STF ਦਾ ਐਕਸ਼ਨ, NEET ਪ੍ਰੀਖਿਆ ਨਾਲ ਜੁੜੇ ਇਨਪੁਟ 'ਤੇ ਦੋ ਡਾਕਟਰ ਤੇ ਇਕ ਅਧਿਆਪਕ ਹਿਰਾਸਤ 'ਚ ਲਏ; ਘੰਟਿਆਂਬੱਧੀ ਚੱਲੀ ਪੁੱਛਗਿੱਛ

ਜਾਗਰਣ ਸੰਵਾਦਦਾਤਾ, ਰੋਹਤਕ : ਨੀਟ ਪ੍ਰੀਖਿਆ ਪੇਪਰ ਨਾਲ ਸਬੰਧਿਤ ਸੂਚਨਾ 'ਤੇ ਸੋਨੀਪਤ ਐੱਸਟੀਐੱਫ (STF) ਨੇ ਰੋਹਤਕ ਦੇ ਦੋ ਡਾਕਟਰਾਂ ਤੇ ਇਕ ਅਧਿਆਪਕ ਤੋਂ ਕਰੀਬ 13 ਘੰਟਿਆਂ ਤਕ ਪੁੱਛਗਿੱਛ ਕੀਤੀ। ਹਾਲਾਂਕਿ ਸ਼ੁਰੂਆਤੀ ਜਾਂਚ 'ਚ ਲੋਕ ਪ੍ਰੀਖਿਆ ਐਕਟ-2024 ਦੀ ਉਲੰਘਣਾ ਨਾਲ ਸਬੰਧਿਤ ਕੋਈ ਪੁਖਤਾ ਸਬੂਤ ਨਾ ਮਿਲਣ 'ਤੇ ਤਿੰਨਾਂ ਨੂੰ ਛੱਡ ਦਿੱਤਾ ਗਿਆ ਹੈ।

ਜਾਣਕਾਰੀ ਅਨੁਸਾਰ ਐੱਸਟੀਐਫ ਨੂੰ ਸੂਚਨਾ ਮਿਲੀ ਸੀ ਕਿ ਨੀਟ ਪ੍ਰੀਖਿਆ ਦੇ ਨਾਮ 'ਤੇ ਪ੍ਰਸ਼ਨ ਪੱਤਰ ਵੇਚਣ ਜਾਂ ਪ੍ਰੀਖਿਆਰਥੀਆਂ ਨੂੰ ਅਨੁਚਿਤ ਲਾਭ ਪਹੁੰਚਾਉਣ ਦੀ ਯੋਜਨਾ ਬਣਾਈ ਜਾ ਰਹੀ ਹੈ। ਇਸੇ ਸੂਚਨਾ ਦੇ ਅਧਾਰ 'ਤੇ ਟੀਮ ਨੇ ਰੋਹਤਕ 'ਚ ਛਾਪੇਮਾਰੀ ਕਰ ਕੇ ਇਕ ਨਿੱਜੀ ਹਸਪਤਾਲ ਨਾਲ ਜੁੜੇ ਦੋ ਡਾਕਟਰਾਂ ਅਤੇ ਇਕ ਟੀਚਰ ਨੂੰ ਫੜ ਕੇ ਪੁੱਛਗਿੱਛ ਕੀਤੀ। ਹਾਲਾਂਕਿ ਮਾਮਲਾ ਹਸਪਤਾਲ

'ਚ ਲੈਣ-ਦੇਣ ਨਾਲ ਸਬੰਧਿਤ ਦੱਸਿਆ ਗਿਆ ਹੈ।

ਪੁੱਛਗਿੱਛ ਦੌਰਾਨ ਐੱਸਟੀਐੱਫ ਨੇ ਤਿੰਨਾਂ ਦੇ ਮੋਬਾਈਲ ਫੋਨ ਅਤੇ ਹੋਰ ਇਲੈਕਟ੍ਰਾਨਿਕ ਉਪਕਰਨਾਂ ਦੀ ਜਾਂਚ ਕੀਤੀ। ਜਾਂਚ ਏਜੰਸੀਆਂ ਨੂੰ ਫੋਨ ਵਿੱਚ ਪ੍ਰੀਖਿਆ ਦੀ ਤਿਆਰੀ ਨਾਲ ਜੁੜੇ ਪ੍ਰਸ਼ਨ ਅਤੇ ਅਧਿਐਨ ਸਮੱਗਰੀ ਤਾਂ ਮਿਲੀ, ਪਰ ਹੁਣ ਤੱਕ ਅਜਿਹਾ ਕੋਈ ਦਸਤਾਵੇਜ਼ ਜਾਂ ਪ੍ਰਸ਼ਨ ਪੱਤਰ ਬਰਾਮਦ ਨਹੀਂ ਹੋਇਆ ਹੈ ਜਿਸ ਨੂੰ ਨੀਟ ਪ੍ਰੀਖਿਆ ਦਾ ਅਸਲੀ ਪੇਪਰ ਮੰਨਿਆ ਜਾ ਸਕੇ।

ਡੀਐੱਸਪੀ ਸਾਂਪਲਾ ਰਾਕੇਸ਼ ਕੁਮਾਰ ਨੇ ਦੱਸਿਆ ਕਿ ਅਜੇ ਤੱਕ ਦੀ ਜਾਂਚ ਵਿੱਚ ਕਿਸੇ ਪ੍ਰਕਾਰ ਦਾ ਅਪਰਾਧਿਕ ਮਾਮਲਾ ਦਰਜ ਕਰਨ ਯੋਗ ਸਬੂਤ ਸਾਹਮਣੇ ਨਹੀਂ ਆਇਆ ਹੈ। ਇਸ ਲਈ ਫਿਲਹਾਲ ਕੋਈ ਐੱਫਆਈਆਰ ਦਰਜ ਨਹੀਂ ਕੀਤੀ ਗਈ ਹੈ।

ਹਾਲਾਂਕਿ ਮਾਮਲੇ ਦੀ ਜਾਂਚ ਅਗਲੇ 14 ਦਿਨਾਂ ਤੱਕ ਜਾਰੀ ਰਹੇਗੀ ਅਤੇ ਸਬੰਧਿਤ ਵਿਅਕਤੀਆਂ ਨੂੰ ਜਾਂਚ ਵਿੱਚ ਸਹਿਯੋਗ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਮਾਮਲੇ ਦੇ ਸਾਰੇ ਪਹਿਲੂਆਂ ਦੀ ਬਾਰੀਕੀ ਨਾਲ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਲੋੜ ਪੈਣ 'ਤੇ ਅੱਗੇ ਵੀ ਪੁੱਛਗਿੱਛ ਕੀਤੀ ਜਾਵੇਗੀ।