ਇਸ ਪਿੰਡ 'ਚ ਨਵਜੰਮੇ ਬੱਚਿਆਂ ਦੇ ਉੱਪਰੋਂ ਛਾਲ ਮਾਰਦਾ ਹੈ ਸ਼ੈਤਾਨ, 400 ਸਾਲਾਂ ਤੋਂ ਚੱਲੀ ਆ ਰਹੀ ਹੈ ਇਹ ਪਰੰਪਰਾ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਹਰ ਪੇਰੈਂਟ ਚਾਹੁੰਦਾ ਹੈ ਕਿ ਉਨ੍ਹਾਂ ਦੇ ਬੱਚੇ ਸੁਰੱਖਿਅਤ ਰਹਿਣ ਅਤੇ ਉਨ੍ਹਾਂ ਦੀ ਜ਼ਿੰਦਗੀ ਵਿਚ ਕੋਈ ਪਰੇਸ਼ਾਨੀ ਨਾ ਆਵੇ, ਪਰ ਕੀ ਤੁਸੀਂ ਕਦੇ ਸੁਣਿਆ ਹੈ ਕਿ ਬੱਚਿਆਂ ਨੂੰ ਬੁਰੀਆਂ ਤਾਕਤਾਂ ਤੋਂ ਬਚਾਉਣ ਲਈ ਕੋਈ ਉਨ੍ਹਾਂ ਦੇ ਉੱਪਰੋਂ ਛਾਲ ਮਾਰ ਦੇਵੇ? ਜੀ ਹਾਂ, ਸਪੇਨ ਦੇ ਇਕ ਛੋਟੇ ਜਿਹੇ ਪਿੰਡ ਕਾਸਤ੍ਰੀਲੋ ਦੇ ਮੁਰਸੀਆ ਵਿਚ ਹਰ ਸਾਲ ਇਕ ਅਜਿਹਾ ਹੀ ਹੈਰਾਨ ਕਰ ਦੇਣ ਵਾਲਾ ਉਤਸਵ ਮਨਾਇਆ ਜਾਂਦਾ ਹੈ, ਜਿਸ ਨੂੰ 'ਐਲ ਕੋਲਾਚੋ' ਉਤਸਵ ਕਿਹਾ ਜਾਂਦਾ ਹੈ।

ਇਹ ਅਨੋਖੀ ਪਰੰਪਰਾ ਲਗਪਗ 400 ਸਾਲ ਪੁਰਾਣੀ ਹੈ ਜਿਸ ਵਿਚ ਡੇਅਰਡੇਵਿਲ ਬੱਚਿਆਂ ਦੇ ਉੱਪਰੋਂ ਛਾਲ ਮਾਰਦਾ ਹੈ। ਇਸ ਹੈਰਾਨ ਕਰਨ ਵਾਲੇ ਉਤਸਵ ਨੂੰ ਦੇਖਣ ਲਈ ਦੂਰ-ਦੂਰ ਤੋਂ ਲੋਕ ਆਉਂਦੇ ਹਨ। ਆਓ ਜਾਣੀਏ ਆਖਿਰ ਕਿਉਂ ਮਨਾਈ ਜਾਂਦੀ ਹੈ ਇਹ ਪਰੰਪਰਾ ਅਤੇ ਪੇਰੈਂਟਸ ਆਪਣੇ ਨਵਜੰਮੇ ਬੱਚਿਆਂ ਦੇ ਉੱਪਰੋਂ ਕਿਸੇ ਨੂੰ ਕੁੱਦਣ ਕਿਉਂ ਦਿੰਦੇ ਹਨ?

ਕੀ ਹੈ ਐਲ ਕੋਲਾਚੋ ਉਤਸਵ?

ਇਸ ਬੇਹੱਦ ਖਾਸ ਤੇ ਪਾਰੰਪਰਿਕ ਉਤਸਵ ਨੂੰ ਐਲ ਕੋਲਾਚੋ ਦੇ ਨਾਮ ਨਾਲ ਜਾਣਿਆ ਜਾਂਦਾ ਹੈ। ਇਸ ਤਿਉਹਾਰ ਦੌਰਾਨ ਪਿੰਡ ਦੀ ਸੜਕ 'ਤੇ ਗੱਦੇ ਵਿਛਾਏ ਜਾਂਦੇ ਹਨ ਤੇ ਉਨ੍ਹਾਂ 'ਤੇ ਨਵਜੰਮੇ ਬੱਚਿਆਂ ਨੂੰ ਲਿਟਾਇਆ ਜਾਂਦਾ ਹੈ। ਇਸ ਤੋਂ ਬਾਅਦ ਸ਼ੈਤਾਨ ਦਾ ਪ੍ਰਤੀਕ ਬਣੇ 'ਐਲ ਕੋਲਾਚੋ' ਦੀ ਪੋਸ਼ਾਕ ਪਹਿਨੇ ਹੋਏ ਵਿਅਕਤੀ ਇਨ੍ਹਾਂ ਮਾਸੂਮ ਬੱਚਿਆਂ ਦੇ ਉੱਪਰੋਂ ਬੜੀ ਤੇਜ਼ੀ ਨਾਲ ਛਾਲਾਂ ਮਾਰਦੇ ਹਨ।

