ਰੋਜ਼ਾਨਾ ਦਹੀਂ ਖਾਣ ਤੋਂ ਪਹਿਲਾਂ ਰਹੋ ਸਾਵਧਾਨ! ਇਨ੍ਹਾਂ 4 ਬਿਮਾਰੀਆਂ ਵਾਲੇ ਲੋਕਾਂ ਲਈ ਹੋ ਸਕਦਾ ਹੈ ਨੁਕਸਾਨਦੇਹ

onlymyhealth, ਸਿਹਤ ਡੈਸਕ: ਦਹੀਂ ਸਾਡੀ ਖ਼ੁਰਾਕ ਦਾ ਇੱਕ ਖ਼ਾਸ ਹਿੱਸਾ ਹੈ। ਇਸ ਨੂੰ ਨਾਸ਼ਤੇ ਤੋਂ ਲੈ ਕੇ ਦੁਪਹਿਰ ਅਤੇ ਰਾਤ ਦੇ ਖਾਣੇ ਤੱਕ ਅਲੱਗ-ਅਲੱਗ ਤਰੀਕਿਆਂ ਨਾਲ ਖਾਧਾ ਜਾਂਦਾ ਹੈ। ਕੋਈ ਇਸ ਨੂੰ ਚੌਲਾਂ ਜਾਂ ਪਰੌਂਠੇ ਨਾਲ ਲੈਂਦਾ ਹੈ, ਤਾਂ ਕੋਈ ਰਾਇਤੇ, ਲੱਸੀ ਜਾਂ ਸਮੂਦੀ ਦੇ ਰੂਪ ਵਿੱਚ ਇਸ ਦਾ ਸੇਵਨ ਕਰਦਾ ਹੈ। ਇਹੋ ਵਜ੍ਹਾ ਹੈ ਕਿ ਕਈ ਲੋਕਾਂ ਦੇ ਮਨ ਵਿੱਚ ਸਵਾਲ ਰਹਿੰਦਾ ਹੈ ਕਿ ਕੀ ਰੋਜ਼ ਦਹੀਂ ਖਾਣਾ ਠੀਕ ਹੈ? ਕੀ ਰੋਜ਼ ਇਸ ਦਾ ਸੇਵਨ ਕਰਨ ਨਾਲ ਸਰੀਰ ਨੂੰ ਕੋਈ ਨੁਕਸਾਨ ਹੋ ਸਕਦਾ ਹੈ? ਦਹੀਂ ਦੀ ਗੁਣਵੱਤਾ, ਉਸ ਦੀ ਤਾਜ਼ਗੀ ਅਤੇ ਉਸ ਨੂੰ ਖਾਣ ਦਾ ਤਰੀਕਾ ਵੀ ਧਿਆਨ ਵਿੱਚ ਰੱਖਣਾ ਜ਼ਰੂਰੀ ਹੁੰਦਾ ਹੈ। ਇਸ ਲਈ ਰੋਜ਼ ਦਹੀਂ ਖਾਣ ਤੋਂ ਪਹਿਲਾਂ ਆਪਣੀ ਲੋੜ ਅਤੇ ਸਰੀਰ ਦੀ ਜ਼ਰੂਰਤ ਨੂੰ ਸਮਝਣਾ ਜ਼ਰੂਰੀ ਹੈ। ਆਓ ਜਾਣਦੇ ਹਾਂ ਕਿ ਰੋਜ਼ ਦਹੀਂ ਖਾਣਾ ਕੀ ਵਾਕਈ ਸਿਹਤਮੰਦ ਹੈ। ਬਿਹਤਰ ਜਾਣਕਾਰੀ ਲਈ ਅਸੀਂ 'ਦ ਨਿਊਟ੍ਰੀਵਾਈਜ਼ ਕਲਿਨਿਕ', ਲਖਨਊ ਦੀ ਨਿਊਟ੍ਰੀਸ਼ਨਿਸਟ ਨੇਹਾ ਸਿਨਹਾ (Neha Sinha) ਨਾਲ ਗੱਲਬਾਤ ਕੀਤੀ।

ਕੀ ਰੋਜ਼ ਦਹੀਂ ਖਾਣਾ ਠੀਕ ਹੈ?

