ਜਲੰਧਰ 'ਚ ਗ਼ਜ਼ਬ ਦੀ ਖੇਡ! ਮ੍ਰਿਤਕ ਦੇ ਫਰਜ਼ੀ ਆਧਾਰ ਨਾਲ ਕਰਵਾਈ ਪਲਾਟ ਦੀ ਰਜਿਸਟਰੀ; ਸਾਬਕਾ ਕੌਂਸਲਰ ਸਮੇਤ ਚਾਰ 'ਤੇ ਕੇਸ

ਜਾਸ, ਜਲੰਧਰ: ਰਾਮਾਮੰਡੀ ਦੇ ਨਜ਼ਦੀਕੀ ਨੰਗਲਸ਼ਾਮਾ ਵਿੱਚ ਇੱਕ ਮ੍ਰਿਤਕ ਵਿਅਕਤੀ ਜਮਨਾ ਦਾਸ ਨੂੰ ਕਾਗਜ਼ਾਂ ਵਿੱਚ ਜ਼ਿੰਦਾ ਦਿਖਾ ਕੇ ਉਸ ਦੀ 17 ਮਰਲੇ ਜ਼ਮੀਨ ਦੀ ਰਜਿਸਟਰੀ ਕਰਵਾਉਣ ਦੇ ਦੋਸ਼ ਵਿੱਚ ਥਾਣਾ ਬਾਰਾਦਰੀ ਦੀ ਪੁਲਿਸ ਨੇ ਕਾਂਗਰਸ ਦੇ ਸਾਬਕਾ ਕੌਂਸਲਰ ਮੰਦੀਪ ਕੁਮਾਰ ਜੱਸਲ ਸਮੇਤ ਚਾਰ ਮੁਲਜ਼ਮਾਂ ਖ਼ਿਲਾਫ਼ ਧੋਖਾਧੜੀ ਦਾ ਮਾਮਲਾ ਦਰਜ ਕੀਤਾ ਹੈ।

ਮੁਲਜ਼ਮਾਂ ਵਿੱਚ ਬਸੰਤ ਵਿਹਾਰ ਦਾ ਰਹਿਣ ਵਾਲਾ ਫਰਜ਼ੀ ਜਮਨਾ ਦਾਸ, ਪਿੰਡ ਸਮਰਾਏ ਦਾ ਹਰਜਿੰਦਰ ਕੁਮਾਰ ਅਤੇ ਭੋਗਪੁਰ ਦਾ ਗੁਰਿੰਦਰ ਸਿੰਘ ਸ਼ਾਮਲ ਹਨ। ਉਕਤ ਮੁਲਜ਼ਮਾਂ ਨੇ ਮ੍ਰਿਤਕ ਜਮਨਾ ਦਾਸ ਦਾ ਫਰਜ਼ੀ ਆਧਾਰ ਕਾਰਡ ਬਣਾ ਕੇ ਅਤੇ ਕਿਸੇ ਹੋਰ ਵਿਅਕਤੀ ਨੂੰ ਪੇਸ਼ ਕਰਕੇ ਜਾਇਦਾਦ ਦੀ ਰਜਿਸਟਰੀ ਕਰਵਾ ਕੇ ਧੋਖਾਧੜੀ ਕੀਤੀ। ਜਮਨਾ ਦਾਸ ਦੀ ਮਈ 2023 ਵਿੱਚ ਮੌਤ ਹੋਣ ਤੋਂ ਬਾਅਦ, ਸਤੰਬਰ 2024 ਵਿੱਚ ਤਹਿਸੀਲ-1 ਦਫ਼ਤਰ ਵਿੱਚ ਉਨ੍ਹਾਂ ਨੂੰ ਜ਼ਿੰਦਾ ਦਿਖਾ ਕੇ ਜ਼ਮੀਨ ਦੀ ਰਜਿਸਟਰੀ ਕਰਵਾਈ ਗਈ ਸੀ।

