ਨਵੀਂ ਖੋਜ 'ਚ ਦਾਅਵਾ: ਓਮੈਗਾ-3 ਸਪਲੀਮੈਂਟਸ ਨਾਲ ਡਿਮੈਂਸ਼ੀਆ ਜਾਂ ਯਾਦਦਾਸ਼ਤ ਸੁਧਾਰਨ 'ਚ ਨਹੀਂ ਮਿਲਦਾ ਕੋਈ ਖ਼ਾਸ ਫ਼ਾਇਦਾ

ਨਿਊਯਾਰਕ ਟਾਈਮਜ਼, ਲਾਈਫਸਟਾਈਲ ਡੈਸਕ। ਓਮੈਗਾ-3 ਫੈਟੀ ਐਸਿਡ ਦਿਮਾਗ ਦੀ ਸਿਹਤ ਲਈ ਬਹੁਤ ਜ਼ਰੂਰੀ ਹਨ। ਇਹ ਦਿਮਾਗ ਦੀਆਂ ਕੋਸ਼ਿਕਾਵਾਂ ਬਣਾਉਣ, ਕੋਸ਼ਿਕਾ ਦੀਆਂ ਦੀਵਾਰਾਂ ਨੂੰ ਲਚਕੀਲਾ ਰੱਖਣ ਅਤੇ ਨਿਊਰਾਨਾਂ ਨੂੰ ਨਵੇਂ ਕੁਨੈਕਸ਼ਨ ਬਣਾਉਣ ਅਤੇ ਹੋਰ ਕੋਸ਼ਿਕਾਵਾਂ ਨਾਲ ਗੱਲਬਾਤ ਕਰਨ ਵਿਚ ਮਦਦ ਕਰਦੇ ਹਨ। ਕਈ ਖੋਜਾਂ ਨੇ ਇਹ ਦਰਸਾਇਆ ਹੈ ਕਿ ਜਿਨ੍ਹਾਂ ਲੋਕਾਂ ਦੇ ਖ਼ੂਨ ਵਿਚ ਓਮੈਗਾ-3 ਦਾ ਪੱਧਰ ਵੱਧ ਹੁੰਦਾ ਹੈ, ਉਨ੍ਹਾਂ ਦੀ ਸੋਚਣ-ਸਮਝਣ ਦੀ ਸਮਰੱਥਾ ਬਿਹਤਰ ਹੁੰਦੀ ਹੈ ਅਤੇ ਦਿਮਾਗ ਜ਼ਿਆਦਾ ਸਿਹਤਮੰਦ ਦਿਖਾਈ ਦਿੰਦਾ ਹੈ। ਉਨ੍ਹਾਂ ਨੂੰ ਡਿਮੈਂਸ਼ੀਆ ਦਾ ਖ਼ਤਰਾ ਵੀ ਘੱਟ ਹੁੰਦਾ ਹੈ। ਇਸ ਦੇ ਉਲਟ, ਅਲਜ਼ਾਈਮਰ ਤੋਂ ਪੀੜਤ ਲੋਕਾਂ ਵਿਚ ਓਮੈਗਾ-3 ਦਾ ਪੱਧਰ ਘੱਟ ਪਾਇਆ ਗਿਆ ਹੈ। ਪਰ ਇਕ ਗੱਲ ਧਿਆਨ ਦੇਣ ਯੋਗ ਹੈ। ਜ਼ਿਆਦਾਤਰ ਕਲੀਨਿਕਲ ਟ੍ਰਾਇਲਜ਼ ਵਿਚ ਇਹ ਦੇਖਿਆ ਗਿਆ ਹੈ ਕਿ ਓਮੈਗਾ-3 ਸਪਲੀਮੈਂਟਸ ਨਾਲ ਸੋਚਣ-ਸਮਝਣ ਦੀ ਸਮਰੱਥਾ ਜਾਂ ਡਿਮੈਂਸ਼ੀਆ ਦੇ ਲੱਛਣਾਂ ਵਿਚ ਲਗਪਗ ਕੋਈ ਫ਼ਾਇਦਾ ਨਹੀਂ ਹੁੰਦਾ।

ਯੂਨੀਵਰਸਿਟੀ ਆਫ ਕੈਲੀਫੋਰਨੀਆ ਦੀ ਪ੍ਰੋਫੈਸਰ ਡਾ. ਕ੍ਰਿਸਟੀਨ ਯਾਫੇ ਨੇ ਕਿਹਾ, ‘ਇਹ ਗੱਲ ਸਹੀ ਤਰੀਕੇ ਨਾਲ ਸਮਝ ਆਉਂਦੀ ਹੈ ਕਿ ਨਿਊਰਾਨਾਂ ਦੀ ਸਿਹਤ ਲਈ ਫੈਟੀ ਐਸਿਡ ਦੀ ਲੋੜ ਹੁੰਦੀ ਹੈ। ਸਮੱਸਿਆ ਇਹ ਹੈ ਕਿ ਜ਼ਿਆਦਾਤਰ ਸਬੂਤ, ਖ਼ਾਸ ਕਰਕੇ ਟ੍ਰਾਇਲ ਦੇ ਸਬੂਤ, ਇਸ ਗੱਲ ਦਾ ਬਿਲਕੁਲ ਵੀ ਸਮਰਥਨ ਨਹੀਂ ਕਰਦੇ।’ ਪਿਛਲੇ ਮਹੀਨੇ ਪ੍ਰਕਾਸ਼ਿਤ ਇਕ ਖੋਜ ਇਸ ਦੀ ਬਿਹਤਰ ਉਦਾਹਰਨ ਹੈ। ਕਲੀਨਿਕਲ ਟ੍ਰਾਇਲ ਕਰਨ ਵਾਲੇ ਵਿਗਿਆਨੀਆਂ ਨੇ ਹਰ ਪਹਿਲੂ ਦਾ ਧਿਆਨ ਰੱਖਣ ਦੀ ਕੋਸ਼ਿਸ਼ ਕੀਤੀ।

