ਪਰਹਾਰ ਹਸਪਤਾਲ ਨੇ ਬਦਲੇ 1,000 ਰੋਬੋਟਿਕ ਜੋੜ

ਪੰਜਾਬੀ ਜਾਗਰਣ ਪ੍ਰਤੀਨਿਧ ਫਗਵਾੜਾ : ਫਗਵਾੜਾ ਦੇ ਪਰਹਾਰ ਹਸਪਤਾਲ ਨੇ 1,000 ਰੋਬੋਟਿਕ ਜੋੜ ਬਦਲਣ ਦੀਆਂ ਸਰਜਰੀਆਂ ਕਰਕੇ ਇਕ ਮੀਲ ਪੱਥਰ ਸਥਾਪਤ ਕੀਤਾ ਹੈ। ਇਸ ਦਾ ਜਸ਼ਨ ਮਨਾਉਣ ਲਈ ਹਸਪਤਾਲ ਪ੍ਰਬੰਧਨ ਨੇ ਫਗਵਾੜਾ ਦੇ ਇਕ ਹੋਟਲ ਵਿਚ ਇਕ ਸਮਾਰੋਹ ਦਾ ਆਯੋਜਨ ਕੀਤਾ, ਜਿਸ ਵਿਚ ਸ਼ਹਿਰ ਦੀਆਂ ਪ੍ਰਮੁੱਖ ਹਸਤੀਆਂ ਨੇ ਸ਼ਿਰਕਤ ਕੀਤੀ। ਇਕੱਠ ਨੂੰ ਸੰਬੋਧਨ ਕਰਦੇ ਹੋਏ, ਡਾ. ਰੋਹਨ ਸਿੰਘ ਪਰਹਾਰ ਨੇ ਪਿਛਲੇ 45-46 ਸਾਲਾਂ ਵਿਚ ਹਸਪਤਾਲ ਦੇ ਸਫ਼ਰ ਬਾਰੇ ਵਿਸਥਾਰ ਨਾਲ ਦੱਸਿਆ। ਉਨ੍ਹਾਂ 1,000 ਰੋਬੋਟਿਕ ਸਰਜਰੀਆਂ ਕਰਦੇ ਸਮੇਂ ਆਈਆਂ ਚੁਣੌਤੀਆਂ ਦਾ ਜ਼ਿਕਰ ਕੀਤਾ ਤੇ ਆਪਣੇ ਸਾਥੀਆਂ ਦਾ ਧੰਨਵਾਦ ਕੀਤਾ। ਉਨ੍ਹਾਂ ਨੇ ਆਪਣੇ ਸਕੂਲ ਦੇ ਅਧਿਆਪਕਾਂ ਨੂੰ ਵੀ ਯਾਦ ਕੀਤਾ ਤੇ ਸਮਾਰੋਹ ਵਿਚ ਮੌਜੂਦ ਮੈਡਮ ਨਰਿੰਦਰ ਕੌਰ ਦੇ ਨਾਲ-ਨਾਲ ਫਗਵਾੜਾ ਦੇ ਸੀਨੀਅਰ ਪੱਤਰਕਾਰ ਟੀਡੀ ਚਾਵਲਾ ਦਾ ਵਿਸ਼ੇਸ਼ ਧੰਨਵਾਦ ਕੀਤਾ। ਉਨ੍ਹਾਂ ਦੱਸਿਆ ਕਿ ਪਰਹਾਰ ਹਸਪਤਾਲ ਦੀ ਸਥਾਪਨਾ 1980-81 ਵਿਚ ਉਨ੍ਹਾਂ ਦੇ ਪਿਤਾ ਡਾ. ਅਮਰੀਕ ਸਿੰਘ ਪਰਹਾਰ ਦੁਆਰਾ ਕੀਤੀ ਗਈ ਸੀ ਤੇ ਉਨ੍ਹਾਂ ਦੇ ਹਸਪਤਾਲ ਵਿਚ ਮਰੀਜ਼ਾਂ ਦਾ ਹਮੇਸ਼ਾ ਵਿਗਿਆਨਕ ਢੰਗ ਨਾਲ ਇਲਾਜ ਕੀਤਾ ਜਾਂਦਾ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਉਹ ਸਮੇਂ ਦੇ ਨਾਲ ਤਾਲਮੇਲ ਰੱਖਦੇ ਹਨ, ਨਵੀਂ ਤਕਨਾਲੋਜੀ ਅਪਣਾਉਂਦੇ ਹਨ ਤੇ ਨਵੀਆਂ ਤਰੱਕੀਆਂ ਵਿਚ ਕਦੇ ਵੀ ਪਿੱਛੇ ਨਹੀਂ ਰਹਿੰਦੇ। ਡਾ. ਪਰਹਾਰ ਨੇ ਆਪਣੇ 10 ਸਾਲਾਂ ਦੇ ਡਾਕਟਰੀ ਕਰੀਅਰ ਬਾਰੇ ਵਿਸਥਾਰ ਵਿਚ ਦੱਸਦੇ ਹੋਏ ਕਿਹਾ ਕਿ ਉਨ੍ਹਾਂ ਨੇ ਆਪਣੇ 10 ਸਾਲਾਂ ਦੇ ਤਜ਼ਰਬੇ ਨਾਲ ਉਹ ਪ੍ਰਾਪਤ ਕੀਤਾ ਜੋ ਜ਼ਿਆਦਾਤਰ ਡਾਕਟਰ 18-20 ਸਾਲਾਂ ਵਿਚ ਪ੍ਰਾਪਤ ਕਰਦੇ ਹਨ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਨੇ ਆਪਣੀ ਮੁੱਢਲੀ ਸਿੱਖਿਆ ਫਗਵਾੜਾ ਵਿਚ ਪ੍ਰਾਪਤ ਕੀਤੀ ਤੇ ਫਿਰ 13-14 ਸਾਲ ਮੁੰਬਈ ਤੇ ਮਹਾਰਾਸ਼ਟਰ ਵਿਚ ਪੜ੍ਹਾਈ ਕਰਦਿਆਂ ਤੇ ਫਿਰ ਅਮਰੀਕਾ , ਜਰਮਨੀ, ਇਟਲੀ ਤੇ ਦੱਖਣੀ ਕੋਰੀਆ ਵਿਚ ਨਵੀਆਂ ਚੀਜ਼ਾਂ ਸਿੱਖਦੇ ਹੋਏ ਤੇ ਫਿਰ ਫਗਵਾੜਾ ਵਿਚ ਮਰੀਜ਼ਾਂ ਦਾ ਇਲਾਜ ਕਰਦੇ ਹੋਏ ਬਿਤਾਏ। ਉਨ੍ਹਾਂ ਖੁਸ਼ੀ ਪ੍ਰਗਟ ਕੀਤੀ ਕਿ ਉਨ੍ਹਾਂ ਨੇ 1,000 ਰੋਬੋਟਿਕ ਸਰਜਰੀਆਂ ਕਰਨ ਦਾ ਮੀਲ ਪੱਥਰ ਪ੍ਰਾਪਤ ਕੀਤਾ ਹੈ, ਇਹ ਇੱਕ ਅਜਿਹਾ ਕਾਰਨਾਮਾ ਹੈ ਜੋ ਉਨ੍ਹਾਂ ਤੇ ਉਨ੍ਹਾਂ ਦੇ ਸਾਥੀਆਂ ਦੀ ਸਖ਼ਤ ਮਿਹਨਤ ਨਾਲ ਸੰਭਵ ਹੋਇਆ ਹੈ। ਇਸ ਮੌਕੇ 100 ਤੋਂ ਵੱਧ ਮਰੀਜ਼ਾਂ ਨੇ ਆਪਣੇ ਵਿਚਾਰ ਸਾਂਝੇ ਕੀਤੇ। ਇਸ ਸਮਾਗਮ ਵਿਚ ਸੰਸਦ ਮੈਂਬਰ ਡਾ. ਰਾਜ ਕੁਮਾਰ ਚੱਬੇਵਾਲ, ਮੇਅਰ ਰਾਮਪਾਲ ਉੱਪਲ, ਅਮਰੀਕ ਸਿੰਘ ਪਰਹਾਰ, ਐੱਚਐੱਸ ਬਸਰਾ ਤੇ ਪਰਹਾਰ ਹਸਪਤਾਲ ਦੀ ਪੂਰੀ ਟੀਮ ਵੀ ਮੌਜੂਦ ਸੀ।