Mohali News : ਵਿਦੇਸ਼ ਭੇਜਣ ਦੇ ਨਾਂ 'ਤੇ ਫਤਿਹਗੜ੍ਹ ਸਾਹਿਬ ਦੇ ਨੌਜਵਾਨ ਨਾਲ 7.5 ਲੱਖ ਦੀ ਠੱਗੀ, ਮੋਹਾਲੀ ਦੀ ਇਮੀਗ੍ਰੇਸ਼ਨ ਕੰਪਨੀ ਖਿਲਾਫ਼ ਸ਼ਿਕਾਇਤ ਦਰਜ

ਜੀਐੱਸ ਸੰਧੂ, ਪੰਜਾਬੀ ਜਾਗਰਣ, ਐੱਸਏਐੱਸ ਨਗਰ : ਫਤਹਿਗੜ੍ਹ ਸਾਹਿਬ ਦੇ ਸਰਹਿੰਦ ਨਿਵਾਸੀ ਗਗਨਦੀਪ ਸਿੰਘ ਨੂੰ ਆਸਟ੍ਰੇਲੀਆ ਭੇਜਣ ਦਾ ਝਾਂਸਾ ਦੇ ਕੇ ਮੋਹਾਲੀ ਦੇ ਫੇਜ਼-3 ਦੀ ਇੱਕ ਨਾਮੀ ਇਮੀਗ੍ਰੇਸ਼ਨ ਕੰਪਨੀ ਨੇ ਸਾਢੇ ਸੱਤ ਲੱਖ ਰੁਪਏ ਦੀ ਠੱਗੀ ਮਾਰੀ ਹੈ। ਪੀੜਤ ਨੇ ਇਹ ਪੈਸੇ ਆਪਣੀ ਸਾਰੀ ਬਚਤ ਅਤੇ ਘਰ ਦਾ ਸੋਨਾ ਗਿਰਵੀ ਰੱਖ ਕੇ ਇਕੱਠੇ ਕੀਤੇ ਸਨ। ਵੀਜ਼ਾ ਨਾ ਲੱਗਣ ਅਤੇ ਕੰਪਨੀ ਵੱਲੋਂ ਪੈਸੇ ਵਾਪਸ ਨਾ ਕਰਨ 'ਤੇ ਗਗਨਦੀਪ ਸਿੰਘ ਨੇ ਆਖਰਕਾਰ ਮਟੌਰ ਥਾਣੇ ਵਿੱਚ ਸ਼ਿਕਾਇਤ ਦਰਜ ਕਰਵਾਈ ਹੈ।

ਘਰ ਦਾ ਸੋਨਾ ਗਿਰਵੀ ਰੱਖ ਕੇ ਭਰੀ ਸੀ ਫੀਸ

ਗਗਨਦੀਪ ਸਿੰਘ ਨੇ ਦੱਸਿਆ ਕਿ ਉਹ ਪਹਿਲਾਂ ਇੰਗਲੈਂਡ ਜਾ ਕੇ ਵਾਪਸ ਪਰਤਿਆ ਸੀ। ਉਸ ਨੇ ਸੋਸ਼ਲ ਮੀਡੀਆ 'ਤੇ ਇਮੀਗ੍ਰੇਸ਼ਨ ਕੰਪਨੀ ਦਾ ਇਸ਼ਤਿਹਾਰ ਦੇਖ ਕੇ ਉਨ੍ਹਾਂ ਨਾਲ ਸੰਪਰਕ ਕੀਤਾ ਸੀ। ਕੰਪਨੀ ਨੇ ਉਸ ਨੂੰ ਆਸਟ੍ਰੇਲੀਆ ਦਾ 482 ਵਰਕ ਵੀਜ਼ਾ ਲਗਵਾਉਣ ਦਾ ਪੱਕਾ ਵਾਅਦਾ ਕੀਤਾ।

