ਸੈਕੰਡ ਹੈਂਡ ਕਾਰ ਲੈਣ ਤੋਂ ਪਹਿਲਾਂ ਚੈੱਕ ਕਰੋ 'Hypothecation ਪੇਪਰ', ਨਹੀਂ ਤਾਂ ਬੈਂਕ ਜ਼ਬਤ ਕਰ ਲਵੇਗਾ ਲੱਖਾਂ ਦੀ ਗੱਡੀ

ਆਟੋ ਡੈਸਕ, ਨਵੀਂ ਦਿੱਲੀ : ਜਦੋਂ ਤੁਸੀਂ ਇੱਕ ਸੈਕੰਡ ਹੈਂਡ ਕਾਰ ਖਰੀਦਣ ਜਾਂਦੇ ਹੋ ਤਾਂ ਤੁਸੀਂ ਉਸ ਦਾ ਲੁੱਕ, ਇੰਜਣ ਅਤੇ ਮਾਈਲੇਜ ਤਾਂ ਚੰਗੀ ਤਰ੍ਹਾਂ ਚੈੱਕ ਕਰਦੇ ਹੋ। ਪਰ ਇੱਕ ਸਭ ਤੋਂ ਜ਼ਰੂਰੀ ਚੀਜ਼ ਹੈ ਜਿਸ ਨੂੰ ਲੋਕ ਦੇਖਣਾ ਭੁੱਲ ਜਾਂਦੇ ਹਨ ਅਤੇ ਉਹ ਹੈ ਹਾਈਪੋਥੀਕੇਸ਼ਨ (Hypothecation)। ਜੇਕਰ ਤੁਸੀਂ ਬਿਨਾਂ ਚੈੱਕ ਕੀਤੇ ਅਜਿਹੀ ਕਾਰ ਖਰੀਦ ਲਈ ਹੈ ਜਿਸ 'ਤੇ ਪਹਿਲਾਂ ਤੋਂ ਬੈਂਕ ਦਾ ਲੋਨ ਚੱਲ ਰਿਹਾ ਹੈ ਤਾਂ ਤੁਸੀਂ ਮੁਸੀਬਤ ਵਿੱਚ ਫਸ ਸਕਦੇ ਹੋ। ਬੈਂਕ ਉਸ ਕਾਰ ਨੂੰ ਜ਼ਬਤ ਕਰ ਸਕਦਾ ਹੈ।

ਕੀ ਹੁੰਦਾ ਹੈ ਹਾਈਪੋਥੀਕੇਸ਼ਨ?

ਜਦੋਂ ਕੋਈ ਵੀ ਵਿਅਕਤੀ ਬੈਂਕ ਤੋਂ ਲੋਨ ਲੈ ਕੇ ਕਾਰ ਖਰੀਦਦਾ ਹੈ ਤਾਂ ਕਾਰ ਦਾ ਮਾਲਕਾਨਾ ਹੱਕ ਤਾਂ ਉਸ ਦਾ ਹੁੰਦਾ ਹੈ ਪਰ ਕਾਨੂੰਨੀ ਰੂਪ ਵਿੱਚ ਉਹ ਕਾਰ ਬੈਂਕ ਦੇ ਕੋਲ ਗਿਰਵੀ (Hypothecated) ਹੁੰਦੀ ਹੈ। ਕਾਰ ਦੀ RC 'ਤੇ ਸਾਫ਼-ਸਾਫ਼ ਲਿਖਿਆ ਹੁੰਦਾ ਹੈ ਕਿ ਕਾਰ ਕਿਸ ਬੈਂਕ ਦੇ ਕੋਲ ਹਾਈਪੋਥੀਕੇਟਿਡ ਹੈ। ਜਦੋਂ ਤੱਕ ਲੋਨ ਪੂਰਾ ਭਰ ਨਹੀਂ ਦਿੱਤਾ ਜਾਂਦਾ ਉਦੋਂ ਤੱਕ ਕਾਰ ਨੂੰ ਕਿਸੇ ਹੋਰ ਦੇ ਨਾਮ 'ਤੇ ਟ੍ਰਾਂਸਫਰ ਨਹੀਂ ਕੀਤਾ ਜਾ ਸਕਦਾ।

