Manjit Kaur Death Case: 'ਗਰਭਪਾਤ ਦਾ ਦਬਾਅ, ਫਿਰ ਜਿਊਂਦੇ ਸਾੜਿਆ', ਪੰਜਾਬ ਦੀ ਇਨਫ਼ਲੂਐਂਸਰ ਮਨਜੀਤ ਦੀ ਮੌਤ 'ਤੇ ਮਾਂ ਦੇ ਹੋਸ਼ ਉਡਾਉਣ ਵਾਲੇ ਖੁਲਾਸੇ

ਸੰਦੀਪ ਖ਼ਤਰੀ, ਮੋਹਾਲੀ: ਪੰਜਾਬੀ ਇਨਫ਼ਲੂਐਂਸਰ ਮਨਜੀਤ ਕੌਰ ਦੀ ਮੌਤ ਦੇ ਮਾਮਲੇ ਵਿੱਚ ਨਵਾਂ ਤੱਥ ਸਾਹਮਣੇ ਆਇਆ ਹੈ। ਮਨਜੀਤ ਕੌਰ ਘਟਨਾ ਦੇ ਸਮੇਂ ਸੱਤ ਹਫ਼ਤਿਆਂ ਦੀ ਗਰਭਵਤੀ ਸੀ। ਉਸ ਦੀ ਮਾਂ ਕਾਂਤਾ ਦੇਵੀ ਨੇ ਰਿੰਕੂ ਨਾਂ ਦੇ ਨੌਜਵਾਨ 'ਤੇ ਗੰਭੀਰ ਦੋਸ਼ ਲਾਏ ਹਨ।

ਮਾਂ ਦਾ ਕਹਿਣਾ ਹੈ ਕਿ ਰਿੰਕੂ ਉਨ੍ਹਾਂ ਦੀ ਧੀ ਨਾਲ ਵਿਆਹ ਨਹੀਂ ਕਰਨਾ ਚਾਹੁੰਦਾ ਸੀ ਅਤੇ ਉਸ ਨੂੰ ਗਰਭਪਾਤ ਕਰਵਾਉਣ ਲਈ ਕਹਿੰਦਾ ਸੀ। ਪੁਲਿਸ ਹੁਣ ਰਿੰਕੂ ਨੂੰ ਪੁੱਛਗਿੱਛ ਲਈ ਬੁਲਾ ਕੇ ਇਸ ਦੋਸ਼ ਸਮੇਤ ਮਾਮਲੇ ਨਾਲ ਜੁੜੇ ਹੋਰ ਪਹਿਲੂਆਂ ਦੀ ਜਾਂਚ ਕਰੇਗੀ।

ਮਨਜੀਤ ਕੌਰ ਦਾ ਪਹਿਲਾਂ ਹੀ ਤਲਾਕ ਹੋ ਚੁੱਕਾ ਸੀ ਅਤੇ ਉਹ ਸੰਨੀ ਐਨਕਲੇਵ ਵਿੱਚ ਅੱਡ ਰਹਿੰਦੀ ਸੀ। ਉਸ ਦੀ ਮਾਂ ਕਾਂਤਾ ਦੇਵੀ ਅਤੇ ਭਰਾ ਪੰਚਕੂਲਾ ਦੇ ਸੈਕਟਰ-19 ਵਿੱਚ ਰਹਿੰਦੇ ਹਨ। ਪਰਿਵਾਰ ਨੇ ਅੰਮ੍ਰਿਤਸਰ ਦੀ ਰਹਿਣ ਵਾਲੀ ਨੇਹਾ 'ਤੇ ਵੀ ਦੋਸ਼ ਲਾਏ ਹਨ। ਹਾਲਾਂਕਿ ਨੇਹਾ ਦਾ ਕਹਿਣਾ ਹੈ ਕਿ ਉਸ ਨੂੰ ਨਹੀਂ ਪਤਾ ਕਿ ਮਨਜੀਤ ਦੀ ਮਾਂ ਨੇ ਬਿਆਨਾਂ ਵਿੱਚ ਉਸ ਦਾ ਨਾਂ ਕਿਉਂ ਲਿਆ। ਪੁਲਿਸ ਜਲਦ ਹੀ ਨੇਹਾ ਨੂੰ ਵੀ ਪੁੱਛਗਿੱਛ ਲਈ ਬੁਲਾ ਸਕਦੀ ਹੈ।

