ਅਮਰਨਾਥ ਧਾਮ 'ਤੇ ਰੋਪਵੇਅ ਲਗਾਉਣ ਦੀ ਤਿਆਰੀ, ਅਗਲੇ ਸਾਲ ਤੋਂ ਸ਼ੁਰੂ ਹੋਵੇਗਾ ਕੰਮ; 40 ਮਿੰਟਾਂ 'ਚ ਕਰ ਸਕੋਗੇ ਬਾਬਾ ਬਰਫ਼ਾਨੀ ਦੇ ਦਰਸ਼ਨ

ਡਿਜੀਟਲ ਡੈਸਕ, ਸ੍ਰੀਨਗਰ : ਤਿੰਨ ਜੁਲਾਈ ਤੋਂ ਅਮਰਨਾਥ ਯਾਤਰਾ-2026 ਸ਼ੁਰੂ ਹੋ ਰਹੀ ਹੈ। ਧਾਮ 'ਤੇ ਜਾਣ ਵਾਲੇ ਦੋਵਾਂ ਰਸਤਿਆਂ ਬਾਲਟਾਲ ਅਤੇ ਪਹਿਲਗਾਮ 'ਤੇ ਸੁਰੱਖਿਆ ਪ੍ਰਬੰਧ ਸਖ਼ਤ ਕਰ ਦਿੱਤੇ ਗਏ ਹਨ। ਬਾਲਟਾਲ ਰਸਤਾ ਜਿੱਥੇ 14 ਕਿਲੋਮੀਟਰ ਦਾ ਹੈ, ਉੱਥੇ ਹੀ ਪਹਿਲਗਾਮ ਰਸਤਾ 48 ਕਿਲੋਮੀਟਰ ਲੰਬਾ ਹੈ। ਇਸ ਨੂੰ ਤੈਅ ਕਰਨ 'ਚ ਦੋ ਤੋਂ ਤਿੰਨ ਦਿਨ ਲੱਗਦੇ ਹਨ। ਪਹਿਲਗਾਮ ਰਸਤੇ ਦੀ ਤੁਲਨਾ ਵਿੱਚ ਬਾਲਟਾਲ ਰਸਤਾ ਜ਼ਿਆਦਾ ਮੁਸ਼ਕਿਲ ਹੈ।

ਅਮਰਨਾਥ ਯਾਤਰਾ ਦੀ ਇਸ ਦੂਰੀ ਨੂੰ ਘਟਾਉਣ ਅਤੇ ਯਾਤਰਾ ਨੂੰ ਆਸਾਨ ਬਣਾਉਣ ਲਈ ਰੋਪਵੇਅ ਲਗਾਉਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਸਾਲ 2025 'ਚ ਰੋਪਵੇਅ ਨੂੰ ਲੈ ਕੇ ਫੈਸਲਾ ਲਿਆ ਗਿਆ ਸੀ। ਪਿਛਲੇ ਸਾਲ ਸੱਤ ਰੋਪਵੇਅ ਪ੍ਰੋਜੈਕਟਾਂ ਨੂੰ ਮਨਜ਼ੂਰੀ ਮਿਲੀ ਸੀ, ਜਿਨ੍ਹਾਂ ਵਿਚ ਅਮਰਨਾਥ ਧਾਮ ਵੀ ਸ਼ਾਮਲ ਹੈ।

ਰੋਪਵੇਅ ਪ੍ਰੋਜੈਕਟਾਂ ਦੀ ਵਿਸਤ੍ਰਿਤ ਪ੍ਰੋਜੈਕਟ ਰਿਪੋਰਟ (DPR) ਤਿਆਰ ਕਰ ਲਈ ਗਈ ਹੈ। ਅਮਰਨਾਥ ਧਾਮ 'ਤੇ ਕੇਬਲ ਕਾਰ ਨਾਲ ਨਾ ਸਿਰਫ਼ ਸ਼ਰਧਾਲੂਆਂ ਦੀ ਯਾਤਰਾ ਆਸਾਨ ਹੋਵੇਗੀ, ਬਲਕਿ ਇਹ ਪ੍ਰੋਜੈਕਟ ਸੈਰ-ਸਪਾਟਾ ਅਤੇ ਆਰਥਿਕ ਵਿਕਾਸ 'ਚ ਮਹੱਤਵਪੂਰਨ ਭੂਮਿਕਾ ਨਿਭਾਏਗਾ। ਇਹ ਪ੍ਰੋਜੈਕਟ ਪੀਪੀਪੀ (PPP) ਮੋਡ ਤਹਿਤ ਵਿਕਸਿਤ ਕੀਤਾ ਜਾ ਰਿਹਾ ਹੈ।

ਕਿਸ ਪਾਸੇ ਬਣਾਇਆ ਜਾਵੇਗਾ ਰੋਪਵੇਅ?

