ਕਦੇ ਖਾਧੇ ਹਨ ਬਰਫ਼ ਵਾਲੇ ਬੋਨ-ਬੋਨ ਗੋਲਗੱਪੇ? ਇਕ ਬਾਈਟ ਲੈਂਦਿਆਂ ਹੀ ਮੂੰਹ ’ਚ ਫੁੱਟੇਗਾ ਸੁਆਦ ਦਾ ਪਟਾਕਾ, ਜਾਣੋ ਇਸ ਫਿਊਜ਼ਨ ਰੈਸਿਪੀ ਦਾ ਤਰੀਕਾ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਗੋਲਗੱਪੇ ਇਕ ਅਜਿਹਾ ਸਟ੍ਰੀਟ ਫੂਡ ਹੈ, ਜਿਸ ਦਾ ਨਾਂ ਸੁਣਦਿਆਂ ਹੀ ਹਰ ਕਿਸੇ ਦੇ ਮੂੰਹ ਵਿੱਚ ਪਾਣੀ ਆ ਜਾਂਦਾ ਹੈ। ਇਸ ਦੇ ਚਟਪਟੇ ਅਤੇ ਤਿੱਖੇ ਪਾਣੀ ਦਾ ਸੁਆਦ ਹਰ ਉਮਰ ਦੇ ਲੋਕਾਂ ਨੂੰ ਪਸੰਦ ਹੈ। ਪਰ ਅੱਜ ਅਸੀਂ ਰਵਾਇਤੀ ਗੋਲਗੱਪਿਆਂ ਦੀ ਨਹੀਂ, ਸਗੋਂ ਇਨ੍ਹੀਂ ਦਿਨੀਂ ਵਾਇਰਲ ਹੋ ਰਹੀ ਇਕ ਮਾਡਰਨ ਫਿਊਜ਼ਨ ਰੈਸਿਪੀ ਬਾਰੇ ਦੱਸਣ ਜਾ ਰਹੇ ਹਾਂ। ਇਸ ਦਾ ਨਾਂ ਹੈ ਬੋਨ-ਬੋਨ ਗੋਲਗੱਪੇ। ਇਸ ਦੀ ਖ਼ਾਸੀਅਤ ਇਹ ਹੈ ਕਿ ਇਸ ਦਾ ਪਾਣੀ ਪਹਿਲਾਂ ਬਰਫ਼ ਵਾਂਗ ਜਮਾਇਆ ਜਾਂਦਾ ਹੈ ਅਤੇ ਫਿਰ ਇਸ ’ਤੇ ਕੋਕੋ ਬਟਰ ਦੀ ਪਰਤ ਚੜ੍ਹਾਈ ਜਾਂਦੀ ਹੈ।

ਬੋਨ-ਬੋਨ ਗੋਲਗੱਪੇ ਬਣਾਉਣ ਲਈ ਸਮੱਗਰੀ

ਪਾਪੜੀ ਲਈ ਸਮੱਗਰੀ:

- ਅੱਧਾ ਕੱਪ ਮੈਦਾ

- ਇਕ ਵੱਡਾ ਚਮਚ ਘਿਓ

- ਸੁਆਦ ਅਨੁਸਾਰ ਨਮਕ

- ਚੌਥਾਈ ਚਮਚ ਜੀਰਾ ਜਾਂ ਅਜਵਾਇਨ

- ਲੋੜ ਅਨੁਸਾਰ ਪਾਣੀ

- ਤਲਣ ਲਈ ਤੇਲ

ਗੋਲਗੱਪੇ ਦੇ ਬੋਨ-ਬੋਨ ਪਾਣੀ ਲਈ ਸਮੱਗਰੀ:

