ਹੁਸ਼ਿਆਰਪੁਰ ਦੀ ਲੀਚੀ ਦਾ ਵਿਦੇਸ਼ਾਂ 'ਚ ਜਲਵਾ: ਪਹਿਲੀ ਖੇਪ ਸਫ਼ਲਤਾਪੂਰਵਕ ਪੁੱਜੀ ਓਮਾਨ, ਬਾਗਬਾਨਾਂ ਦੇ ਚਿਹਰੇ ਖਿੜੇ!

ਪੰਜਾਬੀ ਜਾਗਰਣ ਬਿਊਰੋ, ਚੰਡੀਗੜ੍ਹ: ਹੁਸ਼ਿਆਰਪੁਰ ਤੋਂ ਪਹਿਲੀ ਵਾਰ ਤਾਜ਼ੀ ਲੀਚੀ ਦੀ ਖੇਪ ਓਮਾਨ ਲਈ ਨਿਰਯਾਤ ਕੀਤੀ ਗਈ ਹੈ। ਖੇਤੀ ਅਤੇ ਪ੍ਰੋਸੈਸਡ ਖੁਰਾਕੀ ਉਤਪਾਦ ਨਿਰਯਾਤ ਵਿਕਾਸ ਅਥਾਰਟੀ (ਏਪੀਡਾ) ਦੇ ਸਹਿਯੋਗ ਨਾਲ ਹੋਇਆ ਇਹ ਨਿਰਯਾਤ ਪੰਜਾਬ ਦੇ ਬਾਗਬਾਨੀ ਖੇਤਰ ਅਤੇ ਸਹਿਕਾਰੀ ਖੇਤੀ ਨਿਰਯਾਤ ਲਈ ਇੱਕ ਮਹੱਤਵਪੂਰਨ ਮੀਲ ਪੱਥਰ ਮੰਨਿਆ ਜਾ ਰਿਹਾ ਹੈ।

ਏਪੀਡਾ ਨੇ ਉੱਨਤੀ ਐਗਰੀ ਅਲਾਈਡ ਸਹਿਕਾਰੀ ਸਭਾ ਨੂੰ ਵਿਦੇਸ਼ੀ ਖਰੀਦਦਾਰ ਨਾਲ ਜੋੜਨ ਦੇ ਨਾਲ-ਨਾਲ ਖੇਤ ਤੋਂ ਓਮਾਨ ਤੱਕ ਪੂਰੀ ਨਿਰਯਾਤ ਪ੍ਰਕਿਰਿਆ ਨੂੰ ਸੁਚਾਰੂ ਬਣਾਇਆ। ਅੰਤਰਰਾਸ਼ਟਰੀ ਗੁਣਵੱਤਾ ਮਾਪਦੰਡਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਲੀਚੀ ਦੀ ਪੈਕਿੰਗ ਸੁਪਰ ਪਲਮ ਦੇ ਸਹਿਯੋਗ ਨਾਲ 1 ਤੋਂ 5 ਕਿਲੋਗ੍ਰਾਮ ਸਮਰੱਥਾ ਵਾਲੇ ਮੋਡੀਫਾਈਡ ਐਟਮਾਸਫ਼ੀਅਰ ਪੈਕੇਜਿੰਗ (ਐੱਮਏਪੀ) ਬੈਗਾਂ ਵਿੱਚ ਕੀਤੀ ਗਈ, ਤਾਂ ਜੋ ਆਵਾਜਾਈ ਦੌਰਾਨ ਫਲ ਤਾਜ਼ੇ ਅਤੇ ਸੁਰੱਖਿਅਤ ਰਹਿਣ।

ਓਮਾਨ ਵਿੱਚ ਇਸ ਖੇਪ ਦੀ ਵਿਕਰੀ ਲੂਲੂ ਗਰੁੱਪ ਰਾਹੀਂ ਕੀਤੀ ਜਾਵੇਗੀ। ਇਸ ਪਹਿਲ ਨੂੰ ਪ੍ਰਧਾਨ ਮੰਤਰੀ ਦੇ ‘ਸਹਿਕਾਰ ਤੋਂ ਸਮ੍ਰਿੱਧੀ’ ਵਿਜ਼ਨ ਨੂੰ ਅੱਗੇ ਵਧਾਉਣ ਵੱਲ ਇੱਕ ਅਹਿਮ ਕਦਮ ਮੰਨਿਆ ਜਾ ਰਿਹਾ ਹੈ।

ਪਹਿਲੀ ਖੇਪ ਏਪੀਡਾ ਦੇ ਚੇਅਰਮੈਨ ਅਭਿਸ਼ੇਕ ਦੇਵ ਦੀ ਅਗਵਾਈ ਹੇਠ ਤਿਆਰ ਕੀਤੀ ਗਈ, ਜਦਕਿ ਹਰਪ੍ਰੀਤ ਸਿੰਘ ਨੇ ਅਧਿਕਾਰੀਆਂ ਅਤੇ ਸਹਿਕਾਰੀ ਸਭਾ ਦੇ ਨੁਮਾਇੰਦਿਆਂ ਦੀ ਹਾਜ਼ਰੀ ਵਿੱਚ ਇਸ ਨੂੰ ਰਵਾਨਾ ਕੀਤਾ।