ਕਪੂਰਥਲਾ 'ਚ ਸਨਸਨੀਖੇਜ਼ ਵਾਰਦਾਤ: ਖੇਤਾਂ 'ਚੋਂ ਮੁੜ ਰਹੇ ਨੌਜਵਾਨ 'ਤੇ ਤਾਬੜਤੋੜ ਫਾਇਰਿੰਗ, ਟਰੈਕਟਰ ਦਰੱਖਤ ਨਾਲ ਟਕਰਾਇਆ

ਜਦੋਂ ਉਹ ਜ਼ਮੀਨ ਵਾਹ ਕੇ ਧੁੱਸੀ ਬੰਨ੍ਹ 'ਤੇ ਪਰਤਿਆ, ਤਾਂ ਇੱਕ ਮੋਟਰਸਾਈਕਲ 'ਤੇ ਸਵਾਰ ਦੋ ਨੌਜਵਾਨ ਅਤੇ ਇੱਕ ਆਈ-20 (i20) ਕਾਰ 'ਚ ਸਵਾਰ ਚਾਰ ਲੋਕ ਉਸ ਦਾ ਪਿੱਛਾ ਕਰਨ ਲੱਗ ਪਏ। ਇਨ੍ਹਾਂ ਦੇ ਨਾਲ ਇੱਕ ਹੋਰ ਕਾਰ ਸੀ, ਜੋ ਕਿ ਚਿੱਕੜ 'ਚ ਫਸ ਗਈ। ਜਦੋਂ ਮੁਲਜ਼ਮਾਂ ਨੂੰ ਇਸ ਬਾਰੇ ਪਤਾ ਲੱਗਾ ਤਾਂ ਉਹ ਗੱਡੀ ਨੂੰ ਬਾਹਰ ਕੱਢਣ ਲੱਗ ਪਏ। ਇਸ ਦੌਰਾਨ ਜੋਬਨਪ੍ਰੀਤ ਨੇ ਆਪਣਾ ਟਰੈਕਟਰ ਭਜਾ ਲਿਆ ਅਤੇ ਚੱਲਦੇ ਟਰੈਕਟਰ ਤੋਂ ਹੀ ਆਪਣੇ ਤਾਏ ਦੇ ਲੜਕੇ (ਕਿੱਕੀ) ਵਾਸੀ ਲਖਣ ਕੇ ਪੱਡਾ ਨੂੰ ਫ਼ੋਨ ਕੀਤਾ। ਫ਼ੋਨ ਸੁਣਦੇ ਸਾਰ ਹੀ ਕਿੱਕੀ ਦੇ ਨਾਲ ਸਹਿਜਪਾਲ ਅਤੇ ਗੁਰਜੀਤ ਸਿੰਘ ਵੀ ਧੁੱਸੀ ਬੰਨ੍ਹ 'ਤੇ ਪਹੁੰਚ ਗਏ ਅਤੇ ਉਸ ਦਾ ਇੱਕ ਹੋਰ ਦੋਸਤ ਯੁਵਰਾਜ ਵੀ ਜੋਬਨਪ੍ਰੀਤ ਦੀ ਆਈ-20 ਕਾਰ ਲੈ ਕੇ ਉੱਥੇ ਆ ਗਿਆ। ਇਸੇ ਦੌਰਾਨ ਮੋਟਰਸਾਈਕਲ 'ਤੇ ਪਿੱਛਾ ਕਰ ਰਹੇ ਜਤਿੰਦਰਪਾਲ ਜੱਜਾ (ਵਾਸੀ ਨਡਾਲਾ) ਦੇ ਹੱਥ 'ਚ ਪਿਸਤੌਲ ਫੜੀ ਹੋਈ ਸੀ। ਜੱਜਾ ਨੇ ਜੋਬਨਪ੍ਰੀਤ ਦੀ ਕਾਰ 'ਤੇ ਫਾਇਰ ਕਰ ਦਿੱਤਾ, ਜੋ ਕਿ ਕਾਰ ਦੇ ਬੰਪਰ 'ਤੇ ਲੱਗਾ। ਇੰਨੇ ਨੂੰ ਕਿੱਕੀ ਵੀ ਕਾਰ ਲੈ ਕੇ ਉੱਥੇ ਪਹੁੰਚ ਗਿਆ। ਜਦੋਂ ਜੋਬਨਪ੍ਰੀਤ ਟਰੈਕਟਰ ਲੈ ਕੇ ਭੱਜ ਰਿਹਾ ਸੀ, ਤਾਂ ਜੱਜਾ ਨੇ ਉਸ 'ਤੇ ਫਾਇਰਿੰਗ ਕਰ ਦਿੱਤੀ, ਪਰ ਗੋਲੀ ਉਸ ਨੂੰ ਨਹੀਂ ਲੱਗੀ। ਇਸ ਕਾਰਨ ਉਸ ਦਾ ਟਰੈਕਟਰ ਬੇਕਾਬੂ ਹੋ ਕੇ ਧੁੱਸੀ ਬੰਨ੍ਹ ਤੋਂ ਹੇਠਾਂ ਉਤਰ ਗਿਆ ਅਤੇ ਸਫ਼ੈਦੇ ਦੇ ਦਰੱਖਤ ਨਾਲ ਜਾ ਟਕਰਾਇਆ। ਇੰਨੇ 'ਚ ਜੱਜਾ ਅਤੇ ਉਸ ਦੇ ਅਣਪਛਾਤੇ ਸਾਥੀ ਟਰੈਕਟਰ ਕੋਲ ਆ ਗਏ ਅਤੇ ਹੱਥਾਂ 'ਚ ਪਾਏ ਕੜਿਆਂ ਨਾਲ ਵਾਰ ਕਰਕੇ ਉਸ ਨੂੰ ਜ਼ਖ਼ਮੀ ਕਰ ਦਿੱਤਾ।