ਹਰ ਹਰ ਮਹਾਦੇਵ: 30 ਜੁਲਾਈ ਤੋਂ ਸ਼ੁਰੂ ਹੋਵੇਗਾ ਸਾਵਣ ਦਾ ਪਵਿੱਤਰ ਮਹੀਨਾ, ਹੁਣੇ ਨੋਟ ਕਰ ਲਓ ਵਰਤਾਂ ਦੀਆਂ ਸਾਰੀਆਂ ਜ਼ਰੂਰੀ ਤਰੀਕਾਂ

ਧਰਮ ਡੈਸਕ, ਨਵੀਂ ਦਿੱਲੀ : ਹਿੰਦੂ ਧਰਮ 'ਚ ਸਾਵਣ ਦੇ ਮਹੀਨੇ ਦਾ ਖ਼ਾਸ ਮਹੱਤਵ ਹੁੰਦਾ ਹੈ। ਭਗਵਾਨ ਸ਼ਿਵ ਨੂੰ ਸਮਰਪਿਤ ਇਸ ਮਹੀਨੇ ਦੌਰਾਨ ਚਾਰੇ ਪਾਸੇ ਸ਼ਿਵ ਮੰਦਰਾਂ ਤੋਂ ਆਉਂਦੀਆਂ ਘੰਟੀਆਂ ਦੀ ਗੂੰਜ ਅਤੇ 'ਹਰ ਹਰ ਮਹਾਦੇਵ' ਦੇ ਜੈਕਾਰੇ ਸੁਣਾਈ ਦਿੰਦੇ ਹਨ। ਹਿੰਦੂ ਕੈਲੰਡਰ ਦੇ ਇਸ ਮਹੀਨੇ ਦੀ ਗੱਲ ਸਭ ਤੋਂ ਵੱਖਰੀ ਹੁੰਦੀ ਹੈ।

ਇਹ ਉਹ ਮੌਕਾ ਹੁੰਦਾ ਹੈ, ਜਦੋਂ ਕੁਦਰਤ ਹਰਿਆਲੀ ਦੀ ਖੂਬਸੂਰਤ ਚਾਦਰ ਓਢਦੀ ਹੈ ਅਤੇ ਆਸਥਾ ਤੇ ਭਗਤੀ ਦਾ ਸਭ ਤੋਂ ਪਵਿੱਤਰ ਮਹੀਨਾ ਆਉਂਦਾ ਹੈ। ਇਹ ਮਹੀਨਾ ਭਗਵਾਨ ਸ਼ਿਵ ਨੂੰ ਸਭ ਤੋਂ ਵੱਧ ਪਿਆਰਾ ਹੈ। ਇਸ ਪੂਰੇ ਮਹੀਨੇ ਭਗਤ ਆਪਣੇ ਆਰਾਧਿਆ ਨੂੰ ਪ੍ਰਸੰਨ ਕਰਨ ਲਈ ਖ਼ਾਸ ਪੂਜਾ-ਅਰਚਨਾ ਕਰਦੇ ਹਨ, ਕਾਂਵੜ ਯਾਤਰਾ ਕੱਢਦੇ ਹਨ ਅਤੇ ਘਰ ਵਿੱਚ ਸੁਖ-ਸ਼ਾਂਤੀ ਲਈ ਰੁਦਰਾਭਿਸ਼ੇਕ ਕਰਦੇ ਹਨ। ਆਓ ਅੱਜ ਇਸ ਆਰਟੀਕਲ 'ਚ ਤੁਹਾਨੂੰ ਦੱਸਦੇ ਹਾਂ ਕਦੋਂ ਤੋਂ ਸ਼ੁਰੂ ਹੋਵੇਗਾ ਸਾਵਣ ਦਾ ਪਵਿੱਤਰ ਮਹੀਨਾ-

ਕਦੋਂ ਤੋਂ ਸ਼ੁਰੂ ਹੋਵੇਗਾ ਸਾਵਣ ਦਾ ਮਹੀਨਾ?

