ਹਥੇਲੀਆਂ 'ਚ ਦਿਖ ਸਕਦੇ ਹਨ ਲਿਵਰ ਦੀ ਸਮੱਸਿਆ ਦੇ ਸੰਕੇਤ, ਇਨ੍ਹਾਂ ਬਦਲਾਵਾਂ ਨੂੰ ਨਾ ਕਰੋ ਨਜ਼ਰਅੰਦਾਜ਼

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਸਾਡਾ ਲਿਵਰ ਖੂਨ ਵਿੱਚ ਮੌਜੂਦ ਪ੍ਰੋਟੀਨ, ਹਾਰਮੋਨਜ਼ ਅਤੇ ਬਲੱਡ ਸਰਕੁਲੇਸ਼ਨ ਨੂੰ ਨਿਯੰਤਰਿਤ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਉਂਦਾ ਹੈ। ਅਜਿਹੇ ਵਿੱਚ ਜੇਕਰ ਲਿਵਰ ਵਿੱਚ ਕੋਈ ਸਮੱਸਿਆ ਸ਼ੁਰੂ ਹੋ ਗਈ ਹੈ ਤਾਂ ਇਸ ਦੇ ਕੁਝ ਸਪੱਸ਼ਟ ਲੱਛਣ ਚਮੜੀ, ਨਹੁੰਆਂ ਅਤੇ ਸਾਫਟ ਟਿਸ਼ੂਜ਼ ’ਤੇ ਵੀ ਦਿਖਾਈ ਦੇਣ ਲੱਗਦੇ ਹਨ। ਸ਼ੁਰੂਆਤ ਵਿੱਚ ਹੀ ਇਨ੍ਹਾਂ ਲੱਛਣਾਂ ਦੀ ਪਛਾਣ ਕਰ ਲੈਣ ਨਾਲ ਲਿਵਰ ਨੂੰ ਹੋਣ ਵਾਲੇ ਹੋਰ ਨੁਕਸਾਨ ਤੋਂ ਬਚਾਇਆ ਜਾ ਸਕਦਾ ਹੈ। ਆਓ ਜਾਣਦੇ ਹਾਂ ਕਿਵੇਂ।

ਹਥੇਲੀਆਂ ਦਾ ਲਾਲ ਹੋਣਾ

ਖੂਨ ਨੂੰ ਸਾਫ਼ ਕਰਨਾ, ਭੋਜਨ ਪਚਾਉਣ ਵਿੱਚ ਮਦਦ ਕਰਨਾ ਅਤੇ ਹਾਰਮੋਨਜ਼ ਨੂੰ ਸੰਤੁਲਿਤ ਰੱਖਣਾ ਲਿਵਰ ਦੇ ਮੁੱਖ ਕੰਮ ਹਨ, ਪਰ ਇਸ ਵਿੱਚ ਖਰਾਬੀ ਦੇ ਸੰਕੇਤ ਤੁਰੰਤ ਨਜ਼ਰ ਨਹੀਂ ਆਉਂਦੇ। ਫਿਰ ਵੀ ਧਿਆਨ ਨਾਲ ਦੇਖਿਆ ਜਾਵੇ ਤਾਂ ਹਥੇਲੀਆਂ ਦਾ ਲਾਲ ਰਹਿਣਾ, ਖੁਜਲੀ ਹੋਣਾ, ਨਹੁੰਆਂ ਵਿੱਚ ਪੀਲਾਪਣ ਜਾਂ ਉਨ੍ਹਾਂ ਦਾ ਕਮਜ਼ੋਰ ਹੋ ਜਾਣਾ ਫੈਟੀ ਲਿਵਰ, ਹੈਪੇਟਾਈਟਿਸ ਜਾਂ ਲਿਵਰ ਸਿਰੋਸਿਸ ਕਾਰਨ ਹੋ ਸਕਦਾ ਹੈ।