17ਵੀਂ ਸਦੀ ਤੋਂ ਚੱਲੀ ਆ ਰਹੀ ਹੈ ਇਹ ਮਾਨਤਾ

ਇਹ ਅਜੀਬੋ-ਗਰੀਬ ਪਰੰਪਰਾ 17ਵੀਂ ਸਦੀ ਤੋਂ ਲਗਾਤਾਰ ਚੱਲੀ ਆ ਰਹੀ ਹੈ। ਸਥਾਨਕ ਲੋਕ ਮਾਨਤਾ ਅਨੁਸਾਰ, ਜਦੋਂ ਇਹ ਸ਼ੈਤਾਨ ਬੱਚਿਆਂ ਦੇ ਉੱਪਰੋਂ ਕੁੱਦਦਾ ਹੈ ਤਾਂ ਅਜਿਹਾ ਕਰਨ ਨਾਲ ਬੱਚਿਆਂ ਦੇ ਸਾਰੇ ਪਾਪ ਧੁਲ ਜਾਂਦੇ ਹਨ। ਇੰਨਾ ਹੀ ਨਹੀਂ, ਇਹ ਵੀ ਮੰਨਿਆ ਜਾਂਦਾ ਹੈ ਕਿ ਇਸ ਛਾਲ ਨਾਲ ਬੱਚਿਆਂ 'ਤੇ ਮੰਡਰਾਉਣ ਵਾਲੀਆਂ ਬੁਰੀਆਂ ਸ਼ਕਤੀਆਂ ਅਤੇ ਉਨ੍ਹਾਂ ਦੀ ਬਦਕਿਸਮਤੀ ਹਮੇਸ਼ਾ ਲਈ ਦੂਰ ਹੋ ਜਾਂਦੀ ਹੈ।

ਫੁੱਲਾਂ ਦੀ ਵਰਖਾ ਨਾਲ ਸੁਰੱਖਿਆ ਦੀ ਕਾਮਨਾ

ਇਸ ਤਿਉਹਾਰ ਦਾ ਮਾਹੌਲ ਬੇਹੱਦ ਰੰਗ-ਬਿਰੰਗਾ ਤੇ ਪਾਰੰਪਰਿਕ ਹੁੰਦਾ ਹੈ। ਉਤਸਵ ਦੌਰਾਨ ਲੋਕ ਖਾਸ ਤਰ੍ਹਾਂ ਦੀ ਰੰਗੀਨ ਪੋਸ਼ਾਕ ਪਹਿਨਦੇ ਹਨ ਅਤੇ ਚਿਹਰੇ 'ਤੇ ਮੁਖੌਟਾ ਲਗਾ ਕੇ ਇੱਕ ਸ਼ਾਨਦਾਰ ਜਲੂਸ ਕੱਢਦੇ ਹਨ। ਜਦੋਂ ਐਲ ਕੋਲਾਚੋ ਬੱਚਿਆਂ ਦੇ ਉੱਪਰੋਂ ਸੁਰੱਖਿਅਤ ਰੂਪ 'ਚ ਛਾਲ ਮਾਰ ਲੈਂਦਾ ਹੈ ਤਾਂ ਉਸ ਤੋਂ ਤੁਰੰਤ ਬਾਅਦ ਇਨ੍ਹਾਂ ਨਵਜੰਮੇ ਬੱਚਿਆਂ 'ਤੇ ਫੁੱਲਾਂ ਦੀਆਂ ਪੰਖੜੀਆਂ ਬਰਸਾਈਆਂ ਜਾਂਦੀਆਂ ਹਨ। ਫੁੱਲਾਂ ਦੀ ਇਸ ਵਰਖਾ ਦੇ ਨਾਲ ਹੀ ਸਾਰੇ ਲੋਕ ਮਿਲ ਕੇ ਉਨ੍ਹਾਂ ਬੱਚਿਆਂ ਦੇ ਸੁੱਖ-ਸਮ੍ਰਿੱਧੀ ਅਤੇ ਸੁਰੱਖਿਅਤ ਜੀਵਨ ਦੀ ਕਾਮਨਾ ਕਰਦੇ ਹਨ।