FIFA World Cup 2026 'ਚ ਸਿਰਫ਼ ਗੋਲ ਨਹੀਂ, ਜਰਸੀਆਂ ਵੀ ਬਰਸਾਉਣਗੀਆਂ ਪੈਸਾ; 15 ਕਰੋੜ ਤੱਕ ਵਿਕਰੀ ਦਾ ਅਨੁਮਾਨ

ਸਪੋਰਟਸ ਡੈਸਕ, ਨਵੀਂ ਦਿੱਲੀ: ਫੀਫਾ ਵਰਲਡ ਕੱਪ 2026 ( FIFA World Cup 2026) ਦਾ ਆਗਾਜ਼ ਰੋਮਾਂਚਕ ਤਰੀਕੇ ਨਾਲ ਹੋ ਚੁੱਕਾ ਹੈ। ਮੈਦਾਨ ਵਿੱਚ ਖਿਡਾਰੀਆਂ ਦੇ ਪੈਰਾਂ 'ਚੋਂ ਨਿਕਲ ਰਹੀ ਗੇਂਦ ਜਦੋਂ ਗੋਲਪੋਸਟ ਵਿੱਚ ਜਾ ਰਹੀ ਹੈ, ਤਾਂ ਸਟੈਂਡਸ (ਸਟੇਡੀਅਮ) ਵਿੱਚ ਬੈਠੇ ਪ੍ਰਸ਼ੰਸਕਾਂ ਦਾ ਸ਼ੋਰ ਪੂਰੇ ਸਟੇਡੀਅਮ ਵਿੱਚ ਗੂੰਜ ਰਿਹਾ ਹੈ। ਪਰ ਇਸ ਵਿਸ਼ਵ ਕੱਪ ਦੀ ਇੱਕ ਹੋਰ ਕਹਾਣੀ ਹੈ, ਜੋ ਮੈਦਾਨ ਤੋਂ ਬਾਹਰ ਲਿਖੀ ਜਾ ਰਹੀ ਹੈ। ਇਹ ਕਹਾਣੀ ਹੈ ਫੁੱਟਬਾਲ ਖਿਡਾਰੀਆਂ ਦੀਆਂ ਜਰਸੀਆਂ ਦੀ, ਜਿਨ੍ਹਾਂ ਰਾਹੀਂ ਪ੍ਰਸ਼ੰਸਕ ਦੁਨੀਆ ਦੇ ਸਾਹਮਣੇ ਆਪਣੀ ਮਨਪਸੰਦ ਟੀਮ ਨੂੰ ਸਪੋਰਟ ਕਰਦੇ ਨਜ਼ਰ ਆ ਰਹੇ ਹਨ।

ਫੁੱਟਬਾਲ ਦੀ ਜਰਸੀ (Football jerseys) ਹੁਣ ਸਿਰਫ਼ ਟੀਮ ਜਾਂ ਖੇਡ ਤੱਕ ਸੀਮਤ ਨਹੀਂ ਰਹਿ ਗਈ ਹੈ, ਬਲਕਿ ਇੱਕ ਨਵੇਂ ਮੁਕਾਮ 'ਤੇ ਪਹੁੰਚ ਗਈ ਹੈ, ਜਿੱਥੇ ਇਹ ਪਛਾਣ, ਫੈਸ਼ਨ ਅਤੇ ਭਾਵਨਾਵਾਂ ਦਾ ਪ੍ਰਤੀਕ ਬਣ ਚੁੱਕੀ ਹੈ। ਇਹੀ ਕਾਰਨ ਹੈ ਕਿ ਫੀਫਾ ਵਿਸ਼ਵ ਕੱਪ ਦੇ ਨਾਲ ਜਰਸੀ ਦਾ ਕਾਰੋਬਾਰ ਵੀ ਰਿਕਾਰਡ ਪੱਧਰ 'ਤੇ ਪਹੁੰਚ ਜਾਂਦਾ ਹੈ।

ਇੰਟਰਨੈਸ਼ਨਲ ਰਿਸਰਚ ਏਜੰਸੀਆਂ 'ਵੇਰੀਫਾਈਡ ਮਾਰਕੀਟ ਰਿਪੋਰਟਸ' ਅਤੇ 'ਬਿਜ਼ਨੈੱਸ ਰਿਸਰਚ' ਅਨੁਸਾਰ, 2026 ਵਿੱਚ ਫੁੱਟਬਾਲ ਜਰਸੀ ਦਾ ਵਿਸ਼ਵਵਿਆਪੀ ਕਾਰੋਬਾਰ ਲਗਭਗ 82 ਹਜ਼ਾਰ 600 ਕਰੋੜ ਰੁਪਏ ਤੱਕ ਪਹੁੰਚ ਸਕਦਾ ਹੈ। ਖੇਡਾਂ ਦੀ ਦੁਨੀਆ ਵਿੱਚ ਇਹ ਕਿਸੇ ਇੱਕ ਸਪੋਰਟਸਵੀਅਰ ਕੈਟੇਗਰੀ (Sportswear Category) ਲਈ ਸਭ ਤੋਂ ਵੱਡਾ ਬਾਜ਼ਾਰ ਮੰਨਿਆ ਜਾ ਰਿਹਾ ਹੈ।

ਫੀਫਾ ਵਰਲਡ ਕੱਪ ਦੌਰਾਨ ਜਰਸੀ ਦੀ ਵਿਕਰੀ 15 ਕਰੋੜ ਦੇ ਪਾਰ?

ਦਰਅਸਲ, ਫੀਫਾ ਦੇ ਅੰਕੜੇ ਦੱਸਦੇ ਹਨ ਕਿ ਫੁੱਟਬਾਲ ਜਰਸੀਆਂ ਜੋ ਹਮੇਸ਼ਾ ਵਿਕਦੀਆਂ ਹਨ, ਉਨ੍ਹਾਂ ਦਾ ਲਗਭਗ 55 ਫੀਸਦੀ ਹਿੱਸਾ ਕੇਵਲ ਵਿਸ਼ਵ ਕੱਪ ਦੇ ਦਿਨਾਂ ਦੌਰਾਨ ਹੀ ਵਿਕਦਾ ਹੈ। ਵਜ੍ਹਾ ਵੀ ਸਾਫ਼ ਹੈ, ਜਦੋਂ ਕੋਈ ਟੂਰਨਾਮੈਂਟ ਅਰਬਾਂ ਲੋਕਾਂ ਦਾ ਧਿਆਨ ਆਪਣੇ ਵੱਲ ਖਿੱਚਦਾ ਹੈ, ਤਾਂ ਪ੍ਰਸ਼ੰਸਕ ਆਪਣੀ ਪਸੰਦੀਦਾ ਟੀਮ ਨੂੰ ਸਪੋਰਟ ਕਰਨ ਲਈ ਉਨ੍ਹਾਂ ਦੀ ਜਰਸੀ ਖਰੀਦਦੇ ਹਨ।

ਅਰਜਨਟੀਨਾ ਦੀ ਨੀਲੀ-ਚਿੱਟੀ ਜਰਸੀ, ਬ੍ਰਾਜ਼ੀਲ ਦੀ ਪੀਲੇ ਰੰਗ ਦੀ ਜਰਸੀ, ਫਰਾਂਸ ਦੀ ਨੀਲੀ ਕਿੱਟ ਜਾਂ ਪੁਰਤਗਾਲ ਦੀ ਲਾਲ ਰੰਗ ਦੀ ਜਰਸੀ; ਹਰ ਜਰਸੀ ਆਪਣੇ ਨਾਲ ਇੱਕ ਕਹਾਣੀ ਅਤੇ ਵੱਖਰੀ ਪਛਾਣ ਲੈ ਕੇ ਚੱਲਦੀ ਹੈ। ਦੱਸ ਦੇਈਏ ਕਿ ਇਸ ਵਾਰ ਫੀਫਾ ਵਿਸ਼ਵ ਕੱਪ ਦੇ ਇਤਿਹਾਸ ਵਿੱਚ ਪਹਿਲੀ ਵਾਰ 48 ਟੀਮਾਂ ਵਰਲਡ ਕੱਪ ਖੇਡ ਰਹੀਆਂ ਹਨ ਅਤੇ ਮੈਚਾਂ ਦੀ ਸੰਖਿਆ 104 ਤੱਕ ਪਹੁੰਚ ਗਈ ਹੈ। ਇਸ ਨਾਲ ਜਰਸੀਆਂ ਦੀ ਮੰਗ ਵੀ ਬਹੁਤ ਵੱਧ ਗਈ ਹੈ।

ਤਿੰਨ ਵੱਡੀਆਂ ਸਪੋਰਟਸਵੀਅਰ ਕੰਪਨੀਆਂ ਵਿਚਕਾਰ ਮੁਕਾਬਲਾ

ਫੀਫਾ ਵਰਲਡ ਕੱਪ (FIFA World Cup) ਸਿਰਫ਼ ਟੀਮਾਂ ਵਿਚਕਾਰ ਮੁਕਾਬਲਾ ਨਹੀਂ ਹੈ। ਮੈਦਾਨ ਦੇ ਬਾਹਰ ਖੇਡ ਜਰਸੀਆਂ ਬਣਾਉਣ ਵਾਲੀਆਂ ਕੰਪਨੀਆਂ ਵਿਚਕਾਰ ਵੀ ਵੱਡੀ ਜੰਗ ਚੱਲ ਰਹੀ ਹੈ। ਟੂਰਨਾਮੈਂਟ ਵਿੱਚ ਹਿੱਸਾ ਲੈਣ ਵਾਲੀਆਂ 48 ਟੀਮਾਂ ਵਿੱਚੋਂ 37 ਟੀਮਾਂ ਦੀਆਂ ਅਧਿਕਾਰਤ (Official) ਜਰਸੀਆਂ ਨਾਇਕੀ (Nike), ਐਡੀਦਾਸ (Adidas) ਅਤੇ ਪਿਊਮਾ (Puma) ਨੇ ਤਿਆਰ ਕੀਤੀਆਂ ਹਨ। ਯਾਨੀ ਲਗਭਗ 77 ਫੀਸਦੀ ਟੀਮਾਂ ਇਨ੍ਹਾਂ ਤਿੰਨਾਂ ਬ੍ਰਾਂਡਾਂ ਦੀ ਕਿੱਟ ਪਹਿਨ ਕੇ ਮੈਦਾਨ ਵਿੱਚ ਉਤਰ ਰਹੀਆਂ ਹਨ। ਜਰਸੀਆਂ ਅਤੇ ਬਾਕੀ ਮਰਚੈਂਡਾਈਜ਼ ਦੀ ਵਿਕਰੀ ਤੋਂ ਇਨ੍ਹਾਂ ਕੰਪਨੀਆਂ ਨੂੰ ਅਰਬਾਂ ਡਾਲਰ ਦੀ ਕਮਾਈ ਹੋਣ ਦੀ ਉਮੀਦ ਹੈ।