ਮ੍ਰਿਤਕਾ ਦੀ ਮਾਂ ਨੇ ਪੁਲਿਸ ਨੂੰ ਦਿੱਤੇ ਬਿਆਨਾਂ ਵਿੱਚ ਸ਼ੁਭੀ ਅਤੇ ਪਿੰਦਾ ਦੇ ਨਾਂ ਵੀ ਲਏ ਹਨ। ਉਨ੍ਹਾਂ ਖ਼ਿਲਾਫ਼ ਲਾਏ ਦੋਸ਼ਾਂ ਦੇ ਆਧਾਰ 'ਤੇ ਸੈਕਟਰ-34 ਥਾਣਾ ਪੁਲਿਸ ਨੇ ਸ਼ੁਭੀ, ਪਿੰਦਾ ਅਤੇ ਹੋਰਨਾਂ ਖ਼ਿਲਾਫ਼ ਅਗਵਾ ਅਤੇ ਕਤਲ ਦਾ ਮਾਮਲਾ ਦਰਜ ਕੀਤਾ ਹੈ।

ਪੁਲਿਸ ਹੁਣ ਮੁਲਜ਼ਮਾਂ ਦੀ ਭਾਲ ਦੇ ਨਾਲ-ਨਾਲ ਮਨਜੀਤ ਦੇ ਸੰਪਰਕ ਵਿੱਚ ਰਹੇ ਲੋਕਾਂ ਦੀ ਕਾਲ ਡਿਟੇਲ ਖੰਘਾਲ ਰਹੀ ਹੈ। ਸੈਕਟਰ-34 ਥਾਣੇ ਦੇ ਐਸ.ਐਚ.ਓ. ਇੰਸਪੈਕਟਰ ਸ਼ਾਦੀ ਲਾਲ ਇਸ ਮਾਮਲੇ ਦੇ ਜਾਂਚ ਅਧਿਕਾਰੀ ਹਨ ਅਤੇ ਖ਼ੁਦ ਤਫ਼ਤੀਸ਼ ਕਰ ਰਹੇ ਹਨ।

ਅਗਵਾ ਕਰਕੇ ਮੋਰਿੰਡਾ 'ਚ ਦਰੱਖਤ ਨਾਲ ਬੰਨ੍ਹ ਕੇ ਜਿਊਂਦੇ ਸਾੜਿਆ

ਕਾਂਤਾ ਦੇਵੀ ਅਨੁਸਾਰ 3 ਜੁਲਾਈ ਦੀ ਰਾਤ ਨੂੰ ਸ਼ੁਭੀ ਅਤੇ ਪਿੰਦਾ ਨੇ ਮਨਜੀਤ ਨੂੰ ਸੈਕਟਰ-34 ਸਥਿਤ ਸ਼ਰਾਬ ਦੇ ਠੇਕੇ ਨੇੜੇ ਬੁਲਾਇਆ ਸੀ। ਦੋਸ਼ ਹੈ ਕਿ ਦੋਵਾਂ ਨੇ ਉਸ ਨਾਲ ਕੁੱਟਮਾਰ ਕੀਤੀ ਅਤੇ ਗੱਡੀ ਵਿੱਚ ਅਗਵਾ ਕਰਕੇ ਮੋਰਿੰਡਾ ਦੇ ਜੰਗਲਾਤ ਖੇਤਰ ਵਿੱਚ ਲੈ ਗਏ।

ਉੱਥੇ ਉਸ ਨੂੰ ਦਰੱਖਤ ਨਾਲ ਬੰਨ੍ਹ ਕੇ ਅੱਗ ਲਗਾ ਦਿੱਤੀ ਗਈ। ਇਸੇ ਦੌਰਾਨ ਮਨਜੀਤ ਦਾ ਇੱਕ ਜਾਣਕਾਰ ਉੱਥੇ ਪਹੁੰਚਿਆ ਅਤੇ ਕੰਬਲ ਪਾ ਕੇ ਅੱਗ ਬੁਝਾਈ। ਇਸ ਤੋਂ ਬਾਅਦ ਉਸ ਨੂੰ ਮੋਰਿੰਡਾ ਹਸਪਤਾਲ ਪਹੁੰਚਾਇਆ ਗਿਆ, ਜਿੱਥੋਂ ਉਸ ਨੂੰ ਪੀ.ਜੀ.ਆਈ. (PGI) ਰੈਫ਼ਰ ਕਰ ਦਿੱਤਾ ਗਿਆ, ਪਰ ਮਨਜੀਤ ਨੂੰ ਮੋਹਾਲੀ ਦੇ ਮੈਕਸ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ। ਮੈਕਸ ਹਸਪਤਾਲ ਤੋਂ ਖਰੜ ਸਦਰ ਥਾਣੇ ਵਿੱਚ ਘਟਨਾ ਦੀ ਜਾਣਕਾਰੀ ਭੇਜੀ ਗਈ।

