ਆਰਓਬੀ ਬਣਾਉਣ ਤੋਂ ਪਹਿਲਾਂ ਮਿੱਟੀ ਦੀ ਜਾਂਚ ਸ਼ੁਰੂ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਗੁਰੂ ਨਾਨਕਪੁਰਾ ਰੇਲਵੇ ਫਾਟਕ ਤੇ 48.95 ਕਰੋੜ ਰੁਪਏ ਦੀ ਲਾਗਤ ਨਾਲ ਰੇਲਵੇ ਓਵਰਬ੍ਰਿਜ (ਆਰਓਬੀ) ਬਣਾਇਆ ਜਾਣਾ ਹੈ। ਇਹ ਫਾਟਕ ਰੋਜ਼ਾਨਾ ਲਗਭਗ 140 ਰੇਲ ਗੱਡੀਆਂ ਦੇ ਲੰਘਣ ਕਾਰਨ ਬੰਦ ਰਹਿੰਦਾ ਹੈ, ਯਾਨੀ ਔਸਤ ਹਰ 10 ਮਿੰਟ ਬਾਅਦ ਫਾਟਕ ਬੰਦ ਹੋ ਜਾਂਦਾ ਹੈ। ਇਸ ਰੂਟ ਤੇ ਵਾਹਨਾਂ ਦੀ ਗਿਣਤੀ ਵੀ ਵੱਧ ਕੇ ਕਰੀਬ 4.66 ਲੱਖ ਤੱਕ ਪਹੁੰਚ ਚੁੱਕੀ ਹੈ। ਆਰਓਬੀ ਦੇ ਨਿਰਮਾਣ ਤੋਂ ਪਹਿਲਾਂ ਰਾਜ ਸਰਕਾਰ ਵੱਲੋਂ ਯੂਟਿਲਿਟੀਆਂ ਨੂੰ ਸ਼ਿਫਟ ਕਰਨ ਦਾ ਕੰਮ ਕੀਤਾ ਜਾਣਾ ਹੈ। ਇਸ ਦੇ ਨਾਲ ਹੀ ਰੇਲਵੇ ਵੱਲੋਂ ਵੀ ਸੋਇਲ ਟੈਸਟਿੰਗ, ਅਰਥਾਤ ਮਿੱਟੀ ਦੀ ਜਾਂਚ, ਸ਼ੁਰੂ ਕਰ ਦਿੱਤੀ ਗਈ ਹੈ ਤਾਂ ਜੋ ਇਹ ਪਤਾ ਲੱਗ ਸਕੇ ਕਿ ਮਿੱਟੀ ਆਰਓਬੀ ਦਾ ਭਾਰ ਝੱਲਣ ਦੇ ਯੋਗ ਹੈ ਜਾਂ ਨਹੀਂ। ਇਸ ਤੋਂ ਪਹਿਲਾਂ 2018 ਅਤੇ 2020 ’ਚ ਵੀ ਇਹ ਜਾਂਚ ਕੀਤੀ ਜਾ ਚੁੱਕੀ ਹੈ, ਪਰ ਲੰਬਾ ਸਮਾਂ ਬੀਤ ਜਾਣ ਕਾਰਨ ਮੁੜ ਜਾਂਚ ਕਰਨੀ ਲਾਜ਼ਮੀ ਸੀ। ਇਸ ਨਾਲ ਇਹ ਵੀ ਪਤਾ ਲੱਗੇਗਾ ਕਿ ਮਿੱਟੀ ਦੀ ਗੁਣਵੱਤਾ ਵਿੱਚ ਕੋਈ ਬਦਲਾਅ ਤਾਂ ਨਹੀਂ ਆਇਆ। ਇਸ ਤੋਂ ਇਲਾਵਾ ਰੇਲਵੇ ਅਧਿਕਾਰੀਆਂ ਵੱਲੋਂ ਫਾਟਕ ਦੇ ਦੋਵਾਂ ਪਾਸਿਆਂ ਮਾਰਕਿੰਗ ਦੀ ਪ੍ਰਕਿਰਿਆ ਵੀ ਪੂਰੀ ਕਰ ਲਈ ਗਈ ਹੈ। ਜ਼ਿਕਰਯੋਗ ਹੈ ਕਿ 24 ਜੂਨ ਨੂੰ ਕੇਂਦਰੀ ਰੇਲ ਰਾਜ ਮੰਤਰੀ ਰਵਨੀਤ ਸਿੰਘ ਬਿੱਟੂ ਨੇ 112.93 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣਨ ਵਾਲੇ ਗੁਰੂ ਨਾਨਕਪੁਰਾ ਬੀ-67ਏ ਅਤੇ ਗੜ੍ਹਾ ਫਾਟਕ ਐੱਸ-4 ਆਰਓਬੀ ਪ੍ਰੋਜੈਕਟਾਂ ਦਾ ਨੀਂਹ ਪੱਥਰ ਰੱਖਿਆ ਸੀ। ------------------------------- ਛੇ ਸਾਲਾਂ ਵਿੱਚ ਲਾਗਤ 30 ਕਰੋੜ ਤੋਂ ਵੱਧ ਕੇ 48.95 ਕਰੋੜ ਰੁਪਏ ਹੋਈ ਛੇ ਸਾਲ ਪਹਿਲਾਂ ਗੁਰੂ ਨਾਨਕਪੁਰਾ ਫਾਟਕ ਤੇ ਬਣਨ ਵਾਲੇ ਫਲਾਈਓਵਰ ਦੀ ਲਾਗਤ ਕਰੀਬ 30 ਕਰੋੜ ਰੁਪਏ ਤੈਅ ਕੀਤੀ ਗਈ ਸੀ। ਇਸ ਪ੍ਰੋਜੈਕਟ ਨੂੰ ਰੇਲਵੇ ਵੱਲੋਂ ਮਨਜ਼ੂਰੀ ਵੀ ਮਿਲ ਗਈ ਸੀ, ਪਰ ਰਾਜ ਸਰਕਾਰ ਦੀ ਅੰਤਿਮ ਮਨਜ਼ੂਰੀ ਨਾ ਮਿਲਣ ਕਾਰਨ ਕੰਮ ਅੱਗੇ ਨਹੀਂ ਵੱਧ ਸਕਿਆ। ਵੱਖ-ਵੱਖ ਸਰਕਾਰਾਂ ਵੱਲੋਂ ਧਿਆਨ ਨਾ ਦੇਣ ਕਰਕੇ ਹੁਣ ਇਸ ਦੀ ਲਾਗਤ ਵੱਧ ਕੇ 48.95 ਕਰੋੜ ਰੁਪਏ ਹੋ ਗਈ ਹੈ। ਉਸ ਸਮੇਂ ਇਸ ਰਸਤੇ ਤੋਂ ਕਰੀਬ ਢਾਈ ਲੱਖ ਵਾਹਨ ਗੁਜ਼ਰਦੇ ਸਨ, ਪਰ ਪੀਏਪੀ ਸਰਵਿਸ ਲੇਨ ਬੰਦ ਹੋਣ ਕਾਰਨ ਉੱਥੋਂ ਦਾ ਸਾਰਾ ਟ੍ਰੈਫਿਕ ਵੀ ਇਸੇ ਰਸਤੇ ਤੇ ਆ ਗਿਆ। ਇਸ ਕਾਰਨ ਹੁਣ ਵਾਹਨਾਂ ਦੀ ਗਿਣਤੀ ਲਗਭਗ ਪੰਜ ਲੱਖ ਤੱਕ ਪਹੁੰਚ ਗਈ ਹੈ। ਫਾਟਕ ਬੰਦ ਹੋਣ ਅਤੇ ਖੁੱਲ੍ਹਣ ਵੇਲੇ ਇੱਥੇ ਭਾਰੀ ਟ੍ਰੈਫਿਕ ਜਾਮ ਲੱਗਣਾ ਆਮ ਗੱਲ ਬਣ ਚੁੱਕੀ ਹੈ। ------------------------------- ਆਰਓਬੀ ਬਣਨ ਨਾਲ ਇਨ੍ਹਾਂ ਇਲਾਕਿਆਂ ਨੂੰ ਮਿਲੇਗੀ ਰਾਹਤ ਗੁਰੂ ਨਾਨਕਪੁਰਾ ਆਰਓਬੀ ਬਣਨ ਨਾਲ ਗੁਰੂ ਨਾਨਕਪੁਰਾ ਵੈਸਟ, ਗੁਰੂ ਨਾਨਕਪੁਰਾ ਈਸਟ, ਚੌਗਿੱਟੀ, ਭਾਰਤ ਨਗਰ, ਕਮਲ ਵਿਹਾਰ, ਬੇਅੰਤ ਨਗਰ, ਨਿਊ ਬੇਅੰਤ ਨਗਰ, ਲੱਦੇਵਾਲੀ, ਰੇਲ ਵਿਹਾਰ, ਪ੍ਰੀਤ ਐਨਕਲੇਵ, ਟਾਵਰ ਐਨਕਲੇਵ, ਧਾਲੀਵਾਲ ਕਾਲੋਨੀ, ਹਿਮਾਚਲ ਕਾਲੋਨੀ, ਯੂਨੀਵਰਸਿਟੀ ਐਨਕਲੇਵ, ਲੁਭਾਣਾ ਐਨਕਲੇਵ, ਕਰੋਲ ਬਾਗ, ਸਿਲਵਰ ਸਿਟੀ, ਸਨਸ਼ਾਈਨ ਵੈਲੀ, ਜੰਨਤ ਐਵੇਨਿਊ, ਕਿੰਗ ਸਿਟੀ, ਗ੍ਰੀਨ ਕਾਊਂਟੀ, ਗ੍ਰੀਨ ਐਵੇਨਿਊ, ਲਾਲੇਵਾਲੀ, ਨੰਗਲ ਸ਼ਾਮਾ ਸਮੇਤ ਆਲੇ-ਦੁਆਲੇ ਦੇ 20 ਪਿੰਡਾਂ ਅਤੇ 50 ਤੋਂ ਵੱਧ ਕਾਲੋਨੀਆਂ ਦੇ ਲੋਕਾਂ ਨੂੰ ਵੱਡੀ ਰਾਹਤ ਮਿਲੇਗੀ। ਇਸ ਤੋਂ ਇਲਾਵਾ ਹੁਸ਼ਿਆਰਪੁਰ ਵੱਲ ਜਾਣ ਲਈ ਇੱਕ ਸੁਗਮ ਮੁੱਖ ਰਸਤਾ ਉਪਲਬਧ ਹੋਵੇਗਾ। ਨਾਲ ਹੀ ਟ੍ਰੈਫਿਕ ਦਾ ਦਬਾਅ ਰਾਮਾਮੰਡੀ ਵਾਲੇ ਰਸਤੇ ਤੇ ਘਟੇਗਾ ਅਤੇ ਵਾਹਨਾਂ ਦੀ ਆਵਾਜਾਈ ਦੋ ਹਿੱਸਿਆਂ ਵਿੱਚ ਵੰਡ ਜਾਣ ਕਾਰਨ ਜਾਮ ਦੀ ਸਮੱਸਿਆ ਵਿੱਚ ਵੀ ਕਮੀ ਆਵੇਗੀ।