ਮ੍ਰਿਤਕ ਜਮਨਾ ਦਾਸ ਦੇ ਰਿਸ਼ਤੇਦਾਰ ਵਿਜੇ ਭਾਟੀਆ ਦੀ ਸ਼ਿਕਾਇਤ 'ਤੇ ਡੀਸੀ ਡਾ. ਹਿਮਾਂਸ਼ੂ ਅਗਰਵਾਲ ਨੇ ਜਾਂਚ ਦੇ ਹੁਕਮ ਦਿੱਤੇ ਸਨ। ਉਦੋਂ ਸੀਐਮ ਫੀਲਡ ਅਫ਼ਸਰ ਨਵਦੀਪ ਸਿੰਘ ਅਤੇ ਜ਼ਿਲ੍ਹਾ ਮਾਲ ਅਫ਼ਸਰ ਨਵਦੀਪ ਸਿੰਘ ਭੋਗਲ ਦੀ ਜਾਂਚ ਰਿਪੋਰਟ ਵਿੱਚ ਰਜਿਸਟਰੀ ਦੇ ਇਸ ਫਰਜ਼ੀਵਾੜੇ ਦਾ ਖੁਲਾਸਾ ਹੋਇਆ।

ਮ੍ਰਿਤਕ ਜਮਨਾ ਦਾਸ ਦੇ ਰਿਸ਼ਤੇਦਾਰ ਵਿਜੇ ਭਾਟੀਆ ਦੀ ਸ਼ਿਕਾਇਤ 'ਤੇ ਡੀਸੀ ਡਾ. ਹਿਮਾਂਸ਼ੂ ਅਗਰਵਾਲ ਨੇ ਜਾਂਚ ਦੇ ਹੁਕਮ ਦਿੱਤੇ ਸਨ। ਉਦੋਂ ਸੀਐਮ ਫੀਲਡ ਅਫ਼ਸਰ ਨਵਦੀਪ ਸਿੰਘ ਅਤੇ ਜ਼ਿਲ੍ਹਾ ਮਾਲ ਅਫ਼ਸਰ (ਡੀਆਰਓ) ਨਵਦੀਪ ਸਿੰਘ ਭੋਗਲ ਦੀ ਜਾਂਚ ਰਿਪੋਰਟ ਵਿੱਚ ਰਜਿਸਟਰੀ ਦੇ ਫਰਜ਼ੀਵਾੜੇ ਦਾ ਖੁਲਾਸਾ ਹੋਇਆ ਸੀ।

ਇਸ ਤੋਂ ਬਾਅਦ ਡੀਸੀ ਦੇ ਹੁਕਮਾਂ 'ਤੇ ਡੀਆਰਓ ਨਵਦੀਪ ਸਿੰਘ ਭੋਗਲ ਨੇ 16 ਜਨਵਰੀ ਨੂੰ ਪੁਲਿਸ ਕਮਿਸ਼ਨਰ ਧਨਪ੍ਰੀਤ ਕੌਰ ਨੂੰ ਜਾਂਚ ਰਿਪੋਰਟ ਭੇਜ ਕੇ ਪਰਚਾ ਦਰਜ ਕਰਨ ਦੀ ਸਿਫ਼ਾਰਸ਼ ਕੀਤੀ ਸੀ। ਇਸ ਦੇ 25 ਦਿਨਾਂ ਦੇ ਲੰਬੇ ਇੰਤਜ਼ਾਰ ਤੋਂ ਬਾਅਦ ਥਾਣਾ ਬਾਰਾਦਰੀ ਦੀ ਪੁਲਿਸ ਨੇ ਪਰਚਾ ਦਰਜ ਕੀਤਾ ਹੈ। ਇਸ ਫਰਜ਼ੀ ਰਜਿਸਟਰੀ ਨੂੰ ਰੱਦ ਕਰਨ ਦੀ ਪ੍ਰਕਿਰਿਆ ਵੀ ਸ਼ੁਰੂ ਕਰ ਦਿੱਤੀ ਗਈ ਹੈ। ਇਸੇ ਦੌਰਾਨ ਜਿਸ ਨੰਬਰਦਾਰ ਨੇ ਗਲਤ ਗਵਾਹੀ ਪਾਈ ਸੀ, ਉਸ ਨੰਬਰਦਾਰ ਗੁਰਦੇਵ ਸਿੰਘ ਨੂੰ ਵੀ ਸਸਪੈਂਡ ਕਰ ਦਿੱਤਾ ਗਿਆ ਹੈ ਅਤੇ ਹੁਣ ਉਸ ਨੂੰ ਬਰਖਾਸਤ ਕਰਨ ਦੀ ਕਾਰਵਾਈ ਚੱਲ ਰਹੀ ਹੈ।

