ਲੰਮਾ ਪਿੰਡ-ਪਠਾਨਕੋਟ ਚੌਕ ਐਂਟਰੀ ਤੇ ਸ਼ਹੀਦ ਭਗਤ ਸਿੰਘ ਚੌਕ ਦਾ ਹੋਵੇਗਾ ਸੁੰਦਰੀਕਰਨ

ਜਾਸ, ਜਾਲੰਧਰ : ਸ਼ਹਿਰ ਦੇ ਸਾਰੇ ਚੌਕ-ਚੌਰਾਹਿਆਂ ਅਤੇ ਐਂਟਰੀ ਪੁਆਇੰਟਾਂ ਨੂੰ ਖੂਬਸੂਰਤ ਬਣਾਉਣ ਦੀ ਯੋਜਨਾ ਤਹਿਤ ਨਗਰ ਨਿਗਮ ਦਾ ਅਗਲਾ ਧਿਆਨ ਲੰਮਾ ਪਿੰਡ ਚੌਕ ਤੇ ਪਠਾਨਕੋਟ ਚੌਕ ’ਚ ਐਂਟਰੀ ਪੁਆਇੰਟਾਂ ਦੀ ਸੁੰਦਰਤਾ ਵਧਾਉਣ ’ਤੇ ਹੈ। ਇਸ ਦੇ ਨਾਲ-ਨਾਲ, ਦੋਆਬਾ ਚੌਕ ਦੇ ਨੇੜਲੇ ਇਲਾਕੇ ਤੇ ਸ਼ਹੀਦ ਭਗਤ ਸਿੰਘ ਚੌਕ ਨੂੰ ਵੀ ਖੂਬਸੂਰਤ ਬਣਾਇਆ ਜਾਵੇਗਾ। ਇਹ ਸਾਰੇ ਕੰਮ ਨਗਰ ਨਿਗਮ ਖ਼ੁਦ ਕਰਵਾਏਗਾ। ਇਸ ਲਈ ਡਿਜ਼ਾਈਨ ਤਿਆਰ ਕਰਵਾ ਲਿਆ ਗਿਆ ਹੈ ਤੇ ਛੇਤੀ ਹੀ ਸੁੰਦਰਤਾ ਵਧਾਉਣ ਦਾ ਕੰਮ ਸ਼ੁਰੂ ਕੀਤਾ ਜਾਵੇਗਾ।

ਲੰਮਾ ਪਿੰਡ ਚੌਕ ’ਤੇ ਪਹਿਲਾਂ ਐਂਟਰੀ ਗੇਟ ਬਣਾਉਣ ਦਾ ਯੋਜਨਾ ਸੀ ਪਰ ਹੁਣ ਪੂਰੇ ਰਸਤੇ ਅਤੇ ਚੌਰਾਹੇ ਨੂੰ ਖੂਬਸੂਰਤ ਬਣਾਇਆ ਜਾਵੇਗਾ। ਇਕ ਪਾਸੇ ਆਕਰਸ਼ਕ ਡਿਜ਼ਾਈਨਿੰਗ ਕੀਤੀ ਜਾਵੇਗੀ। ਲੰਮਾ ਪਿੰਡ ਚੌਕ ਦੀ ਹਾਲਤ ਇਸ ਸਮੇਂ ਬਹੁਤ ਖਰਾਬ ਹੈ ਤੇ ਇਸ ਦੇ ਨਾਲ ਪਠਾਨਕੋਟ ਚੌਕ ਦੀ ਮੁੱਖ ਐਂਟਰੀ ਵੀ ਖੂਬਸੂਰਤ ਬਣਾਇਆ ਜਾਵੇਗਾ। ਇੱਥੇ ਗਰਿੱਲ ਤੇ ਲਾਈਟਾਂ ਲਗਾਉਣ ਦੇ ਨਾਲ-ਨਾਲ ਇਕ ਕੋਨੇ ’ਤੇ ਡਿਜ਼ਾਈਨਿੰਗ ਵੀ ਕੀਤੀ ਜਾਵੇਗੀ। ਇਸ ਰਸਤੇ ’ਤੇ ਅੱਗੇ ਦੋਆਬਾ ਚੌਕ ਦੇ ਆਲੇ-ਦੁਆਲੇ ਲਾਈਟਾਂ ਲਗਾਈਆਂ ਜਾਣਗੀਆਂ ਅਤੇ ਗ੍ਰੀਨ ਬੈਲਟ ਦਾ ਵਿਕਾਸ ਕਰਕੇ ਪੂਰੇ ਖੇਤਰ ਨੂੰ ਨਵਾਂ ਰੂਪ ਦਿੱਤਾ ਜਾਵੇਗਾ।

