ਬੋਗਸ ਬਿਲਿੰਗ ਮਗਰੋਂ ਵਿਦੇਸ਼ਾਂ 'ਚ ਪੈਸੇ ਭੇਜਣ ਵਾਲੀਆ ਸ਼ੱਕੀ ਕੰਪਨੀਆਂ ਦਾ ਖੁਲਾਸਾ, 394 ਕੰਪਨੀਆਂ ਤੇ 36 ਪ੍ਰੋਫੈਸ਼ਨਲਜ਼ ਦੇ ਸ਼ੱਕੀ ਲੈਣ-ਦੇਣ ਦੀ ਜਾਂਚ

ਜਗਜੀਤ ਜੰਡੂ, ਪੰਜਾਬੀ ਜਾਗਰਣ, ਲੁਧਿਆਣਾ: ਬੋਗਸ ਬਿਲਿੰਗ ਦੇ ਮਾਮਲਿਆਂ ਤੋਂ ਬਾਅਦ ਹੁਣ ਵਿਦੇਸ਼ਾਂ ਨੂੰ ਭੇਜੀ ਗਈ ਸ਼ੱਕੀ ਰਕਮ ਦੇ ਲੈਣ-ਦੇਣ ਵੀ ਜਾਂਚ ਦੇ ਘੇਰੇ ਵਿੱਚ ਆ ਗਏ ਹਨ। ਸਰਕਾਰ ਵੱਲੋਂ ਕਰੀਬ 394 ਕੰਪਨੀਆਂ ਅਤੇ 36 ਪ੍ਰੋਫੈਸ਼ਨਲਜ਼ ਦੀ ਪਛਾਣ ਕੀਤੀ ਗਈ ਹੈ, ਜਿਨ੍ਹਾਂ ਦੇ ਵਿਦੇਸ਼ੀ ਰਿਮਿਟੈਂਸ ਸ਼ੱਕੀ ਮੰਨੇ ਗਏ ਹਨ। ਕਾਗਜ਼ੀ ਕੰਪਨੀਆਂ ਵੱਲੋਂ ਵੱਡੀ ਮਾਤਰਾ ਵਿੱਚ ਵਿਦੇਸ਼ੀ ਰਕਮ ਭੇਜਣ ਦੇ ਮਾਮਲਿਆਂ ਦੀ ਵਿਸਥਾਰਤ ਜਾਂਚ ਸ਼ੁਰੂ ਕੀਤੀ ਗਈ ਹੈ।

ਆਮਦਨ ਕਰ ਵਿਭਾਗ ਮੁਤਾਬਕ ਕਈ ਕੰਪਨੀਆਂ ਦੀਆਂ ਐਲਾਨੀਆਂ ਕਾਰੋਬਾਰੀ ਗਤੀਵਿਧੀਆਂ ਅਤੇ ਵਿਦੇਸ਼ ਭੇਜੀ ਗਈ ਰਕਮ ਵਿਚਕਾਰ ਕੋਈ ਸਪੱਸ਼ਟ ਸਬੰਧ ਨਜ਼ਰ ਨਹੀਂ ਆਉਂਦਾ। ਘੱਟ ਜਾਂ ਨਗਣ ਕਾਰੋਬਾਰ ਦਿਖਾਉਣ ਵਾਲੀਆਂ ਕੰਪਨੀਆਂ ਵੱਲੋਂ ਵਿਦੇਸ਼ਾਂ ਵਿੱਚ ਵੱਡੀ ਰਕਮ ਭੇਜਣ ਨਾਲ ਸ਼ੱਕ ਹੋਰ ਡੂੰਘਾ ਹੋਇਆ ਹੈ।

ਬੋਗਸ ਬਿਲਿੰਗ ਨਾਲ ਵਿਦੇਸ਼ੀ ਰਿਮਿਟੈਂਸ ਦੀ ਕੜੀ

ਜਾਂਚ ਵਿੱਚ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਕਿ ਵਿਦੇਸ਼ ਭੇਜੀ ਗਈ ਰਕਮ ਅਸਲ ਵਿੱਚ ਕਿਸ ਕਾਰੋਬਾਰ ਜਾਂ ਸੇਵਾ ਦੇ ਬਦਲੇ ਭੇਜੀ ਗਈ ਸੀ। ਇਹ ਵੀ ਦੇਖਿਆ ਜਾ ਰਿਹਾ ਹੈ ਕਿ ਕਿਤੇ ਕੁਝ ਕੰਪਨੀਆਂ ਨੇ ਆਪਣੀਆਂ ਅਸਲ ਕਾਰੋਬਾਰੀ ਗਤੀਵਿਧੀਆਂ ਤੋਂ ਵੱਖਰੇ ਢੰਗ ਨਾਲ ਵਿਦੇਸ਼ੀ ਭੁਗਤਾਨ ਦਰਸਾ ਕੇ ਪੈਸਾ ਤਾਂ ਬਾਹਰ ਨਹੀਂ ਭੇਜਿਆ।

