AI ਨੂੰ ਲੈ ਕੇ 'Five Eyes' ਦੀ ਵੱਡੀ ਚਿਤਾਵਨੀ; ਸਾਲਾਂ ਦੀ ਬਜਾਏ ਮਹੀਨਿਆਂ 'ਚ ਬਦਲ ਜਾਵੇਗਾ ਸਾਈਬਰ ਸੁਰੱਖਿਆ ਦਾ ਮਾਹੌਲ

ਡਿਜ਼ੀਟਲ ਡੈਸਕ, ਵਾਸ਼ਿੰਗਟਨ : ਇੰਟੈਲੀਜੈਂਸ ਅਲਾਇੰਸ ਫਾਈਵ ਆਈਜ਼ (Five Eyes) ਨੇ ਇਕ ਅਨੋਖੀ ਚਿਤਾਵਨੀ ਜਾਰੀ ਕੀਤੀ ਹੈ ਕਿ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਦੀ ਅਗਲੀ ਜਨਰੇਸ਼ਨ ਸਾਲਾਂ ਦੀ ਬਜਾਏ ਕੁਝ ਹੀ ਮਹੀਨਿਆਂ 'ਚ ਸਾਈਬਰ ਸਕਿਓਰਿਟੀ ਦੇ ਮਾਹੌਲ ਨੂੰ ਪੂਰੀ ਤਰ੍ਹਾਂ ਨਾਲ ਬਦਲ ਸਕਦੀ ਹੈ ਅਤੇ ਸਰਕਾਰਾਂ, ਬਿਜ਼ਨੈੱਸ ਤੇ ਕਾਰਪੋਰੇਟ ਲੀਡਰਾਂ ਨੂੰ ਸਾਈਬਰ ਰੈਜ਼ਿਲੀਐਂਸ (Cyber Resilience) ਨੂੰ ਤੁਰੰਤ ਪਹਿਲ ਦੇਣ ਦੀ ਅਪੀਲ ਕੀਤੀ ਹੈ। ਇਹ ਚਿਤਾਵਨੀ 'ਫਾਈਵ ਆਈਜ਼ ਇੰਟੈਲੀਜੈਂਸ ਓਵਰਸਾਈਟ ਐਂਡ ਰਿਵਿਊ ਕੌਂਸਲ' (FIORC) ਦੇ ਇੱਕ ਸਾਂਝੇ ਬਿਆਨ 'ਚ ਦਿੱਤੀ ਗਈ। ਇਹ ਕੌਂਸਲ ਆਸਟ੍ਰੇਲੀਆ, ਕੈਨੇਡਾ, ਨਿਊਜ਼ੀਲੈਂਡ, ਯੂਨਾਈਟਿਡ ਕਿੰਗਡਮ ਅਤੇ ਅਮਰੀਕਾ ਦੀਆਂ ਇੰਟੈਲੀਜੈਂਸ ਤੇ ਸੁਰੱਖਿਆ ਏਜੰਸੀਆਂ ਦਾ ਇਕ ਸਮੂਹ ਹੈ।

ਕਿਸੇ ਖਾਸ ਕੰਪਨੀ ਜਾਂ ਮਾਡਲ ਦਾ ਨਹੀਂ ਲਿਆ ਨਾਂ

ਇਹ ਬਿਆਨ ਉਦੋਂ ਜਾਰੀ ਕੀਤਾ ਗਿਆ ਜਦੋਂ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਪ੍ਰਸ਼ਾਸਨ ਨੇ ਟੈਕਨਾਲੋਜੀ ਕੰਪਨੀ 'ਐਂਥਰੋਪਿਕ' (Anthropic) ਵੱਲੋਂ ਵਿਕਸਤ ਦੋ ਐਡਵਾਂਸਡ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਸਿਸਟਮਾਂ ਤਕ ਵਿਦੇਸ਼ੀ ਨਾਗਰਿਕਾਂ ਦੀ ਪਹੁੰਚ ਨੂੰ ਸੀਮਤ ਕਰਨ ਦਾ ਕਦਮ ਚੁੱਕਿਆ। ਇਸ ਮਹੀਨੇ ਦੀ ਸ਼ੁਰੂਆਤ 'ਚ ਐਲਾਨੇ ਇਹ ਫੈਸਲਾ ਅਮਰੀਕੀ ਸੁਰੱਖਿਆ ਏਜੰਸੀਆਂ ਦੀ ਸਲਾਹ ਤੋਂ ਬਾਅਦ ਲਿਆ ਗਿਆ।

