ਮੇਸੀ ਦੀ ਦੀਵਾਨਗੀ: ਅਰਜਨਟੀਨਾ ਦੇ ਨੀਲੇ ਤੇ ਚਿੱਟੇ ਰੰਗ ’ਚ ਰੰਗਿਆ ਕੰਸਾਸ ਸਿਟੀ

ਸੌਰਵ ਰਾਏ, ਜਾਗਰਣ, ਕੰਸਾਸ ਸਿਟੀ : ਵਿਸ਼ਵ ਕੱਪ 2026 ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਇਸ ਨੂੰ ਸਭ ਤੋਂ ਮਹਿੰਗਾ ਤੇ ਆਲੀਸ਼ਾਨ ਵਿਸ਼ਵ ਕੱਪ ਕਿਹਾ ਜਾ ਰਿਹਾ ਸੀ ਪਰ ਨਿਊਯਾਰਕ ਪਹੁੰਚਣ ਤੋਂ ਬਾਅਦ ਟੂਰਨਾਮੈਂਟ ਦਾ ਮਾਹੌਲ ਲੋਕਾਂ ਦੀਆਂ ਉਮੀਦਾਂ ਤੋਂ ਵੱਖਰਾ ਸੀ। ਨਿਊ ਜਰਸੀ ’ਚ ਨਦੀ ਦੇ ਪਾਰ ਵਧੇਰੇ ਉਤਸ਼ਾਹ ਹੈ, ਜਿੱਥੇ ਵਿਸ਼ਵ ਕੱਪ ਨਾਲ ਸਬੰਧਤ ਬਹੁਤ ਸਾਰੀਆਂ ਗਤੀਵਿਧੀਆਂ ਚੱਲ ਰਹੀਆਂ ਹਨ। ਪੰਜ ਵਾਰ ਦੇ ਜੇਤੂ ਬ੍ਰਾਜ਼ੀਲ ਦਾ ਕੈਂਪ ਵੀ ਇੱਥੇ ਲੱਗਾ ਹੋਇਆ ਹੈ, ਜਦਕਿ ਪਿਛਲੀ ਵਾਰ ਦੇ ਜੇਤੂ ਅਰਜਨਟੀਨਾ ਨੇ ਇਸ ਟੂਰਨਾਮੈਂਟ ਲਈ ਕੰਸਾਸ ਨੂੰ ਆਪਣਾ ਘਰ ਬਣਾਇਆ ਹੈ। ਸ਼ਹਿਰ ਅਰਜਨਟੀਨਾ ਦੇ ਮਸ਼ਹੂਰ ਨੀਲੇ ਤੇ ਚਿੱਟੇ ਰੰਗਾਂ ’ਚ ਸਜਿਆ ਹੋਇਆ ਹੈ ਤੇ ਦੁਨੀਆ ਭਰ ਤੋਂ ਪ੍ਰਸ਼ੰਸਕ ਲਿਓਨ ਮੇਸੀ ਤੇ ਅਰਜਨਟੀਨਾ ਦਾ ਸਮਰਥਨ ਕਰਨ ਲਈ ਆ ਰਹੇ ਹਨ। ਅਰਜਨਟੀਨਾ ਵਿਸ਼ਵ ਕੱਪ 2026 ਲਈ ਆਪਣਾ ਸਫਰ ਬੁੱਧਵਾਰ ਸਵੇਰੇ ਭਾਰਤੀ ਸਮੇਂ ਅਨੁਸਾਰ ਸਵੇਰੇ 6:30 ਵਜੇ ਸ਼ੁਰੂ ਕਰੇਗਾ ਪਰ ਕੰਸਾਸ ਦੇ ਮਾਹੌਲ ਨੂੰ ਦੇਖ ਕੇ ਲੱਗਦਾ ਹੈ ਕਿ ਅਰਜਨਟੀਨਾ ਦੇ ਪ੍ਰਸ਼ੰਸਕਾਂ ਨੇ ਪਹਿਲਾਂ ਹੀ ਇਸ ਸ਼ਹਿਰ ’ਤੇ ਕਬਜ਼ਾ ਕਰ ਲਿਆ ਹੈ।

