ਸਿਵਲ ਹਸਪਤਾਲ ਨੂੰ ਮਿਲਣਗੀਆਂ 30 ਨਵੀਆਂ ਡਾਇਲਸਿਸ ਮਸ਼ੀਨਾਂ, ਹੋਵੇਗਾ ਮੁਫ਼ਤ ਇਲਾਜ

ਸ਼ੈਲੀ, ਜਲੰਧਰ, ਪੰਜਾਬੀ ਜਾਗਰਣ :

ਜਲੰਧਰ ਦੇ ਸ਼ਹੀਦ ਬਾਬੂ ਲਾਭ ਸਿੰਘ ਸਿਵਲ ਹਸਪਤਾਲ ’ਚ 30 ਨਵੀਆਂ ਡਾਇਲਸਿਸ ਮਸ਼ੀਨਾਂ ਲਾਈਆਂ ਜਾ ਰਹੀਆਂ ਹਨ। ਇਸ ਨਾਲ ਹੁਣ ਜਲਦ ਹੀ ਗੁਰਦੇ ਦੇ ਮਰੀਜ਼ਾਂ ਨੂੰ ਡਾਇਲਸਿਸ ਸਬੰਧੀ ਵੱਡੀ ਰਾਹਤ ਮਿਲੇਗੀ। ਇਹ ਪ੍ਰੋਜੈਕਟ ਮਾਤਾ ਗੁਜਰੀ ਟਰੱਸਟ ਦੁਆਰਾ ਲਾਗੂ ਕੀਤਾ ਜਾ ਰਿਹਾ ਹੈ, ਜੋ ਮਰੀਜ਼ਾਂ ਨੂੰ ਮੁਫ਼ਤ ਡਾਇਲਸਿਸ ਸਹੂਲਤਾਂ ਪ੍ਰਦਾਨ ਕਰੇਗਾ। ਹੰਸ ਫਾਊਂਡੇਸ਼ਨ ਵੱਲੋਂ ਮੁਹੱਈਆ ਕੀਤੀਆਂ ਗਈਆਂ ਛੇ ਮਸ਼ੀਨਾਂ ਅਤੇ ਪੰਜਾਬ ਸਿਹਤ ਪ੍ਰਣਾਲੀਆਂ ਨਿਗਮ ਵੱਲੋਂ ਤਿੰਨ ਪਹਿਲਾਂ ਹੀ ਕੰਮ ਕਰ ਰਹੀਆਂ ਹਨ। ਜੋ ਰੋਜ਼ਾਨਾ ਲਗਪਗ 25 ਡਾਇਲਸਿਸ ਸੈਸ਼ਨਾਂ ਦੀ ਸਹੂਲਤ ਦਿੰਦੀਆਂ ਹਨ।

