ਟੂਵੁਮੰਬਾ ਦੀ ਲਾਪਤਾ ਮਾਂ ਜਾਨਾ ਆਰਮਸਟ੍ਰਾਂਗ ਦੀ ਲਾਸ਼ ਬਰਾਮਦ, ਸਾਬਕਾ ਸਾਥੀ ਧਰਮਿੰਦਰ ਸਿੰਘ ’ਤੇ ਕਤਲ ਦਾ ਦੋਸ਼

ਹਰਪ੍ਰੀਤ ਸਿੰਘ ਕੋਹਲੀ, ਬ੍ਰਿਸਬੇਨ: ਆਸਟ੍ਰੇਲੀਆ ਦੇ ਕਵੀਨਜ਼ਲੈਂਡ ਰਾਜ ਦੇ ਟੂਵੁਮੰਬਾ ਸ਼ਹਿਰ ਤੋਂ ਲਾਪਤਾ ਹੋਈ 30 ਸਾਲਾ ਜਾਨਾ ਆਰਮਸਟ੍ਰਾਂਗ ਦੇ ਮਾਮਲੇ ਵਿੱਚ ਦੁਖਦਾਈ ਅੰਤ ਸਾਹਮਣੇ ਆਇਆ ਹੈ। ਪੁਲਿਸ ਨੇ ਰੇਵਨਜ਼ਬੋਰਨ ਨੈਸ਼ਨਲ ਪਾਰਕ ਨੇੜੇ ਰੈੱਡਬੈਂਕ ਕ੍ਰੀਕ ਇਲਾਕੇ ਵਿੱਚ ਝਾੜੀਆਂ ਵਿੱਚੋਂ ਇੱਕ ਮਹਿਲਾ ਦੀ ਲਾਸ਼ ਬਰਾਮਦ ਕੀਤੀ ਹੈ, ਜਿਸ ਨੂੰ ਜਾਂਚ ਅਧਿਕਾਰੀਆਂ ਜਾਨਾ ਆਰਮਸਟ੍ਰਾਂਗ ਦੀ ਲਾਸ਼ ਮੰਨ ਰਹੇ ਹਨ। ਹਾਲਾਂਕਿ, ਅਧਿਕਾਰਤ ਪਛਾਣ ਦੀ ਪ੍ਰਕਿਰਿਆ ਅਜੇ ਜਾਰੀ ਹੈ।

ਕਵੀਨਜ਼ਲੈਂਡ ਪੁਲਿਸ ਨੇ ਇਸ ਮਾਮਲੇ ਵਿੱਚ ਜਾਨਾ ਦੇ 48 ਸਾਲਾ ਸਾਬਕਾ ਸਾਥੀ ਧਰਮਿੰਦਰ ਸਿੰਘ ਨੂੰ ਗ੍ਰਿਫ਼ਤਾਰ ਕਰਕੇ ਕਤਲ ਦਾ ਦੋਸ਼ ਲਗਾਇਆ ਹੈ। ਪੁਲਿਸ ਅਨੁਸਾਰ ਇਸ ਘਟਨਾ ਨੂੰ ਘਰੇਲੂ ਅਤੇ ਪਰਿਵਾਰਕ ਹਿੰਸਾ (Domestic and Family Violence) ਨਾਲ ਸੰਬੰਧਿਤ ਮਾਮਲਾ ਮੰਨ ਕੇ ਜਾਂਚ ਕੀਤੀ ਜਾ ਰਹੀ ਹੈ।

ਜਾਨਾ ਆਰਮਸਟ੍ਰਾਂਗ, ਜੋ ਇੱਕ ਸਹਾਇਤਾ ਕਰਮਚਾਰੀ (Support Worker) ਸੀ ਅਤੇ ਚਾਰ ਮਹੀਨੇ ਦੇ ਬੱਚੇ ਦੀ ਮਾਂ ਸੀ, ਨੂੰ ਆਖ਼ਰੀ ਵਾਰ 7 ਜੁਲਾਈ ਨੂੰ ਟੂਵੁਮੰਬਾ ਦੇ ਨਿਊਟਾਊਨ ਸਥਿਤ ਆਪਣੇ ਘਰ ਵਿੱਚ ਦੇਖਿਆ ਗਿਆ ਸੀ। ਉਸਦੀ ਗੁੰਮਸ਼ੁਦਗੀ ਤੋਂ ਬਾਅਦ ਪਰਿਵਾਰ, ਦੋਸਤਾਂ ਅਤੇ ਪੁਲਿਸ ਵੱਲੋਂ ਲਗਾਤਾਰ ਖੋਜ ਕੀਤੀ ਜਾ ਰਹੀ ਸੀ।