ਗਗਨਦੀਪ ਨੇ ਵਿਸ਼ਵਾਸ ਕਰਕੇ ਸਾਰੀ ਰਕਮ $7.5 ਲੱਖ ਰੁਪਏ ਨਕਦ ਦੇ ਦਿੱਤੀ। ਇਸ ਵਿੱਚ ਉਸਦੀ ਸਾਰੀ ਬਚਤ ਅਤੇ ਘਰ ਦਾ ਸੋਨਾ ਗਿਰਵੀ ਰੱਖ ਕੇ ਇਕੱਠੇ ਕੀਤੇ ਪੈਸੇ ਸ਼ਾਮਲ ਸਨ। ਪੀੜਤ ਨੇ ਦੱਸਿਆ ਕਿ ਹੁਣ ਉਸ ਨੂੰ ਹਰ ਮਹੀਨੇ $16,000 ਰੁਪਏ ਦੀ ਕਿਸ਼ਤ ਚੁਕਾਉਣੀ ਪੈ ਰਹੀ ਹੈ, ਪਰ 2 ਅਕਤੂਬਰ ਨੂੰ ਇੱਕ ਸਾਲ ਪੂਰਾ ਹੋਣ ਦੇ ਬਾਵਜੂਦ ਨਾ ਤਾਂ ਉਸ ਦਾ ਵੀਜ਼ਾ ਲੱਗਿਆ, ਨਾ ਹੀ ਉਸ ਨੂੰ ਵਿਦੇਸ਼ ਭੇਜਿਆ ਗਿਆ ਅਤੇ ਨਾ ਹੀ ਪੈਸੇ ਵਾਪਸ ਕੀਤੇ ਗਏ।

ਪੈਸੇ ਦੇਣ ਤੋਂ ਲਗਾਤਾਰ ਕੀਤਾ ਜਾ ਰਿਹਾ ਟਾਲਮਟੋਲ

ਗਗਨਦੀਪ ਦਾ ਕਹਿਣਾ ਹੈ ਕਿ ਉਹ ਲਗਾਤਾਰ ਮੋਹਾਲੀ ਸਥਿਤ ਕੰਪਨੀ ਦੇ ਦਫਤਰ ਦੇ ਚੱਕਰ ਲਗਾ ਰਿਹਾ ਹੈ, ਜਿਸ ਵਿੱਚ ਉਸ ਦਾ ਹਜ਼ਾਰਾਂ ਰੁਪਏ ਦਾ ਪੈਟਰੋਲ ਖਰਚ ਹੋ ਜਾਂਦਾ ਹੈ। ਕੰਪਨੀ ਵਾਲੇ ਹੁਣ ਮਿਲਣ 'ਤੇ ਸਿਰਫ਼ ਟਾਲਮਟੋਲ ਕਰਦੇ ਹਨ ਜਾਂ ਕਦੇ 5-10 ਹਜ਼ਾਰ ਰੁਪਏ ਦੇ ਕੇ ਟਾਲਣ ਦੀ ਗੱਲ ਕਰਦੇ ਹਨ।

ਉਸ ਨੇ ਦੱਸਿਆ ਕਿ ਸ਼ੁਰੂ ਵਿੱਚ ਉਸ ਨੂੰ ਕੰਪਨੀ 'ਤੇ ਭਰੋਸਾ ਸੀ, ਪਰ ਹੁਣ ਸਮਝ ਆ ਗਿਆ ਹੈ ਕਿ ਇਹ ਲੋਕ ਠੱਗੀ ਦਾ ਧੰਦਾ ਚਲਾਉਂਦੇ ਹਨ। ਪੀੜਤ ਨੇ ਦੋਸ਼ ਲਾਇਆ ਕਿ ਜਦੋਂ ਕੋਈ ਪ੍ਰਦਰਸ਼ਨ ਕਰਦਾ ਹੈ ਤਾਂ ਇਹ ਕੰਪਨੀਆਂ ਆਪਣਾ ਨਾਮ ਬਦਲ ਕੇ ਦੁਬਾਰਾ ਕੰਮ ਸ਼ੁਰੂ ਕਰ ਦਿੰਦੀਆਂ ਹਨ।

ਪੁਲਿਸ ਕਰ ਰਹੀ ਹੈ ਪੜਤਾਲ

ਆਖਰਕਾਰ ਗਗਨਦੀਪ ਸਿੰਘ ਨੇ ਮਟੌਰ ਥਾਣੇ ਵਿੱਚ ਇਮੀਗ੍ਰੇਸ਼ਨ ਕੰਪਨੀ ਖਿਲਾਫ਼ ਲਿਖਤੀ ਸ਼ਿਕਾਇਤ ਦਰਜ ਕਰਵਾਈ ਹੈ।

ਥਾਣਾ ਮੁਖੀ ਅਮਨਦੀਪ ਸਿੰਘ ਕੰਬੋਜ ਨੇ ਇਸ ਮਾਮਲੇ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਸ਼ਿਕਾਇਤ ਮਿਲ ਗਈ ਹੈ ਅਤੇ ਪੂਰੀ ਪੜਤਾਲ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਭਰੋਸਾ ਦਿਵਾਇਆ ਕਿ ਜੇਕਰ ਠੱਗੀ ਸਾਬਤ ਹੋਈ ਤਾਂ ਕੰਪਨੀ ਦੇ ਮਾਲਕਾਂ ਅਤੇ ਸਬੰਧਤ ਲੋਕਾਂ ਖਿਲਾਫ਼ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।