ਸਿਵਲ ਹਸਪਤਾਲ ਦੀ ਮੈਡੀਕਲ ਸੁਪਰਡੈਂਟ ਡਾ. ਨਮਿਤਾ ਘਈ ਨੇ ਦੱਸਿਆ ਕਿ ਮਾਤਾ ਗੁਜਰੀ ਟਰੱਸਟ ਦਾ ਡਾਇਲਸਿਸ ਪ੍ਰੋਜੈਕਟ ਹਸਪਤਾਲ ਦੀ ਪੁਰਾਣੀ ਇਮਾਰਤ ਦੀ ਦੂਜੀ ਮੰਜ਼ਿਲ 'ਤੇ ਸਥਿਤ ਆਰਥੋ ਵਾਰਡ ’ਚ ਸਥਾਪਤ ਕੀਤਾ ਜਾ ਰਿਹਾ ਹੈ। ਟਰੱਸਟ ਦਾ ਟੀਚਾ ਕੁੱਲ 54 ਮਸ਼ੀਨਾਂ ਲਾਉਣਾ ਹੈ, ਜਿਨ੍ਹਾਂ ਵਿੱਚੋਂ 30 ਪਹਿਲੇ ਪੜਾਅ ਵਿਚ ਲਗਾਈਆਂ ਜਾ ਰਹੀਆਂ ਹਨ। ਵਾਰਡ ’ਚ ਫਾਲਸ ਸੀਲਿੰਗ ਦਾ ਕੰਮ ਪੂਰਾ ਹੋ ਗਿਆ ਹੈ ਤੇ ਹੋਰ ਉਪਕਰਨਾਂ ਦੀ ਸਥਾਪਨਾ ਜਾਰੀ ਹੈ। ਉਨਾਂ ਦੱਸਿਆ ਕਿ ਇਕ ਆਰਓ ਸਿਸਟਮ ਲਾਇਆ ਗਿਆ ਹੈ ਅਤੇ ਇਕ ਸਬਮਰਸੀਬਲ ਪੰਪ 'ਤੇ ਕੰਮ ਚੱਲ ਰਿਹਾ ਹੈ। ਮਾਤਾ ਗੁਜਰੀ ਟਰੱਸਟ ਵੱਲੋਂ ਤਾਇਨਾਤ ਸਟਾਫ਼ ਸੇਵਾਵਾਂ ਪ੍ਰਦਾਨ ਕਰੇਗਾ ਤੇ ਟਰੱਸਟ ਜਲਦੀ ਹੀ ਇਸ ਸਹੂਲਤ ਦਾ ਉਦਘਾਟਨ ਕਰੇਗਾ। ਪ੍ਰੋਜੈਕਟ ਕੋਆਰਡੀਨੇਟਰ ਗੁਰਤਾਜ ਸਿੰਘ ਨੇ ਦੱਸਿਆ ਕਿ ਮਾਤਾ ਗੁਜਰੀ ਟਰੱਸਟ ਪਹਿਲਾਂ ਹੀ ਹੋਰ ਥਾਵਾਂ 'ਤੇ ਡਾਇਲਸਿਸ ਮਸ਼ੀਨਾਂ ਚਲਾ ਰਿਹਾ ਹੈ, ਜਿਨ੍ਹਾਂ ’ਚ ਲੁਧਿਆਣਾ ਵਿਚ 33, ਨਵਾਂਸ਼ਹਿਰ ਵਿਚ 12, ਜਗਰਾਓਂ ’ਚ 6 ਅਤੇ ਭੁਲੱਥ ਵਿੱਚ 10 ਹਨ। ਜਲੰਧਰ ਪ੍ਰੋਜੈਕਟ ਵਿਚ ਲਗਭਗ 5 ਕਰੋੜ ਦੀ ਲਾਗਤ ਨਾਲ 54 ਮਸ਼ੀਨਾਂ ਲਗਾਉਣਾ ਸ਼ਾਮਲ ਹੈ। ਕਿਸੇ ਵੀ ਕੇਂਦਰ ਵਿਚ ਕੈਸ਼ ਕਾਊਂਟਰ ਨਹੀਂ ਹਨ। ਮਰੀਜ਼ਾਂ ਨੂੰ ਸੇਵਾਵਾਂ ਪੂਰੀ ਤਰ੍ਹਾਂ ਮੁਫਤ ਮਿਲਦੀਆਂ ਹਨ। ਜਲੰਧਰ ’ਚ, ਸਿੰਗਲ-ਫਿਲਟਰ ਤਕਨਾਲੋਜੀ ਦੀ ਵਰਤੋਂ ਕਰਨ ਵਾਲੀਆਂ ਅਤਿ-ਆਧੁਨਿਕ ਜਰਮਨ ਮਸ਼ੀਨਾਂ ਸ਼ਾਨਦਾਰ ਦੇਖਭਾਲ ਮੁਹੱਈਆ ਕਰਨਗੀਆਂ। ਇਸ ਤੋਂ ਇਲਾਵਾ, ਮਰੀਜ਼ਾਂ ਨੂੰ ਲੋੜੀਂਦੇ ਖੂਨ ਵਧਾਉਣ ਵਾਲੇ ਟੀਕੇ ਮੁਫਤ ਦਿੱਤੇ ਜਾਂਦੇ ਹਨ। ਹੈਪੇਟਾਈਟਸ ਬੀ, ਹੈਪੇਟਾਈਟਸ ਸੀ ਤੇ ਐੱਚਆਈਵੀ ਤੋਂ ਪੀੜਤ ਡਾਇਲਸਿਸ ਮਰੀਜ਼ਾਂ ਲਈ ਵਿਸ਼ੇਸ਼ ਤੌਰ 'ਤੇ ਤਿਆਰ ਕੀਤੇ ਕੈਬਿਨਾਂ ’ਚ ਛੇ ਮਸ਼ੀਨਾਂ ਲਗਾਈਆਂ ਜਾ ਰਹੀਆਂ ਹਨ। ਮਰੀਜ਼ਾਂ 'ਤੇ ਕੋਈ ਵਿੱਤੀ ਬੋਝ ਨਹੀਂ ਹੈ। ਉਨ੍ਹਾਂ ਨੇ ਸੰਸਦ ਮੈਂਬਰਾਂ (ਐੱਮਪੀਜ਼) ਨੂੰ ਐੱਮਪੀ ਲੈਡ ਫੰਡਾਂ ਦੀ ਵਰਤੋਂ ਕਰਕੇ ਆਪੋ-ਆਪਣੇ ਹਲਕਿਆਂ ਵਿੱਚ 25 ਡਾਇਲਸਿਸ ਮਸ਼ੀਨਾਂ ਲਗਾਉਣ ਦੀ ਅਪੀਲ ਕੀਤੀ ਹੈ, ਜਿਨ੍ਹਾਂ ਦਾ ਟਰੱਸਟ ਵੱਲੋਂ ਪੂਰਾ ਸਹਿਯੋਗ ਰਹੇਗਾ।