ਤਜਵੀਜ਼ਸ਼ੁਦਾ ਰੋਪਵੇਅ ਪ੍ਰੋਜੈਕਟਾਂ 'ਚ ਬਾਲਟਾਲ-ਅਮਰਨਾਥ ਭਵਨ (ਅਨੰਤਨਾਗ), ਪਹਿਲਗਾਮ-ਅਮਰਨਾਥ (ਅਨੰਤਨਾਗ) ਹਨ। ਯਾਨੀ ਬਾਬਾ ਬਰਫ਼ਾਨੀ ਵੱਲ ਜਾਣ ਵਾਲੇ ਦੋਵਾਂ ਰਸਤਿਆਂ 'ਤੇ ਹੀ ਰੋਪਵੇਅ ਲਗਾਇਆ ਜਾਣਾ ਪ੍ਰਸਤਾਵਿਤ ਹੈ।

ਰੋਪਵੇਅ ਨਿਰਮਾਣ ਕਰਨ ਵਾਲੀ ਨੈਸ਼ਨਲ ਹਾਈਵੇਅ ਅਥਾਰਟੀ ਆਫ਼ ਇੰਡੀਆ (NHAI) ਦੀ ਕੰਪਨੀ ਨੈਸ਼ਨਲ ਹਾਈਵੇਅ ਲੌਜਿਸਟਿਕਸ ਮੈਨੇਜਮੈਂਟ ਲਿਮਟਿਡ (NHLML) ਨੇ ਪ੍ਰੀ-ਫਿਜ਼ੀਬਿਲਟੀ ਰਿਪੋਰਟ ਤਿਆਰ ਕੀਤੀ ਹੈ। ਬਾਲਟਾਲ ਤੋਂ ਅਮਰਨਾਥ ਗੁਫਾ ਲਈ 9 ਕਿਲੋਮੀਟਰ ਦਾ ਰੋਪ-ਵੇਅ ਹੋਵੇਗਾ। ਇਸ ਨਾਲ 14 ਕਿਲੋਮੀਟਰ ਦੇ ਰਸਤੇ ਦੀ ਪੈਦਲ ਦੂਰੀ 10 ਘੰਟਿਆਂ ਤੋਂ ਘਟ ਕੇ 40 ਮਿੰਟ ਰਹਿ ਜਾਵੇਗੀ।

ਕਦੋਂ ਸ਼ੁਰੂ ਹੋਵੇਗਾ ਕੰਮ?

ਜਾਣਕਾਰੀ ਅਨੁਸਾਰ, ਅਗਲੇ ਸਾਲ ਪ੍ਰੋਜੈਕਟ 'ਤੇ ਕੰਮ ਸ਼ੁਰੂ ਹੋਵੇਗਾ। ਉੱਥੇ ਹੀ, ਇਸ ਨੂੰ ਪੂਰਾ ਹੋਣ ਵਿਚ ਕਰੀਬ ਦੋ ਸਾਲ ਲੱਗਣਗੇ। ਇਸ ਤਰ੍ਹਾਂ ਅਮਰਨਾਥ ਯਾਤਰਾ 2029 'ਚ ਸ਼ਰਧਾਲੂਆਂ ਨੂੰ ਰੋਪਵੇਅ ਦੀ ਸਹੂਲਤ ਮਿਲਣ ਦੀ ਸੰਭਾਵਨਾ ਹੈ।

ਕਿਵੇਂ ਤੈਅ ਹੁੰਦੀ ਹੈ ਅਮਰਨਾਥ ਯਾਤਰਾ

ਅਮਰਨਾਥ ਯਾਤਰਾ ਲਈ ਮੌਜੂਦਾ ਸਮੇਂ ਕੋਈ ਰੋਪਵੇਅ ਸੇਵਾ ਉਪਲਬਧ ਨਹੀਂ ਹੈ। ਇਸ ਸਾਲ ਸੁਰੱਖਿਆ ਕਾਰਨਾਂ ਕਰਕੇ ਯਾਤਰਾ ਰੂਟ ਨੂੰ 'ਨੋ-ਫਲਾਈਂਗ ਜ਼ੋਨ' ਵੀ ਐਲਾਨਿਆ ਗਿਆ ਹੈ, ਜਿਸ ਕਾਰਨ ਇਸ ਵਾਰ ਹੈਲੀਕਾਪਟਰ ਸੇਵਾਵਾਂ ਵੀ ਬੰਦ ਹਨ। ਸ਼ਰਧਾਲੂਆਂ ਨੂੰ ਸਿਰਫ਼ ਪੈਦਲ, ਖੱਚਰ ਜਾਂ ਪੋਨੀ ਅਥਵਾ ਪਾਲਕੀ ਜ਼ਰੀਏ ਰਾਹੀਂ ਹੀ ਯਾਤਰਾ ਤੈਅ ਕਰਨੀ ਹੋਵੇਗੀ।