ਘਰ ਵਿੱਚ ਅੱਗ ਲੱਗਣ ਦੀ ਦਿੱਤੀ ਸੀ ਪੁਲਿਸ ਨੂੰ ਜਾਣਕਾਰੀ

ਪੁਲਿਸ ਸਰੋਤਾਂ ਮੁਤਾਬਕ ਘਟਨਾ ਤੋਂ ਬਾਅਦ ਮਨਜੀਤ ਦੀ ਭੈਣ ਨੇ ਪੁਲਿਸ ਨੂੰ ਦੱਸਿਆ ਸੀ ਕਿ ਮਨਜੀਤ ਘਰ ਵਿੱਚ ਸੜ ਗਈ ਹੈ। ਇਸੇ ਆਧਾਰ 'ਤੇ ਸ਼ੁਰੂਆਤੀ ਤੌਰ 'ਤੇ ਮਾਮਲਾ ਖਰੜ ਸਦਰ ਥਾਣਾ ਪੁਲਿਸ ਦੇ ਪੱਧਰ 'ਤੇ ਆਇਆ। ਹਾਲਾਂਕਿ ਇਹ ਜਾਂਚ ਕੀਤੀ ਜਾ ਰਹੀ ਹੈ ਕਿ ਆਖ਼ਰ ਘਰ ਵਿੱਚ ਅੱਗ ਲੱਗਣ ਦੀ ਜਾਣਕਾਰੀ ਪੁਲਿਸ ਨੂੰ ਕਿਉਂ ਦਿੱਤੀ ਗਈ ਸੀ। ਹਾਲਾਂਕਿ ਪੁਲਿਸ ਨੇ ਵੀ ਕਿਸੇ ਦੇ ਬਿਆਨ ਦਰਜ ਨਹੀਂ ਕੀਤੇ ਸਨ।

ਬਾਅਦ ਵਿੱਚ ਮਨਜੀਤ ਦੀ ਮਾਂ ਨੇ ਦੋਸ਼ ਲਾਇਆ ਕਿ ਉਸ ਦੀ ਧੀ ਨੂੰ ਸ਼ੁਭੀ ਅਤੇ ਪਿੰਦਾ ਨੇ ਅਗਵਾ ਕੀਤਾ ਸੀ ਅਤੇ ਮੋਰਿੰਡਾ ਦੇ ਜੰਗਲ ਵਿੱਚ ਲੈ ਜਾ ਕੇ ਦਰੱਖਤ ਨਾਲ ਬੰਨ੍ਹ ਕੇ ਅੱਗ ਲਗਾਈ।

ਮੋਰਿੰਡਾ ਹਸਪਤਾਲ ਤੋਂ ਮਨਜੀਤ ਨੂੰ ਮੋਹਾਲੀ ਦੇ ਮੈਕਸ ਹਸਪਤਾਲ ਲਿਆਂਦਾ ਗਿਆ। ਹਾਲਤ ਗੰਭੀਰ ਹੋਣ 'ਤੇ ਉਸ ਨੂੰ ਪੀ.ਜੀ.ਆਈ. ਰੈਫ਼ਰ ਕੀਤਾ ਗਿਆ, ਜਿੱਥੇ 9 ਜੁਲਾਈ ਨੂੰ ਉਸ ਨੂੰ ਭਰਤੀ ਕਰਵਾਇਆ ਗਿਆ। ਉਹ ਲੰਮੇ ਸਮੇਂ ਤੱਕ ਜ਼ਿੰਦਗੀ ਅਤੇ ਮੌਤ ਨਾਲ ਜੂਝਦੀ ਰਹੀ।

ਹੋਸ਼ ਆਇਆ ਤਾਂ ਬਿਆਨ ਦਰਜ ਕਰਵਾਉਣ ਦੀ ਮੰਗ

ਮਨਜੀਤ ਨੂੰ 5 ਅਗਸਤ ਨੂੰ ਹੋਸ਼ ਆਇਆ। ਉਸ ਨੇ ਪੁਲਿਸ ਨੂੰ ਬੁਲਾ ਕੇ ਆਪਣੇ ਬਿਆਨ ਦਰਜ ਕਰਵਾਉਣ ਦੀ ਇੱਛਾ ਜਤਾਈ ਸੀ। ਪੀ.ਜੀ.ਆਈ. ਚੌਕੀ ਵੱਲੋਂ ਵੀ ਖਰੜ ਸਦਰ ਥਾਣਾ ਪੁਲਿਸ ਨੂੰ ਉਸ ਦੇ ਹੋਸ਼ ਵਿੱਚ ਆਉਣ ਦੀ ਸੂਚਨਾ ਦਿੱਤੀ ਗਈ ਸੀ।

