ਮੋਟਾਪੇ ਕਾਰਨ ਘੱਟ ਜਾਂਦੇ ਹਨ ਨੌਕਰੀ ਮਿਲਣ ਦੇ ਚਾਂਸ, ਮਰਦਾਂ ਦੇ ਕਰੀਅਰ ਨੂੰ ਹੋ ਰਿਹਾ ਸਭ ਤੋਂ ਜ਼ਿਆਦਾ ਨੁਕਸਾਨ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਅਸੀਂ ਅਕਸਰ ਸੁਣਦੇ ਆਏ ਹਾਂ ਕਿ ਵਧਦਾ ਹੋਇਆ ਵਜ਼ਨ ਕਈ ਬਿਮਾਰੀਆਂ ਜਿਵੇਂ ਡਾਇਬਟੀਜ਼ ਤੇ ਦਿਲ ਦੀਆਂ ਬਿਮਾਰੀਆਂ ਦੀ ਜੜ੍ਹ ਹੈ। ਸਿਹਤ ਨਾਲ ਜੁੜੇ ਇਹ ਨੁਕਸਾਨ ਤਾਂ ਅਸੀਂ ਸਾਰੇ ਜਾਣਦੇ ਹਾਂ, ਪਰ ਕੀ ਤੁਸੀਂ ਕਦੇ ਸੋਚਿਆ ਹੈ ਕਿ ਤੁਹਾਡਾ ਇਹ ਵਧਿਆ ਹੋਇਆ ਵਜ਼ਨ ਤੁਹਾਡੀ ਨੌਕਰੀ ਲਈ ਵੀ ਵੱਡਾ ਖ਼ਤਰਾ ਬਣ ਸਕਦਾ ਹੈ?

ਹਾਲ ਹੀ 'ਚ ਹੋਈ ਇਕ ਰਿਸਰਚ ਨੇ ਇਸ ਗੱਲ ਨੂੰ ਸਾਬਤ ਕੀਤਾ ਹੈ ਕਿ ਮੋਟਾਪਾ ਹੁਣ ਸਿਰਫ਼ ਇਕ ਸਰੀਰਕ ਸਮੱਸਿਆ ਨਹੀਂ ਰਿਹਾ, ਸਗੋਂ ਇਹ ਲੋਕਾਂ ਦੇ ਕਰੀਅਰ ਅਤੇ ਦੇਸ਼ ਦੀ ਆਰਥਿਕਤਾ 'ਤੇ ਵੀ ਸਿੱਧਾ ਵਾਰ ਕਰ ਰਿਹਾ ਹੈ।

ਕੀ ਕਹਿੰਦੀ ਹੈ ਇਹ ਨਵੀਂ ਰਿਸਰਚ?

ਮੈਕਸੀਕੋ 'ਚ 'ਇੰਟਰਨੈਸ਼ਨਲ ਕਾਂਗਰਸ ਓਨ ਓਬੇਸਿਟੀ' 'ਚ ਇਕ ਬਹੁਤ ਹੀ ਅਹਿਮ ਸਟੱਡੀ ਪੇਸ਼ ਕੀਤੀ ਗਈ। ਬ੍ਰਿਟੇਨ ਦੀ 'ਯੂਨੀਵਰਸਿਟੀ ਆਫ਼ ਯਾਰਕ' ਦੇ ਖੋਜਕਰਤਾ ਡਾ. ਅਹਰੋਨ ਕਾਟਜ਼ ਅਤੇ ਉਨ੍ਹਾਂ ਦੀ ਟੀਮ ਨੇ ਲਗਪਗ 2 ਲੱਖ 84 ਹਜ਼ਾਰ ਲੋਕਾਂ ਦੇ ਡੇਟਾ ਦਾ ਡੂੰਘਾਈ ਨਾਲ ਵਿਸ਼ਲੇਸ਼ਣ ਕੀਤਾ। ਇਸ ਦੌਰਾਨ ਉਨ੍ਹਾਂ ਨੇ ਕੇਵਲ ਲੋਕਾਂ ਦੇ ਸਰੀਰ ਨੂੰ ਨਹੀਂ ਦੇਖਿਆ, ਸਗੋਂ ਉਨ੍ਹਾਂ ਦੇ ਬੈਕਗ੍ਰਾਊਂਡ ਨਾਲ ਜੁੜੇ ਤਮਾਮ ਪਹਿਲੂਆਂ ਨੂੰ ਪਰਖਿਆ ਤਾਂ ਜੋ ਮੋਟਾਪੇ ਦੇ ਅਸਲੀ ਅਸਰ ਨੂੰ ਸਟੀਕਤਾ ਨਾਲ ਸਮਝਿਆ ਜਾ ਸਕੇ।