ਕਿਹਾ ਜਾਂਦਾ ਹੈ ਕਿ ਅਰਜਨਟੀਨਾ ਜਦੋਂ ਵੀ ਖੇਡਦਾ ਹੈ ਤਾਂ ਮੈਦਾਨ ’ਚ ਇੱਕ ਤਿਲ ਰੱਖਣ ਲਈ ਵੀ ਜਗ੍ਹਾ ਨਹੀਂ ਹੁੰਦੀ ਹੈ ਤੇ ਸ਼ਾਇਦ ਇਸੇ ਲਈ ਟੀਮ ਮੈਨੇਜਰ ਲਿਓਨ ਸਕਾਲੋਨੀ ਨੇ ਪਿਛਲੇ 2 ਦਿਨਾਂ ਤੋਂ ਟੀਮ ਦੇ ਅਭਿਆਸ ਸੈਸ਼ਨ ਨੂੰ ਪੂਰੀ ਤਰ੍ਹਾਂ ਬੰਦ ਦਰਵਾਜ਼ਿਆਂ ਪਿੱਛੇ ਰੱਖਿਆ ਹੈ। ਇੱਥੋਂ ਤੱਕ ਕਿ ਪੱਤਰਕਾਰਾਂ ਨੂੰ ਵੀ ਇੱਥੇ ਦਾਖਲ ਹੋਣ ਦੀ ਇਜਾਜ਼ਤ ਨਹੀਂ ਹੈ। ਹਾਲਾਂਕਿ ਜ਼ਿਆਦਾਤਰ ਦੇਸ਼ਾਂ ਦੇ ਅਭਿਆਸ ਸੈਸ਼ਨ ਸਾਰਿਆਂ ਲਈ ਖੁੱਲ੍ਹੇ ਹਨ ਪਰ ਖਿਤਾਬ ਦਾ ਬਚਾਅ ਕਰਨ ਜਾ ਰਹੇ ਅਰਜਨਟੀਨਾ ਨੇ ਸਾਰਿਆਂ ਦੀਆਂ ਨਜ਼ਰਾਂ ਤੋਂ ਦੂਰ ਰਹਿ ਕੇ ਚੁੱਪਚਾਪ ਅਭਿਆਸ ਕਰਨਾ ਚੁਣਿਆ ਹੈ। ਖ਼ਬਰਾਂ ਤੋਂ ਪਤਾ ਲੱਗਦਾ ਹੈ ਕਿ ਅਰਜਨਟੀਨਾ ਦੀ ਟੀਮ ਸਕਾਰਾਤਮਕਤਾ ਨਾਲ ਭਰੀ ਹੋਈ ਹੈ। ਹਾਲ ਹੀ ’ਚ ਸਾਹਮਣੇ ਆਈ ਇੱਕ ਵੀਡੀਓ ’ਚ ਅਰਜਨਟੀਨਾ ਦੇ ਖਿਡਾਰੀ ਆਪਣੇ ਕੈਂਪ ’ਚ ਇਕੱਠੇ ਬੈਠ ਕੇ ਜਰਮਨੀ ਦਾ ਮੈਚ ਦੇਖ ਰਹੇ ਸਨ। ਵੀਡੀਓ ’ਚ ਲਿਓਨ ਮੇਸੀ ਸਭ ਤੋਂ ਖੁਸ਼ ਨਜ਼ਰ ਆ ਰਹੇ ਸਨ।

ਸੰਭਵ ਤੌਰ ’ਤੇ ਆਪਣਾ ਅੰਤਿਮ ਵਿਸ਼ਵ ਕੱਪ ’ਚ ਖੇਡ ਰਹੇ ਹਨ ਮੇਸੀ ਬਿਨਾਂ ਕਿਸੇ ਦਬਾਅ ਦੇ ਖੇਡਣਾ ਚਾਹੁੰਦੇ ਹਨ। ਅਰਜਨਟੀਨਾ ਦੇ ਨਾਲ-ਨਾਲ ਇੰਗਲੈਂਡ ਦੀ ਟੀਮ ਵੀ ਕੰਸਾਸ 'ਚ ਹੈ। ਅਰਜਨਟੀਨਾ ਦੇ ਉਲਟ ਉਨ੍ਹਾਂ ਦੇ ਅਭਿਆਸ ਸੈਸ਼ਨ ਹਰ ਕਿਸੇ ਲਈ ਖੁੱਲ੍ਹੇ ਹਨ। ਇਸ ਟੀਮ ਦੇ ਅਨੁਭਵੀ ਤੇ ਨੌਜਵਾਨ ਖਿਡਾਰੀਆਂ ਦੀ ਚੰਗੀ ਫੋਰਸ ਹੈ, ਜੇਕਰ ਉਹ ਕੁਆਟਰ ਫਾਈਨਲ ’ਚ ਬ੍ਰਾਜ਼ੀਲ ਦੇ ਸਾਹਮਣੇ ਨਾ ਆਉਣ ਤਾਂ ਇਸ ਵਾਰ ਇੰਗਲੈਡ ਫਾਈਨਲ ਵੀ ਖੇਡ ਸਕਦਾ ਹੈ।