- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਪਠਾਨਕੋਟ ਦੀ ਲੀਚੀ ਹੁਣ ਦੇਸ਼-ਵਿਦੇਸ਼ਾਂ 'ਚ ਮਚਾਏਗੀ ਧੂਮ; ਸੁਪਰਪਲਮ ਸਟਾਰਟਅੱਪ ਦੀ ਆਧੁਨਿਕ ਤਕਨੀਕ ਨਾਲ ਕਿਸਾਨਾਂ ਨੂੰ ਮਿਲ ਰਿਹਾ ਚੋਖਾ ਮੁਨਾਫ਼ਾ
ਪਠਾਨਕੋਟ ਦੇ ਲੀਚੀ ਉਤਪਾਦਕ ਕਿਸਾਨ ਸਟਾਰਟਅੱਪ ਸੁਪਰਪਲਮ ਨਾਲ ਜੁੜ ਕੇ ਵਧੀਆ ਮੁਨਾਫ਼ਾ ਕਮਾ ਰਹੇ ਹਨ। ਕੰਪਨੀ ਕਿਸਾਨਾਂ ਤੋਂ ਸਿੱਧੇ ਬਾਗਾਂ ਵਿੱਚੋਂ ਲੀਚੀ ਖਰੀਦ ਕੇ ਵਿਚੋਲਿਆਂ ਦੀ ਭੂਮਿਕਾ ਖਤਮ ਕਰ ਰਹੀ ਹੈ, ਜਿਸ ਨਾਲ ਕਿਸਾਨਾਂ ਨੂੰ ਗੁਣਵੱਤਾ ਅਨੁਸਾਰ ਚੰਗਾ ਮੁੱਲ ਮਿਲ ਰਿਹਾ ਹੈ। ਹੁਣ ਤੱਕ ਜ਼ਿਲ੍ਹੇ ਦੇ 100 ਤੋਂ ਵੱਧ ਕਿਸਾਨ ਇਸ ਪਹਿਲ ਦਾ ਲਾਭ ਲੈ ਚੁੱਕੇ ਹਨ।
Posted By Sunita
Publish Date: Fri, 26 Jun 2026 03:52 PM (IST)
Updated Date: Fri, 26 Jun 2026 03:55 PM (IST)
ਆਰ. ਸਿੰਘ, ਪੰਜਾਬੀ ਜਾਗਰਣ, ਪਠਾਨਕੋਟ - ਪਠਾਨਕੋਟ ਦੇ ਲੀਚੀ ਉਤਪਾਦਕ ਕਿਸਾਨ ਸਟਾਰਟਅੱਪ ਸੁਪਰਪਲਮ ਨਾਲ ਜੁੜ ਕੇ ਵਧੀਆ ਮੁਨਾਫ਼ਾ ਕਮਾ ਰਹੇ ਹਨ। ਕੰਪਨੀ ਕਿਸਾਨਾਂ ਤੋਂ ਸਿੱਧੇ ਬਾਗਾਂ ਵਿੱਚੋਂ ਲੀਚੀ ਖਰੀਦ ਕੇ ਵਿਚੋਲਿਆਂ ਦੀ ਭੂਮਿਕਾ ਖਤਮ ਕਰ ਰਹੀ ਹੈ, ਜਿਸ ਨਾਲ ਕਿਸਾਨਾਂ ਨੂੰ ਗੁਣਵੱਤਾ ਅਨੁਸਾਰ ਚੰਗਾ ਮੁੱਲ ਮਿਲ ਰਿਹਾ ਹੈ। ਹੁਣ ਤੱਕ ਜ਼ਿਲ੍ਹੇ ਦੇ 100 ਤੋਂ ਵੱਧ ਕਿਸਾਨ ਇਸ ਪਹਿਲ ਦਾ ਲਾਭ ਲੈ ਚੁੱਕੇ ਹਨ।