ਨਤੀਜਿਆਂ 'ਚ ਪਾਇਆ ਗਿਆ ਕਿ ਆਮ ਵਜ਼ਨ ਵਾਲੇ ਲੋਕਾਂ ਦੇ ਮੁਕਾਬਲੇ, ਮੋਟਾਪੇ ਦਾ ਸਾਹਮਣਾ ਕਰ ਰਹੇ ਬਾਲਗਾਂ ਕੋਲ ਨੌਕਰੀ ਹੋਣ ਦੇ ਚਾਂਸ 4.2 ਪ੍ਰਤੀਸ਼ਤ ਘੱਟ ਹੁੰਦੇ ਹਨ। ਜੇਕਰ ਬ੍ਰਿਟੇਨ ਦੇ ਮੌਜੂਦਾ ਰੋਜ਼ਗਾਰ ਅੰਕੜਿਆਂ ਨੂੰ ਦੇਖੀਏ ਤਾਂ ਉੱਥੇ ਕਰੀਬ 6 ਲੱਖ ਲੋਕ ਅਜਿਹੇ ਹਨ ਜੋ ਕਿਸੇ ਹੋਰ ਵਜ੍ਹਾ ਕਰਕੇ ਨਹੀਂ, ਸਗੋਂ ਸਿਰਫ਼ ਆਪਣੇ ਜ਼ਿਆਦਾ ਵਜ਼ਨ ਕਾਰਨ ਕੰਮ ਤੋਂ ਦੂਰ ਹਨ।

ਮੋਟਾਪੇ ਨਾਲ ਨੌਕਰੀ ਜਾਣ ਦਾ ਕੀ ਕੁਨੈਕਸ਼ਨ ?

ਆਖਿਰ ਵਧਿਆ ਹੋਇਆ ਵਜ਼ਨ ਕਿਸੇ ਨੂੰ ਬੇਰੋਜ਼ਗਾਰ ਕਿਵੇਂ ਬਣਾ ਸਕਦਾ ਹੈ? ਸਟੱਡੀ ਵਿਚ ਇਸ ਦੇ ਮੁੱਖ ਰੂਪ 'ਚ ਦੋ ਵੱਡੇ ਕਾਰਨ ਸਾਹਮਣੇ ਆਏ ਹਨ:

ਸਰੀਰਕ ਚੁਣੌਤੀਆਂ: ਇਹ ਤਾਂ ਸਾਫ਼ ਹੈ ਕਿ ਜ਼ਿਆਦਾ ਵਜ਼ਨ ਹੋਣ ਨਾਲ ਸਰੀਰ 'ਚ ਦਰਦ, ਜਲਦੀ ਥਕਾਵਟ, ਚੱਲਣ-ਫਿਰਨ 'ਚ ਦਿੱਕਤ ਅਤੇ ਨੀਂਦ ਨਾ ਆਉਣ ਵਰਗੀਆਂ ਪਰੇਸ਼ਾਨੀਆਂ ਆਮ ਹੋ ਜਾਂਦੀਆਂ ਹਨ। ਇਸ ਦੇ ਨਾਲ ਹੀ ਮੋਟਾਪੇ ਨਾਲ ਜੁੜੀਆਂ ਹੋਰ ਬਿਮਾਰੀਆਂ ਕੰਮ 'ਤੇ ਲਗਾਤਾਰ ਫੋਕਸ ਕਰਨਾ ਮੁਸ਼ਕਿਲ ਬਣਾ ਦਿੰਦੀਆਂ ਹਨ।