ਜਰਸੀਆਂ ਨੂੰ ਲੈ ਕੇ ਦੁਨੀਆ ਦੀਆਂ ਇਨ੍ਹਾਂ ਤਿੰਨ ਵੱਡੀਆਂ ਕੰਪਨੀਆਂ ਵਿਚਾਲੇ ਜ਼ਬਰਦਸਤ ਟੱਕਰ ਜਾਰੀ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਇਸ ਟੂਰਨਾਮੈਂਟ ਦੌਰਾਨ ਦੁਨੀਆ ਭਰ ਵਿੱਚ 13 ਤੋਂ 15 ਕਰੋੜ ਜਰਸੀਆਂ ਵਿਕ ਸਕਦੀਆਂ ਹਨ।

ਦੱਸ ਦੇਈਏ ਕਿ ਫੁੱਟਬਾਲ ਮਰਚੈਂਡਾਈਜ਼ ਦਾ ਸਭ ਤੋਂ ਵੱਡਾ ਬਾਜ਼ਾਰ ਅਜੇ ਯੂਰਪ ਅਤੇ ਉੱਤਰੀ ਅਮਰੀਕਾ ਹੈ, ਪਰ ਸਭ ਤੋਂ ਤੇਜ਼ ਰਫ਼ਤਾਰ ਏਸ਼ੀਆ ਵਿੱਚ ਦੇਖਣ ਨੂੰ ਮਿਲ ਰਹੀ ਹੈ। ਭਾਰਤ ਵਿੱਚ ਡਿਜੀਟਲ ਸਟ੍ਰੀਮਿੰਗ ਅਤੇ ਕਲੱਬ ਫੁੱਟਬਾਲ ਦੀ ਵਧਦੀ ਲੋਕਪ੍ਰਿਯਤਾ ਨੇ ਮੈਸੀ, ਰੋਨਾਲਡੋ, ਐਮਬਾਪੇ ਵਰਗੇ ਖਿਡਾਰੀਆਂ ਦੀਆਂ ਜਰਸੀਆਂ ਨੂੰ ਬੇਹੱਦ ਮਕਬੂਲ (ਪ੍ਰਸਿੱਧ) ਬਣਾ ਦਿੱਤਾ ਹੈ।

ਕੁਝ ਮਾਹਿਰਾਂ ਦਾ ਮੰਨਣਾ ਹੈ ਕਿ ਵਰਲਡ ਕੱਪ ਦੌਰਾਨ ਵਿਕਣ ਵਾਲੀ ਹਰ ਤੀਜੀ ਜਰਸੀ ਵਿੱਚੋਂ ਇੱਕ ਜਰਸੀ ਨਕਲੀ (Fake) ਹੋ ਸਕਦੀ ਹੈ। ਕੁੱਲ 13 ਤੋਂ 15 ਕਰੋੜ ਦੀ ਸੰਭਾਵਿਤ ਵਿਕਰੀ ਵਿੱਚੋਂ ਲਗਭਗ 5 ਤੋਂ 5.5 ਕਰੋੜ ਜਰਸੀਆਂ ਨਕਲੀ ਹੋ ਸਕਦੀਆਂ ਹਨ। ਇਸ ਦੀ ਵੱਡੀ ਵਜ੍ਹਾ ਅਧਿਕਾਰਤ ਜਰਸੀਆਂ ਦੀਆਂ ਉੱਚੀਆਂ ਕੀਮਤਾਂ ਹਨ, ਜਦੋਂ ਕਿ ਨਕਲੀ ਜਰਸੀਆਂ ਲੋਕਲ ਬਾਜ਼ਾਰਾਂ ਜਾਂ ਆਨਲਾਈਨ ਪਲੇਟਫਾਰਮਾਂ 'ਤੇ ਬਹੁਤ ਸਸਤੇ ਦਾਮਾਂ 'ਤੇ ਆਸਾਨੀ ਨਾਲ ਮਿਲ ਜਾਂਦੀਆਂ ਹਨ।