ਦਹੀਂ ਦੀ ਸੰਤੁਲਿਤ ਮਾਤਰਾ ਨੂੰ ਡਾਈਟ ਦਾ ਹਿੱਸਾ ਬਣਾਇਆ ਜਾ ਸਕਦਾ ਹੈ। ਦਹੀਂ ਤੋਂ ਸਰੀਰ ਨੂੰ ਪ੍ਰੋਟੀਨ ਅਤੇ ਕੈਲਸ਼ੀਅਮ ਵਰਗੇ ਪੋਸ਼ਕ ਤੱਤ ਮਿਲਦੇ ਹਨ। ਜੇਕਰ ਦਹੀਂ ਤੋਂ ਕਿਸੇ ਤਰ੍ਹਾਂ ਦੀ ਐਲਰਜੀ ਨਹੀਂ ਹੈ, ਤਾਂ ਰੋਜ਼ ਇਸ ਦਾ ਸੇਵਨ ਕਰ ਸਕਦੇ ਹੋ। ਦਹੀਂ ਨੂੰ ਸੰਤੁਲਿਤ ਖ਼ੁਰਾਕ ਦੇ ਰੂਪ ਵਿੱਚ ਲੈਣਾ ਚਾਹੀਦਾ ਹੈ। ਨਾਲ ਹੀ ਦਹੀਂ ਨੂੰ ਜ਼ਿਆਦਾ ਨਮਕ ਜਾਂ ਚੀਨੀ ਨਾਲ ਲੈਣ ਦੀ ਬਜਾਏ ਸਾਦੇ ਦਹੀਂ ਦਾ ਸੇਵਨ ਕਰੋ।

ਜ਼ਿਆਦਾ ਦਹੀਂ ਖਾਣ ਨਾਲ ਕੀ ਨੁਕਸਾਨ ਹੋ ਸਕਦਾ ਹੈ?

ਸਿਹਤ ਲਈ ਦਹੀਂ ਪੌਸ਼ਟਿਕ ਹੈ, ਪਰ ਜ਼ਰੂਰਤ ਤੋਂ ਜ਼ਿਆਦਾ ਮਾਤਰਾ ਵਿੱਚ ਇਸ ਨੂੰ ਖਾਣਾ ਨੁਕਸਾਨਦੇਹ ਹੋ ਸਕਦਾ ਹੈ। ਜੇਕਰ ਤੁਸੀਂ ਵਜ਼ਨ ਘਟਾ (Weight Loss) ਰਹੇ ਹੋ ਤਾਂ ਫੁੱਲ-ਫੈਟ ਵਾਲੇ ਦਹੀਂ ਦਾ ਸੇਵਨ ਕਰਨ ਤੋਂ ਬਚੋ। ਉੱਥੇ ਹੀ ਬਾਜ਼ਾਰ ਵਿੱਚ ਮਿਲਣ ਵਾਲੇ ਫਲੇਵਰਡ ਜਾਂ ਮਿੱਠੇ ਯੋਗਰਟ ਵਿੱਚ ਵਾਧੂ ਚੀਨੀ ਹੋ ਸਕਦੀ ਹੈ। ਇਨ੍ਹਾਂ ਨੂੰ ਰੋਜ਼ ਜ਼ਿਆਦਾ ਮਾਤਰਾ ਵਿੱਚ ਖਾਣ ਨਾਲ ਸ਼ੂਗਰ ਅਤੇ ਕੈਲੋਰੀ ਦੀ ਮਾਤਰਾ ਵਧ ਸਕਦੀ ਹੈ। ਕੁਝ ਲੋਕਾਂ ਨੂੰ ਜ਼ਿਆਦਾ ਮਾਤਰਾ ਵਿੱਚ ਡੇਅਰੀ ਪ੍ਰੋਡਕਟਸ ਜਿਵੇਂ ਦਹੀਂ ਲੈਣ 'ਤੇ ਗੈਸ, ਪੇਟ ਫੁੱਲਣਾ, ਪੇਟ ਵਿੱਚ ਮਰੋੜ ਜਾਂ ਦਸਤ ਵਰਗੀ ਸਮੱਸਿਆ ਹੋ ਸਕਦੀ ਹੈ।

ਦਹੀਂ ਖਾਣ ਦੀ ਕਿੰਨੀ ਮਾਤਰਾ ਸਹੀ ਹੈ?

