FIFA World Cup 2026: ਅਲਜੀਰੀਆ ਨੇ ਇਤਿਹਾਸ ਰਚਿਆ, ਜਾਰਡਨ ਨੂੰ 2-1 ਨਾਲ ਹਰਾ ਕੇ 12 ਸਾਲਾਂ ਬਾਅਦ ਦਰਜ ਕੀਤੀ ਪਹਿਲੀ ਜਿੱਤ

ਜਾਗਰਣ ਨਿਊਜ਼ ਨੈੱਟਵਰਕ, ਨਵੀਂ ਦਿੱਲੀ: ਪਹਿਲੇ ਹਾਫ ’ਚ ਪਿੱਛੇ ਰਹਿ ਰਹੇ ਅਲਜੀਰੀਆ ਨੇ ਦੂਜੇ ਹਾਫ ’ਚ ਕਾਰਨਰਾਂ ਤੋਂ ਦੋ ਗੋਲ ਕਰ ਕੇ ਜਾਰਡਨ ਨੂੰ 2-1 ਨਾਲ ਹਰਾਇਆ। ਇਹ 2026 ਫੀਫਾ ਵਿਸ਼ਵ ਕੱਪ ’ਚ ਟੀਮ ਦੀ ਪਹਿਲੀ ਜਿੱਤ ਸੀ, ਨਾਲ ਹੀ 2014 ਤੋਂ ਬਾਅਦ ਫੀਫਾ ਵਿਸ਼ਵ ਕੱਪ ’ਚ ਉਨ੍ਹਾਂ ਦੀ ਪਹਿਲੀ ਜਿੱਤ ਸੀ। ਟੀਮ ਲਈ ਨਾਦਿਰ ਬੇਨਬੋਅਲੀ ਤੇ ਅਮੀਨ ਗੁਇਰੀ ਨੇ ਗੋਲ ਕੀਤੇ।

ਅਰਜਨਟੀਨਾ ਖਿਲਾਫ਼ 3-0 ਦੀ ਹਾਰ ਤੋਂ ਬਾਅਦ ਜਾਰਡਨ ਦਾ ਸਾਹਮਣਾ ਕਰ ਰਹੇ ਅਲਜੀਰੀਆ ਦਾ ਮੈਚ ਜਿੱਤਣ ਦੀ ਸੰਭਾਵਨਾ ਘੱਟ ਜਾਪਦੀ ਸੀ। ਨਿਜ਼ਾਰ ਅਲ ਰਾਸ਼ਦਾਨ ਨੇ 36ਵੇਂ ਮਿੰਟ ’ਚ ਜਾਰਡਨ ਨੂੰ ਲੀਡ ਦਿਵਾਈ। ਇਹ ਅਗੇਤ 68ਵੇਂ ਮਿੰਟ ਤੱਕ ਰਹੀ, ਪਰ ਅਲਜੀਰੀਆ ਨੇ 69ਵੇਂ ਮਿੰਟ ’ਚ ਬਰਾਬਰੀ ਕਰ ਲਈ ਜਦੋਂ ਬਦਲਵੇਂ ਖਿਡਾਰੀ ਬੇਨਬੋਅਲੀ ਨੇ ਇੱਕ ਕਾਰਨਰ ਤੋਂ ਸ਼ਾਨਦਾਰ ਹੈਡਰ ਨਾਲ ਗੋਲ ਕਰ ਕੇ ਸਕੋਰ 1-1 ਕਰ ਦਿੱਤਾ। ਸਟਾਰ ਵਿੰਗਰ ਰਿਆਦ ਮਹਰੇਜ਼ ਨੇ ਇਸ ਗੋਲ ’ਚ ਉਸ ਦੀ ਸਹਾਇਤਾ ਕੀਤੀ। ਪਹਿਲੇ ਹਾਫ ’ਚ ਪਿੱਛੇ ਰਹਿਣ ਤੋਂ ਬਾਅਦ ਜਾਰਡਨ ਨੇ ਕਦੇ ਵੀ ਫੀਫਾ ਵਿਸ਼ਵ ਕੱਪ ਨਹੀਂ ਜਿੱਤਿਆ ਸੀ। ਉਨ੍ਹਾਂ ਨੂੰ ਇਤਿਹਾਸ ਬਦਲਣ ਲਈ ਅਜੇ ਵੀ ਇੱਕ ਗੋਲ ਦੀ ਲੋੜ ਸੀ। ਇਹ ਗੋਲ ਸਟ੍ਰਾਈਕਰ ਗੁਇਰੀ ਨੇ ਕੀਤਾ, ਜਿਸ ਨੇ ਇੱਕ ਕਾਰਨਰ ਤੋਂ ਬਾਅਦ ਬਾਕਸ ਦੇ ਅੰਦਰ ਹਫੜਾ-ਦਫੜੀ ਦਾ ਫਾਇਦਾ ਉਠਾਇਆ ਤੇ ਗੇਂਦ ਨੂੰ ਗੋਲ ’ਚ ਪਾ ਦਿੱਤਾ। ਇਸ ਦੇ ਨਾਲ ਅਲਜੀਰੀਆ ਨੇ ਪਹਿਲੇ ਹਾਫ ਵਿੱਚ ਪਿੱਛੇ ਰਹਿਣ ਤੋਂ ਬਾਅਦ ਪਹਿਲੀ ਵਾਰ ਫੀਫਾ ਵਿਸ਼ਵ ਕੱਪ ਮੈਚ ਜਿੱਤਿਆ। ਇਸ ਤੋਂ ਪਹਿਲਾਂ ਉਹ ਸੱਤ ਅਜਿਹੇ ਮੈਚ ਹਾਰ ਚੁੱਕੇ ਸਨ ਅਤੇ ਦੋ ਵਾਰ ਮੈਚ ਡਰਾਅ ’ਚ ਖਤਮ ਹੋਏ ਸਨ। ਜੇਕਰ ਅਲਜੀਰੀਆ ਹੁਣ ਆਪਣੇ ਆਖਰੀ ਮੈਚ ’ਚ ਆਸਟਰੀਆ ਨੂੰ ਹਰਾ ਦਿੰਦਾ ਹੈ, ਤਾਂ ਉਹ ਦੂਜੇ ਸਥਾਨ ’ਤੇ ਰਹਿ ਕੇ ਆਖਰੀ 32 ’ਚ ਪਹੁੰਚ ਸਕਦਾ ਹੈ।