ਉਂਗਲਾਂ ਦਾ ਝੁਕਣਾ ਜਾਂ ਸੁੰਨ ਹੋਣਾ

ਜੇਕਰ ਤੁਹਾਨੂੰ ਲੱਗਦਾ ਹੈ ਕਿ ਤੁਹਾਡੀਆਂ ਉਂਗਲਾਂ ਪਹਿਲਾਂ ਨਾਲੋਂ ਜ਼ਿਆਦਾ ਅੰਦਰ ਵੱਲ ਮੁੜਨ ਲੱਗੀਆਂ ਹਨ ਜਾਂ ਹਥੇਲੀਆਂ ’ਤੇ ਖਿਚਾਅ ਜਿਹਾ ਮਹਿਸੂਸ ਹੁੰਦਾ ਹੈ ਤਾਂ ਇਹ ਚਮੜੀ ਦੇ ਮੋਟੀ ਅਤੇ ਸਖ਼ਤ ਹੋਣ ਕਾਰਨ ਹੋ ਸਕਦਾ ਹੈ। ਲਿਵਰ ਦੀਆਂ ਪੁਰਾਣੀਆਂ ਬਿਮਾਰੀਆਂ ਜਿਵੇਂ ਸਿਰੋਸਿਸ ਜਾਂ ਜ਼ਿਆਦਾ ਸ਼ਰਾਬ ਪੀਣ ਵਾਲੇ ਲੋਕਾਂ ਵਿੱਚ ਅਜਿਹਾ ਦੇਖਿਆ ਗਿਆ ਹੈ।

ਨਹੁੰਆਂ ਦਾ ਸਫੈਦ ਹੋਣਾ

ਨਹੁੰਆਂ ਦਾ ਰੰਗ ਸਫੈਦ ਹੋਣ ਲੱਗਣਾ ਅਤੇ ਉਨ੍ਹਾਂ ਦੇ ਉੱਪਰਲੇ ਹਿੱਸੇ ’ਤੇ ਲਾਲ ਜਾਂ ਗੁਲਾਬੀ ਰੰਗ ਦੀ ਪੱਟੀ ਦਿਖਾਈ ਦੇਣਾ ਬਲੱਡ ਸਰਕੁਲੇਸ਼ਨ ਅਤੇ ਲਿਵਰ ਵਿੱਚ ਪ੍ਰੋਟੀਨ ਦੇ ਪੱਧਰ ਵਿੱਚ ਗੜਬੜ ਵੱਲ ਇਸ਼ਾਰਾ ਕਰ ਸਕਦਾ ਹੈ।

ਨਹੁੰਆਂ ਦਾ ਜ਼ਿਆਦਾ ਚੌੜਾ ਅਤੇ ਉਭਰਿਆ ਦਿਖਣਾ

ਲਿਵਰ ਦੀ ਪੁਰਾਣੀ ਬਿਮਾਰੀ ਕਾਰਨ ਨਹੁੰਆਂ ਦਾ ਆਕਾਰ ਜ਼ਿਆਦਾ ਗੋਲ, ਚੌੜਾ ਅਤੇ ਸੁੱਜਿਆ ਹੋਇਆ ਨਜ਼ਰ ਆ ਸਕਦਾ ਹੈ। ਹਾਲਾਂਕਿ, ਫੇਫੜਿਆਂ ਜਾਂ ਦਿਲ ਦੀਆਂ ਬਿਮਾਰੀਆਂ ਵਿੱਚ ਵੀ ਇਸ ਤਰ੍ਹਾਂ ਦੇ ਲੱਛਣ ਜ਼ਿਆਦਾ ਦੇਖੇ ਜਾਂਦੇ ਹਨ।

ਹੱਥਾਂ ਦਾ ਕੰਬਣਾ

ਜੇਕਰ ਲਿਵਰ ਦੀ ਬਿਮਾਰੀ ਐਡਵਾਂਸ ਸਟੇਜ ’ਤੇ ਪਹੁੰਚ ਗਈ ਹੈ ਤਾਂ ਕਈ ਵਾਰ ਹੱਥਾਂ ’ਤੇ ਕੰਟਰੋਲ ਘੱਟ ਹੋ ਜਾਂਦਾ ਹੈ ਅਤੇ ਉਹ ਲਗਾਤਾਰ ਕੰਬਦੇ ਰਹਿੰਦੇ ਹਨ। ਅਜਿਹੀ ਸਥਿਤੀ ਵਿੱਚ ਤੁਰੰਤ ਡਾਕਟਰੀ ਸਲਾਹ ਲੈਣੀ ਚਾਹੀਦੀ ਹੈ।

