ਰਾਤ ਨੂੰ ਕਿੰਨੇ ਵਜੇ ਖੋਲ੍ਹ ਸਕਦੇ ਹੋ ਟ੍ਰੇਨ ਦਾ ਮਿਡਲ ਬਰਥ? ਸਫ਼ਰ 'ਚ ਨਹੀਂ ਚਾਹੁੰਦੇ ਵਿਵਾਦ ਤਾਂ ਸਮਝ ਲਵੋ ਰੇਲਵੇ ਦਾ ਨਿਯਮ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਅਸੀਂ ਸਾਰੇ ਟ੍ਰੇਨ 'ਚ ਸਫ਼ਰ ਕਰਦੇ ਸਮੇਂ ਇਹੀ ਚਾਹੁੰਦੇ ਹਾਂ ਕਿ ਸਾਨੂੰ ਹੇਠਾਂ ਵਾਲੀ ਸੀਟ (ਲੋਅਰ ਬਰਥ) ਮਿਲ ਜਾਵੇ। ਦਰਅਸਲ, ਖਿੜਕੀ ਤੋਂ ਬਾਹਰ ਦੇ ਨਜ਼ਾਰੇ ਦੇਖਦੇ ਹੋਏ ਆਰਾਮ ਨਾਲ ਸਫ਼ਰ ਕਰਨ ਦਾ ਮਜ਼ਾ ਹੀ ਕੁਝ ਹੋਰ ਹੁੰਦਾ ਹੈ।

ਵੈਸੇ ਰੇਲਵੇ ਦੀ ਹਮੇਸ਼ਾ ਇਹੀ ਕੋਸ਼ਿਸ਼ ਰਹਿੰਦੀ ਹੈ ਕਿ ਲੋਅਰ ਬਰਥ ਬਜ਼ੁਰਗਾਂ ਨੂੰ ਦਿੱਤਾ ਜਾਵੇ ਕਿਉਂਕਿ ਉਨ੍ਹਾਂ ਲਈ ਉੱਪਰ ਵਾਲੀ ਸੀਟ 'ਤੇ ਚੜ੍ਹਨਾ ਕਾਫ਼ੀ ਔਖਾ ਹੁੰਦਾ ਹੈ। ਇਸ ਸਭ ਦੇ ਵਿਚਕਾਰ ਟ੍ਰੇਨ 'ਚ ਯਾਤਰੀਆਂ ਵਿਚਾਲੇ ਸਭ ਤੋਂ ਜ਼ਿਆਦਾ ਬਹਿਸ ਅਤੇ ਵਿਵਾਦ ਜਿਸ ਗੱਲ 'ਤੇ ਹੁੰਦਾ ਹੈ, ਉਹ ਹੈ 'ਮਿਡਲ ਬਰਥ'।

ਦਿਨ 'ਚ ਮਿਡਲ ਬਰਥ ਖੋਲ੍ਹਣ ਨਾਲ ਹੁੰਦੀ ਹੈ ਪਰੇਸ਼ਾਨੀ

ਕਈ ਵਾਰ ਅਜਿਹਾ ਹੁੰਦਾ ਹੈ ਕਿ ਕੁਝ ਯਾਤਰੀ ਦਿਨ ਵੇਲੇ ਹੀ ਆਪਣੀ ਮਿਡਲ ਬਰਥ ਖੋਲ੍ਹ ਲੈਂਦੇ ਹਨ। ਅਜਿਹਾ ਕਰਨ ਨਾਲ ਲੋਅਰ ਬਰਥ ਵਾਲੇ ਯਾਤਰੀਆਂ ਨੂੰ ਸਿੱਧੇ ਬੈਠਣ 'ਚ ਕਾਫ਼ੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਇਸੇ ਸਮੱਸਿਆ ਨੂੰ ਸੁਲਝਾਉਣ ਤੇ ਯਾਤਰੀਆਂ ਦਾ ਸਫ਼ਰ ਆਰਾਮਦਾਇਕ ਬਣਾਉਣ ਲਈ ਰੇਲਵੇ ਨੇ ਮਿਡਲ ਬਰਥ ਨਾਲ ਜੁੜੇ ਕੁਝ ਬਹੁਤ ਜ਼ਰੂਰੀ ਨਿਯਮ ਬਣਾਏ ਹਨ।

ਕੀ ਹੈ ਮਿਡਲ ਬਰਥ ਖੋਲ੍ਹਣ ਦਾ ਸਹੀ ਸਮਾਂ?