ਦਹੀਂ ਦੀ ਕੋਈ ਇੱਕ ਮਾਤਰਾ ਸਾਰੇ ਲੋਕਾਂ ਲਈ ਤੈਅ ਨਹੀਂ ਕੀਤੀ ਜਾ ਸਕਦੀ। ਇਹ ਵਿਅਕਤੀ ਦੀ ਉਮਰ, ਕੁੱਲ ਡਾਈਟ, ਕੈਲੋਰੀ ਅਤੇ ਪ੍ਰੋਟੀਨ ਦੀ ਲੋੜ 'ਤੇ ਨਿਰਭਰ ਕਰਦਾ ਹੈ। ਇੱਕ ਸਿਹਤਮੰਦ ਬਾਲਗ ਲਈ ਇੱਕ ਛੋਟੀ ਕੌਲੀ ਅਰਥਾਤ ਲਗਭਗ 50 ਤੋਂ 100 ਗ੍ਰਾਮ ਸਾਦਾ ਦਹੀਂ ਰੋਜ਼ਾਨਾ ਦੀ ਡਾਈਟ ਵਿੱਚ ਸ਼ਾਮਲ ਕਰ ਸਕਦੇ ਹੋ। ਜੇਕਰ ਤੁਸੀਂ ਦਿਨ ਵਿੱਚ ਦੁੱਧ, ਪਨੀਰ ਜਾਂ ਹੋਰ ਡੇਅਰੀ ਉਤਪਾਦ ਵੀ ਕਾਫ਼ੀ ਮਾਤਰਾ ਵਿੱਚ ਲੈ ਰਹੇ ਹੋ, ਤਾਂ ਕੁੱਲ ਮਾਤਰਾ ਨੂੰ ਉਸੇ ਅਨੁਸਾਰ ਰੱਖਣਾ ਚਾਹੀਦਾ ਹੈ।

ਦਹੀਂ ਖਾਣ ਦਾ ਸਹੀ ਸਮਾਂ ਕੀ ਹੈ?

ਦਹੀਂ ਦੀ ਤਾਸੀਰ ਠੰਢੀ ਹੁੰਦੀ ਹੈ, ਇਸ ਲਈ ਇਸ ਨੂੰ ਦਿਨ ਵੇਲੇ ਭੋਜਨ ਦੇ ਨਾਲ ਜਾਂ ਸਨੈਕ ਵਜੋਂ ਲਿਆ ਜਾ ਸਕਦਾ ਹੈ।

ਕਿਨ੍ਹਾਂ ਲੋਕਾਂ ਨੂੰ ਦਹੀਂ ਖਾਣ ਵਿੱਚ ਸਾਵਧਾਨੀ ਵਰਤਣੀ ਚਾਹੀਦੀ ਹੈ?

ਲੈਕਟੋਜ਼ ਇਨਟੌਲਰੈਂਸ (Lactose Intolerance) ਵਾਲੇ ਲੋਕ: ਜਿਨ੍ਹਾਂ ਲੋਕਾਂ ਨੂੰ ਲੈਕਟੋਜ਼ ਇਨਟੌਲਰੈਂਸ ਹੈ, ਉਨ੍ਹਾਂ ਨੂੰ ਦੁੱਧ ਅਤੇ ਕੁਝ ਡੇਅਰੀ ਉਤਪਾਦਾਂ ਤੋਂ ਗੈਸ, ਪੇਟ ਫੁੱਲਣਾ, ਮਰੋੜ ਜਾਂ ਦਸਤ ਵਰਗੀ ਸਮੱਸਿਆ ਹੋ ਸਕਦੀ ਹੈ। ਹਾਲਾਂਕਿ, ਦਹੀਂ ਵਿੱਚ ਲੈਕਟੋਜ਼ ਦੀ ਮਾਤਰਾ ਦੁੱਧ ਦੀ ਤੁਲਨਾ ਵਿੱਚ ਘੱਟ ਹੋ ਸਕਦੀ ਹੈ। ਜੇਕਰ ਦਹੀਂ ਖਾਣ ਤੋਂ ਬਾਅਦ ਵਾਰ-ਵਾਰ ਪਾਚਨ ਸੰਬੰਧੀ ਸਮੱਸਿਆ ਹੋਵੇ, ਤਾਂ ਮਾਹਰ ਦੀ ਸਲਾਹ ਲਵੋ।