ਪੀ.ਜੀ.ਆਈ. ਚੌਕੀ ਵੱਲੋਂ ਜਾਂਚ ਅਧਿਕਾਰੀ ਏ.ਐਸ.ਆਈ. ਕੁਲਵਿੰਦਰ ਸਿੰਘ ਨੂੰ ਫ਼ੋਨ 'ਤੇ ਜਾਣਕਾਰੀ ਦਿੱਤੀ ਗਈ ਸੀ। ਦੋਸ਼ ਹੈ ਕਿ ਇਸ ਦੇ ਬਾਵਜੂਦ ਉਹ ਬਿਆਨ ਦਰਜ ਕਰਨ ਹਸਪਤਾਲ ਨਹੀਂ ਪਹੁੰਚੇ। ਪੀ.ਜੀ.ਆਈ. ਚੌਕੀ ਵਿੱਚ ਇਸ ਸਬੰਧੀ ਡੀ.ਡੀ.ਆਰ. (DDR) ਵੀ ਦਰਜ ਹੈ।

26 ਅਗਸਤ ਨੂੰ ਮੌਤ ਤੋਂ ਬਾਅਦ ਦਰਜ ਹੋਇਆ ਅਗਵਾ-ਕਤਲ ਦਾ ਕੇਸ

ਮਨਜੀਤ ਕੌਰ ਦੀ 26 ਅਗਸਤ ਨੂੰ ਪੀ.ਜੀ.ਆਈ. ਵਿੱਚ ਇਲਾਜ ਦੌਰਾਨ ਮੌਤ ਹੋ ਗਈ। ਇਸ ਤੋਂ ਬਾਅਦ ਚੰਡੀਗੜ੍ਹ ਪੁਲਿਸ ਨੇ ਉਸ ਦੀ ਮਾਂ ਕਾਂਤਾ ਦੇਵੀ ਦੇ ਬਿਆਨ 'ਤੇ ਅਗਵਾ ਕਰਕੇ ਕਤਲ ਕਰਨ ਦਾ ਮਾਮਲਾ ਦਰਜ ਕੀਤਾ। ਪੁਲਿਸ ਸ਼ੁਭੀ ਅਤੇ ਪਿੰਦਾ ਦੀ ਭਾਲ ਵਿੱਚ ਛਾਪੇਮਾਰੀ ਕਰ ਰਹੀ ਹੈ। ਉੱਥੇ ਹੀ ਰਿੰਕੂ ਅਤੇ ਨੇਹਾ ਨੂੰ ਪੁੱਛਗਿੱਛ ਲਈ ਬੁਲਾਇਆ ਜਾਵੇਗਾ। ਪੁਲਿਸ ਕਾਲ ਡਿਟੇਲ, ਸੀ.ਸੀ.ਟੀ.ਵੀ. ਫੁੱਟੇਜ ਅਤੇ ਹੋਰ ਸਬੂਤਾਂ ਦੀ ਜਾਂਚ ਕਰ ਰਹੀ ਹੈ।

ਪੁਲਿਸ ਦਾ ਕਹਿਣਾ ਹੈ ਕਿ ਮਾਮਲੇ ਵਿੱਚ ਸਾਹਮਣੇ ਆਏ ਸਾਰੇ ਦੋਸ਼ਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਜਾਂਚ ਦੌਰਾਨ ਇਹ ਸਪੱਸ਼ਟ ਕੀਤਾ ਜਾਵੇਗਾ ਕਿ ਮਨਜੀਤ ਨੂੰ ਕਿਸ ਨੇ ਅਗਵਾ ਕੀਤਾ, ਮੋਰਿੰਡਾ ਵਿੱਚ ਉਸ ਨੂੰ ਅੱਗ ਲਗਾਉਣ ਦੀ ਘਟਨਾ ਵਿੱਚ ਕੌਣ-ਕੌਣ ਸ਼ਾਮਲ ਸੀ ਅਤੇ ਘਟਨਾ ਦੇ ਪਿੱਛੇ ਅਸਲ ਕਾਰਨ ਕੀ ਸੀ।