ਇਸ ਸਾਲ ਸਾਵਣ ਦੇ ਮਹੀਨੇ ਦੀ ਸ਼ੁਰੂਆਤ ਬਹੁਤ ਹੀ ਸ਼ੁਭ ਸੰਯੋਗ ਦੇ ਨਾਲ ਹੋ ਰਹੀ ਹੈ। ਪੰਚਾਂਗ ਅਨੁਸਾਰ, ਸਾਵਣ ਮਹੀਨੇ ਦੇ ਕ੍ਰਿਸ਼ਨ ਪੱਖ ਦੀ ਪ੍ਰਤੀਪਦਾ ਤਾਰੀਖ਼ 29 ਜੁਲਾਈ ਦੀ ਰਾਤ 8:05 ਵਜੇ ਸ਼ੁਰੂ ਹੋ ਜਾਵੇਗੀ ਪਰ ਉਦੈਤਿਥੀ ਦੇ ਮਹੱਤਵ ਨੂੰ ਦੇਖਦੇ ਹੋਏ ਇਹ ਪਵਿੱਤਰ ਮਹੀਨਾ ਵੀਰਵਾਰ, 30 ਜੁਲਾਈ ਤੋਂ ਸ਼ੁਰੂ ਮੰਨਿਆ ਜਾਵੇਗਾ।

ਉੱਥੇ ਹੀ, ਇਸ ਦੀ ਸਮਾਪਤੀ 28 ਅਗਸਤ ਨੂੰ ਸਾਵਣ ਪੂਰਨਮਾਸ਼ੀ ਦੇ ਨਾਲ ਹੋਵੇਗੀ। ਸਭ ਤੋਂ ਚੰਗੀ ਗੱਲ ਇਹ ਹੈ ਕਿ ਇਸ ਵਾਰ ਸਾਵਣ ਦੀ ਸ਼ੁਰੂਆਤ 'ਆਯੁਸ਼ਮਾਨ ਯੋਗ' 'ਚ ਹੋ ਰਹੀ ਹੈ। ਮਾਨਤਾ ਹੈ ਕਿ ਇਸ ਖ਼ਾਸ ਯੋਗ ਵਿਚ ਕੀਤੀ ਗਈ ਪੂਜਾ ਨਾਲ ਇਨਸਾਨ ਨੂੰ ਵਧੀਆ ਸਿਹਤ ਅਤੇ ਲੰਬੀ ਉਮਰ ਦਾ ਵਰਦਾਨ ਮਿਲਦਾ ਹੈ।

ਇਸ ਮਹੀਨੇ ਆਉਣਗੇ ਕਈ ਵੱਡੇ ਵਰਤ-ਤਿਉਹਾਰ

ਸਾਵਣ ਦੇ ਮਹੀਨੇ ਆਉਣ ਵਾਲੇ ਹਰ ਸੋਮਵਾਰ ਦਾ ਖ਼ਾਸ ਮਹੱਤਵ ਹੁੰਦਾ ਹੈ। ਇਸ ਦੌਰਾਨ ਲੋਕ ਸਾਵਣ ਸੋਮਵਾਰ ਦਾ ਵਰਤ ਰੱਖਦੇ ਹਨ ਤੇ ਭੋਲੇਨਾਥ ਦੀ ਪੂਰੀ ਕਿਰਪਾ ਪਾਉਣ ਲਈ ਪੂਜਾ-ਅਰਚਨਾ ਕਰਦੇ ਹਨ। ਇਸ ਤੋਂ ਇਲਾਵਾ ਕੁਝ ਲੋਕ ਸਾਵਣ ਸੋਮਵਾਰ ਤੋਂ ਹੀ 'ਸੋਲ਼ਾਂ ਸੋਮਵਾਰ' ਦੇ ਵਰਤ ਵੀ ਸ਼ੁਰੂ ਕਰਦੇ ਹਨ।