- 200 ਗ੍ਰਾਮ ਧਨੀਆ

- 2-3 ਹਰੀਆਂ ਮਿਰਚਾਂ

- 80 ਗ੍ਰਾਮ ਪੁਦੀਨਾ

- ਇਕ ਇੰਚ ਅਦਰਕ

- ਇਕ ਛੋਟਾ ਚਮਚ ਭੁੰਨਿਆ ਹੋਇਆ ਜੀਰਾ

- ਇਕ ਛੋਟਾ ਚਮਚ ਇਮਲੀ

- ਇਕ ਛੋਟਾ ਚਮਚ ਅੰਬਚੂਰ

- ਕੋਕੋ ਬਟਰ

- ਸੁਆਦ ਅਨੁਸਾਰ ਨਮਕ ਅਤੇ ਚੀਨੀ

- ਲੋੜ ਅਨੁਸਾਰ ਪਾਣੀ

ਬਲੂਬੇਰੀ ਹੰਗ ਕਰਡ ਲਈ ਸਮੱਗਰੀ:

- ਬਲੂਬੇਰੀ

- ਥੋੜ੍ਹੀ ਮਾਤਰਾ ਵਿੱਚ ਚੀਨੀ

- ਨਿੰਬੂ ਦਾ ਰਸ

- ਗਾੜ੍ਹਾ ਛਾਣਿਆ ਹੋਇਆ ਦਹੀਂ

- ਨਮਕ ਅਤੇ ਭੁੰਨਿਆ ਜੀਰਾ ਪਾਊਡਰ

ਇਸ ਤਰ੍ਹਾਂ ਤਿਆਰ ਕਰੋ ਬੋਨ-ਬੋਨ ਗੋਲਗੱਪੇ

ਸਭ ਤੋਂ ਪਹਿਲਾਂ ਗੋਲਗੱਪਿਆਂ ਦਾ ਪਾਣੀ ਤਿਆਰ ਕਰੋ। ਮਿਕਸੀ ਦੇ ਜਾਰ ਵਿੱਚ ਧਨੀਆ, ਹਰੀਆਂ ਮਿਰਚਾਂ, ਪੁਦੀਨਾ, ਅਦਰਕ, ਇਮਲੀ ਅਤੇ ਲੋੜ ਅਨੁਸਾਰ ਪਾਣੀ ਪਾ ਕੇ ਬਰੀਕ ਪੀਸ ਲਓ। ਇਸ ਮਿਸ਼ਰਣ ਨੂੰ ਛਾਣ ਕੇ ਇਕ ਬਰਤਨ ਵਿੱਚ ਕੱਢ ਲਓ। ਹੁਣ ਇਸ ਨੂੰ ਸਿਲੀਕੋਨ ਮੋਲਡ ਵਿੱਚ ਪਾ ਕੇ 3-4 ਘੰਟਿਆਂ ਲਈ ਫ੍ਰੀਜ਼ਰ ਵਿੱਚ ਜਮਾਉਣ ਵਾਸਤੇ ਰੱਖ ਦਿਓ।

ਦੂਜੇ ਪਾਸੇ ਪਾਪੜੀ ਬਣਾਉਣ ਲਈ ਇਕ ਬਰਤਨ ਵਿੱਚ ਮੈਦਾ, ਘਿਓ, ਨਮਕ ਅਤੇ ਜੀਰਾ ਜਾਂ ਅਜਵਾਇਨ ਪਾਓ। ਲੋੜ ਅਨੁਸਾਰ ਪਾਣੀ ਮਿਲਾ ਕੇ ਸਖ਼ਤ ਆਟਾ ਗੁੰਨ੍ਹ ਲਓ। ਇਸ ਨੂੰ ਪਤਲਾ ਵੇਲ ਕੇ ਛੋਟੀਆਂ-ਛੋਟੀਆਂ ਪਾਪੜੀਆਂ ਤਿਆਰ ਕਰ ਲਓ। ਇਨ੍ਹਾਂ ਨੂੰ ਓਵਨ ਵਿੱਚ ਬੇਕ ਕਰ ਸਕਦੇ ਹੋ ਜਾਂ ਕੜਾਹੀ ਵਿੱਚ ਤੇਲ ਗਰਮ ਕਰ ਕੇ ਤਲ ਸਕਦੇ ਹੋ।