ਜ਼ਿਕਰਯੋਗ ਹੈ ਕਿ ਦੋਆਬਾ ਚੌਕ ਨੂੰ ਪਹਿਲਾਂ ਹੀ ਨਵੇਂ ਰੂਪ ਵਿਚ ਜਨਤਾ ਨੂੰ ਸਮਰਪਿਤ ਕੀਤਾ ਜਾ ਚੁੱਕਾ ਹੈ। ਇੱਥੇ ਸੰਗੀਤਕ ਯੰਤਰ ਸਥਾਪਿਤ ਕੀਤੇ ਗਏ ਹਨ। ਇਹ ਚੌਕ ਪ੍ਰਸਿੱਧ ਬਾਬਾ ਸ਼੍ਰੀ ਹਰਿਵੱਲਭ ਸੰਗੀਤ ਸੰਮੇਲਨ ਨੂੰ ਸਮਰਪਿਤ ਹੈ।

ਸ਼ਹੀਦ ਭਗਤ ਸਿੰਘ ਚੌਕ ਦੇ ਆਲੇ-ਦੁਆਲੇ ਵੀ ਸੁੰਦਰਤਾ ਵਧਾਈ ਜਾਵੇਗੀ। ਹਾਲਾਂਕਿ ਚੌਕ ਵਿਚ ਕੋਈ ਬਦਲਾਅ ਨਹੀਂ ਕੀਤਾ ਜਾਵੇਗਾ ਪਰ ਨੇੜਲੇ ਇਲਾਕੇ ਵਿਚ ਗ੍ਰੀਨ ਗਰਿੱਲ ਅਤੇ ਲਾਈਟਿੰਗ ਦਾ ਕੰਮ ਕੀਤਾ ਜਾਵੇਗਾ। ਦੁਕਾਨਦਾਰਾਂ ਅਤੇ ਸਥਾਨਕ ਲੋਕਾਂ ਨੇ ਕਈ ਵਾਰੀ ਚੌਕ ਦੇ ਆਲੇ-ਦੁਆਲੇ ਸੁੰਦਰਤਾ ਵਧਾਉਣ ਦੀ ਮੰਗ ਕੀਤੀ ਸੀ। ਉਨ੍ਹਾਂ ਦੀ ਲਗਾਤਾਰ ਅਪੀਲ ਦੇ ਬਾਅਦ ਹੁਣ ਨਗਰ ਨਿਗਮ ਨੇ ਇਸ ਇਲਾਕੇ ਨੂੰ ਵੀ ਯੋਜਨਾ ਵਿਚ ਸ਼ਾਮਲ ਕੀਤਾ ਹੈ। ਨਗਰ ਨਿਗਮ ਦਾ ਟੀਚਾ ਸ਼ਹਿਰ ਦੇ ਦਾਖਲੇ ਅਤੇ ਪ੍ਰਮੁੱਖ ਚੌਕਾਂ ਨੂੰ ਆਧੁਨਿਕ ਅਤੇ ਆਕਰਸ਼ਕ ਬਣਾ ਕੇ ਜਾਲੰਧਰ ਦੀ ਪਛਾਣ ਨੂੰ ਹੋਰ ਬਿਹਤਰ ਕਰਨਾ ਹੈ। ਇਸ ਤੋਂ ਪਹਿਲਾਂ, ਨਗਰ ਨਿਗਮ ਸ਼੍ਰੀ ਸਿੱਧ ਬਾਬਾ ਸੋਡਲ ਚੌਕ ਦੇ ਨਿਰਮਾਣ ਦਾ ਕੰਮ ਸ਼ੁਰੂ ਕਰ ਚੁੱਕਾ ਹੈ। ਇਹ ਚੌਕ ਸੋਡਲ ਮੇਲੇ ਤੋਂ ਪਹਿਲਾਂ ਪੂਰਾ ਕੀਤਾ ਜਾਵੇਗਾ। ਇਸ ਦਾ ਪੂਰਾ ਖਰਚਾ ਨਗਰ ਨਿਗਮ ਚੁੱਕ ਰਿਹਾ ਹੈ।

