ਦਸੰਬਰ ਤੱਕ ਤੰਗ ਬਾਜ਼ਾਰਾਂ ’ਚ ਬਦਲੀਆਂ ਜਾਣਗੀਆਂ ਬਿਜਲੀ ਦੀਆਂ ਤਾਰਾਂ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਸਕਿੱਲਡ ਮਜ਼ਦੂਰਾਂ ਦੀ ਘਾਟ ਕਾਰਨ ਤੰਗ ਬਾਜ਼ਾਰਾਂ ਵਿੱਚ ਬਿਜਲੀ ਦੀਆਂ ਤਾਰਾਂ ਬਦਲਣ ਦੇ ਕੰਮ ਵਿੱਚ ਦੇਰੀ ਹੋ ਰਹੀ ਹੈ। 106 ਕਰੋੜ ਰੁਪਏ ਦੀ ਲਾਗਤ ਨਾਲ ਇਹ ਪ੍ਰੋਜੈਕਟ ਪੂਰਾ ਕੀਤਾ ਜਾਣਾ ਹੈ, ਜਿਸ ਵਿੱਚ ਨਵੇਂ ਟਰਾਂਸਫਾਰਮਰ ਲਗਾਉਣ, ਨਵੀਆਂ ਕੇਬਲਾਂ, ਨਵੇਂ ਫੀਡਰ ਅਤੇ ਹਾਈ ਟੈਂਸ਼ਨ ਤਾਰਾਂ ਵਿਛਾਉਣ ਦਾ ਕੰਮ ਸ਼ਾਮਲ ਹੈ। ਪਾਵਰਕਾਮ ਵੱਲੋਂ ਕੰਮ ਸ਼ੁਰੂ ਕੀਤਾ ਜਾ ਚੁੱਕਾ ਹੈ। ਜੇ ਅਟਾਰੀ ਬਾਜ਼ਾਰ ਦੀ ਗੱਲ ਕਰੀਏ ਤਾਂ ਉੱਥੇ ਨਵੀਆਂ ਤਾਰਾਂ ਲਗਾਈਆਂ ਜਾ ਚੁੱਕੀਆਂ ਹਨ ਅਤੇ ਨੰਗੇ ਜੋੜਾਂ ਨੂੰ ਢੱਕ ਦਿੱਤਾ ਗਿਆ ਹੈ। ਜਦਕਿ ਸੈਦਾਂ ਗੇਟ, ਰਸਤਾ ਮੁਹੱਲਾ ਅਤੇ ਦਿਲਕੁਸ਼ਾ ਮਾਰਕੀਟ ਵਿੱਚ ਹੁਣ ਤੱਕ ਸਿਰਫ 20 ਫ਼ੀਸਦੀ ਕੰਮ ਹੀ ਮੁਕੰਮਲ ਹੋਇਆ ਹੈ। ਇਹ ਕੰਮ ਰੀਵੈਂਪਡ ਡਿਸਟ੍ਰੀਬਿਊਸ਼ਨ ਸੈਕਟਰ ਸਕੀਮ (ਆਰਡੀਐੱਸਐੱਸ) ਤਹਿਤ ਕੀਤਾ ਜਾ ਰਿਹਾ ਹੈ। ਗਰਮੀਆਂ ਦੀਆਂ ਛੁੱਟੀਆਂ ਦੌਰਾਨ ਅਟਾਰੀ ਬਾਜ਼ਾਰ ਚਾਰ ਦਿਨ ਬੰਦ ਰਿਹਾ, ਜਿਸ ਦਾ ਫਾਇਦਾ ਚੁੱਕਦਿਆਂ ਪਾਵਰਕਾਮ ਨੇ ਤਾਰਾਂ ਬਦਲਣ ਦਾ ਕੰਮ ਪੂਰਾ ਕੀਤਾ। ਇਨ੍ਹਾਂ ਤੰਗ ਬਾਜ਼ਾਰਾਂ ’ਚ ਅਕਸਰ ਬਿਜਲੀ ਫਾਲਟ ਦੀਆਂ ਸ਼ਿਕਾਇਤਾਂ ਮਿਲਦੀਆਂ ਰਹਿੰਦੀਆਂ ਸਨ। ----------------------- 95 ਤੇ 150 ਐੱਮਐੱਮ ਦੀ ਕੇਬਲ ਵਿਛਾਉਣ ਦਾ ਕੰਮ ਸ਼ੁਰੂ ਪਾਵਰਕਾਮ ਵੱਲੋਂ ਪਹਿਲਾਂ 6 ਐੱਮਐੱਮ ਅਤੇ 10 ਐੱਮਐੱਮ ਦੀਆਂ ਕੇਬਲਾਂ ਵਿਛਾਈਆਂ ਗਈਆਂ ਸਨ। ਹੁਣ 95 ਐੱਮਐੱਮ ਅਤੇ 150 ਐੱਮਐੱਮ ਦੀਆਂ ਮੋਟੀਆਂ ਕੇਬਲਾਂ ਪਾਈਆਂ ਜਾ ਰਹੀਆਂ ਹਨ। ਇਸ ਨਾਲ ਫਾਲਟ ਘੱਟ ਆਉਣਗੇ ਤੇ ਵਾਇਰਿੰਗ ਸੜਨ ਦੀ ਸਮੱਸਿਆ ਵੀ ਨਹੀਂ ਰਹੇਗੀ। ਇੱਕ ਹੀ ਕੇਬਲ ਰਾਹੀਂ ਕਈ ਦੁਕਾਨਾਂ ਨੂੰ ਬਿਜਲੀ ਕੁਨੈਕਸ਼ਨ ਦਿੱਤਾ ਜਾ ਸਕੇਗਾ। ------------------------------ ਸੈਦਾਂ ਗੇਟ ’ਚ ਨਵਾਂ ਟਰਾਂਸਫਾਰਮਰ ਲਾਉਣ ਲਈ ਥਾਂ ਦੀ ਭਾਲ ਸੈਦਾਂ ਗੇਟ ਦੇ ਕਈ ਦੁਕਾਨਦਾਰਾਂ ਨੇ ਘੱਟ ਲੋਡ ਦੀ ਮਨਜ਼ੂਰੀ ਲੈ ਕੇ ਵੱਧ ਲੋਡ ਵਰਤਿਆ ਹੋਇਆ ਹੈ, ਜਿਸ ਕਾਰਨ ਇਲਾਕੇ ਦੇ ਟਰਾਂਸਫਾਰਮਰਾਂ ਵਿੱਚ ਵਾਰ-ਵਾਰ ਫਾਲਟ ਆ ਰਹੇ ਹਨ। ਲੋਡ ਵਧਣ ਨਾਲ ਟਰਾਂਸਫਾਰਮਰ ਦੀ ਵਾਇਰਿੰਗ ਸੜ ਜਾਂਦੀ ਹੈ ਅਤੇ ਘੰਟਿਆਂ ਤੱਕ ਦੁਕਾਨਾਂ ਦੀ ਬਿਜਲੀ ਬੰਦ ਰਹਿੰਦੀ ਹੈ। ਹਾਲੇ ਤੱਕ ਦੁਕਾਨਦਾਰਾਂ ਨੇ ਮਨਜ਼ੂਰਸ਼ੁਦਾ ਲੋਡ ਨਹੀਂ ਵਧਾਇਆ। ਵਾਰ-ਵਾਰ ਆ ਰਹੇ ਫਾਲਟ ਨੂੰ ਦੇਖਦੇ ਹੋਏ ਪਾਵਰਕਾਮ ਨਵਾਂ ਟਰਾਂਸਫਾਰਮਰ ਲਗਾਉਣ ਦੀ ਯੋਜਨਾ ਬਣਾ ਰਿਹਾ ਹੈ ਪਰ ਬਾਜ਼ਾਰ ਵਿੱਚ ਢੁੱਕਵੀਂ ਥਾਂ ਨਹੀਂ ਮਿਲ ਰਹੀ। ਜੇ ਟਰਾਂਸਫਾਰਮਰ ਲੱਗ ਜਾਂਦਾ ਹੈ ਤਾਂ ਲੋਡ ਦੀ ਸਮੱਸਿਆ ਕਾਫ਼ੀ ਹੱਦ ਤੱਕ ਹੱਲ ਹੋ ਸਕਦੀ ਹੈ। ਪਾਵਰਕਾਮ ਨੇ ਤਾਰਾਂ ਬਦਲਣ ਦਾ ਕੰਮ ਤਾਂ ਸ਼ੁਰੂ ਕਰ ਦਿੱਤਾ ਹੈ ਪਰ ਦੁਕਾਨਦਾਰਾਂ ਨੂੰ ਵੀ ਜ਼ਿੰਮੇਵਾਰੀ ਸਮਝਦਿਆਂ ਮਨਜ਼ੂਰਸ਼ੁਦਾ ਲੋਡ ਵਧਾਉਣਾ ਚਾਹੀਦਾ ਹੈ। ----------------------- ਦੁਚਿੱਤੀ ਕਾਰਨ ਪ੍ਰਭਾਵਿਤ ਹੋ ਰਿਹੈ ਕੰਮ ਪਾਵਰਕਾਮ ਦਾ ਕਹਿਣਾ ਹੈ ਕਿ ਸਕੀਮ ਤਹਿਤ ਕੇਬਲਾਂ ਵਿਛਾਉਣ ਅਤੇ ਨਵੇਂ ਟਰਾਂਸਫਾਰਮਰ ਲਾਉਣ ਦਾ ਕੰਮ ਸ਼ੁਰੂ ਹੋ ਚੁੱਕਾ ਹੈ। ਦੂਜੇ ਪਾਸੇ ਦੁਕਾਨਦਾਰਾਂ ਦੀ ਮੰਗ ਹੈ ਕਿ ਦਿਨ ਦੇ ਸਮੇਂ ਬਿਜਲੀ ਬੰਦ ਨਾ ਕੀਤੀ ਜਾਵੇ, ਕਿਉਂਕਿ ਇਸ ਨਾਲ ਗਾਹਕ ਪ੍ਰਭਾਵਿਤ ਹੁੰਦੇ ਹਨ। ਗਰਮੀਆਂ ਵਿੱਚ ਬਿਨਾਂ ਬਿਜਲੀ ਦੇ ਗਾਹਕ ਦੁਕਾਨਾਂ ਤੇ ਨਹੀਂ ਆਉਂਦੇ। ਇਸ ਕਾਰਨ ਪਾਵਰਕਾਮ ਘੱਟ ਸਮੇਂ ਲਈ ਹੀ ਬਿਜਲੀ ਬੰਦ ਕਰ ਰਿਹਾ ਹੈ, ਜਿਸ ਨਾਲ ਕੰਮ ਦੀ ਰਫ਼ਤਾਰ ਹੌਲੀ ਹੋ ਗਈ ਹੈ। ਫਿਲਹਾਲ ਐਤਵਾਰ ਨੂੰ ਕੁਝ ਸਮੇਂ ਲਈ ਬਿਜਲੀ ਬੰਦ ਕਰਕੇ ਕੰਮ ਕੀਤਾ ਜਾ ਰਿਹਾ ਹੈ। --------------------------- ਹੋਰਨਾਂ ਸੂਬਿਆਂ ਤੋਂ ਮੰਗਵਾਏ ਗਏ ਸਕਿੱਲਡ ਮਜ਼ਦੂਰ ਪਾਵਰਕਾਮ ਨੇ ਜਿਸ ਠੇਕੇਦਾਰ ਨੂੰ ਇਹ ਪ੍ਰੋਜੈਕਟ ਦਿੱਤਾ ਹੈ, ਉਹ ਪੰਜਾਬ ਦੀ ਬਜਾਏ ਝਾਰਖੰਡ, ਓਡੀਸ਼ਾ ਤੇ ਪੱਛਮੀ ਬੰਗਾਲ ਤੋਂ ਸਕਿੱਲਡ ਮਜ਼ਦੂਰ ਲੈ ਕੇ ਆਇਆ ਹੈ। ਪੰਜਾਬ ਵਿੱਚ ਪਹਿਲਾਂ ਹੀ ਸਕਿੱਲਡ ਮਜ਼ਦੂਰਾਂ ਦੀ ਘਾਟ ਹੈ, ਜਿਸ ਕਾਰਨ ਪ੍ਰੋਜੈਕਟ ਦੀ ਰਫ਼ਤਾਰ ਹੌਲੀ ਹੈ।