ਸਫ਼ਲ ਵਿਆਹੁਤਾ ਜੀਵਨ ਦਾ ਰਾਜ਼: ਗਰੁੜ ਪੁਰਾਣ ਮੁਤਾਬਕ ਇੰਝ ਕਰੋ ਸਹੀ ਜੀਵਨਸਾਥੀ ਦੀ ਪਛਾਣ, ਪਰਿਵਾਰ ਰਹੇਗਾ ਖ਼ੁਸ਼ਹਾਲ

ਧਰਮ ਡੈਸਕ, ਨਵੀਂ ਦਿੱਲੀ : ਸਨਾਤਨ ਧਰਮ 'ਚ ਗਰੁੜ ਪੁਰਾਣ ਇਕ ਮਹੱਤਵਪੂਰਨ ਗ੍ਰੰਥ ਹੈ। ਇਸ ਵਿਚ ਸੁਖੀ ਵਿਆਹੁਤਾ ਜੀਵਨ ਲਈ ਕਈ ਖ਼ਾਸ ਗੱਲਾਂ ਦਾ ਵਰਣਨ ਕੀਤਾ ਗਿਆ ਹੈ। ਅਜਿਹਾ ਮੰਨਿਆ ਜਾਂਦਾ ਹੈ ਕਿ ਜੀਵਨਸਾਥੀ ਦੀ ਚੋਣ ਕਰਦੇ ਸਮੇਂ ਗਰੁੜ ਪੁਰਾਣ ਦੀਆਂ ਗੱਲਾਂ ਨੂੰ ਧਿਆਨ ਵਿੱਚ ਰੱਖਣ ਨਾਲ ਪਰਿਵਾਰ ਇੱਕਜੁੱਟ ਅਤੇ ਖ਼ੁਸ਼ਹਾਲ ਰਹਿੰਦਾ ਹੈ। ਵਿਆਹੁਤਾ ਜੀਵਨ ਹਮੇਸ਼ਾ ਖ਼ੁਸ਼ਹਾਲ ਰਹਿੰਦਾ ਹੈ। ਜੇਕਰ ਤੁਸੀਂ ਵੀ ਖ਼ੁਸ਼ਹਾਲ ਵਿਆਹੁਤਾ ਜੀਵਨ ਚਾਹੁੰਦੇ ਹੋ ਤਾਂ ਜੀਵਨਸਾਥੀ ਦੀ ਚੋਣ ਕਰਦੇ ਸਮੇਂ ਇਸ ਲੇਖ 'ਚ ਦੱਸੀਆਂ ਗਈਆਂ ਗੱਲਾਂ ਦਾ ਧਿਆਨ ਰੱਖੋ।

ਸੰਸਕਾਰ ਤੇ ਉੱਤਮ ਆਚਰਣ

ਗਰੁੜ ਪੁਰਾਣ ਅਨੁਸਾਰ, ਵਿਅਕਤੀ ਦੇ ਸੰਸਕਾਰ ਤੇ ਉੱਤਮ ਆਚਰਣ ਨੂੰ ਵਿਆਹੁਤਾ ਜੀਵਨ ਨੂੰ ਖ਼ੁਸ਼ਹਾਲ ਬਣਾਈ ਰੱਖਣ ਲਈ ਮਹੱਤਵਪੂਰਨ ਮੰਨਿਆ ਜਾਂਦਾ ਹੈ। ਜੋ ਵਿਅਕਤੀ ਆਪਣੇ ਧਰਮ ਤੇ ਵੱਡਿਆਂ ਦਾ ਸਤਿਕਾਰ ਕਰਦਾ ਹੈ, ਉਹ ਵਿਆਹੁਤਾ ਜੀਵਨ ਨੂੰ ਸੁਖੀ ਬਣਾਉਂਦਾ ਹੈ। ਇਸ ਨਾਲ ਪੂਰਾ ਪਰਿਵਾਰ ਇੱਕਜੁੱਟ ਰਹਿੰਦਾ ਹੈ।

ਗੁੱਸੇ 'ਤੇ ਕਾਬੂ ਤੇ ਸੰਜਮ

ਜੋ ਵਿਅਕਤੀ ਛੋਟੀਆਂ-ਛੋਟੀਆਂ ਗੱਲਾਂ 'ਤੇ ਗੁੱਸੇ ਹੋ ਜਾਂਦਾ ਹੈ ਅਤੇ ਗੱਲਬਾਤ ਦੌਰਾਨ ਕੁਝ ਕੌੜੇ ਬੋਲ ਬੋਲ ਦਿੰਦਾ ਹੈ, ਉਹ ਕਦੇ ਵੀ ਵਿਆਹੁਤਾ ਜੀਵਨ ਨੂੰ ਖ਼ੁਸ਼ਹਾਲ ਨਹੀਂ ਬਣਾ ਸਕਦਾ। ਇਸ ਦੇ ਲਈ ਜੀਵਨਸਾਥੀ ਨੂੰ ਹਮੇਸ਼ਾ ਗੁੱਸੇ 'ਤੇ ਕਾਬੂ ਅਤੇ ਸੰਜਮ ਰੱਖਣਾ ਚਾਹੀਦਾ ਹੈ। ਗਰੁੜ ਪੁਰਾਣ 'ਚ ਦੱਸਿਆ ਗਿਆ ਹੈ ਕਿ ਸ਼ਾਂਤ ਸੁਭਾਅ ਅਤੇ ਸੰਜਮ ਵਾਲਾ ਵਿਅਕਤੀ ਇਕ ਆਦਰਸ਼ ਜੀਵਨਸਾਥੀ ਬਣਦਾ ਹੈ।

