ਅੱਜ ਤੋਂ ਬਦਲੇਗਾ ਹਵਾਈ ਅੱਡੇ ਦਾ ਵਿੰਟਰ ਫਲਾਈਟ ਸ਼ਡਿਊਲ, 28 ਮਾਰਚ 2027 ਤੱਕ ਲਾਗੂ ਰਹੇਗੀ ਨਵੀਂ ਸਮਾਂ-ਸਾਰਣੀ

ਜਾਗਰਣ ਸੰਵਾਦਦਾਤਾ, ਮੋਹਾਲੀ : ਸ਼ਹੀਦ ਭਗਤ ਸਿੰਘ ਕੌਮਾਂਤਰੀ ਹਵਾਈ ਅੱਡੇ ਤੋਂ ਸੋਮਵਾਰ ਤੋਂ ਵਿੰਟਰ ਫਲਾਈਟ ਸ਼ਡਿਊਲ ਲਾਗੂ ਹੋਵੇਗਾ, ਜੋ 28 ਮਾਰਚ 2027 ਤੱਕ ਜਾਰੀ ਰਹੇਗਾ। ਨਵੇਂ ਸ਼ਡਿਊਲ ’ਚ ਕਈ ਘਰੇਲੂ ਤੇ ਕੌਮਾਂਤਰੀ ਰੂਟਾਂ ’ਤੇ ਉਡਾਣਾਂ ਵਧਣਗੀਆਂ।

ਕਰੀਬ ਤਿੰਨ ਸਾਲ ਬਾਅਦ ਚੰਡੀਗੜ੍ਹ-ਸ਼ਾਰਜਾਹ ਸਿੱਧੀ ਉਡਾਣ ਮੁੜ ਸ਼ੁਰੂ ਹੋਵੇਗੀ। ਇਹ ਸੇਵਾ ਸੋਮਵਾਰ, ਮੰਗਲਵਾਰ, ਵੀਰਵਾਰ ਤੇ ਸ਼ਨੀਵਾਰ ਨੂੰ ਚੱਲੇਗੀ। ਚੰਡੀਗੜ੍ਹ ਤੋਂ ਜਹਾਜ਼ ਦੁਪਹਿਰ 1:50 ਵਜੇ ਰਵਾਨਾ ਹੋਵੇਗਾ ਅਤੇ ਸ਼ਾਮ 5:50 ਵਜੇ ਸ਼ਾਰਜਾਹ ਪਹੁੰਚੇਗਾ। ਵਾਪਸੀ ਦੀ ਉਡਾਣ ਰਾਤ 11:05 ਵਜੇ ਚੰਡੀਗੜ੍ਹ ਪਹੁੰਚੇਗੀ। ਇਕ ਪਾਸੇ ਦਾ ਕਿਰਾਇਆ ਕਰੀਬ 17,820 ਰੁਪਏ ਹੈ।

ਇੰਦੌਰ ਲਈ ਹੁਣ ਰੋਜ਼ਾਨਾ ਉਡਾਣ ਹੋਵੇਗੀ, ਜਦਕਿ ਮੁੰਬਈ ਲਈ ਰੋਜ਼ਾਨਾ ਉਡਾਣਾਂ ਤਿੰਨ ਤੋਂ ਵਧਾ ਕੇ ਚਾਰ ਅਤੇ ਅਬੂ ਧਾਬੀ ਲਈ ਹਫ਼ਤੇ ’ਚ ਤਿੰਨ ਤੋਂ ਛੇ ਕੀਤੀਆਂ ਜਾਣਗੀਆਂ। ਲੇਹ ਲਈ ਹਫ਼ਤੇ ’ਚ ਤਿੰਨ ਦਿਨ ਉਡਾਣ ਚੱਲੇਗੀ।

ਬੈਂਗਲੁਰੂ ਲਈ ਵਾਧੂ ਸੇਵਾ ਇਕ ਦਸੰਬਰ ਤੋਂ ਅਤੇ ਗੋਆ ਦੇ ਦੱਖਣੀ ਹਿੱਸੇ ਲਈ ਸਿੱਧੀ ਉਡਾਣ ਵੀ ਨਵੇਂ ਸ਼ਡਿਊਲ ਤਹਿਤ ਉਪਲਬਧ ਹੋਵੇਗੀ। ਗੋਆ ਦੀ ਉਡਾਣ ਚੰਡੀਗੜ੍ਹ ਤੋਂ ਸਵੇਰੇ 11 ਵਜੇ ਰਵਾਨਾ ਹੋ ਕੇ ਦੁਪਹਿਰ 1:45 ਵਜੇ ਪਹੁੰਚੇਗੀ। ਪਟਨਾ ਨੂੰ ਵੀ ਚੰਡੀਗੜ੍ਹ ਨਾਲ ਜੋੜਿਆ ਗਿਆ ਹੈ।

ਨਵੇਂ ਸ਼ਡਿਊਲ ’ਚ ਅੱਧੀ ਰਾਤ ਤੋਂ ਬਾਅਦ ਵੀ ਉਡਾਣਾਂ ਜਾਰੀ ਰਹਿਣਗੀਆਂ। ਬੈਂਗਲੁਰੂ ਲਈ ਆਖ਼ਰੀ ਉਡਾਣ ਰਾਤ 12:35 ਵਜੇ ਰਵਾਨਾ ਹੋਵੇਗੀ ਅਤੇ ਮੁੰਬਈ ਤੋਂ ਆਖ਼ਰੀ ਉਡਾਣ ਰਾਤ 12:20 ਵਜੇ ਪਹੁੰਚੇਗੀ। ਯਾਤਰੀਆਂ ਨੂੰ ਉਡਾਣ ਦੇ ਸਮੇਂ ਦੀ ਪੁਸ਼ਟੀ ਏਅਰਲਾਈਨ ਤੋਂ ਕਰਨ ਦੀ ਸਲਾਹ ਦਿੱਤੀ ਗਈ ਹੈ।