ਧੋਖਾ ਮੇਰੇ ਨਾਲ ਹੋਇਆ ਹੈ: ਜੱਸਲ

ਮੁਲਜ਼ਮਾਂ ਵਿੱਚ ਮਨਦੀਪ ਕੁਮਾਰ ਜੱਸਲ ਦਾ ਨਾਮ ਸ਼ਾਮਲ ਹੈ, ਜੋ ਰਾਮਾਮੰਡੀ ਇਲਾਕੇ ਦੇ ਵਾਰਡ ਨੰਬਰ 10 ਤੋਂ ਕਾਂਗਰਸ ਦਾ ਕੌਂਸਲਰ ਰਹਿ ਚੁੱਕਾ ਹੈ। ਉਸ ਨੇ ਪਿਛਲੀਆਂ ਚੋਣਾਂ ਵਿੱਚ ਵਾਰਡ ਨੰਬਰ ਅੱਠ ਤੋਂ ਵੀ ਕੌਂਸਲਰ ਦੀ ਚੋਣ ਲੜੀ ਸੀ, ਜਿਸ ਵਿੱਚ ਉਸ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।

ਪਰਚਾ ਦਰਜ ਹੋਣ ਬਾਰੇ ਜੱਸਲ ਦਾ ਕਹਿਣਾ ਹੈ ਕਿ "ਧੋਖਾ ਤਾਂ ਉਹਨਾਂ ਦੇ ਨਾਲ ਹੋਇਆ ਹੈ।" ਉਸ ਨੇ 22.10 ਲੱਖ ਰੁਪਏ ਦੇ ਕੇ ਪਲਾਟ ਖਰੀਦਿਆ ਸੀ ਅਤੇ ਸਾਰੀ ਅਦਾਇਗੀ ਬੈਂਕ ਖਾਤੇ ਰਾਹੀਂ ਹੋਈ ਹੈ, ਜਿਸ ਦਾ ਕਾਗਜ਼ੀ ਸਬੂਤ ਉਹਨਾਂ ਕੋਲ ਹੈ। ਇਸ ਸਬੰਧੀ ਉਹਨਾਂ ਨੇ ਪਹਿਲਾਂ ਹੀ ਮਈ 2025 ਵਿੱਚ ਸੀਪੀ (ਪੁਲਿਸ ਕਮਿਸ਼ਨਰ) ਕੋਲ ਸ਼ਿਕਾਇਤ ਦਰਜ ਕਰਵਾਈ ਹੋਈ ਹੈ ਕਿ ਉਹਨਾਂ ਨਾਲ ਧੋਖਾ ਹੋਇਆ ਹੈ। ਉਹਨਾਂ ਦੀ ਮੰਗ ਹੈ ਕਿ ਪਹਿਲਾਂ ਉਸ ਸ਼ਿਕਾਇਤ ਦੀ ਜਾਂਚ ਕੀਤੀ ਜਾਵੇ। ਹੁਣ ਜੋ ਪਰਚਾ ਦਰਜ ਹੋਇਆ ਹੈ, ਉਸ ਬਾਰੇ ਵੀ ਉਹ ਸੀਪੀ ਅੱਗੇ ਪੇਸ਼ ਹੋ ਕੇ ਆਪਣਾ ਪੱਖ ਰੱਖਣਗੇ।

ਜਲੰਧਰ ਦੀ ਤਹਿਸੀਲ ਵਿੱਚ ਸਾਲਾਂ ਤੋਂ ਫਰਜ਼ੀਵਾੜਾ ਕਰਨ ਵਾਲਾ ਇੱਕ ਰੈਕੇਟ ਸਰਗਰਮ ਹੈ। ਦਰਅਸਲ, ਪਿੰਡ ਭੋਜੇਵਾਲ ਦੇ ਰਹਿਣ ਵਾਲੇ ਮ੍ਰਿਤਕ ਜਮਨਾ ਦਾਸ ਦੇ ਇੱਕ ਹੋਰ ਪਲਾਟ ਦੀ ਫਰਜ਼ੀ ਰਜਿਸਟਰੀ ਹੋ ਗਈ ਸੀ। ਉਨ੍ਹਾਂ ਦੇ ਨੰਗਲਸ਼ਾਮਾ ਸਥਿਤ 17 ਮਰਲੇ ਪਲਾਟ ਦੀ ਫਰਜ਼ੀ ਰਜਿਸਟਰੀ ਸਤੰਬਰ 2024 ਵਿੱਚ ਕਰਵਾਈ ਗਈ ਸੀ। ਜੇਕਰ ਪ੍ਰਸ਼ਾਸਨ ਨੇ ਸਮਾਂ ਰਹਿੰਦਿਆਂ ਉਸ ਫਰਜ਼ੀਵਾੜੇ 'ਤੇ ਕਾਰਵਾਈ ਕੀਤੀ ਹੁੰਦੀ, ਤਾਂ ਜਮਨਾ ਦਾਸ ਦੀ ਪਿੰਡ ਬੋਲੀਨਾ ਸਥਿਤ 30 ਮਰਲੇ ਜ਼ਮੀਨ ਦੀ ਫਰਜ਼ੀ ਰਜਿਸਟਰੀ ਜਨਵਰੀ 2025 ਵਿੱਚ ਨਾ ਹੋ ਪਾਉਂਦੀ।

