ਆਲੂ-ਪਿਆਜ਼ ਨੂੰ ਇੱਕੋ ਥਾਂ ਰੱਖਣ ਨਾਲ ਦੋਵੇਂ ਹੋ ਸਕਦੇ ਨੇ ਜਲਦੀ ਖ਼ਰਾਬ, ਜਾਣੋ ਲੰਬੇ ਸਮੇਂ ਤੱਕ ਤਾਜ਼ਾ ਰੱਖਣ ਦਾ ਸਹੀ ਤਰੀਕਾ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਰਸੋਈ ਵਿੱਚ ਆਲੂ ਅਤੇ ਪਿਆਜ਼ ਤੋਂ ਬਿਨਾਂ ਕੋਈ ਵੀ ਕੰਮ ਨਹੀਂ ਚੱਲਦਾ। ਅਸੀਂ ਅਕਸਰ ਬਾਜ਼ਾਰ ਤੋਂ ਇਨ੍ਹਾਂ ਨੂੰ ਇਕੱਠੇ ਖਰੀਦਦੇ ਹਾਂ ਅਤੇ ਘਰ ਆ ਕੇ ਸਹੂਲਤ ਲਈ ਇੱਕੋ ਟੋਕਰੀ ਵਿੱਚ ਰੱਖ ਦਿੰਦੇ ਹਾਂ। ਦੇਖਣ ਵਿੱਚ ਤੁਹਾਨੂੰ ਵੀ ਸ਼ਾਇਦ ਇਹ ਬਹੁਤ ਆਮ ਗੱਲ ਲੱਗਦੀ ਹੋਵੇਗੀ, ਪਰ ਕੀ ਤੁਹਾਨੂੰ ਪਤਾ ਹੈ ਕਿ ਤੁਹਾਡੀ ਇਹ ਛੋਟੀ ਜਿਹੀ ਆਦਤ ਇਨ੍ਹਾਂ ਦੋਵਾਂ ਸਬਜ਼ੀਆਂ ਨੂੰ ਸਮੇਂ ਤੋਂ ਪਹਿਲਾਂ ਸੜਾ ਸਕਦੀ ਹੈ?

ਆਲੂ ਅਤੇ ਪਿਆਜ਼ ਨੂੰ ਇਕੱਠੇ ਨਾ ਰੱਖੋ

ਜੀ ਹਾਂ, ਤੁਸੀਂ ਬਿਲਕੁਲ ਸਹੀ ਪੜ੍ਹਿਆ। ਆਲੂ ਅਤੇ ਪਿਆਜ਼ ਨੂੰ ਕਦੇ ਵੀ ਇੱਕੋ ਥਾਂ 'ਤੇ ਨਹੀਂ ਰੱਖਣਾ ਚਾਹੀਦਾ। ਅਸਲ ਵਿੱਚ, ਪਿਆਜ਼ ਵਿੱਚੋਂ ਐਥੀਲੀਨ ਗੈਸ ਅਤੇ ਨਮੀ ਨਿਕਲਦੀ ਹੈ। ਜਦੋਂ ਆਲੂ ਇਸ ਗੈਸ ਦੇ ਸੰਪਰਕ ਵਿੱਚ ਆਉਂਦੇ ਹਨ, ਤਾਂ ਉਹ ਜਲਦੀ ਪੁੰਗਰਨ ਲੱਗਦੇ ਹਨ ਅਤੇ ਅੰਦਰੋਂ ਨਰਮ ਹੋ ਕੇ ਗਲ ਜਾਂਦੇ ਹਨ।

ਦੂਜੇ ਪਾਸੇ, ਆਲੂ ਦੀ ਵੀ ਆਪਣੀ ਇੱਕ ਵੱਖਰੀ ਨਮੀ ਹੁੰਦੀ ਹੈ। ਜਦੋਂ ਪਿਆਜ਼ ਇਸ ਨਮੀ ਦੇ ਸੰਪਰਕ ਵਿੱਚ ਆਉਂਦੇ ਹਨ, ਤਾਂ ਉਹ ਵੀ ਜਲਦੀ ਸੜਨ ਲੱਗਦੇ ਹਨ ਅਤੇ ਉਨ੍ਹਾਂ ਵਿੱਚੋਂ ਬਦਬੂ ਆਉਣ ਲੱਗਦੀ ਹੈ। ਸਿੱਧੇ ਸ਼ਬਦਾਂ ਵਿੱਚ ਕਹੀਏ ਤਾਂ ਰਸੋਈ ਵਿੱਚ ਇਹ ਦੋਵੇਂ ਸਬਜ਼ੀਆਂ ਇੱਕ-ਦੂਜੇ ਦੀਆਂ 'ਦੁਸ਼ਮਣ' ਹਨ। ਜੇਕਰ ਤੁਸੀਂ ਇਨ੍ਹਾਂ ਨੂੰ ਇਕੱਠੇ ਰੱਖੋਗੇ, ਤਾਂ ਤੁਹਾਡਾ ਪੈਸਾ ਅਤੇ ਸਬਜ਼ੀ ਦੋਵੇਂ ਬਰਬਾਦ ਹੋਣਗੇ।

