ਪਠਾਨਕੋਟ 'ਚ ED ਦੀ ਰੇਡ ਖ਼ਤਮ, ਦੋ ਕਰੱਸ਼ਰ ਕਾਰੋਬਾਰੀਆਂ ਕੋਲੋਂ ਦਸਤਾਵੇਜ਼ਾਂ ਨਾਲ ਡਿਜੀਟਲ ਡਾਟਾ ਵੀ ਇਕੱਠਾ ਕਰਨ ਦੀ ਚਰਚਾ

ਜਾਗਰਣ ਸੰਵਾਦਦਾਤਾ ਪਠਾਨਕੋਟ: ਜ਼ਿਲ੍ਹੇ ਦੇ ਦੋ ਕਰੱਸ਼ਰ ਕਾਰੋਬਾਰੀਆਂ, ਤਾਰਾਗੜ੍ਹ ਦੇ ਇੱਕ ਪ੍ਰਾਪਰਟੀ ਡੀਲਰ ਅਤੇ ਇੱਕ ਸਥਾਨਕ ਆਗੂ ਦੇ ਟਿਕਾਣਿਆਂ 'ਤੇ ਚੱਲੀ ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈਡੀ) ਦੀ ਕਾਰਵਾਈ ਤਿੰਨ ਦਿਨਾਂ ਬਾਅਦ ਸ਼ਨੀਵਾਰ ਦੇਰ ਰਾਤ ਸਮਾਪਤ ਹੋ ਗਈ। ਕਰੀਬ 36 ਘੰਟਿਆਂ ਤੋਂ ਵੱਧ ਚੱਲੀ ਜਾਂਚ ਤੋਂ ਬਾਅਦ ਈਡੀ ਦੀਆਂ ਟੀਮਾਂ ਵਾਪਸ ਪਰਤ ਗਈਆਂ।

ਸੂਤਰਾਂ ਅਨੁਸਾਰ ਈਡੀ ਨੇ ਜਾਂਚ ਦੌਰਾਨ ਕਰੀਬ ਛੇ ਟਿਕਾਣਿਆਂ ਤੋਂ ਜਾਇਦਾਦ ਨਾਲ ਸਬੰਧਤ ਦਸਤਾਵੇਜ਼, ਆਮਦਨ ਅਤੇ ਆਮਦਨ ਦੇ ਸਰੋਤਾਂ ਨਾਲ ਜੁੜੇ ਰਿਕਾਰਡ ਅਤੇ ਕਾਰੋਬਾਰ ਨਾਲ ਸਬੰਧਤ ਹੋਰ ਦਸਤਾਵੇਜ਼ਾਂ ਦੀ ਪੜਤਾਲ ਕੀਤੀ। ਇਹ ਵੀ ਚਰਚਾ ਹੈ ਕਿ ਕਾਰੋਬਾਰੀਆਂ ਦੇ ਲੈਪਟਾਪਾਂ ਤੋਂ ਡਿਜੀਟਲ ਡਾਟਾ ਵੀ ਇਕੱਠਾ ਕੀਤਾ ਗਿਆ ਹੈ। ਹਾਲਾਂਕਿ ਇਸ ਦੀ ਅਧਿਕਾਰਤ ਪੁਸ਼ਟੀ ਨਹੀਂ ਹੋ ਸਕੀ।

ਸੂਤਰਾਂ ਮੁਤਾਬਕ ਜਾਂਚ ਦਾ ਇੱਕ ਅਹਿਮ ਕੇਂਦਰ 92 ਏਕੜ ਚਰਚਿਤ ਜ਼ਮੀਨ ਵੀ ਰਹੀ। ਈਡੀ ਦੇ ਅਧਿਕਾਰੀਆਂ ਨੇ ਦੋ ਦਿਨਾਂ ਤੱਕ ਇਸ ਜ਼ਮੀਨ ਦੀ ਪੈਮਾਇਸ਼ ਕਰਵਾਈ ਅਤੇ ਇੱਥੇ ਹੋਈਆਂ ਖਣਨ ਗਤੀਵਿਧੀਆਂ ਸਬੰਧੀ ਰਿਪੋਰਟ ਵੀ ਸਬੰਧਤ ਅਧਿਕਾਰੀਆਂ ਤੋਂ ਪ੍ਰਾਪਤ ਕੀਤੀ।

ਫਿਲਹਾਲ ਈਡੀ ਦੀ ਕਾਰਵਾਈ ਸਮਾਪਤ ਹੋ ਚੁੱਕੀ ਹੈ ਅਤੇ ਟੀਮਾਂ ਵਾਪਸ ਜਾ ਚੁੱਕੀਆਂ ਹਨ। ਤਿੰਨ ਦਿਨ ਚੱਲੀ ਇਸ ਰੇਡ ਨੂੰ ਲੈ ਕੇ ਅਜੇ ਤੱਕ ਈਡੀ ਵੱਲੋਂ ਕੋਈ ਅਧਿਕਾਰਤ ਬਿਆਨ ਜਾਂ ਪੁਸ਼ਟੀ ਜਾਰੀ ਨਹੀਂ ਕੀਤੀ ਗਈ ਹੈ।