ਇਸ ਵਿਚ ਸ਼ਾਮਲ ਲੋਕ ਵੱਡੀ ਉਮਰ ਦੇ ਸਨ ਅਤੇ ਉਹ ਜ਼ਿਆਦਾ ਮੱਛੀ ਨਹੀਂ ਖਾਂਦੇ ਸਨ (ਜਿਸ ਵਿਚ ਓਮੈਗਾ-3 ਭਰਪੂਰ ਮਾਤਰਾ ਵਿਚ ਹੁੰਦਾ ਹੈ), ਜਿਸ ਨਾਲ ਇਹ ਦਰਸਾਇਆ ਗਿਆ ਕਿ ਉਨ੍ਹਾਂ ਨੂੰ ਸਪਲੀਮੈਂਟ ਤੋਂ ਸਭ ਤੋਂ ਵੱਧ ਫ਼ਾਇਦਾ ਹੋ ਸਕਦਾ ਸੀ। ਲਗਪਗ ਅੱਧੇ ਲੋਕਾਂ ਵਿਚ ਅਲਜ਼ਾਈਮਰ ਦਾ ਜੈਨੇਟਿਕ ਖ਼ਤਰਾ ਵੱਧ ਸੀ। ਇਹ ਇਕ ਅਜਿਹਾ ਗਰੁੱਪ ਸੀ, ਜਿਸ ਬਾਰੇ ਮਾਹਿਰਾਂ ਦਾ ਮੰਨਣਾ ਸੀ ਕਿ ਉਨ੍ਹਾਂ ਨੂੰ ਵੱਧ ਓਮੈਗਾ-3 ਦੀ ਲੋੜ ਹੋ ਸਕਦੀ ਹੈ। ਖੋਜਕਰਤਾਵਾਂ ਨੇ ਕੁਝ ਲੋਕਾਂ ਦਾ ਲੰਬਰ ਪੰਚਰ ਵੀ ਕੀਤਾ ਤਾਂ ਜੋ ਇਹ ਪੱਕਾ ਕੀਤਾ ਜਾ ਸਕੇ ਕਿ ਸਪਲੀਮੈਂਟ ਨਾਲ ਦਿਮਾਗ ਵਿਚ ਓਮੈਗਾ-3 ਦਾ ਪੱਧਰ ਵਧਿਆ ਹੈ।

ਪਰ ਪਲੇਸਬੋ ਦੀ ਤੁਲਨਾ ਵਿਚ, ਲੋਕਾਂ ਦੀ ਸੋਚਣ-ਸਮਝਣ ਦੀ ਸਮਰੱਥਾ ਜਾਂ ਦਿਮਾਗ ਦੀ ਬਣਤਰ ’ਤੇ ਇਸ ਸਪਲੀਮੈਂਟ ਦਾ ਕੋਈ ਫ਼ਾਇਦਾ ਨਹੀਂ ਹੋਇਆ। ਖੋਜਕਰਤਾਵਾਂ ਨੇ ਇਸ ਦਾ ਕਾਰਨ ਜਾਣਨ ਲਈ ਕੁਝ ਅਨੁਮਾਨ ਲਗਾਏ। ਇਸ ਵਿਚ ਕਿਹਾ ਗਿਆ ਕਿ ਉਨ੍ਹਾਂ ਦੀ ਡਾਈਟ ਅਤੇ ਜੀਵਨਸ਼ੈਲੀ ਕਾਰਨ ਪਹਿਲਾਂ ਹੀ ਕਾਫ਼ੀ ਮਾਤਰਾ ਵਿਚ ਓਮੈਗਾ-3 ਮਿਲ ਜਾਂਦਾ ਹੈ। ਇਹ ਵੀ ਮਹੱਤਵਪੂਰਨ ਹੈ ਕਿ ਕੋਈ ਓਮੈਗਾ-3 ਨੂੰ ਕਿਵੇਂ ਮੈਟਾਬੋਲਾਈਜ਼ ਕਰਦਾ ਹੈ। ਨਾਲ ਹੀ, ਫ਼ਾਇਦੇ ਦੇਖਣ ਲਈ ਤੁਹਾਨੂੰ ਲੰਬੇ ਸਮੇਂ ਤੱਕ ਵੱਡੀ ਮਾਤਰਾ ਵਿਚ ਓਮੈਗਾ-3 ਦਾ ਸੇਵਨ ਕਰਨਾ ਪੈ ਸਕਦਾ ਹੈ। ।