ਰੋਜ਼ ਗਾਰਡਨ 'ਚ ਰੀਲ ਬਣਾ ਰਹੀਆਂ ਮਾਂ-ਧੀ ਨੂੰ ਨਿਹੰਗਾਂ ਨੇ ਰੋਕਿਆ, ਕੱਪੜਿਆਂ ਤੇ ਡਾਂਸ 'ਤੇ ਜਤਾਇਆ ਇਤਰਾਜ਼

ਜਾਗਰਣ ਸੰਵਾਦਦਾਤਾ, ਲੁਧਿਆਣਾ : ਸ਼ਹਿਰ ਦੇ ਰੋਜ਼ ਗਾਰਡਨ 'ਚ ਸੋਸ਼ਲ ਮੀਡੀਆ ਰੀਲ ਬਣਾ ਰਹੀਆਂ ਮਾਂ-ਧੀ ਨੂੰ ਕੁਝ ਨਿਹੰਗਾਂ ਵੱਲੋਂ ਰੋਕ ਕੇ ਝਾੜ ਪਾਉਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਘਟਨਾ ਐਤਵਾਰ ਦੀ ਦੱਸੀ ਜਾ ਰਹੀ ਹੈ, ਜਿਸ ਦੀ ਵੀਡੀਓ ਵੀ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀ ਹੈ।

ਜਾਣਕਾਰੀ ਅਨੁਸਾਰ, ਮਾਂ-ਧੀ ਉੱਤਰ ਪ੍ਰਦੇਸ਼ ਦੇ ਗੋਂਡਾ ਜ਼ਿਲ੍ਹੇ ਦੀਆਂ ਰਹਿਣ ਵਾਲੀਆਂ ਹਨ ਤੇ ਹਾਲ ਹੀ 'ਚ ਪੰਜਾਬ ਆਈਆਂ ਸਨ। ਐਤਵਾਰ ਨੂੰ ਉਹ ਆਪਣੇ ਰਿਸ਼ਤੇਦਾਰਾਂ ਨਾਲ ਰੋਜ਼ ਗਾਰਡਨ ਘੁੰਮਣ ਪਹੁੰਚੀਆਂ। ਇਸੇ ਦੌਰਾਨ ਦੋਵੇਂ ਸੋਸ਼ਲ ਮੀਡੀਆ ਲਈ ਡਾਂਸ ਦੀ ਰੀਲ ਬਣਾ ਰਹੀਆਂ ਸਨ। ਦੱਸਿਆ ਗਿਆ ਕਿ ਮੁਟਿਆਰ ਨੇ ਸਲੀਵਲੇਸ ਟੌਪ ਅਤੇ ਲਹਿੰਗਾ ਪਾਇਆ ਹੋਇਆ ਸੀ।

ਵਾਇਰਲ ਵੀਡੀਓ 'ਚ ਦਿਖਾਈ ਦੇ ਰਿਹਾ ਹੈ ਕਿ ਕੁਝ ਨਿਹੰਗ ਦੋਵਾਂ ਦੇ ਕੋਲ ਪਹੁੰਚੇ ਅਤੇ ਪਾਰਕ 'ਚ ਇਸ ਤਰ੍ਹਾਂ ਡਾਂਸ ਕਰਨ 'ਤੇ ਇਤਰਾਜ਼ ਜਤਾਇਆ। ਉਨ੍ਹਾਂ ਕਿਹਾ ਕਿ ਜਨਤਕ ਪਾਰਕ ਘੁੰਮਣ ਤੇ ਬੈਠਣ ਲਈ ਹੁੰਦੇ ਹਨ, ਨਾ ਕਿ ਇਸ ਪ੍ਰਕਾਰ ਦੀਆਂ ਵੀਡੀਓਜ਼ ਬਣਾਉਣ ਲਈ। ਨਿਹੰਗਾਂ ਨੇ ਮੁਟਿਆਰ ਦੇ ਪਹਿਰਾਵੇ 'ਤੇ ਵੀ ਟਿੱਪਣੀ ਕਰਦਿਆਂ ਇਸ ਨੂੰ ਅਣਉਚਿਤ ਦੱਸਿਆ ਅਤੇ ਕਿਹਾ ਕਿ ਇਸ ਤਰ੍ਹਾਂ ਦੀਆਂ ਗਤੀਵਿਧੀਆਂ ਨੂੰ ਬੜ੍ਹਾਵਾ ਨਹੀਂ ਦਿੱਤਾ ਜਾਣਾ ਚਾਹੀਦਾ।

