ਸਿਵਲ ਹਸਪਤਾਲ ਦੀ ਸੜਕ ’ਤੇ ਪਏ ਚਿੱਕੜ ਤੋਂ ਲੋਕ ਪਰੇਸ਼ਾਨ

ਜਾਗਰਣ ਸੰਵਾਦਦਾਤਾ, ਜਲੰਧਰ : ਪ੍ਰੀ-ਮੌਨਸੂਨ ਦੇ ਮੀਂਹ ਨੇ ਗਰਮੀ ਤੋਂ ਰਾਹਤ ਤਾਂ ਜ਼ਰੂਰ ਦਿੱਤੀ, ਪਰ ਇਸ ਨਾਲ ਲੋਕਾਂ ਲਈ ਕਈ ਸਮੱਸਿਆਵਾਂ ਵੀ ਖੜ੍ਹੀਆਂ ਕੀਤੀਆਂ ਹਨ। ਮੀਂਹ ਪੈਣ ਕਾਰਨ ਸਿਵਲ ਹਸਪਤਾਲ ਦੀਆਂ ਸੜਕਾਂ ਦੀ ਹਾਲਤ ਵਿਗੜ ਗਈ ਹੈ। ਹਸਪਤਾਲ ’ਚ ਚੱਲ ਰਹੇ ਸੀਵਰੇਜ ਦੇ ਕੰਮ ਕਾਰਨ ਸੜਕਾਂ ਦੀ ਪੁਟਾਈ ਮੀਂਹ ਪੈਣ ਤੋਂ ਬਾਅਦ ਇਕ ਵੱਡੀ ਸਮੱਸਿਆ ਬਣ ਗਈ ਹੈ। ਮੀਂਹ ਨਾਲ ਸਿਵਲ ਹਸਪਤਾਲ ’ਚ ਲੱਗੇ ਮਿੱਟੀ ਦੇ ਢੇਰ ਚਿੱਕੜ ’ਚ ਬਦਲ ਗਏ ਹਨ। ਇਸ ਕਾਰਨ ਸ਼ਵਗ੍ਰਿਹ ਵਾਲੇ ਰਸਤੇ 'ਤੇ ਲੋਕਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ।

ਹਾਲਾਂਕਿ, ਸਿਵਲ ਹਸਪਤਾਲ ਪ੍ਰਸ਼ਾਸਨ ਨੇ ਕੁਝ ਸਮੇਂ ਲਈ ਰਸਤਾ ਬੰਦ ਰੱਖਿਆ। ਪਾਰਕਿੰਗ ਠੇਕੇਦਾਰ ਨੇ ਵਾਹਨਾਂ ਦੀ ਸਮੱਸਿਆ ਨੂੰ ਦੇਖਦੇ ਹੋਏ ਇਸਨੂੰ ਦੋਪਹੀਆ ਵਾਹਨਾਂ ਲਈ ਖੋਲ੍ਹ ਦਿੱਤਾ ਸੀ। ਇਸ ਰਸਤੇ ਤੋਂ ਦੋਪਹੀਆ ਵਾਹਨਾਂ ਤੇ ਪੈਦਲ ਜਾਣ ਵਾਲੇ ਲੋਕਾਂ ਨੂੰ ਵੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਉੱਥੋਂ ਪੈਦਲ ਕ੍ਰਿਸ਼ਨਾ ਲੈਬ, ਫਿਜੀਓਥੈਰੇਪੀ ਸੈਂਟਰ, ਮੌਰਚਰੀ ਘਰ ਤੇ ਜੱਚਾ-ਬੱਚਾ ਸੈਂਟਰ ਜਾਣ ਵਾਲੇ ਲੋਕਾਂ ਨੂੰ ਕਾਫੀ ਮੁਸ਼ਕਲਾਂ ਝੱਲਣੀਆਂ ਪਈਆਂ। ਬਹੁਤ ਸਾਰੇ ਲੋਕਾਂ ਨੂੰ ਜੱਚਾ-ਬੱਚਾ ਸੈਂਟਰ ਪੁੱਜਣ ਲਈ ਲੰਬਾ ਰਸਤਾ ਤੈਅ ਕਰਨਾ ਪਿਆ। ਜੱਚਾ-ਬੱਚਾ ਸੈਂਟਰ ’ਚ ਦਾਖ਼ਲ ਹੋਣ ਵਾਲੀ ਔਰਤ ਮਰੀਜ਼ ਦੇ ਭਰਾ ਸਤਨਾਮ ਸਿੰਘ ਨੇ ਕਿਹਾ ਕਿ ਰਾਤ ਨੂੰ ਜਦੋਂ ਉਹ ਹਸਪਤਾਲ ਆਏ, ਤਾਂ ਇਸ ਰਸਤੇ 'ਤੇ ਪਾਣੀ ਤੇ ਚਿੱਕੜ ਕਾਫੀ ਜਮ੍ਹਾਂ ਸੀ। ਸੈਂਟਰ ’ਚ ਜਾਣ ਲਈ ਦੂਜਾ ਰਸਤਾ ਵੀ ਨਹੀਂ ਪਤਾ ਸੀ। ਉਨ੍ਹਾਂ ਨੂੰ ਚਿੱਕੜ ’ਚੋਂ ਹੋ ਕੇ ਜਾਣਾ ਪਿਆ ਤੇ ਸਾਰੇ ਕੱਪੜੇ ਖਰਾਬ ਹੋ ਗਏ।