ਕਿਸੇ ਖਾਸ ਕੰਪਨੀ ਜਾਂ ਮਾਡਲ ਦਾ ਨਾਂ ਲਏ ਬਿਨਾਂ ਫਾਈਵ ਆਈਜ਼ ਦੇ ਬਿਆਨ 'ਚ ਚਿਤਾਵਨੀ ਦਿੱਤੀ ਗਈ ਕਿ 'ਫਰੰਟੀਅਰ AI ਸਿਸਟਮ' ਤੋਂ ਮੌਜੂਦਾ ਇੰਡਸਟਰੀ ਦੀਆਂ ਉਮੀਦਾਂ ਤੋਂ ਕਿਤੇ ਅੱਗੇ ਨਿਕਲਣ ਅਤੇ ਹਮਲਾਵਰ ਤੇ ਰੱਖਿਆਤਮਕ, ਦੋਵਾਂ ਤਰ੍ਹਾਂ ਦੀਆਂ ਸਾਈਬਰ ਸਮਰੱਥਾਵਾਂ 'ਚ ਵੱਡੇ ਬਦਲਾਅ ਲਿਆਉਣ ਦੀ ਉਮੀਦ ਹੈ।

ਬਿਆਨ 'ਚ ਕੀ ਕਿਹਾ ਗਿਆ?

ਬਿਆਨ 'ਚ ਕਿਹਾ ਗਿਆ ਹੈ, 'ਹਾਲਾਂਕਿ AI ਸਮੇਂ ਦੇ ਨਾਲ ਸਾਈਬਰ ਸੁਰੱਖਿਆ ਨੂੰ ਬਿਹਤਰ ਬਣਾਉਣ 'ਚ ਸਾਡੀ ਮਦਦ ਕਰੇਗਾ, ਪਰ ਇਹ ਸਾਈਬਰ ਖਤਰਿਆਂ ਦੀ ਰਫ਼ਤਾਰ, ਦਾਇਰੇ ਅਤੇ ਗੁੰਝਲਦਾਰਤਾ ਨੂੰ ਵੀ ਵਧਾ ਦਿੰਦਾ ਹੈ। ਉਮੀਦ ਹੈ ਕਿ 'ਫਰੰਟੀਅਰ AI ਮਾਡਲ' ਇੰਡਸਟਰੀ ਦੀਆਂ ਮੌਜੂਦਾ ਉਮੀਦਾਂ ਤੋਂ ਕਿਤੇ ਅੱਗੇ ਨਿਕਲ ਜਾਣਗੇ ਅਤੇ ਸਾਈਬਰ ਹਮਲੇ ਅਤੇ ਬਚਾਅ, ਦੋਵਾਂ ਹੀ ਸਮਰੱਥਾਵਾਂ 'ਚ ਬੁਨਿਆਦੀ ਬਦਲਾਅ ਲਿਆਉਣਗੇ। ਇਸ ਵਿੱਚ ਸਾਲਾਂ ਦਾ ਨਹੀਂ, ਸਗੋਂ ਮਹੀਨਿਆਂ ਦਾ ਸਮਾਂ ਲੱਗੇਗਾ।'

