ਡੌਂਕੀ ਲਾ ਕੇ ਜਾਣ ਵਾਲੇ ਸਾਵਧਾਨ: ਜ਼ਿੰਦਗੀ ਬਣਾਉਣ ਗਏ ਪੰਜਾਬੀ ਨਾਲ ਮੈਕਸੀਕੋ 'ਚ ਵਾਪਰਿਆ ਭਾਣਾ; ਵਾਇਰਲ ਵੀਡੀਓ 'ਚ ਸੁਣਾਈ ਰੂਹ ਕੰਬਾਊ ਆਪਬੀਤੀ

ਰਾਕੇਸ਼ ਗਾਂਧੀ, ਪੰਜਾਬੀ ਜਾਗਰਣ, ਜਲੰਧਰ। ਭੋਲੇ ਭਾਲੇ ਲੋਕਾਂ ਨੂੰ ਲੱਖਾਂ ਰੁਪਏ ਲੈ ਕੇ ਦੋ ਨੰਬਰ ਵਿਚ ਵਿਦੇਸ਼ਾਂ ਵਿੱਚ ਪਹੁੰਚਾਉਣ ਵਾਲੇ ਟਰੈਵਲ ਏਜੰਟ ਇਸ ਗੱਲ ਦੀ ਪਰਵਾਹ ਨਹੀਂ ਕਰਦੇ ਕਿ ਫੜੇ ਜਾਣ ਤੇ ਉਹਨਾਂ ਦਾ ਕੀ ਹਸ਼ਰ ਹੋਵੇਗਾ। ਉਹਨਾਂ ਨੂੰ ਤਾਂ ਆਪਣੇ ਲੱਖਾਂ ਰੁਪਏ ਨਾਲ ਮਤਲਬ ਹੁੰਦਾ ਹੈ। ਅਜਿਹੇ ਏਜੈਂਟਾਂ ਦੇ ਖਿਲਾਫ ਕਈ ਵਾਰ ਸਰਕਾਰ ਵੱਲੋਂ ਕਾਰਵਾਈ ਕਰਨ ਦੇ ਹੁਕਮ ਜਾਰੀ ਕੀਤੇ ਜਾਂਦੇ ਹਨ ਪਰ ਅਜਿਹੇ ਏਜੰਟ ਆਪਣੀਆਂ ਜੇਬਾਂ ਭਰਨ ਲਈ ਕਿਸੇ ਦੀ ਵੀ ਜ਼ਿੰਦਗੀ ਦਾਅ ਤੇ ਲਗਾ ਸਕਦੇ ਹਨ।

ਇੱਕ ਅਜਿਹਾ ਹੀ ਵੀਡੀਓ ਸੋਸ਼ਲ ਮੀਡੀਆ ਤੇ ਵਾਇਰਲ ਹੋ ਰਿਹਾ ਹੈ ਜਿਸ ਵਿੱਚ ਇੱਕ ਸਿੱਖ ਨੌਜਵਾਨ ਜੋ ਕਿ ਬੁਰੀ ਹਾਲਤ ਵਿੱਚ ਜ਼ਖਮੀ ਹੈ ਆਪਣੀ ਆਪਬੀਤੀ ਸੁਣਾ ਰਿਹਾ ਹੈ ਅਤੇ ਲੋਕਾਂ ਨੂੰ ਅਪੀਲ ਕਰ ਰਿਹਾ ਹੈ ਕਿ ਕੋਈ ਵੀ ਡੋਂਕੀ ਰਾਹੀਂ ਮੈਕਸਕੋ ਵੱਲ ਨਾ ਆਵੇ। ਸੋਸ਼ਲ ਮੀਡੀਆ ਤੇ ਵਾਇਰਲ ਹੋ ਰਹੀ ਵੀਡੀਓ ਵਿੱਚ ਉਕਤ ਨੌਜਵਾਨ ਦੱਸ ਰਿਹਾ ਹੈ ਕਿ ਉਸਨੇ ਲੱਖਾਂ ਰੁਪਏ ਦੇ ਕੇ ਇਕ ਏਜੰਟ ਦੇ ਜਰੀਏ ਦੋ ਨੰਬਰ ਵਿੱਚ ਮੈਕਸਕੋ ਰਾਹੀਂ ਅੱਗੇ ਵਿਦੇਸ਼ ਜਾਣਾ ਸੀ ਪਰ ਉਹ ਮੈਕਸਕੋ ਦੇ ਜੰਗਲਾਂ ਵਿੱਚ ਹੀ ਫੜਿਆ ਗਿਆ।

ਉਸ ਨਾਲ ਕੁਝ ਗੁੰਡਾ ਟਾਈਪ ਲੋਕਾਂ ਨੇ ਇੰਨੀ ਮਾਰਕੁਟ ਕੀਤੀ ਕਿ ਹੁਣ ਉਹ ਚੱਲ ਫਿਰ ਵੀ ਨਹੀਂ ਸਕਦਾ। ਉਹ ਲੋਕਾਂ ਨੂੰ ਅਪੀਲ ਕਰ ਰਿਹਾ ਹੈ ਕਿ ਉਹ ਤਾਂ ਇਸ ਤਰਾਂ ਫਸ ਚੁੱਕਿਆ ਹੈ ਪਰ ਹੋਰ ਵੀ ਕੋਈ ਪੰਜਾਬੀ ਭਰਾ ਅਜਿਹੇ ਰਸਤਿਆਂ ਦੀ ਵਰਤੋਂ ਨਾ ਕਰੇ ਅਤੇ ਨਾ ਹੀ ਠੱਗ ਟਰੈਵਲ ਏਜੰਟਾਂ ਦੇ ਹੱਥੇ ਚੜੇ।