ਸਬਜ਼ੀਆਂ ਦੀ ਸ਼ੈਲਫ ਲਾਈਫ ਵਧਾਉਣ ਦੇ ਤਰੀਕੇ

ਆਪਣੀਆਂ ਸਬਜ਼ੀਆਂ ਨੂੰ ਲੰਬੇ ਸਮੇਂ ਤੱਕ ਤਾਜ਼ਾ ਰੱਖਣ ਲਈ ਤੁਸੀਂ ਇਨ੍ਹਾਂ ਸੌਖੇ ਨੁਸਖਿਆਂ ਨੂੰ ਅਪਣਾ ਸਕਦੇ ਹੋ:

ਆਲੂ ਰੱਖਣ ਦਾ ਸਹੀ ਤਰੀਕਾ: ਆਲੂ ਨੂੰ ਹਮੇਸ਼ਾ ਕਿਸੇ ਠੰਢੀ, ਸੁੱਕੀ ਅਤੇ ਹਨੇਰੇ ਵਾਲੀ ਥਾਂ 'ਤੇ ਰੱਖਣਾ ਚਾਹੀਦਾ ਹੈ। ਇਨ੍ਹਾਂ ਨੂੰ ਕਦੇ ਵੀ ਪਲਾਸਟਿਕ ਦੇ ਲਿਫ਼ਾਫ਼ੇ ਵਿੱਚ ਬੰਨ੍ਹ ਕੇ ਨਾ ਰੱਖੋ, ਸਗੋਂ ਕਿਸੇ ਖੁੱਲ੍ਹੀ ਟੋਕਰੀ ਜਾਂ ਪੇਪਰ ਬੈਗ ਵਿੱਚ ਰੱਖੋ ਤਾਂ ਜੋ ਉਨ੍ਹਾਂ ਨੂੰ ਚੰਗੀ ਤਰ੍ਹਾਂ ਹਵਾ ਲੱਗਦੀ ਰਹੇ।

ਪਿਆਜ਼ ਰੱਖਣ ਦਾ ਸਹੀ ਤਰੀਕਾ: ਪਿਆਜ਼ ਨੂੰ ਵੀ ਖੁੱਲ੍ਹੀ ਹਵਾ ਦੀ ਬਹੁਤ ਲੋੜ ਹੁੰਦੀ ਹੈ। ਇਨ੍ਹਾਂ ਨੂੰ ਜਾਲੀਦਾਰ ਬੈਗ, ਜੂਟ ਦੇ ਥੈਲੇ ਜਾਂ ਖੁੱਲ੍ਹੀ ਟੋਕਰੀ ਵਿੱਚ ਰੱਖੋ। ਬਸ ਇਸ ਗੱਲ ਦਾ ਧਿਆਨ ਰੱਖੋ ਕਿ ਪਿਆਜ਼ ਦੀ ਟੋਕਰੀ ਆਲੂਆਂ ਤੋਂ ਕੁਝ ਦੂਰੀ 'ਤੇ ਰੱਖੀ ਹੋਵੇ।

ਇਨ੍ਹਾਂ ਦੋਵਾਂ ਤੋਂ ਇਲਾਵਾ, ਲਸਣ ਨੂੰ ਤੁਸੀਂ ਪਿਆਜ਼ ਦੇ ਨਾਲ ਰੱਖ ਸਕਦੇ ਹੋ, ਕਿਉਂਕਿ ਦੋਵਾਂ ਨੂੰ ਸਟੋਰ ਕਰਨ ਦਾ ਤਰੀਕਾ ਲਗਭਗ ਇੱਕੋ ਜਿਹਾ ਹੀ ਹੁੰਦਾ ਹੈ। ਇਸ ਲਈ, ਅਗਲੀ ਵਾਰ ਜਦੋਂ ਤੁਸੀਂ ਬਾਜ਼ਾਰ ਤੋਂ ਆਲੂ ਅਤੇ ਪਿਆਜ਼ ਖਰੀਦ ਕੇ ਲਿਆਓ, ਤਾਂ ਉਨ੍ਹਾਂ ਨੂੰ ਵੱਖ-ਵੱਖ ਟੋਕਰੀਆਂ ਵਿੱਚ ਰੱਖਣਾ ਬਿਲਕੁਲ ਨਾ ਭੁੱਲਿਓ।