ਇਸ ਗਰੁੱਪ ਨੇ ਕਿਹਾ ਕਿ ਬਿਜ਼ਨੈੱਸ, ਬਾਜ਼ਾਰ ਦੇ ਭਰੋਸੇ ਤੇ ਲੰਬੇ ਸਮੇਂ ਤਕ ਆਰਥਿਕ ਵੈਲਿਊ ਬਣਾਏ ਰੱਖਣ ਲਈ ਸਾਈਬਰ ਰੈਜ਼ਿਲੀਐਂਸ ਬਹੁਤ ਜ਼ਰੂਰੀ ਹੋ ਗਈ ਹੈ। ਇਸਨੇ ਲੀਡਰਾਂ ਨੂੰ ਕਿਹਾ ਕਿ ਉਹ ਜੋਖ਼ਮਾਂ ਤੇ ਜਵਾਬਦੇਹੀ ਦਾ ਮੁਲਾਂਕਣ ਕਰਨ, ਮੁੱਖ ਸਾਈਬਰ ਸਕਿਓਰਿਟੀ ਕੰਟਰੋਲ ਨੂੰ ਪਹਿਲ ਦੇਣ, ਸਾਈਬਰ ਸਕਿਓਰਿਟੀ ਟੀਮਾਂ ਨੂੰ ਢੁਕਵੇਂ ਅਧਿਕਾਰ ਅਤੇ ਸਾਧਨ ਦੇਣ ਅਤੇ ਖਤਰਿਆਂ ਦੇ ਬਦਲਦੇ ਸਰੂਪ ਦੇ ਨਾਲ ਸਰਗਰਮ ਰੂਪ ਨਾਲ ਜੁੜੇ ਰਹਿਣ।

ਬਿਆਨ 'ਚ ਕਿਹਾ ਗਿਆ, 'ਜ਼ਰੂਰਤ ਸਾਫ਼ ਹੈ। AI ਭਵਿੱਖ ਦੀ ਕੋਈ ਚੀਜ਼ ਨਹੀਂ ਹੈ, ਇਹ ਪਹਿਲਾਂ ਤੋਂ ਹੀ ਮੌਜੂਦ ਹੈ।' ਫਾਈਵ ਆਈਜ਼ ਦੇ ਬਿਆਨ ਮੁਤਾਬਕ, AI ਕਿਸੇ ਕਮਜ਼ੋਰੀ ਦਾ ਪਤਾ ਲੱਗਣ ਅਤੇ ਮਾੜੇ ਇਰਾਦੇ ਵਾਲੇ ਲੋਕਾਂ ਦੁਆਰਾ ਉਸਦਾ ਫਾਇਦਾ ਉਠਾਉਣ ਦੇ ਵਿਚਕਾਰ ਦੇ ਸਮੇਂ ਨੂੰ ਘੱਟ ਕਰ ਰਿਹਾ ਹੈ।

'ਸੰਗਠਨ ਅਤੇ ਸਮਾਜ ਨੂੰ ਕਰਨਾ ਪਵੇਗਾ ਅਸਰਦਾਰ ਢੰਗ ਨਾਲ ਕੰਮ'

ਨਾਲ ਹੀ, ਅਧਿਕਾਰੀਆਂ ਨੇ ਇਹ ਵੀ ਮੰਨਿਆ ਕਿ ਇਹ ਟੈਕਨਾਲੋਜੀ ਸਾਈਬਰ ਸੁਰੱਖਿਆ ਨੂੰ ਮਜ਼ਬੂਤ ਕਰਨ 'ਚ ਸਮਰੱਥ ਸ਼ਕਤੀਸ਼ਾਲੀ ਸੁਰੱਖਿਆਤਮਕ ਉਪਕਰਨ ਵੀ ਦਿੰਦੀ ਹੈ। ਇਸ ਵਿਚ ਕਿਹਾ ਗਿਆ ਹੈ, 'ਇਸਦੇ ਲਈ ਪੂਰੇ ਸੰਗਠਨ ਅਤੇ ਪੂਰੇ ਸਮਾਜ ਵੱਲੋਂ ਪ੍ਰਤੀਕਿਰਿਆ ਦੀ ਲੋੜ ਹੈ। ਸਾਈਬਰ ਜੋਖ਼ਮ ਨੂੰ ਹੁਣ ਸਿਰਫ਼ ਇਕ ਤਕਨੀਕੀ ਸਮੱਸਿਆ ਨਹੀਂ ਮੰਨਿਆ ਜਾ ਸਕਦਾ। ਇਹ ਕਾਰੋਬਾਰ ਦਾ ਇਕ ਮੁੱਖ ਜੋਖ਼ਮ ਤੇ ਲੀਡਰਸ਼ਿਪ ਦੀ ਜ਼ਿੰਮੇਵਾਰੀ ਹੈ।'