ਕਿਵੇਂ ਕਰੀਏ ਚੈੱਕ

ਇਸ ਦੇ ਲਈ ਸਭ ਤੋਂ ਪਹਿਲਾਂ mParivahan ਐਪ ਨੂੰ ਡਾਊਨਲੋਡ ਕਰੋ ਜਾਂ ਪਰਿਵਹਨ ਸੇਵਾ ਦੀ ਵੈੱਬਸਾਈਟ 'ਤੇ ਜਾਓ। ਉੱਥੇ RC Status ਜਾਂ Vehicle Details ਦੇ ਆਪਸ਼ਨ 'ਤੇ ਕਲਿੱਕ ਕਰੋ ਅਤੇ ਇਸ ਤੋਂ ਬਾਅਦ ਗੱਡੀ ਦਾ ਨੰਬਰ ਪਾ ਦਿਓ। ਹੇਠਾਂ ਸਕ੍ਰੋਲ ਕਰਕੇ ਦੇਖੋ ਕਿ ਉੱਥੇ Hypothecated to ਲਿਖਿਆ ਹੈ ਜਾਂ ਨਹੀਂ। ਜੇਕਰ ਉੱਥੇ ਕਿਸੇ ਬੈਂਕ ਦਾ ਨਾਮ ਲਿਖਿਆ ਹੈ ਤਾਂ ਇਸ ਦਾ ਮਤਲਬ ਹੈ ਕਿ ਕਾਰ ਲੋਨ 'ਤੇ ਲਈ ਗਈ ਸੀ।

ਓਰੀਜਨਲ RC ਚੈੱਕ ਕਰੋ

ਗੱਡੀ ਦੇ ਮਾਲਕ ਤੋਂ ਉਸ ਦੀ ਓਰੀਜਨਲ RC ਮੰਗੋ। RC ਦੇ ਉੱਪਰ ਜਾਂ ਹੇਠਾਂ ਧਿਆਨ ਨਾਲ ਦੇਖੋ ਕਿ ਉੱਥੇ HP ਜਾਂ Hypothecated to ਲਿਖਿਆ ਹੋਵੇਗਾ। ਜੇਕਰ ਚੈੱਕ ਕਰਨ 'ਤੇ ਪਤਾ ਚੱਲਦਾ ਹੈ ਕਿ ਕਾਰ 'ਤੇ ਲੋਨ ਹੈ ਤਾਂ ਮਾਲਕ ਤੋਂ NOC ਮੰਗੋ ਜੋ ਬੈਂਕ ਦਿੰਦਾ ਹੈ ਲੋਨ ਦੇ ਪੂਰਾ ਹੋਣ ਤੋਂ ਬਾਅਦ। ਇਸ NOC ਨੂੰ RTO ਵਿੱਚ ਜਮ੍ਹਾਂ ਕਰਵਾ ਕੇ RC ਤੋਂ ਬੈਂਕ ਦਾ ਨਾਮ ਹਟਵਾਉਣਾ ਪੈਂਦਾ ਹੈ ਜਿਸ ਨੂੰ Hypothecation Removal ਕਹਿੰਦੇ ਹਨ।

ਜੇਕਰ ਮਾਲਕ ਕੋਲ NOC ਨਹੀਂ ਹੈ ਜਾਂ RC ਤੋਂ ਬੈਂਕ ਦਾ ਨਾਮ ਨਹੀਂ ਹਟਿਆ ਹੈ ਤਾਂ ਉਦੋਂ ਤੱਕ ਡੀਲ ਫਾਈਨਲ ਨਾ ਕਰੋ ਜਦੋਂ ਤੱਕ ਉਹ ਲੋਨ ਕਲੀਅਰ ਨਾ ਕਰ ਦੇਵੇ।