ਮਿਲਕ ਐਲਰਜੀ (Milk Allergy) ਦੇ ਸ਼ਿਕਾਰ ਲੋਕ: ਮਿਲਕ ਐਲਰਜੀ ਲੈਕਟੋਜ਼ ਇਨਟੌਲਰੈਂਸ ਨਾਲੋਂ ਅੱਲਗ ਹੁੰਦੀ ਹੈ। ਦੁੱਧ ਦੇ ਪ੍ਰੋਟੀਨ ਤੋਂ ਐਲਰਜੀ ਹੋਣ 'ਤੇ ਦਹੀਂ ਵੀ ਸਮੱਸਿਆ ਪੈਦਾ ਕਰ ਸਕਦਾ ਹੈ। ਅਜਿਹੇ ਲੋਕਾਂ ਨੂੰ ਡਾਕਟਰ ਦੀ ਸਲਾਹ ਤੋਂ ਬਿਨਾਂ ਦਹੀਂ ਜਾਂ ਹੋਰ ਡੇਅਰੀ ਉਤਪਾਦਾਂ ਦਾ ਸੇਵਨ ਨਹੀਂ ਕਰਨਾ ਚਾਹੀਦਾ।

ਸ਼ੂਗਰ (Diabetic) ਦੇ ਮਰੀਜ਼: ਸ਼ੂਗਰ ਹੋਣ 'ਤੇ ਸਾਦਾ, ਬਿਨਾਂ ਚੀਨੀ ਵਾਲਾ ਦਹੀਂ ਬਿਹਤਰ ਆਪਸ਼ਨ ਹੋ ਸਕਦਾ ਹੈ। ਦੂਜੇ ਪਾਸੇ, ਮਿੱਠਾ ਜਾਂ ਫਲੇਵਰਡ ਯੋਗਰਟ ਸ਼ੂਗਰ ਲੈਵਲ ਵਧਾ ਸਕਦਾ ਹੈ।

ਗੁਰਦੇ (Kidney) ਦੇ ਮਰੀਜ਼: ਦਹੀਂ ਵਿੱਚ ਪ੍ਰੋਟੀਨ, ਕੈਲਸ਼ੀਅਮ, ਫਾਸਫੋਰਸ ਅਤੇ ਪੋਟਾਸ਼ੀਅਮ ਵਰਗੇ ਪੋਸ਼ਕ ਤੱਤ ਹੁੰਦੇ ਹਨ। ਗੁਰਦੇ ਦੀ ਬਿਮਾਰੀ ਵਿੱਚ ਇਨ੍ਹਾਂ ਪੋਸ਼ਕ ਤੱਤਾਂ ਦੀ ਮਾਤਰਾ ਵਿਅਕਤੀ ਦੀ ਬਿਮਾਰੀ ਦੇ ਅਨੁਸਾਰ ਸੀਮਤ ਕੀਤੀ ਜਾ ਸਕਦੀ ਹੈ। ਇਸ ਲਈ ਗੁਰਦੇ ਦੇ ਮਰੀਜ਼ਾਂ ਨੂੰ ਦਹੀਂ ਦੀ ਮਾਤਰਾ ਖ਼ੁਦ ਤੈਅ ਕਰਨ ਦੀ ਬਜਾਏ ਡਾਕਟਰ ਤੋਂ ਸਲਾਹ ਲੈਣੀ ਚਾਹੀਦੀ ਹੈ।

ਸਿੱਟਾ : ਜਿਨ੍ਹਾਂ ਲੋਕਾਂ ਨੂੰ ਲੈਕਟੋਜ਼ ਇਨਟੌਲਰੈਂਸ ਹੈ, ਦੁੱਧ ਤੋਂ ਐਲਰਜੀ ਹੈ, ਸ਼ੂਗਰ ਹੈ ਜਾਂ ਗੁਰਦੇ ਦੀ ਸ਼ਿਕਾਇਤ ਹੈ, ਉਨ੍ਹਾਂ ਨੂੰ ਦਹੀਂ ਦਾ ਸੇਵਨ ਕਰਨ ਤੋਂ ਪਹਿਲਾਂ ਡਾਕਟਰ ਤੋਂ ਸਲਾਹ ਲੈਣੀ ਚਾਹੀਦੀ ਹੈ। ਦਹੀਂ ਦਾ ਸੇਵਨ ਰੋਜ਼ ਕਰ ਸਕਦੇ ਹੋ, ਪਰ ਮਾਤਰਾ ਦਾ ਖ਼ਿਆਲ ਰੱਖਣਾ ਜ਼ਰੂਰੀ ਹੈ। ਦਹੀਂ ਨੂੰ ਜ਼ਿਆਦਾ ਚੀਨੀ ਜਾਂ ਨਮਕ ਤੋਂ ਬਿਨਾਂ ਖਾਣਾ ਚਾਹੀਦਾ ਹੈ, ਨਹੀਂ ਤਾਂ ਕੈਲੋਰੀ ਇੰਟੇਕ ਵਧ ਸਕਦਾ ਹੈ।