Black Fever ਦੇ ਇਲਾਜ 'ਤੇ ਖੋਜ ਲਈ ਡਾ. ਪ੍ਰਦੀਪ ਸੇਨ ਨੂੰ ਮਿਲਿਆ ਹੋਰੀਜ਼ਨ ਪ੍ਰਾਈਜ਼ 2026, ਚੰਡੀਗੜ੍ਹ ਇਮਟੈਕ ਸੈਕਟਰ-39 ਦੇ ਹਨ ਵਿਗਿਆਨੀ

ਜਾਗਰਣ ਸੰਵਾਦਦਾਤਾ, ਚੰਡੀਗੜ੍ਹ : ਬਲੈਕ ਫੀਵਰ (ਕਾਲਾਜ਼ਾਰ-ਲੀਸ਼ਮੈਨਿਆਸਿਸ) ਦਾ ਇਲਾਜ ਬਿਹਤਰ ਅਤੇ ਆਸਾਨ ਹੋਵੇ, ਇਸਦੇ ਲਈ ਚੰਡੀਗੜ੍ਹ ਇਮਟੈਕ ਸੈਕਟਰ-39 ਦੇ ਵਿਗਿਆਨੀ ਡਾਕਟਰ ਪ੍ਰਦੀਪ ਸੇਨ ਨੂੰ ਅੰਤਰਰਾਸ਼ਟਰੀ ਸੁਸਾਇਟੀ ਨੇ ਹੋਰੀਜ਼ਨ ਪ੍ਰਾਈਜ਼ 2026 ਨਾਲ ਸਨਮਾਨਿਤ ਕੀਤਾ ਹੈ। ਇਹ ਸਨਮਾਨ ਰਾਇਲ ਸੁਸਾਇਟੀ ਆਫ਼ ਕੈਮਿਸਟਰੀ (RSC) ਨੇ ਲੀਸ਼ਮੈਨਿਆਸਿਸ (ਬਲੈਕ ਫੀਵਰ-ਕਾਲਾਜ਼ਾਰ) ਅਤੇ ਚਗਾਸ ਦੇ ਇਲਾਜ ਲਈ ਖੋਜ ਕਰਨ ਵਾਲੇ ਵਿਗਿਆਨੀਆਂ ਦੀ ਟੀਮ ਨੂੰ ਦਿੱਤਾ ਹੈ। ਲੀਸ਼ਮੈਨਿਆਸਿਸ ਤੇ ਚਗਾਸ 'ਤੇ ਅੰਤਰਰਾਸ਼ਟਰੀ ਪੱਧਰ ਦੇ 51 ਵਿਗਿਆਨੀਆਂ ਨੇ ਖੋਜ ਕੀਤੀ ਹੈ ਜਿਸ ਵਿੱਚ ਤਿੰਨ ਭਾਰਤੀ ਸਨ। ਡਾਕਟਰ ਪ੍ਰਦੀਪ ਸੇਨ ਨੇ ਬਲੈਕ ਫੀਵਰ 'ਤੇ ਕੰਮ ਕੀਤਾ ਹੈ ਜਿਸਦੇ ਲਈ ਉਨ੍ਹਾਂ ਨੂੰ ਅੰਤਰਰਾਸ਼ਟਰੀ ਸਨਮਾਨ ਦਿੱਤਾ ਗਿਆ ਹੈ।