ਵਰਕਪਲੇਸ 'ਤੇ ਵਿਤਕਰਾ: ਇਹ ਸਭ ਤੋਂ ਵੱਧ ਹੈਰਾਨ ਕਰਨ ਵਾਲੀ ਗੱਲ ਹੈ। ਨੌਕਰੀ ਦੇਣ ਵਾਲੇ ਅਕਸਰ ਬਿਨਾਂ ਕਿਸੇ ਠੋਸ ਆਧਾਰ ਦੇ ਇਹ ਮੰਨ ਲੈਂਦੇ ਹਨ ਕਿ ਮੋਟਾਪੇ ਤੋਂ ਪੀੜਤ ਲੋਕ ਕੰਮ ਵਿਚ ਘੱਟ ਫੁਰਤੀਲੇ ਜਾਂ ਘੱਟ ਸਕਸ਼ਮ ਹੁੰਦੇ ਹਨ। ਇਸ ਗਲਤ ਤੇ ਨਕਾਰਾਤਮਕ ਧਾਰਨਾ ਦੇ ਕਾਰਨ ਲੋਕਾਂ ਨੂੰ ਹਾਇਰਿੰਗ ਤੋਂ ਲੈ ਕੇ ਪ੍ਰਮੋਸ਼ਨ ਤਕ 'ਚ ਭਾਰੀ ਵਿਤਕਰੇ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।

ਔਰਤਾਂ ਦੇ ਮੁਕਾਬਲੇ ਮਰਦਾਂ 'ਤੇ ਪੈ ਰਹੀ ਹੈ ਜ਼ਿਆਦਾ ਮਾਰ

ਖੋਜ ਵਿਚ ਇਕ ਹੈਰਾਨ ਕਰਨ ਵਾਲਾ ਅੰਕੜਾ ਵੀ ਸਾਹਮਣੇ ਆਇਆ ਹੈ। ਇਸ 'ਰੋਜ਼ਗਾਰ ਸੰਕਟ' ਦਾ ਬੁਰਾ ਅਸਰ ਮਰਦਾਂ 'ਤੇ ਕਿਤੇ ਜ਼ਿਆਦਾ ਹੋ ਰਿਹਾ ਹੈ। ਜਿੱਥੇ ਔਰਤਾਂ ਦੀ ਨੌਕਰੀ ਮਿਲਣ ਦੀਆਂ ਸੰਭਾਵਨਾਵਾਂ 'ਚ ਮੋਟਾਪੇ ਕਾਰਨ 2.1% ਦੀ ਘਾਟ ਆਉਂਦੀ ਹੈ, ਉੱਥੇ ਮਰਦਾਂ ਲਈ ਇਹ ਨੁਕਸਾਨ 6.6% ਦਾ ਹੈ। ਹਾਲਾਂਕਿ, ਅਜਿਹਾ ਕਿਉਂ ਹੋ ਰਿਹਾ ਹੈ ਇਸ ਦੇ ਸਟੀਕ ਕਾਰਨ ਅਜੇ ਖੋਜੇ ਜਾਣੇ ਬਾਕੀ ਹਨ, ਪਰ ਇਹ ਫਾਸਲਾ ਆਪਣੇ ਆਪ 'ਚ ਬਹੁਤ ਵੱਡਾ ਹੈ।

ਆਰਥਿਕਤਾ ਲਈ ਵੱਜ ਰਹੀ ਹੈ ਖ਼ਤਰੇ ਦੀ ਘੰਟੀ

ਸਥਿਤੀ ਕਿੰਨੀ ਗੰਭੀਰ ਹੈ, ਇਸ ਦਾ ਅੰਦਾਜ਼ਾ ਇਸੇ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਇੰਗਲੈਂਡ ਤੇ ਵੇਲਜ਼ 'ਚ ਕੰਮ ਕਰਨ ਦੀ ਉਮਰ ਵਾਲੇ ਇੱਕ-ਚੌਥਾਈ ਬਾਲਗ ਹੁਣ ਮੋਟਾਪੇ ਦੇ ਸ਼ਿਕਾਰ ਹਨ। ਬ੍ਰਿਟੇਨ ਦਾ ਰੋਜ਼ਗਾਰ ਦਰ ਫਿਲਹਾਲ 75.5% ਹੈ। ਅਜਿਹੇ 'ਚ ਮੋਟਾਪੇ ਕਾਰਨ ਰੋਜ਼ਗਾਰ 'ਚ ਆਉਣ ਵਾਲੀ ਜ਼ਰਾ-ਜਿੰਨੀ ਗਿਰਾਵਟ ਵੀ ਲੱਖਾਂ ਲੋਕਾਂ ਨੂੰ ਪ੍ਰਭਾਵਿਤ ਕਰਦੀ ਹੈ।