ਭਾਰਤੀ ਰੇਲਵੇ ਦੇ ਨਿਯਮਾਂ ਅਨੁਸਾਰ, ਤੁਸੀਂ ਮਿਡਲ ਬਰਥ ਨੂੰ ਸਿਰਫ਼ ਰਾਤ ਨੂੰ ਸੌਣ ਲਈ ਹੀ ਖੋਲ੍ਹ ਸਕਦੇ ਹੋ। ਇਸ ਦੇ ਲਈ ਬਾਕਾਇਦਾ ਇਕ ਸਮਾਂ ਤੈਅ ਕੀਤਾ ਗਿਆ ਹੈ। ਨਿਯਮ ਅਨੁਸਾਰ, ਯਾਤਰੀਆਂ ਨੂੰ ਰਾਤ 10 ਵਜੇ ਤੋਂ ਲੈ ਕੇ ਸਵੇਰੇ 6 ਵਜੇ ਤਕ ਹੀ ਮਿਡਲ ਬਰਥ ਖੋਲ੍ਹਣ ਦੀ ਇਜਾਜ਼ਤ ਹੈ।

ਸਵੇਰੇ 6 ਵਜੇ ਤੋਂ ਬਾਅਦ ਅਤੇ ਰਾਤ 10 ਵਜੇ ਤੋਂ ਪਹਿਲਾਂ ਮਿਡਲ ਬਰਥ ਨੂੰ ਬੰਦ ਕਰਨਾ ਹੁੰਦਾ ਹੈ। ਅਜਿਹਾ ਇਸ ਲਈ ਕੀਤਾ ਜਾਂਦਾ ਹੈ ਤਾਂ ਜੋ ਲੋਅਰ ਬਰਥ ਵਾਲੇ ਯਾਤਰੀ ਦਿਨ 'ਚ ਆਰਾਮ ਨਾਲ ਬੈਠ ਸਕਣ। ਹਾਲਾਂਕਿ, ਜੇਕਰ ਦੂਜੇ ਸਹਿ-ਯਾਤਰੀ ਸਹਿਮਤ ਹੋਣ ਤਾਂ ਬਜ਼ੁਰਗਾਂ ਅਤੇ ਗਰਭਵਤੀ ਔਰਤਾਂ ਨੂੰ ਦਿਨ ਦੇ ਸਮੇਂ ਵੀ ਮਿਡਲ ਬਰਥ ਵਰਤਣ ਦੀ ਛੋਟ ਦਿੱਤੀ ਜਾ ਸਕਦੀ ਹੈ।

ਕੀ ਨਿਯਮ ਤੋੜਨ 'ਤੇ ਲੱਗਦਾ ਹੈ ਜੁਰਮਾਨਾ?

ਹੁਣ ਸਭ ਤੋਂ ਵੱਡਾ ਸਵਾਲ ਇਹ ਹੈ ਕਿ ਜੇਕਰ ਕੋਈ ਯਾਤਰੀ ਦਿਨ 'ਚ ਮਿਡਲ ਬਰਥ ਖੋਲ੍ਹਦਾ ਹੈ, ਤਾਂ ਕੀ ਉਸ 'ਤੇ ਕੋਈ ਜੁਰਮਾਨਾ ਲੱਗਦਾ ਹੈ? ਜਾਣਕਾਰੀ ਲਈ ਦੱਸ ਦੇਈਏ ਕਿ ਦਿਨ 'ਚ ਮਿਡਲ ਬਰਥ ਖੋਲ੍ਹਣ 'ਤੇ ਕਿਸੇ ਵੀ ਤਰ੍ਹਾਂ ਦੇ ਜੁਰਮਾਨੇ ਜਾਂ ਸਖ਼ਤ ਕਾਰਵਾਈ ਦਾ ਕੋਈ ਪ੍ਰਬੰਧ ਨਹੀਂ ਹੈ।