ਇਸ ਦਾ ਕਾਰਨ ਇਹ ਹੈ ਕਿ ਇਸ ਫਰਜ਼ੀਵਾੜੇ ਵਿੱਚ ਸ਼ਾਮਲ ਡੀਡ ਰਾਈਟਰ ਤੋਂ ਲੈ ਕੇ ਗਵਾਹ ਅਤੇ ਤਸਦੀਕ ਕਰਨ ਵਾਲਾ ਐਡਵੋਕੇਟ ਵੀ ਉਹੀ ਸੀ। ਦੋਵਾਂ ਫਰਜ਼ੀ ਰਜਿਸਟਰੀਆਂ ਵਿੱਚ ਨੰਦਨਪੁਰ ਰੋਡ ਦੇ ਰਹਿਣ ਵਾਲੇ ਇੱਕ ਵਿਅਕਤੀ ਨੇ ਹੀ ਜਮਨਾ ਦਾਸ ਦੇ ਨਾਂ 'ਤੇ ਬਣਾਏ ਜਾਅਲੀ ਆਧਾਰ ਕਾਰਡ ਅਤੇ ਪੈਨ ਕਾਰਡ ਦੀ ਵਰਤੋਂ ਕੀਤੀ ਸੀ। ਨੰਗਲਸ਼ਾਮਾ ਵਾਲੇ ਪਲਾਟ ਦੇ ਸ਼ਿਕਾਇਤਕਰਤਾ ਵਿਜੇ ਭਾਟੀਆ ਨੇ ਦੱਸਿਆ ਕਿ ਉਨ੍ਹਾਂ ਨੇ ਪਹਿਲੇ ਫਰਜ਼ੀਵਾੜੇ ਦੀ ਸ਼ਿਕਾਇਤ ਵੀ ਡੀਸੀ ਡਾ. ਹਿਮਾਂਸ਼ੂ ਅਗਰਵਾਲ ਕੋਲ ਕੀਤੀ ਸੀ।

ਉਦੋਂ ਜਮਨਾ ਦਾਸ ਬਣ ਕੇ ਇੱਕ ਫਰਜ਼ੀ ਵਿਅਕਤੀ ਨੇ ਅਜੀਤ ਨਗਰ ਦੇ ਰਹਿਣ ਵਾਲੇ ਰਾਮਾਮੰਡੀ ਦੇ ਕਾਰੋਬਾਰੀ ਰਹਿਮਾਨ ਨੂੰ 30 ਮਰਲੇ ਦਾ ਪਲਾਟ ਵੇਚ ਦਿੱਤਾ ਸੀ। ਰਜਿਸਟਰੀ ਵਿੱਚ 22 ਲੱਖ ਰੁਪਏ ਦੀ ਅਦਾਇਗੀ ਦਾ ਵੇਰਵਾ ਹੈ। ਜਦੋਂ ਰਹਿਮਾਨ ਨੇ ਪਲਾਟ ਦੀ ਚਾਰਦੀਵਾਰੀ ਕਰਵਾਉਣੀ ਸ਼ੁਰੂ ਕੀਤੀ, ਉਦੋਂ ਉਸ ਨੂੰ ਪਤਾ ਲੱਗਾ ਕਿ ਉਸ ਨਾਲ ਠਗੀ ਹੋਈ ਹੈ। ਇਸ ਤੋਂ ਬਾਅਦ ਰਹਿਮਾਨ ਨੇ ਰਾਮਾਮੰਡੀ ਥਾਣੇ ਵਿੱਚ ਆਪਣੇ ਨਾਲ ਹੋਈ ਠਗੀ ਦੀ ਸ਼ਿਕਾਇਤ ਦਰਜ ਕਰਵਾਈ ਸੀ।