89 ਦੇਸ਼ਾਂ 'ਚ ਦੋ ਕਰੋੜ ਰੋਗੀ, ਭਾਰਤ ਦੇ ਬਿਹਾਰ, ਝਾਰਖੰਡ 'ਚ ਮਿਲਦੇ ਹਨ ਕਈ ਮਰੀਜ਼

ਡਾਕਟਰ ਪ੍ਰਦੀਪ ਸੇਨ ਇੰਗਲੈਂਡ ਦੀ ਡਰਹਮ ਯੂਨੀਵਰਸਿਟੀ ਦੀ ਅਗਵਾਈ ਵਾਲੀ ਗਲੋਬਲ ਖੋਜਕਰਤਾ ਟੀਮ ਦਾ ਹਿੱਸਾ ਰਹੇ ਹਨ। ਟੀਮ ਨੇ ਅਜਿਹੇ ਸੰਭਾਵੀ ਦਵਾਈ ਟੀਚਿਆਂ (Drug Targets) ਦੀ ਪਛਾਣ ਅਤੇ ਪੁਸ਼ਟੀ ਕੀਤੀ ਹੈ, ਜਿਨ੍ਹਾਂ ਨਾਲ ਇਨ੍ਹਾਂ ਦੋਵਾਂ ਗੰਭੀਰ ਬਿਮਾਰੀਆਂ ਦੇ ਬਿਹਤਰ ਇਲਾਜ ਦਾ ਰਸਤਾ ਖੁੱਲ੍ਹ ਸਕਦਾ ਹੈ। ਦੁਨੀਆ ਭਰ ਵਿਚ ਦੋ ਕਰੋੜ ਤੋਂ ਵੱਧ ਲੋਕ ਇਨ੍ਹਾਂ ਬਿਮਾਰੀਆਂ ਤੋਂ ਪ੍ਰਭਾਵਿਤ ਹਨ, ਜਦਕਿ ਇਨ੍ਹਾਂ ਲਈ ਹੁਣ ਤੱਕ ਕੋਈ ਪ੍ਰਭਾਵਸ਼ਾਲੀ ਟੀਕਾ ਉਪਲਬਧ ਨਹੀਂ ਹੈ। ਭਾਰਤ 'ਚ ਬਲੈਕ ਫੀਵਰ ਦੀ ਬਿਮਾਰੀ ਬਿਹਾਰ, ਉੱਤਰ ਪ੍ਰਦੇਸ਼, ਝਾਰਖੰਡ ਦੇ ਕਈ ਉਸ਼ਣ-ਕਟਿਬੰਧੀ (Tropical) ਖੇਤਰਾਂ ਤੇ ਬੰਗਲਾਦੇਸ਼ 'ਚ ਪਾਈ ਜਾਂਦੀ ਹੈ। ਬਲੈਕ ਫੀਵਰ ਇਸ ਸਮੇਂ ਵਿਸ਼ਵ ਦੇ 89 ਦੇਸ਼ਾਂ ਵਿੱਚ ਮੌਜੂਦ ਹੈ। ਇਸ ਰੋਗ 'ਚ ਇਨਸਾਨ ਦੀ ਚਮੜੀ ਦਾ ਰੰਗ ਕਾਲਾ ਜਾਂ ਭੂਰਾ ਹੋ ਜਾਂਦਾ ਹੈ ਤੇ ਉਸਦੇ ਸਰੀਰ 'ਤੇ ਵੱਖਰੇ ਪ੍ਰਕਾਰ ਦੇ ਚੱਟਾਕ ਦਿਖਾਈ ਦਿੰਦੇ ਹਨ। ਬਿਮਾਰੀ ਨਾਲ ਇਨਸਾਨ ਨੂੰ ਬੁਖਾਰ ਰਹਿੰਦਾ ਹੈ, ਖੂਨ ਦੀ ਕਮੀ, ਕਮਜ਼ੋਰੀ ਵਰਗੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ ਅਤੇ ਸਮੇਂ ਸਿਰ ਇਲਾਜ ਨਾ ਹੋਣ ਨਾਲ ਇਨਸਾਨ ਦੀ ਮੌਤ ਵੀ ਹੋ ਜਾਂਦੀ ਹੈ।

