ਹਰੀਆ ਕਤਲ ਕਾਂਡ ’ਚ 15 ਗੈਂਗਸਟਰਾਂ ਨੂੰ ਉਮਰ ਕੈਦ, 2016 ’ਚ ਥਾਣੇ ਦੇ ਬਾਹਰ ਗੋਲੀਆਂ ਮਾਰ ਕੇ ਕੀਤਾ ਸੀ ਕਤਲ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਅੰਮ੍ਰਿਤਸਰ : 4 ਮਈ 2016 ਦੀ ਸ਼ਾਮ ਥਾਣਾ ਬੀ ਡਿਵੀਜ਼ਨ ਦੇ ਬਾਹਰ ਰਾਹੁਲ ਉਰਫ਼ ਹਰੀਆ ਦਾ ਕਤਲ ਕਰਨ ਦੇ ਮਾਮਲੇ ਵਿੱਚ ਅਦਾਲਤ ਨੇ 15 ਗੈਂਗਸਟਰਾਂ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ। ਇਕ ਹੋਰ ਮੁਲਜ਼ਮ ਪਵਨ ਉਰਫ਼ ਤਾਂਬਾ ਦਾ 10 ਸਾਲ ਬਾਅਦ ਵੀ ਪੁਲਿਸ ਪਤਾ ਨਹੀਂ ਲਗਾ ਸਕੀ। ਅਦਾਲਤ ਨੇ ਉਸ ਨੂੰ ਭਗੌੜਾ ਕਰਾਰ ਦਿੱਤਾ ਹੈ।

ਸਜ਼ਾ ਪਾਉਣ ਵਾਲਿਆਂ ਵਿੱਚ ਸਾਗਰ ਉਰਫ਼ ਬੌਬੀ ਮਲਹੋਤਰਾ, ਦਰਸ਼ਨ ਸਿੰਘ ਉਰਫ਼ ਰਾਜਾ ਕਨਵੱਢਾ, ਸਾਰਜ ਉਰਫ਼ ਮਿੰਟੂ, ਅਰੁਣ ਛੁਰੀਮਾਰ, ਸਾਹਿਲ ਬਾਬਾ, ਸੁਖਪਾਲ ਸਿੰਘ ਉਰਫ਼ ਸ਼ਿਵਾ, ਅਮਨ ਕੁਮਾਰ ਉਰਫ਼ ਅੰਮੂ, ਮੁਕੇਸ਼, ਸਿਮਰਨਜੀਤ ਸਿੰਘ ਉਰਫ਼ ਬਾਬਾ ਬੁੱਲੜ, ਸੌਰਭ ਉਰਫ਼ ਕੱਟੂ, ਜਗਰੋਸ਼ਨ ਸਿੰਘ ਉਰਫ਼ ਰੋਸ਼ਨ, ਸ਼ਿਵ, ਸੂਰਜ, ਰਮਿੰਦਰ ਸਿੰਘ ਉਰਫ਼ ਗੋਲੀ ਅਤੇ ਜਸਕਰਨ ਸ਼ਾਮਲ ਹਨ।

ਪੁਲਿਸ ਮੁਤਾਬਕ ਮੁਲਜ਼ਮ ਦੀ ਸ਼ਹਿ ’ਤੇ ਸ਼ਹਿਰ ਵਿੱਚ ਕਤਲ ਅਤੇ ਗੋਲੀਬਾਰੀ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇ ਰਹੇ ਸਨ। ਮੁਲਜ਼ਮਾਂ ਨੂੰ ਸ਼ੱਕ ਸੀ ਕਿ ਹਰੀਆ ਉਨ੍ਹਾਂ ਦੇ ਗਿਰੋਹ ਦੀ ਪੁਲਿਸ ਨੂੰ ਮੁਖਬਰੀ ਕਰ ਰਿਹਾ ਹੈ। ਇਸ ਕਾਰਨ ਉਸ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦਿੱਤੀਆਂ ਗਈਆਂ ਸਨ।

4 ਮਈ 2016 ਨੂੰ ਹਰੀਆ ਸੌ ਫੁੱਟੀ ਰੋਡ ਤੋਂ ਦੋਸਤ ਦੀ ਪਾਰਟੀ ਤੋਂ ਥਾਣਾ ਬੀ ਡਿਵੀਜ਼ਨ ਵੱਲ ਵਾਪਸ ਆ ਰਿਹਾ ਸੀ। ਮੁਲਜ਼ਮਾਂ ਨੇ ਅੱਠ ਤੋਂ ਦਸ ਮੋਟਰਸਾਈਕਲਾਂ ’ਤੇ ਉਸ ਦਾ ਪਿੱਛਾ ਕੀਤਾ ਅਤੇ ਗੋਲੀਆਂ ਚਲਾਈਆਂ। ਥਾਣੇ ਦੇ ਬਾਹਰ ਪਹੁੰਚ ਕੇ ਹਰੀਆ ਨੂੰ ਕਈ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ।

ਵਾਰਦਾਤ ਤੋਂ ਪਹਿਲਾਂ ਦੋ ਹੋਰ ਲੋਕਾਂ ਦੀ ਕੀਤੀ ਸੀ ਹੱਤਿਆ

ਹਰੀਆ ਦੇ ਕਤਲ ਤੋਂ ਪਹਿਲਾਂ ਇਸੇ ਗਿਰੋਹ ਦੇ ਕੁਝ ਮੈਂਬਰਾਂ ਨੇ ਦੋ ਦੋਸਤਾਂ ਨੂੰ ਅਗਵਾ ਕਰਕੇ ਤਰਨਤਾਰਨ ਲਿਜਾਇਆ ਸੀ, ਜਿੱਥੇ ਦੋਵਾਂ ਦਾ ਕਤਲ ਕਰ ਦਿੱਤਾ ਗਿਆ। ਪੁਲਿਸ ਨੇ ਬਾਅਦ ਵਿੱਚ ਦੋਵਾਂ ਦੀਆਂ ਲਾਸ਼ਾਂ ਬਰਾਮਦ ਕੀਤੀਆਂ ਸਨ। ਇਸੇ ਗਿਰੋਹ ’ਤੇ ਕਾਂਗਰਸੀ ਕੌਂਸਲਰ ਗੁਰਦੀਪ ਸਿੰਘ ਪਹਿਲਵਾਨ ਅਤੇ ਹਿੰਦੂ ਨੇਤਾ ਵਿਪਨ ਸ਼ਰਮਾ ਦੇ ਕਤਲ ਦੇ ਮਾਮਲੇ ਦਰਜ ਹਨ।