ਹਰਿਦੁਆਰ ਤੋਂ ਉੱਠੀ ਸੰਤਾਂ ਦੀ ਆਵਾਜ਼, ਹਿੰਦੂਆਂ ਦੇ ਹੋਣ ਦੋ ਤੋਂ ਤਿੰਨ ਬੱਚੇ; ਵੀਐੱਚਪੀ ਦੀ ਕੇਂਦਰੀ ਮਾਰਗਦਰਸ਼ਕ ਮੰਡਲ ਦੀ ਬੈਠਕ ’ਚ ਸੰਤ ਸਮਾਜ ਨੇ ਲਿਆ ਫ਼ੈਸਲਾ

ਸਟੇਟ ਬਿਊਰੋ, ਜਾਗਰਣ, ਦੇਹਰਾਦੂਨ : ਵਿਸ਼ਵ ਹਿੰਦੂ ਪ੍ਰੀਸ਼ਦ (ਵੀਐੱਚਪੀ) ਨੇ ਹਿੰਦੂਆਂ ਦੀ ਆਬਾਦੀ ਬਾਰੇ ਚਿੰਤਾ ਪ੍ਰਗਟਾਈ ਹੈ। ਵੀਐੱਚਪੀ ਨੇ ਇਹ ਸੰਕਲਪ ਲਿਆ ਹੈ ਕਿ ਸੰਗਠਨ ਹਿੰਦੂਆਂ ਨੂੰ ਜਗਾਉਣ ਦੀ ਮੁਹਿੰਮ ਚਲਾਏਗਾ। ਹਿੰਦੂ ਸਮਾਜ ਵਿਚ ਹੁਣ ਇਕ ਬੱਚੇ ਦਾ ਚਲਨ ਛੱਡ ਕੇ ਦੋ ਤੋਂ ਤਿੰਨ ਬੱਚੇ ਹੋਣੇ ਚਾਹੀਦੇ ਹਨ। ਵਿਸ਼ਵ ਹਿੰਦੂ ਪਰਿਵਾਰ ਨੇ ਇਸ ਵਿਸ਼ੇ ਨੂੰ ਆਪਣੀਆਂ ਮੁੱਖ ਤਰਜੀਹਾਂ ਵਿਚ ਸ਼ਾਮਲ ਕੀਤਾ ਹੈ। ਹਰਿਦੁਆਰ ਵਿਚ ਵਿਸ਼ਵ ਹਿੰਦੂ ਪਰਿਵਾਰ ਦੀ ਕੇਂਦਰੀ ਮਾਰਗਦਰਸ਼ਕ ਮੰਡਲ ਦੀ ਬੈਠਕ ਵਿਚ ਇਸ ’ਤੇ ਸੰਤ ਸਮਾਜ ਨੇ ਫੈਸਲਾ ਲਿਆ ਹੈ। ਸੰਤਾਂ ਨੇ ਚਰਚ ਤੇ ਮਿਸ਼ਨਰੀ ਗਤੀਵਿਧੀਆਂ ਬਾਰੇ ਵੀ ਚਿੰਤਾ ਪ੍ਰਗਟਾਈ। ਸਰਹੱਦੀ ਸੂਬਿਆਂ, ਖਾਸ ਕਰ ਕੇ ਪੱਛਮੀ ਬੰਗਾਲ ਵਰਗੇ ਖੇਤਰਾਂ ਵਿਚ ਧਾਰਮਿਕ-ਸੰਸਕ੍ਰਿਤਕ ਗਤੀਵਿਧੀਆਂ ਵਧਾਉਣ ਦੀ ਗੱਲ ਵੀ ਕਹੀ ਗਈ।

ਅਖਿਲ ਭਾਰਤੀ ਸੰਤ ਸਮਿਤੀ ਦੇ ਰਾਸ਼ਟਰੀ ਮੁੱਖ ਸਕੱਤਰ ਦੰਡੀ ਸਵਾਮੀ ਜਿਤੇਂਦਰਾਨੰਦ ਸਰਸਵਤੀ ਨੇ ਹਿੰਦੂਆਂ ਵਿਚ ਘੱਟ ਰਹੀ ਪ੍ਰਜਣਨ ਦਰ ਅਤੇ ਆਬਾਦੀ ਬਦਲਾਅ ’ਤੇ ਚਿੰਤਾ ਪ੍ਰਗਟਾਈ। ਉਨ੍ਹਾਂ ਕਿਹਾ, ਵੀਐੱਚਪੀ ਦਾ ਚਿੰਤਨ ਸਿਰਫ ਮੰਦਰਾਂ, ਤੀਰਥਾਂ ਤੇ ਧਾਰਮਿਕ ਪ੍ਰਤੀਕਾਂ ਤੱਕ ਸੀਮਤ ਨਹੀਂ। ਇਹ ਸਮਾਜ ਦੀ ਬਣਤਰ, ਪਰਿਵਾਰ ਦੀ ਧਾਰਨਾ ਅਤੇ ਭਵਿੱਖ ਦੇ ਭਾਰਤ ਦੀ ਆਬਾਦੀ ਦੀ ਤਸਵੀਰ ਤੱਕ ਆਪਣਾ ਵਿਸਥਾਰ ਕਰ ਰਿਹਾ ਹੈ। ਰਾਮ ਮੰਦਰ ਅੰਦੋਲਨ ਤੋਂ ਬਾਅਦ ਹਿੰਦੂਤਵ ਦੀ ਰਾਜਨੀਤੀ ਸਾਹਮਣੇ ਕੁਝ ਸਵਾਲ ਉੱਠੇ ਸਨ ਕਿ ਅਗਲਾ ਮਾਰਗ ਕੀ ਹੋਵੇਗਾ। ਇਸ ਸੰਦਰਭ ਵਿਚ ਵੀਐੱਚਪੀ ਨੇ ਫ਼ੈਸਲਾ ਲਿਆ ਕਿ ਹੁਣ ਸਮਾਜ ਦੀਆਂ ਮੂਲ ਇਕਾਈਆਂ ਨੂੰ ਦੁਬਾਰਾ ਪਰਿਭਾਸ਼ਿਤ ਕਰਨ ਦੀ ਲੋੜ ਹੈ। ਪਰਿਵਾਰ, ਵਿਆਹ, ਆਬਾਦੀ ਤੇ ਸੰਸਕ੍ਰਿਤਕ ਏਕਤਾ ਨੂੰ ਨਵੇਂ ਵਿਚਾਰਾਂ ਦਾ ਕੇਂਦਰ ਬਣਾਇਆ ਜਾਵੇਗਾ। ਸੰਤ ਸਮਾਜ ਨੇ ਕਿਹਾ ਕਿ ਹਿੰਦੂਆਂ ਦੀਆਂ ਕਈ ਜਾਤੀਆਂ-ਵਰਗਾਂ ਵਿਚ ਪ੍ਰਜਣਨ ਦਰ 1.5 ਫ਼ੀਸਦੀ ਤੋਂ ਹੇਠਾਂ ਜਾ ਚੁੱਕੀ ਹੈ। ਇਹ ਚਿੰਤਾ ਦਾ ਵਿਸ਼ਾ ਹੈ। ਇਸ ਦੇ ਸਮਾਜਿਕ ਮਾੜੇ ਪ੍ਰਭਾਵਾਂ ’ਤੇ ਵੀ ਵਿਚਾਰ ਕੀਤਾ ਗਿਆ।