ਪਰ, ਇਹ ਗੱਲ ਪੂਰੀ ਤਰ੍ਹਾਂ ਸੱਚ ਹੈ ਕਿ ਦਿਨ 'ਚ ਸੀਟ ਖੋਲ੍ਹਣਾ ਰੇਲਵੇ ਦੇ ਤੈਅ ਨਿਯਮਾਂ ਦੇ ਖ਼ਿਲਾਫ਼ ਹੈ। ਅਜਿਹੇ 'ਚ, ਜੇਕਰ ਤੁਹਾਡੇ ਮਿਡਲ ਬਰਥ ਖੋਲ੍ਹਣ ਨਾਲ ਲੋਅਰ ਬਰਥ ਵਾਲੇ ਯਾਤਰੀ ਨੂੰ ਕੋਈ ਪਰੇਸ਼ਾਨੀ ਹੁੰਦੀ ਹੈ ਜਾਂ ਉਹ ਇਸ 'ਤੇ ਇਤਰਾਜ਼ ਜਤਾਉਂਦਾ ਹੈ ਤਾਂ ਤੁਹਾਨੂੰ ਆਪਣੀ ਮਿਡਲ ਬਰਥ ਹਰ ਹਾਲਤ 'ਚ ਬੰਦ ਕਰਨੀ ਪਵੇਗੀ।

ਜੇਕਰ ਕੋਈ ਯਾਤਰੀ ਗੱਲ ਨਾ ਮੰਨੇ ਤਾਂ ਕੀ ਕਰੀਏ?

ਸਫ਼ਰ ਦੌਰਾਨ ਕਈ ਵਾਰ ਅਜਿਹਾ ਵੀ ਹੁੰਦਾ ਹੈ ਕਿ ਤੁਹਾਡੇ ਪਿਆਰ ਨਾਲ ਬੇਨਤੀ ਕਰਨ ਤੋਂ ਬਾਅਦ ਵੀ ਸਾਹਮਣੇ ਵਾਲਾ ਯਾਤਰੀ ਮਿਡਲ ਬਰਥ ਬੰਦ ਕਰਨ ਤੋਂ ਮਨ੍ਹਾ ਕਰ ਦਿੰਦਾ ਹੈ ਅਤੇ ਨਿਯਮਾਂ ਦੀ ਪਾਲਣਾ ਨਹੀਂ ਕਰਦਾ। ਅਜਿਹੇ ਹਾਲਾਤ 'ਚ ਤੁਹਾਨੂੰ ਪਰੇਸ਼ਾਨ ਹੋਣ ਦੀ ਜ਼ਰੂਰਤ ਨਹੀਂ ਹੈ। ਤੁਸੀਂ ਸਿੱਧਾ ਟ੍ਰੇਨ 'ਚ ਮੌਜੂਦ ਟੀਟੀਈ (TTE) ਕੋਲ ਉਸ ਯਾਤਰੀ ਦੀ ਸ਼ਿਕਾਇਤ ਕਰ ਸਕਦੇ ਹੋ। ਇਸ ਤੋਂ ਇਲਾਵਾ, ਤੁਸੀਂ ਰੇਲਵੇ ਦੇ ਅਧਿਕਾਰਤ ਹੈਲਪਲਾਈਨ ਨੰਬਰ '139' 'ਤੇ ਸੰਪਰਕ ਕਰਕੇ ਵੀ ਤੁਰੰਤ ਮਦਦ ਮੰਗ ਸਕਦੇ ਹੋ।