ਸਟਾਰਟਅੱਪ ਦੇ ਸੀਨੀਅਰ ਡਾਇਰੈਕਟਰ ਡਾ. ਅਰਵਿੰਦ ਕੁਮਾਰ ਨੇ ਦੱਸਿਆ ਕਿ ਆਧੁਨਿਕ ਸਲਫੇਟ-ਮੁਕਤ ਕੋਲਡ ਚੇਨ ਤਕਨੀਕ, ਸਾਫਟਵੇਅਰ ਅਤੇ ਰੀਅਲ-ਟਾਈਮ ਟ੍ਰੈਕਿੰਗ ਰਾਹੀਂ ਲੀਚੀ ਨੂੰ ਖੇਤ ਦੇ ਨੇੜੇ ਹੀ ਪ੍ਰੋਸੈਸ ਅਤੇ ਕੂਲ ਕੀਤਾ ਜਾਂਦਾ ਹੈ। ਇਸ ਨਾਲ ਲੀਚੀ 7 ਤੋਂ 8 ਦਿਨ ਤੱਕ ਤਾਜ਼ਾ ਰਹਿੰਦੀ ਹੈ ਅਤੇ ਫਲ ਦੀ ਬਰਬਾਦੀ ਵਿੱਚ ਵੱਡੀ ਕਮੀ ਆਈ ਹੈ। ਲੀਚੀ ਦੇ ਪੈਕਟ 'ਤੇ ਦਿੱਤੇ ਕਿਊਆਰ ਕੋਡ ਰਾਹੀਂ ਉਪਭੋਗਤਾ ਇਹ ਵੀ ਜਾਣ ਸਕਦੇ ਹਨ ਕਿ ਫਲ ਕਿਸ ਕਿਸਾਨ ਅਤੇ ਕਿਸ ਖੇਤਰ ਵਿੱਚ ਉਗਾਇਆ ਗਿਆ ਹੈ।
ਸੁਪਰਪਲਮ ਦੇ ਫਾਊਂਡਰ ਅਤੇ ਸੀਈਓ ਸ਼ੋਭਿਤ ਗੁਪਤਾ ਨੇ ਦੱਸਿਆ ਕਿ ਕੰਪਨੀ 2020 ਤੋਂ ਕਿਸਾਨਾਂ ਨਾਲ ਸਿੱਧੇ ਤੌਰ 'ਤੇ ਕੰਮ ਕਰ ਰਹੀ ਹੈ। ਕਿਸਾਨਾਂ ਨੂੰ ਆਧੁਨਿਕ ਖੇਤੀ, ਕਟਾਈ ਤੋਂ ਬਾਅਦ ਪ੍ਰਬੰਧਨ, ਕੋਲਡ ਚੇਨ ਅਤੇ ਡਿਜ਼ਿਟਲ ਸਪਲਾਈ ਚੇਨ ਦੀ ਸਹੂਲਤ ਦਿੱਤੀ ਜਾ ਰਹੀ ਹੈ। ਇਸ ਸਾਲ ਕੰਪਨੀ ਨੇ ਇੱਕੋ ਵਾਰ 25 ਮੈਟ੍ਰਿਕ ਟਨ ਲੀਚੀ ਦੀ ਖਰੀਦ ਕਰਕੇ ਨਵਾਂ ਮੀਲ ਪੱਥਰ ਸਥਾਪਤ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ ਇਜ਼ਰਾਈਲ ਅਤੇ ਵੀਅਤਨਾਮ ਦੀ ਤਕਨੀਕ ਦੇ ਆਧਾਰ 'ਤੇ ਵਿਕਸਿਤ ਸਲਫੇਟ-ਮੁਕਤ ਪ੍ਰਣਾਲੀ ਨਾਲ ਪਠਾਨਕੋਟ ਦੀ ਲੀਚੀ ਹੁਣ ਚੇਨਈ, ਕੋਚੀ, ਬੈਂਗਲੁਰੂ ਸਮੇਤ ਕੈਨੇਡਾ, ਯੂਰਪ ਅਤੇ ਖਾੜੀ ਦੇਸ਼ਾਂ ਦੇ ਬਾਜ਼ਾਰਾਂ ਤੱਕ ਪਹੁੰਚ ਰਹੀ ਹੈ।
ਕਿਸਾਨ ਮੁਨੱਵਰ ਨੇ ਕਿਹਾ ਕਿ ਸੁਪਰਪਲਮ ਨਾ ਸਿਰਫ਼ ਲੀਚੀ ਦੀ ਖਰੀਦ ਕਰਦੀ ਹੈ, ਸਗੋਂ ਵਿਗਿਆਨਕ ਖੇਤੀ ਅਤੇ ਅੰਤਰਰਾਸ਼ਟਰੀ ਮਾਪਦੰਡਾਂ ਬਾਰੇ ਵੀ ਸਿਖਲਾਈ ਦਿੰਦੀ ਹੈ, ਜਿਸ ਨਾਲ ਉਤਪਾਦਨ ਵਧਿਆ ਅਤੇ ਨੁਕਸਾਨ ਘਟਿਆ ਹੈ। ਡਾ. ਅਰਵਿੰਦ ਕੁਮਾਰ ਨੇ ਦੱਸਿਆ ਕਿ ਕੰਪਨੀ ਨੇ ਪਠਾਨਕੋਟ ਵਿੱਚ 80 ਤੋਂ ਵੱਧ ਲੋਕਾਂ ਨੂੰ ਸਿੱਧਾ ਰੁਜ਼ਗਾਰ ਵੀ ਮੁਹੱਈਆ ਕਰਵਾਇਆ ਹੈ।