ਸੋਮਵਾਰ ਤੋਂ ਇਲਾਵਾ ਸਾਵਣ ਦੇ ਹਰ ਮੰਗਲਵਾਰ ਨੂੰ ਮਾਤਾ ਪਾਰਵਤੀ ਨੂੰ ਸਮਰਪਿਤ 'ਮੰਗਲਾ ਗੌਰੀ' ਦਾ ਵਰਤ ਰੱਖਿਆ ਜਾਂਦਾ ਹੈ। ਇਹ ਵਰਤ ਸੁਹਾਗ ਅਤੇ ਘਰ 'ਚ ਸੁੱਖ-ਸਮ੍ਰਿੱਧੀ ਲਈ ਬੇਹੱਦ ਸ਼ੁੱਭ ਮੰਨਿਆ ਜਾਂਦਾ ਹੈ।

ਕਦੋਂ-ਕਦੋਂ ਹੋਣਗੇ ਸੋਮਵਾਰ

ਪਹਿਲਾ ਸੋਮਵਾਰ: 3 ਅਗਸਤ

ਦੂਜਾ ਸੋਮਵਾਰ: 10 ਅਗਸਤ

ਤੀਜਾ ਸੋਮਵਾਰ: 17 ਅਗਸਤ

ਚੌਥਾ ਸੋਮਵਾਰ: 24 ਅਗਸਤ

ਮੰਗਲਾ ਗੌਰੀ ਵਰਤ ਦੀਆਂ ਤਰੀਕਾਂ

ਮੰਗਲਾ ਗੌਰੀ ਵਰਤ: 4 ਅਗਸਤ

ਮੰਗਲਾ ਗੌਰੀ ਵਰਤ: 11 ਅਗਸਤ

ਮੰਗਲਾ ਗੌਰੀ ਵਰਤ: 18 ਅਗਸਤ

ਮੰਗਲਾ ਗੌਰੀ ਵਰਤ: 25 ਅਗਸਤ

ਕਿਵੇਂ ਕਰੀਏ ਭੋਲੇਨਾਥ ਦੀ ਪੂਜਾ?

• ਸਾਵਣ ਦੇ ਸੋਮਵਾਰ ਨੂੰ ਸਵੇਰੇ ਜਲਦੀ ਉੱਠ ਕੇ ਨਹਾ ਲਓ ਤੇ ਸਾਫ਼ ਕੱਪੜੇ ਪਹਿਨੋ।
• ਇਸ ਤੋਂ ਬਾਅਦ ਨੇੜੇ ਦੇ ਸ਼ਿਵ ਮੰਦਰ ਜਾਓ। ਸਭ ਤੋਂ ਪਹਿਲਾਂ ਸ਼ਿਵਲਿੰਗ 'ਤੇ ਗੰਗਾਜਲ ਚੜ੍ਹਾਓ।
• ਫਿਰ ਦੁੱਧ, ਦਹੀਂ, ਘਿਓ, ਸ਼ਹਿਦ ਤੇ ਗੰਨੇ ਦੇ ਰਸ ਤੋਂ ਬਣਿਆ 'ਪੰਚਾਮ੍ਰਿਤ' ਅਰਪਿਤ ਕਰੋ।
• ਭੋਲੇਨਾਥ ਨੂੰ ਚਿੱਟਾ ਚੰਦਨ ਲਗਾਓ ਤੇ ਚਿੱਟੇ ਫੁੱਲ, ਭੰਗ, ਧਤੂਰਾ ਅਤੇ ਫਲ ਚੜ੍ਹਾਓ।
• ਸ਼ਿਵ ਜੀ ਦੇ ਨਾਲ ਪੂਰੇ ਸ਼ਿਵ ਪਰਿਵਾਰ ਦੀ ਵੀ ਪੂਜਾ ਕਰੋ।
• ਅਖੀਰ 'ਚ ਆਰਤੀ ਕਰੋ ਅਤੇ ਸੱਚੇ ਮਨ ਨਾਲ "ॐ नमः शिवाय" ਜਾਂ "श्री शिवाय नमस्तुभ्यं" ਮੰਤਰ ਦਾ ਜਾਪ ਕਰੋ।