ਇਸੇ ਤਰ੍ਹਾਂ, ਚਾਰ ਪਹੀਆ ਵਾਹਨਾਂ ਦੀ ਪਾਰਕਿੰਗ ਲਈ ਵੀ ਲੋਕਾਂ ਨੂੰ ਕਾਫ਼ੀ ਮੁਸ਼ਕਲਾਂ ਝੱਲਣੀਆਂ ਪਈਆਂ। ਇਸ ਕਾਰਨ ਹਸਪਤਾਲ ’ਚ ਦਿਨ ਵੇਲੇ ਕਈ ਵਾਰੀ ਟ੍ਰੈਫਿਕ ਜਾਮ ਵੀ ਲੱਗਣ ਲੱਗਾ ਹੈ। ਸਿਵਲ ਹਸਪਤਾਲ ਦੀ ਐੱਮਐੱਸ ਡਾ. ਨਮਿਤਾ ਘਈ ਨੇ ਕਿਹਾ ਕਿ ਠੇਕੇਦਾਰ ਨੂੰ ਕਈ ਵਾਰੀ ਸੱਦ ਕੇ ਕੰਮ ਜਲਦੀ ਪੂਰਾ ਕਰਨ ਲਈ ਹਦਾਇਤਾਂ ਦਿੱਤੀਆਂ ਜਾ ਚੁੱਕੀਆਂ ਹਨ। ਉਨ੍ਹਾਂ ਨੂੰ ਮੌਨਸੂਨ ਤੋਂ ਪਹਿਲਾਂ ਕੰਮ ਖਤਮ ਕਰਨ ਦੀ ਗੱਲ ਕੀਤੀ ਜਾਵੇਗੀ, ਤਾਂ ਜੋ ਮਰੀਜ਼ਾਂ ਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਨੂੰ ਕੋਈ ਸਮੱਸਿਆ ਨਾ ਹੋਵੇ। ਹਸਪਤਾਲ ਦੇ ਸੁਰੱਖਿਆ ਮੁਲਾਜ਼ਮਾਂ ਨੂੰ ਟ੍ਰੈਫਿਕ ਜਾਮ ਦੀ ਸਮੱਸਿਆ ਦਾ ਹੱਲ ਕਰਨ ਦੀ ਹਦਾਇਤ ਦਿੱਤੀ ਗਈ ਹੈ।