ਮੋਟਾਪੇ ਦੀ ਵਜ੍ਹਾ ਕਰਕੇ ਮੁਲਾਜ਼ਮ ਜ਼ਿਆਦਾ ਬਿਮਾਰ ਪੈਂਦੇ ਹਨ, ਛੁੱਟੀਆਂ ਜ਼ਿਆਦਾ ਲੈਂਦੇ ਹਨ, ਜਿਸ ਨਾਲ ਉਨ੍ਹਾਂ ਦੀ ਦਿਹਾੜੀ ਘਟਦੀ ਹੈ ਤੇ ਕੰਮ ਦੀ ਰਫ਼ਤਾਰ ਵੀ ਹੌਲੀ ਪੈ ਜਾਂਦੀ ਹੈ। ਬ੍ਰਿਟੇਨ ਦੀ 'ਨੈਸ਼ਨਲ ਹੈਲਥ ਸਰਵਿਸ' ਪਹਿਲਾਂ ਤੋਂ ਹੀ ਮੋਟਾਪੇ ਨਾਲ ਜੁੜੀਆਂ ਬਿਮਾਰੀਆਂ 'ਤੇ ਹਰ ਸਾਲ ਅਰਬਾਂ ਰੁਪਏ ਖ਼ਰਚ ਕਰ ਰਹੀ ਹੈ ਅਤੇ ਕੰਮ ਦਾ ਇਹ ਨੁਕਸਾਨ ਇਸ ਆਰਥਿਕ ਬੋਝ ਨੂੰ ਕਈ ਗੁਣਾ ਵਧਾ ਰਿਹਾ ਹੈ।

ਕੀ ਮੈਡੀਕਲ ਸਾਇੰਸ ਕੋਲ ਹੈ ਕੋਈ ਰਸਤਾ?

ਇਸ ਵੱਡੀ ਸਮੱਸਿਆ ਨਾਲ ਨਜਿੱਠਣ ਲਈ GLP-1 ਵਰਗੀਆਂ ਨਵੀਆਂ ਵਜ਼ਨ ਘਟਾਉਣ ਵਾਲੀਆਂ ਦਵਾਈਆਂ ਤੋਂ ਕਾਫ਼ੀ ਉਮੀਦਾਂ ਬੱਝ ਰਹੀਆਂ ਹਨ। ਮੈਨਚੈਸਟਰ 'ਚ ਸਰਕਾਰ ਬਕਾਇਦਾ ਇਕ ਟ੍ਰਾਇਲ ਕਰ ਰਹੀ ਹੈ ਤਾਂ ਜੋ ਇਹ ਦੇਖਿਆ ਜਾ ਸਕੇ ਕਿ ਕੀ ਵਜ਼ਨ ਘਟਾਉਣ ਵਾਲੀਆਂ ਇਹ ਨਵੀਆਂ ਦਵਾਈਆਂ ਲੋਕਾਂ ਨੂੰ ਉਨ੍ਹਾਂ ਦਾ ਰੋਜ਼ਗਾਰ ਬਚਾਏ ਰੱਖਣ ਜਾਂ ਵਾਪਸ ਕੰਮ 'ਤੇ ਪਰਤਣ 'ਚ ਮਦਦ ਕਰ ਸਕਦੀਆਂ ਹਨ।

ਐਕਸਪਰਟਸ ਹੁਣ ਸਾਫ਼ ਤੌਰ 'ਤੇ ਕਹਿ ਰਹੇ ਹਨ ਕਿ ਮੋਟਾਪਾ ਸਿਰਫ਼ ਖ਼ਰਾਬ ਲਾਈਫਸਟਾਈਲ ਦਾ ਨਤੀਜਾ ਨਹੀਂ ਹੈ, ਸਗੋਂ ਇਹ ਇਕ ਕ੍ਰੋਨਿਕ ਡਿਜ਼ੀਜ਼ (ਗੰਭੀਰ ਬਿਮਾਰੀ) ਹੈ। ਇਸ ਦਾ ਇਲਾਜ ਸਿਰਫ਼ 'ਘੱਟ ਖਾਓ ਜਾਂ ਕਸਰਤ ਕਰੋ' ਕਹਿਣ ਨਾਲ ਨਹੀਂ ਹੋਵੇਗਾ। ਇਸ ਦੇ ਲਈ ਲੋਕਾਂ ਨੂੰ ਸਹੀ ਦਵਾਈਆਂ, ਬਿਹਤਰ ਖਾਣ-ਪੀਣ ਅਤੇ ਲੰਬੇ ਸਮੇਂ ਤੱਕ ਮੈਡੀਕਲ ਦੇਖਰੇਖ ਦੀ ਲੋੜ ਹੈ।