ਡਾ. ਗੋਗਨਾ ਨੇ ਦੱਸਿਆ ਹਾੜ੍ਹ ਗੁਪਤ ਨਰਾਤਿਆਂ ਦਾ ਅਧਿਆਤਮਕ ਮਹੱਤਵ

ਵਿਜੇ ਸੋਨੀ, ਪੰਜਾਬੀ ਜਾਗਰਣ ਫਗਵਾੜਾ : ਹਾੜ੍ਹ ਮਹੀਨੇ ਦੇ ਗੁਪਤ ਨਰਾਤਿਆਂ ’ਚ ਦੇਵੀ ਸਾਧਨਾ ਦਾ ਬਹੁਤ ਹੀ ਪਵਿੱਤਰ ਅਤੇ ਸ਼ਕਤੀਸ਼ਾਲੀ ਪਾਵਨ ਪਰਵ ਮੰਨਿਆ ਜਾਂਦਾ ਹੈ। ਇਹ ਨਰਾਤੇ ਖਾਸ ਤੌਰ ’ਤੇ ਉਨ੍ਹਾਂ ਸਾਧਕਾਂ ਲਈ ਮਹੱਤਵਪੂਰਨ ਹੁੰਦੇ ਹਨ ਜੋ ਮਾਂ ਦੁਰਗਾ ਦੀ ਕਿਰਪਾ, ਅਧਿਆਤਮਕ ਉੱਨਤੀ, ਮਾਨਸਿਕ ਸ਼ਾਂਤੀ ਅਤੇ ਜੀਵਨ ਦੀਆਂ ਰੁਕਾਵਟਾਂ ਤੋਂ ਮੁਕਤੀ ਦੀ ਕਾਮਨਾ ਕਰਦੇ ਹਨ। ਜਾਣਕਾਰੀ ਦਿੰਦੇ ਹੋਏ ਪ੍ਰਸਿਧ ਜੋਤਿਸ਼ ਅਚਾਰਿਆ ਡਾ. ਅਮਰਜੀਤ ਗੋਗਨਾ ਨੇ ਦੱਸਿਆ ਕਿ ਹਾੜ੍ਹ ਗੁਪਤ ਨਰਾਤੇ 2026 ਦੀ ਸ਼ੁਰੂਆਤ 15 ਜੁਲਾਈ ਤੋਂ ਹੋਵੇਗੀ ਅਤੇ ਸਮਾਪਤੀ 23 ਜੁਲਾਈ 2026 ਨੂੰ ਹੋਵੇਗੀ। ਇਨ੍ਹਾਂ ਨੌਂ ਦਿਨਾਂ ਦੌਰਾਨ ਮਾਂ ਦੁਰਗਾ ਦੇ ਵੱਖ-ਵੱਖ ਸਰੂਪਾਂ ਦੀ ਉਪਾਸਨਾ ਬਹੁਤ ਹੀ ਸ਼ੁਭ ਅਤੇ ਫਲਦਾਇਕ ਮੰਨੀ ਜਾਂਦੀ ਹੈ। ਗੁਪਤ ਨਰਾਤੇ ਕੀ ਹਨ? ਆਮ ਨਰਾਤਿਆਂ ਵਾਂਗ ਹੀ ਗੁਪਤ ਨਰਾਤੇ ਵੀ ਮਾਂ ਆਦਿ ਸ਼ਕਤੀ ਦੀ ਆਰਾਧਨਾ ਦਾ ਪਾਵਨ ਪਰਵ ਹਨ, ਪਰ ਇਨ੍ਹਾਂ ਵਿੱਚ ਸਾਧਨਾ, ਮੰਤਰ ਜਾਪ, ਧਿਆਨ ਅਤੇ ਅਧਿਆਤਮਕ ਅਨੁਸ਼ਠਾਨਾਂ ਨੂੰ ਵਿਸ਼ੇਸ਼ ਮਹੱਤਵ ਦਿੱਤਾ ਜਾਂਦਾ ਹੈ। ਇਹ ਨਰਾਤੇ ਬਾਹਰੀ ਦਿਖਾਵੇ ਨਾਲੋਂ ਵੱਧ ਅੰਦਰੂਨੀ ਸਾਧਨਾ ਅਤੇ ਆਤਮ-ਸ਼ੁੱਧੀ ’ਤੇ ਕੇਂਦਰਿਤ ਹੁੰਦੇ ਹਨ। ਇਨ੍ਹਾਂ ਨੂੰ ‘ਗੁਪਤ’ ਨਰਾਤੇ ਕਿਉਂ ਕਿਹਾ ਜਾਂਦਾ ਹੈ ਡਾ. ਗੋਗਨਾ ਅਨੁਸਾਰ, ਇਨ੍ਹਾਂ ਨੂੰ ਗੁਪਤ ਨਰਾਤੇ ਇਸ ਲਈ ਕਿਹਾ ਜਾਂਦਾ ਹੈ ਕਿਉਂਕਿ ਇਸ ਦੌਰਾਨ ਕੀਤੀ ਜਾਣ ਵਾਲੀ ਸਾਧਨਾ, ਮੰਤਰ ਸਿੱਧੀ ਅਤੇ ਅਧਿਆਤਮਕ ਅਨੁਸ਼ਠਾਨ ਆਮ ਤੌਰ ’ਤੇ ਗੁਪਤ ਰੱਖੇ ਜਾਂਦੇ ਹਨ। ਮਾਨਤਾ ਹੈ ਕਿ ਸੱਚੀ ਸ਼ਰਧਾ ਅਤੇ ਇਕਾਗਰਤਾ ਨਾਲ ਕੀਤੀ ਗਈ ਸਾਧਨਾ ਦਾ ਫਲ ਹੋਰ ਵੀ ਪ੍ਰਭਾਵਸ਼ਾਲੀ ਹੁੰਦਾ ਹੈ। ਗੁਪਤ ਨਰਾਤਿਆਂ ਦੌਰਾਨ ਕੀ ਕਰਨਾ ਚਾਹੀਦੈ ਹਰ ਰੋਜ਼ ਸਵੇਰ-ਸ਼ਾਮ ਮਾਂ ਦੁਰਗਾ ਦੀ ਪੂਜਾ ਕਰੋ। ਦੁਰਗਾ ਸਪਤਸ਼ਤੀ, ਦੁਰਗਾ ਚਾਲੀਸਾ ਜਾਂ ਦੇਵੀ ਮੰਤਰਾਂ ਦਾ ਨਿਯਮਿਤ ਪਾਠ ਕਰੋ। ਘਰ ਵਿੱਚ ਸਫ਼ਾਈ, ਸਾਤਵਿਕਤਾ ਤੇ ਸਕਾਰਾਤਮਕ ਮਾਹੌਲ ਬਣਾਈ ਰੱਖੋ। ਯਥਾਸੰਭਵ ਵਰਤ ਰੱਖੋ ਅਤੇ ਸਾਤਵਿਕ ਭੋਜਨ ਹੀ ਗ੍ਰਹਿਣ ਕਰੋ। ਕੰਨਿਆਵਾਂ, ਗਊ ਸੇਵਾ ਅਤੇ ਲੋੜਵੰਦਾਂ ਦੀ ਸੇਵਾ ਅਤੇ ਦਾਨ ਕਰੋ। ਹਰ ਰੋਜ਼ ਧਿਆਨ ਅਤੇ ਮੰਤਰ ਜਾਪ ਲਈ ਨਿਸ਼ਚਿਤ ਸਮਾਂ ਕੱਢੋ। ਕੀ ਨਹੀਂ ਕਰਨਾ ਚਾਹੀਦੈ ਗੁੱਸਾ, ਕੌੜੀ ਬੋਲੀ ਅਤੇ ਵਿਵਾਦ ਤੋਂ ਬਚੋ। ਤਾਮਸਿਕ ਭੋਜਨ, ਸ਼ਰਾਬ ਅਤੇ ਹਰ ਤਰ੍ਹਾਂ ਦੇ ਨਸ਼ਿਆਂ ਤੋਂ ਦੂਰ ਰਹੋ। ਘਰ ’ਚ ਗੰਦਗੀ ਅਤੇ ਨਕਾਰਾਤਮਕ ਮਾਹੌਲ ਨਾ ਬਣਨ ਦਿਓ। ਕਿਸੇ ਦਾ ਅਪਮਾਨ, ਧੋਖਾ ਜਾਂ ਅਨੈਤਿਕ ਕੰਮ ਨਾ ਕਰੋ। ਸਾਧਨਾ ਦੌਰਾਨ ਮਨ ਨੂੰ ਭਟਕਣ ਤੋਂ ਬਚਾਓ ਤੇ ਅਨੁਸ਼ਾਸਨ ਬਣਾਈ ਰੱਖੋ। ਜੋਤਿਸ਼ ਅਨੁਸਾਰ ਲਾਭ ਡਾ. ਅਮਰਜੀਤ ਗੋਗਨਾ ਅਨੁਸਾਰ ਗੁਪਤ ਨਰਾਤਿਆਂ ’ਚ ਸ਼ਰਧਾਪੂਰਵਕ ਕੀਤੀ ਗਈ ਪੂਜਾ ਨਾਲ ਗ੍ਰਹਿ ਦੋਸ਼ਾਂ ਦੀ ਸ਼ਾਂਤੀ ਵਿੱਚ ਸਹਾਇਤਾ ਮਿਲਦੀ ਹੈ। ਰਾਹੂ, ਕੇਤੂ ਅਤੇ ਸ਼ਨੀ ਨਾਲ ਸੰਬੰਧਿਤ ਨਕਾਰਾਤਮਕ ਪ੍ਰਭਾਵਾਂ ਵਿੱਚ ਰਾਹਤ ਮਿਲ ਸਕਦੀ ਹੈ। ਮਾਨਸਿਕ ਤਣਾਅ ਘਟਦਾ ਹੈ ਅਤੇ ਆਤਮ-ਵਿਸ਼ਵਾਸ ਵਿੱਚ ਵਾਧਾ ਹੁੰਦਾ ਹੈ। ਕਰੀਅਰ, ਕਾਰੋਬਾਰ ਅਤੇ ਆਰਥਿਕ ਉੱਨਤੀ ਦੇ ਨਵੇਂ ਮੌਕੇ ਬਣਦੇ ਹਨ। ਪਰਿਵਾਰ ਵਿੱਚ ਸੁੱਖ, ਸ਼ਾਂਤੀ ਅਤੇ ਸਕਾਰਾਤਮਕ ਊਰਜਾ ਦਾ ਸੰਚਾਰ ਹੁੰਦਾ ਹੈ। ਵਾਸਤੂ ਅਨੁਸਾਰ ਲਾਭ ਵਾਸਤੂ ਸ਼ਾਸਤਰ ਅਨੁਸਾਰ ਇਨ੍ਹਾਂ ਦਿਨਾਂ ਦੌਰਾਨ ਪੂਜਾ ਸਥਾਨ ਦੀ ਸ਼ੁੱਧਤਾ, ਦੀਵਾ ਪ੍ਰਜਵਲਿਤ ਕਰਨਾ, ਸੁਗੰਧਿਤ ਧੂਫ ਜਗਾਉਣਾ ਅਤੇ ਨਿਯਮਿਤ ਮੰਤਰ ਉਚਾਰਨ ਕਰਨ ਨਾਲ ਘਰ ਦਾ ਮਾਹੌਲ ਸਕਾਰਾਤਮਕ ਬਣਦਾ ਹੈ। ਇਸ ਨਾਲ ਨਕਾਰਾਤਮਕ ਊਰਜਾ ਘਟਦੀ ਹੈ ਅਤੇ ਪਰਿਵਾਰ ਵਿੱਚ ਆਪਸੀ ਪਿਆਰ, ਸ਼ਾਂਤੀ ਅਤੇ ਅਧਿਆਤਮਕ ਊਰਜਾ ਦਾ ਸੰਚਾਰ ਹੁੰਦਾ ਹੈ। ਗੁਪਤ ਨਰਾਤੇ ਸਿਰਫ਼ ਪੂਜਾ-ਅਰਚਨਾ ਦਾ ਪਰਵ ਹੀ ਨਹੀਂ, ਸਗੋਂ ਆਤਮ-ਚਿੰਤਨ, ਸਾਧਨਾ ਅਤੇ ਜੀਵਨ ਵਿੱਚ ਸਕਾਰਾਤਮਕ ਬਦਲਾਅ ਲਿਆਉਣ ਦਾ ਸੁਨਹਿਰੀ ਮੌਕਾ ਹਨ। ਜੇਕਰ ਸ਼ਰਧਾ, ਅਨੁਸ਼ਾਸਨ ਅਤੇ ਸਹੀ ਮਾਰਗਦਰਸ਼ਨ ਨਾਲ ਦੇਵੀ ਉਪਾਸਨਾ ਕੀਤੀ ਜਾਵੇ ਤਾਂ ਜੀਵਨ ਵਿੱਚ ਅਧਿਆਤਮਕ ਉੱਨਤੀ ਦੇ ਨਾਲ-ਨਾਲ ਸੁੱਖ, ਸ਼ਾਂਤੀ ਅਤੇ ਖੁਸ਼ਹਾਲੀ ਦਾ ਰਾਹ ਵੀ ਪੱਧਰਾ ਹੁੰਦਾ ਹੈ।