ਬਰਨਾਲੇ ’ਚ ਦੋ ਨਿਆਣੇ ਘਰੋਂ ਗਾਇਬ

-- ਦੋਸਤ ਦੇ ਘਰੇ ਖੇਡਣ ਗਏ ਦੋਵੇਂ ਜਵਾਕ ਨੀ ਲੱਭੇ -- ਸੀਸੀਟੀਵੀ ’ਚ ਕੈਦ ਹੋਈਆਂ ਜਵਾਕਾਂ ਦੀਆਂ ਫੋਟੋਆਂ, ਬਰਨਾਲਾ ਪੁਲਿਸ ਭਾਲ ’ਚ ਜੁਟੀ ਯਾਦਵਿੰਦਰ ਸਿੰਘ ਭੁੱਲਰ, ਪੰਜਾਬੀ ਜਾਗਰਣ, ਬਰਨਾਲਾ : ਬਰਨਾਲੇ ਸ਼ਹਿਰ ਤੋਂ ਇੱਕ ਚਿੰਤਾ ਵਾਲੀ ਖ਼ਬਰ ਨਿਕਲ ਕੇ ਸਾਹਮਣੇ ਆਈ ਹੈ। ਸ਼ਹਿਰ ਦੇ ਦੋ ਨਿੱਕੇ-ਨਿੱਕੇ ਜਵਾਕ ਕੱਲ੍ਹ ਆਥਣ ਤੋਂ ਐਸੇ ਗਾਇਬ ਹੋਏ ਨੇ ਕਿ ਕੋਈ ਪਤਾ ਨਹੀਂ ਲੱਗ ਰਿਹਾ। ਘਟਨਾ ਤੋਂ ਬਾਅਦ ਦੋਵਾਂ ਘਰਾਂ ’ਚ ਚੀਕ-ਚਿਹਾੜਾ ਮਚਿਆ ਹੋਇਐ, ਮਾਵਾਂ ਦਾ ਰੋ-ਰੋ ਕੇ ਬੁਰਾ ਹਾਲ ਹੈ। ਉੱਧਰ ਥਾਣਾ ਸਿਟੀ-2 ਦੀ ਪੁਲਿਸ ਵੀ ਜਵਾਕਾਂ ਨੂੰ ਲੱਭਣ ਵਾਸਤੇ ਪੂਰੀ ਵਾਹ ਲਾ ਰਹੀ ਹੈ ਤੇ ਨੱਠ-ਭੱਜ ਕਰ ਰਹੀ ਹੈ। ਪੁਲਿਸ ਨੇ ਰੇਲਵੇ ਸਟੇਸ਼ਨ, ਬੱਸ ਅੱਡਾ ਤੇ ਸ਼ਹਿਰ ਦੀਆਂ ਹੋਰ ਕਈ ਥਾਵਾਂ ਚੰਗੀ ਤਰ੍ਹਾਂ ਫੋਲ ਮਾਰੀਆਂ ਹਨ। ਇਹਦੇ ਨਾਲ ਹੀ ਆਲੇ-ਦੁਆਲੇ ਲੱਗੇ ਸੀਸੀਟੀਵੀ ਦੀਆਂ ਫੁਟੇਜਾਂ ਵੀ ਚੈੱਕ ਕੀਤੀਆਂ ਜਾ ਰਹੀਆਂ ਨੇ। ਥਾਣਾ ਸਿਟੀ ਦੋ ਦੇ ਮੁਖੀ ਚਰਨਜੀਤ ਸਿੰਘ ਨੇ ਦੱਸਿਆ ਕਿ ਕੁਝ ਕੈਮਰਿਆਂ ’ਚ ਜਵਾਕ ਜਾਂਦੇ ਦਿਸੇ ਨੇ, ਤੇ ਹੁਣ ਉਸੇ ਪੈੜ ਨੱਪਦੇ ਹੋਏ ਜਾਂਚ ਅੱਗੇ ਵਧਾਈ ਜਾ ਰਹੀ ਹੈ। ਸਕੂਲ ਦਾ ਕੋਈ ਕੰਮ ਕਰਨ ਵਾਸਤੇ ਦੋਸਤ ਦੇ ਘਰ ਗਿਆ ਸੀ : ਮਾਂ ਮੈਂ ਤਾਂ ਭਾਈ ਦਿਹਾੜੀ-ਦੱਪੇ (ਕੰਮ) ’ਤੇ ਗਈ ਹੋਈ ਸੀ। ਮੇਰੇ ਮੁੰਡੇ ਨੇ ਕਿਹਾ ਸੀ ਕਿ ਉਹ ਸਕੂਲ ਦਾ ਕੋਈ ਕੰਮ ਕਰਨ ਵਾਸਤੇ ਉਹਦੇ ਦੋਸਤ ਦੇ ਘਰੇ ਜਾਊਗਾ। ਜਦੋਂ ਮੈਂ ਮੁੜ ਕੇ ਆਈ ਤਾਂ ਛੋਟੇ ਜਵਾਕ ਤੋਂ ਪਤਾ ਲੱਗਿਆ ਕਿ ਕ੍ਰਿਸ਼ਨ ਤਾਂ ਘਰੇ ਹੈ ਹੀ ਨਹੀਂ। ਟੱਬਰ ਨੇ ਪਹਿਲਾਂ ਤਾਂ ਆਪਣੇ ਪੱਧਰ ’ਤੇ ਆਲੇ-ਦੁਆਲੇ ਸਾਰੇ ਕਿਤੇ ਭਾਲ ਕੀਤੀ, ਪਰ ਜਦੋਂ ਕੋਈ ਉੱਘ-ਸੁੱਘ ਨਾ ਮਿਲੀ ਤਾਂ ਉਨ੍ਹਾਂ ਨੇ ਤੁਰੰਤ ਥਾਣੇ ਇਤਲਾਹ ਦਿੱਤੀ। ਉੱਧਰ ਦੂਜੇ ਜਵਾਕ ਦੇ ਮਾਮੇ ਤੇ ਨਾਨੀ ਨੇ ਦੱਸਿਆ ਕਿ ਉਨ੍ਹਾਂ ਦਾ ਮੁੰਡਾ ਆਪਣੇ ਦੋਸਤ ਕ੍ਰਿਸ਼ਨ ਦੇ ਘਰੇ ਖੇਡਣ ਜਾਣ ਦਾ ਕਹਿਕੇ ਨਿਕਲਿਆ ਸੀ। ਬਾਅਦ ’ਚ ਪਤਾ ਲੱਗਿਆ ਕਿ ਦੋਵੇਂ ਦੇ ਦੋਵੇਂ ਹੀ ਗਾਇਬ ਨੇ। ਟੱਬਰ ਦਾ ਕਹਿਣਾ ਹੈ ਕਿ ਕ੍ਰਿਸ਼ਨ ਦੇ ਬਾਪੂ ਨੇ ਦੋਵਾਂ ਜਵਾਕਾਂ ਨੂੰ ਕਿਸੇ ਗੱਲੋਂ ਘੂਰਿਆ ਵੀ ਸੀ, ਹੋ ਸਕਦਾ ਐ ਜਵਾਕ ਡਰਦੇ ਮਾਰੇ ਹੀ ਕਿਤੇ ਵਗ ਗਏ ਹੋਣ। ਵਾਰਡ-12 ਦੇ ਕੌਂਸਲਰ ਜਸਪ੍ਰੀਤ ਸਿੰਘ ਨੇ ਦੱਸਿਆ ਕਿ ਦੋਵੇਂ ਪਰਿਵਾਰ ਬਾਹਰਲੇ ਸੂਬੇ ਤੋਂ ਪ੍ਰਵਾਸੀ ਨੇ ਤੇ ਜਵਾਕਾਂ ਦੀ ਆਪਸ ’ਚ ਪੱਕੀ ਯਾਰੀ ਸੀ। ਉਨ੍ਹਾਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਜੇ ਕਿਸੇ ਨੂੰ ਜਵਾਕਾਂ ਬਾਰੇ ਕੋਈ ਵੀ ਪਤਾ ਲੱਗੇ ਤਾਂ ਤੁਰੰਤ ਪੁਲਿਸ ਨੂੰ ਦੱਸੇ। ਪੁਲਿਸ ਦੀਆਂ ਟੀਮਾਂ ਭਾਲ ’ਚ ਲਗੀਆਂ : ਐੱਸਐੱਚਓ ਇਸ ਮਾਮਲੇ ’ਤੇ ਥਾਣਾ ਸਿਟੀ-2 ਦੇ ਐੱਸਐੱਚਓ ਸਬ ਇੰਸਪੈਕਟਰ ਚਰਨਜੀਤ ਸਿੰਘ ਨੇ ਦੱਸਿਆ ਕਿ ਜਿਵੇਂ ਹੀ ਖ਼ਬਰ ਮਿਲੀ, ਪੁਲਿਸ ਦੀਆਂ ਵੱਖ-ਵੱਖ ਟੀਮਾਂ ਭਾਲ ’ਚ ਲਾ ਦਿੱਤੀਆਂ ਸਨ। ਸਾਰੀ ਰਾਤ ਕਈ ਥਾਵਾਂ ’ਤੇ ਛਾਪੇਮਾਰੀ ਕੀਤੀ ਹੈ ਤੇ ਹੁਣ ਸੀਸੀਟੀਵੀ ਦੇ ਆਧਾਰ ’ਤੇ ਜਾਂਚ ਹੋਰ ਤੇਜ਼ ਕਰ ਦਿੱਤੀ ਹੈ। ਉਨ੍ਹਾਂ ਪੱਕਾ ਭਰੋਸਾ ਦਿਵਾਇਆ ਕਿ ਜਵਾਕਾਂ ਨੂੰ ਜਲਦੀ ਤੋਂ ਜਲਦੀ ਸਹੀ-ਸਲਾਮਤ ਲੱਭ ਕੇ ਮਾਪਿਆਂ ਦੇ ਹਵਾਲੇ ਕਰ ਦਿੱਤਾ ਜਾਵੇਗਾ। ਹੁਣ ਪੁਲਿਸ ਪੂਰੀ ਤਰ੍ਹਾਂ ਤਫਤੀਸ਼ ’ਚ ਜੁਟੀ ਹੋਈ ਹੈ ਤੇ ਸਾਰੇ ਲੋਕ ਰੱਬ ਅੱਗੇ ਅਰਦਾਸਾਂ ਕਰ ਰਹੇ ਨੇ ਬਈ ਦੋਵੇਂ ਮਾਸੂਮ ਬੱਚੇ ਰਾਜ਼ੀ-ਖੁਸ਼ੀ ਆਪਣੇ ਘਰਾਂ ਨੂੰ ਮੁੜ ਆਉਣ।