ਸਾਰੇ ਐਂਟਰੀ ਪੁਆਇੰਟਾਂ 'ਤੇ ਗੇਟ ਬਣਾਉਣ ਦਾ ਫੈਸਲਾ

ਮੇਅਰ ਵਨੀਤ ਧੀਰ ਨੇ ਕਰੀਬ ਇਕ ਸਾਲ ਪਹਿਲਾਂ ਇਹ ਫੈਸਲਾ ਲਿਆ ਸੀ ਕਿ ਸ਼ਹਿਰ ਦੇ ਸਾਰੇ ਐਂਟਰੀ ਪੁਆਇੰਟਾਂ 'ਤੇ ਸਵਾਗਤੀ ਗੇਟ ਬਣਾਏ ਜਾਣਗੇ। ਇਸ ਲਈ ਨਗਰ ਨਿਗਮ ਨੇ ਪੰਜ ਸਥਾਨਾਂ - ਪੀਏਪੀ ਚੌਕ, ਹੋਸ਼ਿਆਰਪੁਰ ਰੋਡ ਤੋਂ ਸ਼ਹਿਰ ਵਿਚ ਐਂਟਰੀ, ਨਕੋਦਰ ਰੋਡ ਤੋਂ ਸ਼ਹਿਰ ਵਿਚ ਐਂਟਰੀ, ਕਪੂਰਥਲਾ ਰੋਡ ਤੋਂ ਐਂਟਰੀ ਅਤੇ ਮਕਸੂਦਾਂ ਨੂੰ ਤੈਅ ਕੀਤਾ ਸੀ। ਹਾਲਾਂਕਿ ਇਸ 'ਤੇ ਹੁਣ ਤੱਕ ਕੰਮ ਨਹੀਂ ਹੋਇਆ ਹੈ।

ਸ਼ਹਿਰ ਦੀਆਂ ਸਾਰੀਆਂ ਐਂਟਰੀਆਂ ਨੂੰ ਖੂਬਸੂਰਤ ਬਣਾਉਣ ਦੇ ਪ੍ਰੋਜੈਕਟ ਦੇ ਤਹਿਤ ਹੀ ਨਗਰ ਨਿਗਮ ਨੇ ਵੈਲਕਮ ਗੇਟ ਬਣਾਉਣ ਦੀ ਯੋਜਨਾ ਬਣਾਈ ਸੀ। ਹਾਲਾਂਕਿ ਇਸ ’ਤੇ ਵੀ ਕੰਮ ਸ਼ੁਰੂ ਨਹੀਂ ਹੋਇਆ ਹੈ। ਮੇਅਰ ਨੇ ਕਿਹਾ ਸੀ ਕਿ ਇਹ ਗੇਟ ਸ਼ਹਿਰ ਦੇ ਇਤਿਹਾਸ, ਸੰਸਕ੍ਰਿਤੀ, ਪਛਾਣ, ਉਦਯੋਗ ਅਤੇ ਖੇਡਾਂ ਦੇ ਥੀਮ ’ਤੇ ਬਣਾਏ ਜਾਣਗੇ। ਗੇਟਾਂ ਦੇ ਨਿਰਮਾਣ ਲਈ ਇਕ ਕਮੇਟੀ ਦਾ ਗਠਨ ਵੀ ਕੀਤਾ ਜਾਣਾ ਹੈ। ਇਸ ਕਮੇਟੀ ਨੇ ਸ਼ਹਿਰ ਦੇ ਪ੍ਰਮੁੱਖ ਲੋਕਾਂ ਤੋਂ ਰਾਏ ਲੈ ਕੇ ਗੇਟ ਦੀ ਥੀਮ ਫਾਈਨਲ ਕਰਨੀ ਹੈ। ਇਨ੍ਹਾਂ ਦੀ ਥੀਮ ਵਿਚ ਸ਼ਹਿਰ ਵਿਚ ਵਿਸ਼ਵ ਪ੍ਰਸਿੱਧ ਧਾਰਮਿਕ ਸਥਾਨ, ਖੇਡ ਉਦਯੋਗ, ਹੈਂਡ ਟੂਲਜ਼, ਵਾਲਵ ਅਤੇ ਕਾਕਸ, ਪਾਈਪ ਫਿਟਿੰਗ ਉਦਯੋਗ ਸ਼ਾਮਲ ਹਨ।