ਖੰਨਾ 'ਚ ਦਰਦਨਾਕ ਹਾਦਸਾ: ਫੈਕਟਰੀ ’ਚ ਕੰਮ ਕਰ ਰਹੀ ਔਰਤ ਦਾ ਸਿਰ ਮਸ਼ੀਨ ’ਚ ਫਸਿਆ, ਮੌਕੇ 'ਤੇ ਨਿਕਲਿਆ ਦਮ

ਕੁਲਵਿੰਦਰ ਸਿੰਘ ਰਾਏ, ਪੰਜਾਬੀ ਜਾਗਰਣ ਖੰਨਾ : ਰਸੂਲੜਾ-ਬਘੌਰ ਰੋਡ ’ਤੇ ਸਥਿਤ ਕਬਜ਼ਾ ਫੈਕਟਰੀ ’ਚ ਕੰਮ ਦੌਰਾਨ ਇੱਕ ਬਜ਼ੁਰਗ ਔਰਤ ਮਜ਼ਦੂਰ ਮਸ਼ੀਨ ਦੀ ਲਪੇਟ ਆ ਗਈ, ਜਿਸ ਕਾਰਨ ਉਸ ਦਾ ਸਿਰ ਬੁਰੀ ਤਰ੍ਹਾਂ ਕੁਚਲਿਆ ਗਿਆ। ਫੈਕਟਰੀ ਵਾਲਿਆਂ ਨੇ ਔਰਤ ਨੂੰ ਸਿਵਲ ਹਸਪਤਾਲ ਲਿਆਂਦਾ ਗਿਆ ਪਰ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਔਰਤ ਦੀ ਪਛਾਣ ਪਰਮਜੀਤ ਕੌਰ ਵਾਸੀ ਪਿੰਡ ਇਕੋਲਾਹਾ ਵਜੋਂ ਹੋਈ ਹੈ। ਉਸ ਦਾ ਜੱਦੀ ਪਿੰਡ ਇਕੋਲਾਹਾ ਹੈ ਪਰ ਉਹ ਇਸ ਸਮੇਂ ਮਾਜਰੀ ਪਿੰਡ ’ਚ ਕਿਰਾਏ ਦੇ ਮਕਾਨ ’ਚ ਰਹਿੰਦੀ ਸੀ। ਉਹ ਫੈਕਟਰੀ ’ਚ ਕੰਮ ਕਰਕੇ ਆਪਣਾ ਗੁਜ਼ਾਰਾ ਕਰਦੀ ਸੀ। ਇਸ ਹਾਦਸੇ ਨੇ ਉਸ ਦੇ ਪਰਿਵਾਰ ਨੂੰ ਡੂੰਘੇ ਦੁੱਖ ’ਚ ਪਾ ਦਿੱਤਾ ਹੈ। ਪੁਲਿਸ ਨੇ ਲਾਸ਼ ਨੂੰ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਖੰਨਾ ਵਿਖੇ ਰੱਖਿਆ ਹੈ।

ਐੱਸਐੱਚਓ ਥਾਣਾ ਸਦਰ ਖੰਨਾ ਵਿਜੇਪਾਲ ਸਿੰਘ ਨੇ ਦੱਸਿਆ ਪਰਿਵਾਰਕ ਮੈਂਬਰਾਂ ਦੇ ਬਿਆਨਾਂ ਦੇ ਆਧਾਰ ’ਤੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਇਸ ਹਾਦਸੇ ਤੋਂ ਬਾਅਦ ਫੈਕਟਰੀ ਪ੍ਰਬੰਧਾਂ, ਸਬੰਧਤ ਵਿਭਾਗਾਂ ਤੇ ਉਦਯੋਗਿਕ ਇਕਾਈਆਂ ’ਚ ਵਰਕਰਾਂ ਦੇ ਸੁਰੱਖਿਆ ਪ੍ਰਬੰਧਾਂ ’ਤੇ ਗੰਭੀਰ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।