---

ਜ਼ਿਲ੍ਹੇ ’ਚ ਚੱਲ ਰਹੀਆਂ ਹਨ 800 ਮਸ਼ੀਨਾਂ

ਜ਼ਿਲ੍ਹੇ ’ਚ ਇਸ ਸਮੇਂ ਲਗਭਗ 800 ਡਾਇਲਸਿਸ ਮਸ਼ੀਨਾਂ ਚੱਲ ਰਹੀਆਂ ਹਨ, ਜਿਨ੍ਹਾਂ ਵਿੱਚੋਂ ਹਰ ਮਹੀਨੇ ਲਗਭਗ 25,000 ਡਾਇਲਸਿਸ ਪ੍ਰਕਿਰਿਆਵਾਂ ਕੀਤੀਆਂ ਜਾਂਦੀਆਂ ਹਨ। ਮਰੀਜ਼ਾਂ ਨੂੰ ਨਿੱਜੀ ਤੇ ਚੈਰੀਟੇਬਲ ਹਸਪਤਾਲਾਂ ਵਿਚ ਪ੍ਰਤੀ ਸੈਸ਼ਨ 5,000 ਤੋਂ 15,000 ਤੱਕ ਖਰਚ ਕਰਨ ਲਈ ਮਜਬੂਰ ਕੀਤਾ ਜਾਂਦਾ ਹੈ। ਮਾਤਾ ਗੁਜਰੀ ਟਰੱਸਟ ਦੁਆਰਾ ਲਾਗੂ ਕੀਤਾ ਜਾ ਰਿਹਾ ਇਹ ਪ੍ਰੋਜੈਕਟ ਗੁਰਦੇ ਦੇ ਮਰੀਜ਼ਾਂ ਲਈ ਕਾਫ਼ੀ ਰਾਹਤ ਲਿਆਏਗਾ। ਉਨ੍ਹਾਂ ਦੀ ਸਥਿਤੀ ਦੀ ਗੰਭੀਰਤਾ ਦੇ ਅਧਾਰ ਤੇ ਮਰੀਜ਼ਾਂ ਨੂੰ ਆਮ ਤੌਰ 'ਤੇ ਹਫ਼ਤੇ ਵਿਚ ਦੋ ਤੋਂ ਤਿੰਨ ਵਾਰ ਡਾਇਲਸਿਸ ਦੀ ਲੋੜ ਹੁੰਦੀ ਹੈ। ਗੁਰਦੇ ਦੇ ਮਰੀਜ਼ਾਂ ਨੂੰ ਗੁਰਦੇ ਦੇ ਟ੍ਰਾਂਸਪਲਾਂਟ ਦੀ ਉਡੀਕ ਕਰਦੇ ਸਮੇਂ ਡਾਇਲਸਿਸ ਜ਼ਰੂਰੀ ਸਹਾਇਤਾ ਤੇ ਰਾਹਤ ਮੁਹੱਈਆ ਕਰਦਾ ਹੈ।