ਪੰਜਾਬੀ ਯੂਨੀਵਰਸਿਟੀ ’ਚ ਵੱਡਾ ਪ੍ਰੀਖਿਆ ਘੁਟਾਲਾ: ਰੀ-ਇਵੈਲਿਊਏਸ਼ਨ ਦੌਰਾਨ ਬਦਲੀਆਂ ਜਾ ਰਹੀਆਂ ਸਨ ਉੱਤਰ-ਪੱਤਰੀਆਂ, ਵੱਡੇ ਰੈਕਟ ਦਾ ਖ਼ਦਸ਼ਾ

ਜਾਂਚ ਦੌਰਾਨ ਇਹ ਸਾਹਮਣੇ ਆਇਆ ਕਿ ਪੇਪਰਾਂ ਵਿੱਚ ਵਿਦਿਆਰਥੀਆਂ ਨੇ ਰੀ-ਇਵੈਲੂਏਸ਼ਨ ਲਈ ਅਪਲਾਈ ਕੀਤਾ ਸੀ। ਜਦੋਂ ਅਸਲ ਉੱਤਰ-ਕਾਪੀਆਂ ਦੀ ਪੜਤਾਲ ਕੀਤੀ ਗਈ ਤਾਂ ਪਤਾ ਲੱਗਿਆ ਕਿ ਵਿਦਿਆਰਥੀਆਂ ਦੀਆਂ ਅਸਲ ਕਾਪੀਆਂ ਦੇ ਅੰਦਰਲੇ ਪੰਨੇ ਕਿਸੇ ਹੋਰ ਉੱਤਰ-ਕਾਪੀ ਜਿਸ ਦਾ ਰੋਲ ਨੰਬਰ,ਕਾਪੀ ਨੰਬਰ ਵੱਖਰਾ ਸੀ, ਨਾਲ ਅਦਲਾ-ਬਦਲੀ ਕੀਤੇ ਗਏ ਸਨ। ਇੱਕ ਮਾਮਲੇ ਵਿੱਚ ਵਿਦਿਆਰਥੀ ਨੂੰ ਪਹਿਲੇ ਪੇਜ 'ਤੇ ਪੀਖਿਅਕ ਵੱਲੋਂ ਸਿਰਫ਼ 10 ਨੰਬਰ ਦਿੱਤੇ ਗਏ ਸਨ, ਜਦਕਿ ਜਦੋਂ ਅੰਦਰਲੇ ਪੰਨਿਆਂ ਦਾ ਜੋੜ ਚੈੱਕ ਕੀਤਾ ਗਿਆ ਤਾਂ ਉਹ 50 ਫੀਸਦ ਤੋਂ ਵੱਧ ਬਣਦੇ ਸੀ। ਇਸੇ ਤਰ੍ਹਾਂ ਦੂਜੇ ਪੇਪਰਾਂ ਵਿੱਚ ਵੀ ਅੰਦਰਲੇ ਪੰਨਿਆਂ 'ਤੇ 80 ਫੀਸਦ ਤੋਂ ਵੱਧ ਨੰਬਰ ਬਣਦੇ ਸਨ, ਜਦਕਿ ਬਾਹਰਲੇ ਪੇਜ 'ਤੇ ਸਿਰਫ਼ 02 ਤੋਂ 04 ਨੰਬਰ ਹੀ ਦਰਸਾਏ ਗਏ ਸਨ। ਇਸ ਤੋਂ ਸਾਫ਼ ਸਿੱਧ ਹੁੰਦਾ ਹੈ ਕਿ ਹੋਰਨਾਂ ਹੁਸ਼ਿਆਰ ਬੱਚਿਆਂ ਦੀਆਂ ਕਾਪੀਆਂ ਦੇ ਪੰਨੇ ਪਾੜ ਕੇ ਇਨ੍ਹਾਂ ਵਿਦਿਆਰਥੀਆਂ ਦੀਆਂ ਕਾਪੀਆਂ ਵਿੱਚ ਲਗਾਏ ਗਏ ਤਾਂ ਜੋ ਰੀ-ਇਵੈਲੂਏਸ਼ਨ ਦੌਰਾਨ ਇਨ੍ਹਾਂ ਦੇ ਨੰਬਰ ਆਸਾਨੀ ਨਾਲ ਵਧਾਏ ਜਾ ਸਕਣ।