ਦੱਸਿਆ ਜਾ ਰਿਹਾ ਹੈ ਕਿ ਨਿਹੰਗਾਂ ਦੇ ਇਤਰਾਜ਼ ਤੋਂ ਬਾਅਦ ਮਾਂ-ਧੀ ਨੇ ਡਾਂਸ ਕਰਨਾ ਬੰਦ ਕਰ ਦਿੱਤਾ। ਉਨ੍ਹਾਂ ਹੱਥ ਜੋੜ ਕੇ ਮਾਫ਼ੀ ਮੰਗੀ ਅਤੇ ਆਪਣੇ ਮੋਬਾਈਲ ਫੋਨ ਤੋਂ ਬਣਾਈ ਗਈ ਵੀਡੀਓ ਵੀ ਡਿਲੀਟ ਕਰ ਦਿੱਤੀ। ਇਸ ਤੋਂ ਬਾਅਦ ਨਿਹੰਗਾਂ ਨੇ ਉਨ੍ਹਾਂ ਨੂੰ ਚੇਤਾਵਨੀ ਦੇ ਕੇ ਜਾਣ ਦਿੱਤਾ।

ਘਟਨਾ ਦੌਰਾਨ ਨਿਹੰਗਾਂ ਨੇ ਦੋਵਾਂ ਦਾ ਮੋਬਾਈਲ ਫੋਨ ਵੀ ਦੇਖਿਆ ਤੇ ਭਵਿੱਖ ਵਿਚ ਜਨਤਕ ਪਾਰਕਾਂ 'ਚ ਅਜਿਹੀਆਂ ਰੀਲਾਂ ਜਾਂ ਡਾਂਸ ਵੀਡੀਓ ਨਾ ਬਣਾਉਣ ਦੀ ਸਲਾਹ ਦਿੱਤੀ। ਪੂਰੇ ਘਟਨਾਕ੍ਰਮ ਦੀ ਵੀਡੀਓ ਵੀ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਸਾਂਝੀ ਕੀਤੀ ਜਾ ਰਹੀ ਹੈ। ਹਾਲਾਂਕਿ, ਇਸ ਮਾਮਲੇ 'ਚ ਅਜੇ ਤਕ ਕਿਸੇ ਪੱਖ ਵੱਲੋਂ ਪੁਲਿਸ ਕੋਲ ਕੋਈ ਸ਼ਿਕਾਇਤ ਦਰਜ ਨਹੀਂ ਕਰਵਾਈ ਗਈ ਹੈ। ਪੁਲਿਸ ਵੱਲੋਂ ਵੀ ਘਟਨਾ ਨੂੰ ਲੈ ਕੇ ਕੋਈ ਅਧਿਕਾਰਤ ਬਿਆਨ ਸਾਹਮਣੇ ਨਹੀਂ ਆਇਆ ਹੈ। ਸੋਸ਼ਲ ਮੀਡੀਆ 'ਤੇ ਵਾਇਰਲ ਵੀਡੀਓ ਨੂੰ ਲੈ ਕੇ ਲੋਕ ਆਪਣੀ-ਆਪਣੀ ਰਾਏ ਪ੍ਰਗਟ ਕਰ ਰਹੇ ਹਨ।