ਜ਼ਮੀਨ ’ਤੇ ਕਬਜ਼ੇ ਲਈ ਵਿਧਵਾ ਦੀ ਕੁੱਟਮਾਰ, 3 ਔਰਤਾਂ ਸਣੇ 8 ਨਾਮਜ਼ਦ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਖੰਨਾ: ਸਹੁਰੇ ਪਰਿਵਾਰ ਵੱਲੋਂ ਜ਼ਮੀਨ ’ਤੇ ਕਬਜ਼ਾ ਕਰਨ ਦੇ ਲਈ ਧੱਕੇ ਨਾਲ ਵੜ ਕੇ ਜ਼ਮੀਨ ਵਾਹੁਣ ਤੇ ਵਿਧਵਾ ਔਰਤ ਦੀ ਕੁੱਟਮਾਰ ਕੀਤੀ। ਪੁਲਿਸ ਵੱਲੋਂ ਤਿੰਨ ਔਰਤਾਂ ਸਮੇਤ 8 ਵਿਅਕਤੀਆਂ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਗਿਆ। ਇਹ ਮਾਮਲਾ ਲਖਵਿੰਦਰ ਕੌਰ ਪਤਨੀ ਸਵ. ਕਿਰਨਦੀਪ ਸਿੰਘ ਵਾਸੀ ਜੋਗੀਮਾਜਰਾ ਥਾਣਾ ਮਲੋਦ ਦੀ ਸ਼ਿਕਾਇਤ ’ਤੇ ਰਾਜਵੰਤ ਕੌਰ, ਗੁਰੀ, ਰਣਜੀਤ ਸਿੰਘ ਪੁੱਤਰ ਅਣਪਛਾਤੇ ਵਾਸੀ ਕੁੱਪ ਕਲਾਂ, ਹਰਜਿੰਦਰ ਕੌਰ, ਸਾਧੂ ਸਿੰਘ ਪੁੱਤਰ ਅਣਪਛਾਤੇ ਵਾਸੀਆਨ ਜੋਗੀਮਾਜਰਾ, ਜਸਵੀਰ ਕੌਰ, ਲਖਦੀਪ ਸਿੰਘ ਵਾਸੀ ਕੰਗਣਵਾਲ ਤੇ ਭੋਲਾ ਪੁੱਤਰ ਅਣਪਛਾਤੇ ਵਾਸੀ ਜਿੱਤਵਾਲ ਥਾਣਾ ਸਦਰ ਅਹਿਮਦਗੜ੍ਹ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ। ਪੁਲਿਸ ਕੋਲ ਦਰਜ ਕਰਵਾਈ ਰਿਪੋਰਟ ਰਾਹੀਂ ਲਖਵਿੰਦਰ ਕੌਰ ਅਨੁਸਾਰ ਉਸਦੇ ਪਤੀ ਦੀ ਸਾਲ 2025 ’ਚ ਮੌਤ ਹੋ ਚੁੱਕੀ ਹੈ, ਉਸਦੇ ਘਰਵਾਲੇ ਦੇ ਨਾਮ ’ਤੇ ਕਰੀਬ 7 ਕਿੱਲੇ ਜ਼ਮੀਨ ਹੈ, ਜੋ ਉਸਦੀ ਮੌਤ ਤੋਂ ਬਾਅਦ ਜ਼ਮੀਨ ’ਤੇ ਉਹ ਹੀ ਕਾਸ਼ਤ ਕਰਦੀ ਹੈ। ਇਸ ਜ਼ਮੀਨ ’ਚ ਹੁਣ ਉਸਨੇ ਮੱਕੀ ਦੀ ਫ਼ਸਲ ਬੀਜੀ ਹੋਈ ਹੈ। ਉਸਦਾ ਸਹੁਰਾ ਸਾਧੂ ਸਿੰਘ, ਸੱਸ ਹਰਜਿੰਦਰ ਕੌਰ, ਉਸਦੀ ਨਣਦ ਰਾਜਵੰਤ ਕੌਰ ਪਤਨੀ ਰਣਜੀਤ ਸਿੰਘ ਵਾਸੀ ਪਿੰਡ ਕੁੱਪ ਕਲਾਂ ਕੋਲ, ਕਰੀਬ 12 ਜਾਂ 13 ਸਾਲ ਤੋਂ ਰਹਿੰਦੇ ਹਨ। ਜਦੋਂ ਉਸਦੇ ਘਰਵਾਲੇ ਦੀ ਮੌਤ ਹੋਈ ਸੀ ਤਾਂ ਉਦੋਂ ਤੋਂ ਰਣਜੀਤ ਸਿੰਘ ਉਸਦੀ ਸੱਸ ਨੂੰ ਅੱਗੇ ਕਰਕੇ ਉਸਦੇ ਘਰਵਾਲੇ ਕਿਰਨਦੀਪ ਸਿੰਘ ਦੀ ਜ਼ਮੀਨ ’ਚੋਂ ਹਿੱਸਾ ਮੰਗਦੇ ਹਨ ਜਦਕਿ ਘਰਵਾਲੇ ਨੇ ਮਰਨ ਤੋਂ ਪਹਿਲਾਂ ਆਪਣੀ ਜਾਇਦਾਦ ਦੀ ਵਸੀਅਤ ਮੇਰੇ ਨਾਮ ਕਰਵਾ ਦਿੱਤੀ ਸੀ, ਜਿਸ ਕਰਕੇ ਇਸ ਜ਼ਮੀਨ ਦਾ ਅਦਾਲਤ ’ਚ ਕੇਸ ਵੀ ਚੱਲਦਾ ਹੈ ਤੇ ਜ਼ਮੀਨ ਦਾ ਕਬਜ਼ਾ ਉਸ ਕੋਲ ਹੀ ਹੈ। ਲਖਵਿੰਦਰ ਕੌਰ ਨੇ ਪੁਲਿਸ ਨੂੰ ਦੱਸਿਆ ਕਿ ਬੀਤੇ ਦਿਨ ਉਸਦਾ ਲਣਦੋਈਆਂ ਰਣਜੀਤ ਸਿੰਘ, ਨਣਦ ਰਾਜਵੰਤ ਕੌਰ, ਸਹੁਰਾ ਸਾਧੂ ਸਿੰਘ, ਸੱਸ ਹਰਜਿੰਦਰ ਕੌਰ, ਛੋਟੀ ਨਣਦ ਜਸਵੀਰ ਕੌਰ ਪਤਨੀ ਗੁਰਪ੍ਰੀਤ ਸਿੰਘ, ਇਸਦਾ ਲੜਥਾ ਲਖਦੀਪ ਸਿੰਘ ਵਾਸੀ ਕੰਗਣਵਾਲ, ਉਸਦੀ ਜ਼ਮੀਨ ’ਚ ਆਏ। ਸਾਰੇ ਜਾਣੇ ਲਲਕਾਰੇ ਮਾਰ ਕੇ ਕਹਿਣ ਲੱਗੇ ਕਿ ਲਖਵਿੰਦਰ ਕੌਰ ਦੀ ਸਾਰੀ ਜ਼ਮੀਨ ’ਤੇ ਕਬਜ਼ਾ ਕਰਨਾ ਹੈ ਤੇ ਇਸਨੂੰ ਜਾਨੋ ਮਾਰ ਮੁਕਾਉਣਾ ਹੈ। ਲਖੀਵਿੰਦਰ ਕੌਰ ਨੇ ਦੱਸਿਆ ਕਿ ਜਦੋਂ ਉਸਨੇ ਆਪਣੇ ਖੇਤ ’ਚ ਦੇਖਿਆ ਤਾਂ ਟਰੈਕਟਰ ਨਾਲ ਖੇਤ ’ਚ ਵਾਹਿਆ ਜਾ ਰਿਹਾ ਸੀ ਤੇ ਟਰੈਕਟਰ ਨੂੰ ਭੋਲਾ ਜਿੱਤਵਾਲ ਚਲਾ ਰਿਹਾ ਸੀ। ਇੱਕ ਹੋਰ ਟਰੈਕਟਰ ਨੂੰ ਗੁਰੀ ਪੁੱਤਰ ਰਣਜੀਤ ਸਿੰਘ ਚਲਾ ਰਿਹਾ ਸੀ। ਜਿੰਨ੍ਹਾਂ ਨੇ ਟਰੈਕਟਰਾਂ ਨਾਲ ਉਸ ਦੀ ਦੋ ਢਾਈ ਏਕੜ ਮਿੱਕੀ ਦੀ ਫ਼ਸਲ ਵਾਹ ਕੇ ਤਬਾਹ ਕਰ ਦਿੱਤੀ। ਜਦੋਂ ਉਸਨੇ ਕਬਜ਼ਾ ਕਰਨ ਆਏ ਵਿਅਕਤੀਆਂ ਨੂੰ ਅਜਿਹਾ ਕਰਨ ਤੋਂ ਰੋਕਿਆ ਤਾਂ ਉਸਦੀ ਕੁੱਟਮਾਰ ਕੀਤੀ ਗਈ। ਉਕਤ ਸਾਰੇ ਵਿਅਕਤੀਆਂ ਨੇ ਉਸ ਨੂੰ ਜੰਮ ਕੇ ਕੁੱਟਿਆਂ ਤੇ ਗੰਦੀਆਂ ਗਾਲਾਂ ਕੱਢੀਆਂ। ਲਖਵਿੰਦਰ ਕੌਰ ਨੇ ਦੱਸਿਆ ਕਿ ਜਦੋਂ ਉਸਨੇ ਬਚਾਓ ਬਚਾਓ ਦਾ ਰੋਲਾ ਪਾਹਿਆ ਤਾਂ ਪਿੰਡ ਦੇ ਕੁਝ ਵਿਅਕਤੀਆਂ ਨੇ ਆ ਕੇ ਉਨ੍ਹਾਂ ਤੋਂ ਛੁਡਾਇਆ। ਸਾਰੇ ਵਿਅਕਤੀ ਹਥਿਆਰਾਂ ਤੇ ਟਰੈਕਟਰਾਂ ਸਮੇਤ ਮੌਕੇ ਤੋਂ ਦੌੜ ਗਏ। ਉਸਦੇ ਭਰਾ ਹਰਪ੍ਰੀਤ ਸਿੰਘ ਵੱਲੋਂ ਸਿਵਲ ਹਸਪਤਾਲ ਮਲੌਦ ਦਾਖ਼ਲ ਕਰਵਾਇਆ ਗਿਆ। ਪੁਲਿਸ ਵੱਲੋਂ ਮਾਮਲਾ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।