ਹੁਣ ਜੰਮੇ ਹੋਏ ਬਰਫ਼ ਦੇ ਕਿਊਬਜ਼ ਨੂੰ ਪਿਘਲੇ ਹੋਏ ਕੋਕੋ ਬਟਰ ਵਿੱਚ ਡੁਬੋਵੋ ਅਤੇ ਘੱਟੋ-ਘੱਟ 15 ਮਿੰਟ ਲਈ ਕਮਰੇ ਦੇ ਤਾਪਮਾਨ ’ਤੇ ਰੱਖ ਦਿਓ। ਇਸ ਨਾਲ ਅੰਦਰਲਾ ਪਾਣੀ ਪਿਘਲ ਜਾਵੇਗਾ ਅਤੇ ਬਾਹਰ ਕੋਕੋ ਬਟਰ ਦੀ ਪਰਤ ਜੰਮ ਜਾਵੇਗੀ।

ਬਲੂਬੇਰੀ ਹੰਗ ਕਰਡ ਡਿਪ ਬਣਾਉਣ ਦਾ ਤਰੀਕਾ

ਇਸ ਡਿਪ ਨੂੰ ਬਣਾਉਣ ਲਈ ਬਲੂਬੇਰੀ, ਚੀਨੀ ਅਤੇ ਨਿੰਬੂ ਦਾ ਰਸ ਇਕੱਠੇ ਪਕਾਓ। ਜਦੋਂ ਇਹ ਜੈਮ ਵਾਂਗ ਗਾੜ੍ਹਾ ਹੋ ਜਾਵੇ ਤਾਂ ਇਸ ਨੂੰ ਠੰਢਾ ਹੋਣ ਦਿਓ। ਹੁਣ ਇਸ ਵਿੱਚ ਹੰਗ ਕਰਡ, ਭੁੰਨਿਆ ਜੀਰਾ ਅਤੇ ਨਮਕ ਮਿਲਾ ਲਓ। ਇਸ ਤਰ੍ਹਾਂ ਤੁਹਾਡਾ ਬਲੂਬੇਰੀ ਹੰਗ ਕਰਡ ਡਿਪ ਤਿਆਰ ਹੋ ਜਾਵੇਗਾ।

ਇਸ ਤਰ੍ਹਾਂ ਕਰੋ ਸਰਵ

ਸਭ ਤੋਂ ਪਹਿਲਾਂ ਕਰਿਸਪੀ ਪਾਪੜੀ ਦੇ ਉੱਪਰ ਚਮਚ ਦੀ ਮਦਦ ਨਾਲ ਬਲੂਬੇਰੀ ਹੰਗ ਕਰਡ ਡਿਪ ਲਗਾਓ। ਇਸ ਦੇ ਉੱਪਰ ਤਿਆਰ ਕੀਤਾ ਹੋਇਆ ਬੋਨ-ਬੋਨ ਪਾਣੀ ਰੱਖੋ। ਫਿਰ ਚੁਟਕੀ ਭਰ ਮਸਾਲਾ, ਅਨਾਰ ਦੇ ਦਾਣੇ ਅਤੇ ਪੁਦੀਨੇ ਦੇ ਪੱਤਿਆਂ ਨਾਲ ਸਜਾਓ।

ਹੁਣ ਇਸ ਨੂੰ ਪਲੇਟ ਵਿੱਚ ਰੱਖ ਕੇ ਤੁਰੰਤ ਸਰਵ ਕਰੋ। ਇਕੋ ਬਾਈਟ ਵਿੱਚ ਖਾਧੇ ਜਾਣ ਵਾਲੇ ਇਨ੍ਹਾਂ ਬੋਨ-ਬੋਨ ਗੋਲਗੱਪਿਆਂ ਦਾ ਸੁਆਦ ਆਮ ਗੋਲਗੱਪਿਆਂ ਤੋਂ ਬਿਲਕੁਲ ਵੱਖਰਾ ਅਤੇ ਲਾਜਵਾਬ ਹੁੰਦਾ ਹੈ।