤੀ ਨੇ ਇਸ ਦਰਦ ਨੂੰ ਗੁੱਸੇ ਵਿੱਚ ਬਦਲ ਦਿੱਤਾ ਹੈ।

ਕੈਰਾਬਲੇਡਾ ਦੇ ਸਮੁੰਦਰ ਕੰਢੇ ਵਸੇ ਕਸਬੇ ਵਿੱਚ ਮਲਬੇ ਦੇ ਵਿਚਕਾਰ ਆਪਣਿਆਂ ਦੀ ਭਾਲ ਕਰ ਰਹੀ ਮਾਈਲੇਡੀ ਰੋਮੇਰੋ ਨੇ ਕਿਹਾ, "ਉੱਥੇ ਕੱਲ੍ਹ ਰਾਤ ਤੋਂ ਲਾਸ਼ਾਂ ਦਾ ਢੇਰ ਲੱਗਿਆ ਹੋਇਆ ਹੈ। ਉਨ੍ਹਾਂ ਲਾਸ਼ਾਂ ਵਿੱਚ ਮਾਸੂਮ ਨਵਜੰਮੇ ਬੱਚੇ ਵੀ ਹਨ।"

ਉਨ੍ਹਾਂ ਅੱਗੇ ਕਿਹਾ, "ਕੱਲ੍ਹ ਰਾਤ 8 ਵਜੇ ਤੱਕ ਉੱਥੇ ਮਲਬੇ ਹੇਠਾਂ ਲੋਕ ਜ਼ਿੰਦਾ ਸਨ ਅਤੇ ਚੀਕ ਰਹੇ ਸਨ ਪਰ ਪ੍ਰਸ਼ਾਸਨ ਨੇ ਉਨ੍ਹਾਂ ਨੂੰ ਬਚਾਉਣਾ ਜ਼ਰੂਰੀ ਹੀ ਨਹੀਂ ਸਮਝਿਆ। ਅਸੀਂ ਆਪਣੇ ਪੱਧਰ 'ਤੇ ਕਈ ਲਾਸ਼ਾਂ ਬਾਹਰ ਕੱਢੀਆਂ ਹਨ ਪਰ ਉਨ੍ਹਾਂ ਨੂੰ ਕੱਢਣ ਵਿੱਚ ਵੀ ਅਧਿਕਾਰੀਆਂ ਨੇ ਸਾਡੀ ਕੋਈ ਮਦਦ ਨਹੀਂ ਕੀਤੀ। ਆਖਰ ਉਹ ਕਿਸ ਗੱਲ ਦਾ ਇੰਤਜ਼ਾਰ ਕਰ ਰਹੇ ਹਨ?"

ਹਾਲਾਂਕਿ, ਅਮਰੀਕਾ ਸਮੇਤ 21 ਦੇਸ਼ਾਂ ਦੀਆਂ ਰਾਹਤ ਟੀਮਾਂ ਭਾਲ ਅਤੇ ਬਚਾਅ ਕਾਰਜਾਂ ਵਿੱਚ ਜੁਟੀਆਂ ਹੋਈਆਂ ਹਨ। ਸੰਯੁਕਤ ਰਾਸ਼ਟਰ (UN) ਦੇ ਅਨੁਸਾਰ, ਇਸ ਆਫ਼ਤ ਨਾਲ ਲਗਪਗ 67 ਲੱਖ ਲੋਕ ਪ੍ਰਭਾਵਿਤ ਹੋਏ ਹਨ।