ਸੀਏ ਦੀ ਭੂਮਿਕਾ ਵੀ ਜਾਂਚ ਦੇ ਘੇਰੇ ’ਚ

ਮਾਮਲੇ ਵਿੱਚ 36 ਪ੍ਰੋਫੈਸ਼ਨਲਜ਼ ਦੀ ਭੂਮਿਕਾ ਵੀ ਜਾਂਚੀ ਜਾ ਰਹੀ ਹੈ। ਖ਼ਾਸ ਤੌਰ ’ਤੇ ਵਿਦੇਸ਼ੀ ਰਿਮਿਟੈਂਸ ਲਈ ਚਾਰਟਰਡ ਅਕਾਊਂਟੈਂਟ ਵੱਲੋਂ ਜਾਰੀ ਕੀਤੇ ਜਾਣ ਵਾਲੇ ਫਾਰਮ 15 ਸੀਬੀ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਹਾਲਾਂਕਿ ਜਾਂਚ ਪੂਰੀ ਹੋਣ ਤੋਂ ਪਹਿਲਾਂ ਕਿਸੇ ਸੀਏ ਜਾਂ ਪ੍ਰੋਫੈਸ਼ਨਲ ਨੂੰ ਦੋਸ਼ੀ ਮੰਨਣਾ ਉਚਿਤ ਨਹੀਂ ਹੋਵੇਗਾ।

ਇਮਾਨਦਾਰ ਕਾਰੋਬਾਰੀਆਂ ਲਈ ਵੀ ਵਧ ਸਕਦੀ ਹੈ ਕੰਪਲਾਇੰਸ

ਸਖ਼ਤੀ ਦਾ ਅਸਰ ਜਾਇਜ਼ ਕਾਰੋਬਾਰੀ ਲੈਣ-ਦੇਣ ’ਤੇ ਵੀ ਪੈ ਸਕਦਾ ਹੈ। ਵਿਦੇਸ਼ਾਂ ਵਿੱਚ ਕੰਸਲਟੈਂਸੀ ਫੀਸ, ਕਮਿਸ਼ਨ, ਰਾਇਲਟੀ ਜਾਂ ਹੋਰ ਜਾਇਜ਼ ਭੁਗਤਾਨ ਕਰਨ ਵਾਲੀਆਂ ਕੰਪਨੀਆਂ ਨੂੰ ਵਾਧੂ ਦਸਤਾਵੇਜ਼ ਮੁਹੱਈਆ ਕਰਵਾਉਣੇ ਪੈ ਸਕਦੇ ਹਨ। ਹਾਲਾਂਕਿ ਮਾਹਿਰਾਂ ਮੁਤਾਬਕ ਸਹੀ ਜਾਂਚ ਰਾਹੀਂ ਜਾਇਜ਼ ਲੈਣ-ਦੇਣ ਅਤੇ ਸ਼ੱਕੀ ਰਿਮਿਟੈਂਸ ਵਿਚਕਾਰ ਫ਼ਰਕ ਕਰਨਾ ਸੰਭਵ ਹੋਵੇਗਾ।

ਜਾਂਚ ਦੇ ਮੁੱਖ ਸਵਾਲ

ਵਿਦੇਸ਼ਾਂ ਵਿੱਚ ਅਸਲ ਵਿੱਚ ਕਿੰਨੀ ਰਕਮ ਭੇਜੀ ਗਈ?

ਰਕਮ ਭੇਜਣ ਦਾ ਮਕਸਦ ਕੀ ਸੀ?

ਵਿਦੇਸ਼ੀ ਰਕਮ ਪ੍ਰਾਪਤ ਕਰਨ ਵਾਲੇ ਕੌਣ ਹਨ?

ਕੀ ਲੈਣ-ਦੇਣ ਦਾ ਸਬੰਧ ਕਿਸੇ ਬੋਗਸ ਬਿਲਿੰਗ ਜਾਂ ਹਵਾਲਾ ਨੈੱਟਵਰਕ ਨਾਲ ਹੈ?