ਇਸ ਅਲਾਇੰਸ ਨੇ ਕੰਪਨੀਆਂ ਦੇ ਬੋਰਡ ਅਤੇ ਸੀਨੀਅਰ ਅਧਿਕਾਰੀਆਂ ਨੂੰ ਕਿਹਾ ਕਿ ਉਹ ਇਹ ਯਕੀਨੀ ਬਣਾਉਣ ਕਿ ਸਾਈਬਰ ਸੁਰੱਖਿਆ ਦੇ ਉਪਾਅ ਸਿਰਫ਼ ਕਾਗਜ਼ਾਂ 'ਤੇ ਹੀ ਨਾ ਹੋਣ, ਸਗੋਂ ਅਸਲ ਘਟਨਾਵਾਂ ਦੇ ਸਮੇਂ ਵੀ ਅਸਰਦਾਰ ਢੰਗ ਨਾਲ ਕੰਮ ਕਰ ਸਕਣ। ਅਲਾਇੰਸ ਦਾ ਕਹਿਣਾ ਹੈ ਕਿ ਲੀਡਰਾਂ ਨੂੰ ਪੁਰਾਣੀਆਂ ਮਾਨਤਾਵਾਂ 'ਤੇ ਮੁੜ ਵਿਚਾਰ ਕਰਨਾ ਚਾਹੀਦਾ ਹੈ ਅਤੇ ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਲਈ ਸੋਚ-ਸਮਝ ਕੇ AI ਦੀ ਵਰਤੋਂ ਕਰਨੀ ਚਾਹੀਦੀ ਹੈ, ਨਾ ਕਿ ਸਿਰਫ਼ ਕੰਮ ਦੀ ਸਮਰੱਥਾ ਵਧਾਉਣ ਲਈ।

ਬਿਆਨ 'ਚ ਕਿਹਾ ਗਿਆ, 'ਫਰੰਟੀਅਰ AI ਦੇ ਤੇਜ਼ੀ ਨਾਲ ਹੋ ਰਹੇ ਵਿਕਾਸ ਦਾ ਮਤਲਬ ਹੈ ਕਿ ਸਾਈਬਰ ਜੋਖ਼ਮ ਨਾਲ ਜੁੜੀਆਂ ਧਾਰਨਾਵਾਂ ਸਾਲਾਂ ਵਿਚ ਨਹੀਂ, ਸਗੋਂ ਮਹੀਨਿਆਂ ਵਿਚ ਹੀ ਪੁਰਾਣੀਆਂ ਪੈ ਸਕਦੀਆਂ ਹਨ। ਸਾਨੂੰ ਪਹਿਲਾਂ ਤੋਂ ਹੀ ਕਦਮ ਚੁੱਕਣੇ ਪੈਣਗੇ ਅਤੇ ਬਦਲਦੇ ਖਤਰਿਆਂ ਦੇ ਅਨੁਸਾਰ ਖੁਦ ਨੂੰ ਢਾਲਣ ਅਤੇ ਉਨ੍ਹਾਂ ਦਾ ਸਾਹਮਣਾ ਕਰਨ ਲਈ ਤਿਆਰ ਰਹਿਣਾ ਪਵੇਗਾ।'