ਲਗਾਤਾਰ ਖੁਜਲੀ ਹੋਣਾ

ਜੇਕਰ ਹਥੇਲੀਆਂ ਅਤੇ ਪੈਰਾਂ ਦੇ ਤਲਵਿਆਂ ਵਿੱਚ ਲਗਾਤਾਰ ਖੁਜਲੀ ਹੋ ਰਹੀ ਹੈ ਤਾਂ ਇਹ ਲਿਵਰ ਵਿੱਚ ਪਿੱਤ ਇਕੱਠਾ ਹੋਣ ਜਾਂ ਉਸ ਦੇ ਬਾਹਰ ਨਿਕਲਣ ਦੀ ਗਤੀ ਹੌਲੀ ਹੋਣ ਵੱਲ ਇਸ਼ਾਰਾ ਕਰ ਸਕਦਾ ਹੈ। ਖਾਸ ਕਰਕੇ ਰਾਤ ਦੇ ਸਮੇਂ ਇਹ ਸਮੱਸਿਆ ਵੱਧ ਸਕਦੀ ਹੈ। ਕਈ ਵਾਰ ਹੱਥਾਂ ਅਤੇ ਪੈਰਾਂ ਵਿੱਚ ਹੋਣ ਵਾਲੀ ਸੋਜ ਵੀ ਲਿਵਰ ਨੂੰ ਨੁਕਸਾਨ ਹੋਣ ਦਾ ਸੰਕੇਤ ਹੋ ਸਕਦੀ ਹੈ।

ਹੱਥ ਪੈ ਜਾਂਦੇ ਹਨ ਠੰਢੇ

ਬਲੱਡ ਸਰਕੁਲੇਸ਼ਨ ਕਮਜ਼ੋਰ ਹੋਣ ਕਾਰਨ ਹੱਥ ਅਤੇ ਪੈਰ ਹਰ ਸਮੇਂ ਠੰਢੇ ਮਹਿਸੂਸ ਹੋ ਸਕਦੇ ਹਨ। ਲਿਵਰ ਨੂੰ ਨੁਕਸਾਨ ਹੋਣ ’ਤੇ ਵੀ ਇਸ ਤਰ੍ਹਾਂ ਦੀ ਸਮੱਸਿਆ ਨਜ਼ਰ ਆ ਸਕਦੀ ਹੈ।

ਇਨ੍ਹਾਂ ਗੱਲਾਂ ’ਤੇ ਧਿਆਨ ਦਿਓ

- ਤੁਹਾਡੇ ਲੱਛਣ ਕਿੰਨੇ ਸਮੇਂ ਜਾਂ ਕਿੰਨੇ ਦਿਨਾਂ ਤੋਂ ਬਣੇ ਹੋਏ ਹਨ।

- ਹਥੇਲੀਆਂ ਵਿੱਚ ਬਦਲਾਅ ਦੇ ਨਾਲ ਜੇਕਰ ਥਕਾਵਟ ਮਹਿਸੂਸ ਹੋਵੇ।

- ਭੁੱਖ ਨਾ ਲੱਗੇ।

- ਪਿਸ਼ਾਬ ਦਾ ਰੰਗ ਗੂੜ੍ਹਾ ਹੋ ਜਾਵੇ।

- ਪੇਟ ਵਿੱਚ ਬੇਚੈਨੀ ਜਾਂ ਅਸਹਿਜਤਾ ਮਹਿਸੂਸ ਹੋਵੇ।

ਨੋਟ: ਇਨ੍ਹਾਂ ਵਿੱਚੋਂ ਕੋਈ ਵੀ ਲੱਛਣ ਇਕੱਲੇ ਲਿਵਰ ਦੀ ਬਿਮਾਰੀ ਦੀ ਪੁਸ਼ਟੀ ਨਹੀਂ ਕਰਦਾ। ਲੱਛਣ ਲਗਾਤਾਰ ਬਣੇ ਰਹਿਣ ਜਾਂ ਹੋਰ ਸਮੱਸਿਆਵਾਂ ਨਾਲ ਦਿਖਾਈ ਦੇਣ ’ਤੇ ਡਾਕਟਰ ਦੀ ਸਲਾਹ ਲੈਣੀ ਚਾਹੀਦੀ ਹੈ।