ਸਰੀਰਕ ਅਤੇ ਮਾਨਸਿਕ ਸਿਹਤ

ਇਸ ਤੋਂ ਇਲਾਵਾ ਸੁਖੀ ਵਿਆਹੁਤਾ ਜੀਵਨ ਬਣਾਉਣ ਲਈ ਇਕ ਤੰਦਰੁਸਤ ਸਰੀਰ ਅਤੇ ਸਿਹਤਮੰਦ ਦਿਮਾਗ ਦਾ ਹੋਣਾ ਬੇਹੱਦ ਜ਼ਰੂਰੀ ਹੈ। ਅਜਿਹਾ ਮੰਨਿਆ ਜਾਂਦਾ ਹੈ ਕਿ ਕਿਸੇ ਬਿਮਾਰੀ ਤੋਂ ਪੀੜਤ ਵਿਅਕਤੀ ਵਿਆਹੁਤਾ ਜੀਵਨ ਨੂੰ ਖ਼ੁਸ਼ਹਾਲ ਬਣਾਉਣ 'ਚ ਅਸਫ਼ਲ ਹੁੰਦਾ ਹੈ। ਇਸ ਲਈ ਜੀਵਨਸਾਥੀ ਦੀ ਚੋਣ ਕਰਦੇ ਸਮੇਂ ਪਾਰਟਨਰ ਦੀ ਸਰੀਰਕ ਤੇ ਮਾਨਸਿਕ ਸਿਹਤ ਬਾਰੇ ਜ਼ਰੂਰ ਜਾਣਕਾਰੀ ਪ੍ਰਾਪਤ ਕਰੋ। ਇਸ ਨਾਲ ਜੀਵਨ ਤੇ ਆਉਣ ਵਾਲੀ ਪੀੜ੍ਹੀ ਵੀ ਸੁਰੱਖਿਅਤ ਰਹੇਗੀ।

ਸਮਝਦਾਰੀ ਅਤੇ ਵਿਚਾਰਾਂ 'ਚ ਸਮਾਨਤਾ

ਜਿਸ ਵਿਅਕਤੀ 'ਚ ਸਮਝਦਾਰੀ ਦੀ ਕਮੀ ਹੁੰਦੀ ਹੈ, ਅਜਿਹੇ ਵਿਅਕਤੀ ਨੂੰ ਆਪਣਾ ਜੀਵਨਸਾਥੀ ਨਹੀਂ ਬਣਾਉਣਾ ਚਾਹੀਦਾ। ਪਾਰਟਨਰ ਅਜਿਹਾ ਹੋਣਾ ਚਾਹੀਦਾ ਹੈ, ਜੋ ਜ਼ਿੰਦਗੀ ਵਿਚ ਕਿਸੇ ਮੁਸ਼ਕਲ ਦੌਰਾਨ ਸਮਝਦਾਰੀ ਨਾਲ ਤੁਹਾਡਾ ਸਾਥ ਦੇਵੇ। ਨਾਲ ਹੀ ਉਸ ਦੇ ਵਿਚਾਰ ਤੁਹਾਡੇ ਨਾਲ ਮੇਲ ਖਾਂਦੇ ਹੋਣ। ਅਜਿਹਾ ਵਿਅਕਤੀ ਇਕ ਸਫ਼ਲ ਵਿਆਹੁਤਾ ਜੀਵਨ ਬਣਾ ਸਕਦਾ ਹੈ।

ਮਿੱਠੀ ਬੋਲੀ

ਗਰੁੜ ਪੁਰਾਣ ਅਨੁਸਾਰ, ਮਿੱਠੀ ਬੋਲੀ ਵਾਲੇ ਲੋਕ ਹੀ ਇਕ ਸੁਖੀ ਗ੍ਰਹਿਸਥੀ ਦਾ ਨਿਰਮਾਣ ਕਰ ਸਕਦੇ ਹਨ, ਜਿਸ ਦੀ ਬਾਣੀ 'ਚ ਮਿਠਾਸ ਹੁੰਦੀ ਹੈ, ਉਹੀ ਲੋਕ ਸੁਖੀ ਵਿਆਹੁਤਾ ਜੀਵਨ ਬਣਾਉਂਦੇ ਹਨ। ਕੌੜਾ ਤੇ ਅਪਸ਼ਬਦ ਬੋਲਣ ਵਾਲਾ ਵਿਅਕਤੀ ਘਰ ਦੀ ਸ਼ਾਂਤੀ ਭੰਗ ਕਰ ਸਕਦਾ ਹੈ।

ਗਰੁੜ ਪੁਰਾਣ ਵਿੱਚ ਮਿਲਦਾ ਹੈ ਵਰਣਨ

ਗਰੁੜ ਪੁਰਾਣ ਵਿੱਚ ਵਿਆਹ ਅਤੇ ਜੀਵਨਸਾਥੀ ਦੇ ਗੁਣਾਂ ਦਾ ਵਰਣਨ ਗਰੁੜ ਪੁਰਾਣ ਦੇ ਪਹਿਲੇ ਭਾਗ ਵਿੱਚ 'ਨੀਤੀਸਾਰ' ਵਿੱਚ ਮਿਲਦਾ ਹੈ।