ਪੁਲਿਸ ਅਨੁਸਾਰ, ਖੇਤਰ ਵਿੱਚ ਖੋਜ ਕਰ ਰਹੇ ਕੁਝ ਲੋਕਾਂ ਨੂੰ ਸ਼ਨੀਵਾਰ ਰਾਤ ਦੇਰ ਉਸਦੇ ਅਵਸ਼ੇਸ਼ ਮਿਲੇ, ਜਿਸ ਤੋਂ ਬਾਅਦ ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ। ਘਟਨਾ ਸਥਾਨ ਨੂੰ ਅਪਰਾਧ ਸਥਲ ਐਲਾਨ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਗਈ। ਐਤਵਾਰ ਸਵੇਰੇ ਪੁਲਿਸ ਨੇ ਹੈਰਿਸਟਾਊਨ ਵਿੱਚ ਇੱਕ ਘਰ ’ਤੇ ਛਾਪਾ ਮਾਰ ਕੇ ਧਰਮਿੰਦਰ ਸਿੰਘ ਨੂੰ ਗ੍ਰਿਫ਼ਤਾਰ ਕੀਤਾ। ਉਸਨੂੰ ਟੂਵੁਮੰਬਾ ਮੈਜਿਸਟ੍ਰੇਟ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਣਾ ਹੈ। ਜਾਨਾ ਦੀ ਭੈਣ ਫੇਥ ਆਇਜ਼ੈਕਸ, ਜੋ ਉਸਦੇ ਚਾਰ ਮਹੀਨੇ ਦੇ ਪੁੱਤਰ ਦੀ ਦੇਖਭਾਲ ਕਰ ਰਹੀ ਹੈ, ਨੇ ਭਾਵੁਕ ਹੋ ਕੇ ਕਿਹਾ ਕਿ ਪਰਿਵਾਰ ਨੂੰ ਘੱਟੋ-ਘੱਟ ਇਹ ਤਸੱਲੀ ਹੈ ਕਿ ਜਾਨਾ ਮਿਲ ਗਈ ਹੈ ਅਤੇ ਇਸ ਮਾਮਲੇ ਵਿੱਚ ਇੱਕ ਵਿਅਕਤੀ ਨੂੰ ਦੋਸ਼ੀ ਠਹਿਰਾਇਆ ਗਿਆ ਹੈ। ਉਨ੍ਹਾਂ ਨੇ ਕਿਹਾ ਕਿ ਜਾਨਾ ਬਹੁਤ ਹੀ ਦਿਆਲੂ, ਸ਼ਾਂਤ ਅਤੇ ਪਿਆਰ ਕਰਨ ਵਾਲੀ ਇਨਸਾਨ ਸੀ, ਜੋ ਹਮੇਸ਼ਾਂ ਦੂਜਿਆਂ ਦੀ ਭਲਾਈ ਨੂੰ ਪਹਿਲ ਦਿੰਦੀ ਸੀ।

ਕਵੀਨਜ਼ਲੈਂਡ ਪੁਲਿਸ ਨੇ ਮਾਮਲੇ ਦੀ ਜਾਂਚ ਜਾਰੀ ਰੱਖੀ ਹੋਈ ਹੈ ਅਤੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇਕਰ ਕਿਸੇ ਕੋਲ ਇਸ ਘਟਨਾ ਨਾਲ ਸੰਬੰਧਿਤ ਕੋਈ ਜਾਣਕਾਰੀ ਜਾਂ ਵੀਡੀਓ ਫੁਟੇਜ ਹੈ ਤਾਂ ਉਹ ਪੁਲਿਸ ਨਾਲ ਸੰਪਰਕ ਕਰਨ।