ਮੱਧਮ ਤੇ ਨਿਮਨ ਵਰਗ ਸ਼੍ਰੇਣੀ ਦੇ ਦੇਸ਼ਾਂ 'ਚ ਗੰਭੀਰ ਹੈ ਬਲੈਕ ਫੀਵਰ

ਬਲੈਕ ਫੀਵਰ ਦੇ ਦੁਨੀਆ 'ਚ ਦੋ ਕਰੋੜ ਮਰੀਜ਼ ਹਨ। ਖੋਜਕਰਤਾ ਮੰਨਦੇ ਹਨ ਕਿ ਇਸ ਬਿਮਾਰੀ ਦਾ ਪ੍ਰਭਾਵ ਮੱਧਮ ਤੇ ਨਿਮਨ ਵਰਗ ਸ਼੍ਰੇਣੀ ਵਾਲੇ ਦੇਸ਼ਾਂ 'ਚ ਸਭ ਤੋਂ ਜ਼ਿਆਦਾ ਹੈ। ਬਲੈਕ ਫੀਵਰ ਦਾ ਸਮੇਂ ਸਿਰ ਇਲਾਜ ਨਾ ਹੋਣ 'ਤੇ ਇਹ ਘਾਤਕ ਰੂਪ ਲੈਂਦਾ ਹੋਇਆ ਇਨਸਾਨ ਦੇ ਸਰੀਰ 'ਚ ਅਨੇਕਾਂ ਰੋਗਾਂ ਨੂੰ ਜਨਮ ਦਿੰਦਾ ਹੈ ਜਿਸ ਨਾਲ ਸਥਿਤੀ ਗੰਭੀਰ ਹੋ ਸਕਦੀ ਹੈ।

ਸਿਰਫ਼ ਉਪਲਬਧੀ ਨਹੀਂ, ਬਲਕਿ ਵਿਸ਼ਵ ਪੱਧਰੀ ਖੋਜ 'ਚ ਪਛਾਣ

ਇਮਟੈਕ ਨਿਰਦੇਸ਼ਕ ਡਾਕਟਰ ਅਲਕਾ ਰਾਓ ਨੇ ਕਿਹਾ ਕਿ ਇਹ ਸਨਮਾਨ ਕੇਵਲ ਡਾਕਟਰ ਪ੍ਰਦੀਪ ਸੇਨ ਦੀ ਉਪਲਬਧੀ ਮਾਤਰ ਨਹੀਂ ਹੈ। ਇਹ ਚੰਡੀਗੜ੍ਹ ਸਥਿਤ ਸੰਸਥਾ 'ਚ ਹੋ ਰਹੀ ਵਿਸ਼ਵ ਪੱਧਰੀ ਖੋਜ ਦੀ ਵੀ ਅੰਤਰਰਾਸ਼ਟਰੀ ਪਛਾਣ ਹੈ। ਉਨ੍ਹਾਂ ਕਿਹਾ ਕਿ ਇਮਟੈਕ ਅਣਗੌਲੀਆਂ ਉਸ਼ਣ-ਕਟਿਬੰਧੀ ਬਿਮਾਰੀਆਂ (Neglected Tropical Diseases) ਦੇ ਹੱਲ ਲੱਭਣ 'ਚ ਮੋਹਰੀ ਭੂਮਿਕਾ ਨਿਭਾ ਰਿਹਾ ਹੈ ਅਤੇ ਇਹ ਸਨਮਾਨ ਸੰਸਥਾ ਦੇ ਖੋਜ ਯਤਨਾਂ ਨੂੰ ਨਵੀਂ ਪਛਾਣ ਦੇਵੇਗਾ। ਉਨ੍ਹਾਂ ਕਿਹਾ ਕਿ ਇਮਟੈਕ ਲਗਾਤਾਰ ਖੋਜ ਕਾਰਜ ਵਿੱਚ ਜੁਟਿਆ ਹੈ ਅਤੇ ਅਸੀਂ ਬਿਹਤਰ ਨਤੀਜੇ ਦੇਣ ਨੂੰ ਤਿਆਰ ਹਾਂ।