ਬਰਸਾਤ ਦੇ ਮੌਸਮ 'ਚ ਖ਼ਰਾਬ ਨਹੀਂ ਹੋਵੇਗਾ ਅਚਾਰ: ਵਰਤੋਂ ਇਹ ਆਸਾਨ ਟਿਪਸ, ਮਹੀਨਿਆਂ ਤੱਕ ਬਰਕਰਾਰ ਰਹੇਗਾ ਸਵਾਦ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਜਿਵੇਂ ਹੀ ਬਰਸਾਤ ਦਾ ਮੌਸਮ ਆਉਂਦਾ ਹੈ, ਅਚਾਰ 'ਤੇ ਉੱਲੀ ਲੱਗਣ ਦਾ ਖ਼ਤਰਾ ਮੰਡਰਾਉਣ ਲੱਗਦਾ ਹੈ। ਜੀ ਹਾਂ, ਮੌਨਸੂਨ ਦੀ ਹਵਾ ਵਿੱਚ ਮੌਜੂਦ ਨਮੀ ਅਚਾਰ ਨੂੰ ਬਹੁਤ ਜਲਦੀ ਖ਼ਰਾਬ ਕਰ ਸਕਦੀ ਹੈ।

ਜੇਕਰ ਤੁਸੀਂ ਚਾਹੁੰਦੇ ਹੋ ਕਿ ਤੁਹਾਡਾ ਅਚਾਰ ਇਸ ਬਰਸਾਤ ਦੇ ਮੌਸਮ ਵਿੱਚ ਬਿਲਕੁਲ ਸੁਰੱਖਿਅਤ ਅਤੇ ਸਵਾਦਿਸ਼ਟ ਰਹੇ, ਤਾਂ ਇਨ੍ਹਾਂ ਕੰਮ ਦੀਆਂ ਗੱਲਾਂ ਦਾ ਧਿਆਨ ਜ਼ਰੂਰ ਰੱਖੋ।

ਨਮੀ ਤੋਂ ਰੱਖੋ ਦੂਰ

ਬਰਸਾਤ ਦੇ ਮੌਸਮ ਵਿੱਚ ਨਮੀ ਅਚਾਰ ਦੀ ਸਭ ਤੋਂ ਵੱਡੀ ਦੁਸ਼ਮਣ ਹੁੰਦੀ ਹੈ। ਅਚਾਰ ਕੱਢਣ ਲਈ ਹਮੇਸ਼ਾ ਬਿਲਕੁਲ ਸੁੱਕੇ ਅਤੇ ਸਾਫ਼ ਚਮਚ ਦੀ ਹੀ ਵਰਤੋਂ ਕਰੋ। ਕਦੇ ਵੀ ਗਿੱਲੇ ਹੱਥਾਂ ਨਾਲ ਅਚਾਰ ਦੇ ਜਾਰ ਨੂੰ ਨਾ ਛੂਹੋ। ਜਾਰ ਨੂੰ ਖੋਲ੍ਹਣ ਤੋਂ ਬਾਅਦ ਉਸ ਨੂੰ ਤੁਰੰਤ ਕੱਸ ਕੇ ਬੰਦ ਕਰ ਦਿਓ ਤਾਂ ਜੋ ਬਾਹਰਲੀ ਨਮੀ ਅੰਦਰ ਨਾ ਜਾ ਸਕੇ।

ਤੇਲ ਵਿੱਚ ਪੂਰੀ ਤਰ੍ਹਾਂ ਡੁੱਬਿਆ ਹੋਣਾ ਚਾਹੀਦਾ ਹੈ ਅਚਾਰ

ਤੇਲ ਇੱਕ ਬਹਤਰੀਨ ਕੁਦਰਤੀ ਪ੍ਰਿਜ਼ਰਵੇਟਿਵ ਦਾ ਕੰਮ ਕਰਦਾ ਹੈ। ਇਹ ਯਕੀਨੀ ਬਣਾਓ ਕਿ ਤੁਹਾਡੇ ਡੱਬੇ ਵਿੱਚ ਅਚਾਰ ਦੇ ਟੁਕੜੇ ਪੂਰੀ ਤਰ੍ਹਾਂ ਨਾਲ ਤੇਲ ਵਿੱਚ ਡੁੱਬੇ ਹੋਣ। ਤੇਲ ਦੀ ਪਰਤ ਹਵਾ ਅਤੇ ਨਮੀ ਨੂੰ ਅਚਾਰ ਦੇ ਮਸਾਲਿਆਂ ਤੱਕ ਪਹੁੰਚਣ ਤੋਂ ਰੋਕਦੀ ਹੈ, ਜਿਸ ਨਾਲ ਉੱਲੀ ਲੱਗਣ ਦਾ ਖ਼ਤਰਾ ਲਗਭਗ ਖ਼ਤਮ ਹੋ ਜਾਂਦਾ ਹੈ।

ਸਹੀ ਡੱਬੇ ਦੀ ਚੋਣ ਹੈ ਜ਼ਰੂਰੀ

ਅਚਾਰ ਨੂੰ ਸਟੋਰ ਕਰਨ ਲਈ ਹਮੇਸ਼ਾ ਕੱਚ ਜਾਂ ਚੀਨੀ ਮਿੱਟੀ ਦੇ ਮਰਤਬਾਨ ਦਾ ਹੀ ਇਸਤੇਮਾਲ ਕਰੋ। ਪਲਾਸਟਿਕ ਜਾਂ ਸਟੀਲ ਦੇ ਬਰਤਨਾਂ ਵਿੱਚ ਅਚਾਰ ਜਲਦੀ ਰਿਐਕਟ ਕਰਦਾ ਹੈ ਅਤੇ ਖ਼ਰਾਬ ਹੋ ਸਕਦਾ ਹੈ। ਨਾਲ ਹੀ ਡੱਬੇ ਦਾ ਢੱਕਣ ਪੂਰੀ ਤਰ੍ਹਾਂ ਨਾਲ ਏਅਰਟਾਈਟ ਹੋਣਾ ਚਾਹੀਦਾ ਹੈ।

ਜਦੋਂ ਵੀ ਮੌਕਾ ਮਿਲੇ, ਦਿਖਾਓ ਧੁੱਪ

ਬਰਸਾਤ ਦੇ ਮੌਸਮ ਵਿੱਚ ਧੁੱਪ ਘੱਟ ਹੀ ਨਿਕਲਦੀ ਹੈ, ਪਰ ਜਦੋਂ ਵੀ ਮੌਸਮ ਸਾਫ਼ ਹੋਵੇ ਅਤੇ ਚੰਗੀ ਧੁੱਪ ਨਿਕਲੇ, ਤਾਂ ਆਪਣੇ ਅਚਾਰ ਦੇ ਡੱਬੇ ਦਾ ਢੱਕਣ ਖੋਲ੍ਹ ਕੇ ਉਸ 'ਤੇ ਇੱਕ ਸੂਤੀ ਕੱਪੜਾ ਬੰਨ੍ਹੋ ਅਤੇ ਕੁਝ ਘੰਟਿਆਂ ਲਈ ਧੁੱਪ ਵਿੱਚ ਰੱਖ ਦਿਓ। ਧੁੱਪ ਦੀ ਗਰਮੀ ਨਾਲ ਡੱਬੇ ਦੇ ਅੰਦਰ ਦੀ ਸਾਰੀ ਨਮੀ ਖ਼ਤਮ ਹੋ ਜਾਵੇਗੀ ਅਤੇ ਅਚਾਰ ਦੀ ਲਾਈਫ਼ ਵਧ ਜਾਵੇਗੀ।

ਲੂਣ ਅਤੇ ਸਿਰਕੇ ਦਾ ਸਹੀ ਸੰਤੁਲਨ

ਲੂਣ ਨਾ ਸਿਰਫ਼ ਸਵਾਦ ਵਧਾਉਂਦਾ ਹੈ ਬਲਕਿ ਅਚਾਰ ਨੂੰ ਲੰਬੇ ਸਮੇਂ ਤੱਕ ਸੁਰੱਖਿਅਤ ਵੀ ਰੱਖਦਾ ਹੈ। ਜੇਕਰ ਤੁਹਾਨੂੰ ਲੱਗ ਰਿਹਾ ਹੈ ਕਿ ਅਚਾਰ ਜਲਦੀ ਖ਼ਰਾਬ ਹੋ ਰਿਹਾ ਹੈ, ਤਾਂ ਤੁਸੀਂ ਉਸ ਵਿੱਚ ਥੋੜ੍ਹਾ ਜਿਹਾ ਲੂਣ ਹੋਰ ਮਿਲਾ ਸਕਦੇ ਹੋ। ਇਸ ਤੋਂ ਇਲਾਵਾ ਤੁਸੀਂ ਚਾਹੋ ਤਾਂ ਇਸ ਵਿੱਚ ਇੱਕ-ਦੋ ਚਮਚ ਚਿੱਟਾ ਸਿਰਕਾ ਵੀ ਪਾ ਸਕਦੇ ਹੋ।

ਬੱਸ ਇਨ੍ਹਾਂ ਆਸਾਨ ਜਿਹੇ ਘਰੇਲੂ ਟਿਪਸ ਨੂੰ ਅਪਣਾ ਕੇ ਤੁਸੀਂ ਆਪਣੇ ਘਰ ਦੇ ਬਣੇ ਸਵਾਦਿਸ਼ਟ ਅਚਾਰ ਨੂੰ ਬਰਸਾਤ ਦੀ ਨਮੀ ਅਤੇ ਉੱਲੀ ਤੋਂ ਆਸਾਨੀ ਨਾਲ ਬਚਾ ਸਕਦੇ ਹੋ।