ਬਿਨਾਂ ਤੰਦੂਰ ਦੇ ਘਰ 'ਚ ਬਣੇਗੀ ਹੋਟਲ ਵਰਗੀ ਨਰਮ ਰੁਮਾਲੀ ਰੋਟੀ, ਬਸ ਅਪਣਾਉਣੇ ਪੈਣਗੇ ਇਹ ਆਸਾਨ ਕਦਮ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ। ਅਕਸਰ ਜਦੋਂ ਅਸੀਂ ਕਿਸੇ ਰੈਸਟੋਰੈਂਟ ਜਾਂ ਢਾਬੇ ’ਤੇ ਜਾਂਦੇ ਹਾਂ, ਤਾਂ ਆਪਣੀ ਮਨਪਸੰਦ ਗ੍ਰੇਵੀ ਵਾਲੀ ਸਬਜ਼ੀ ਦੇ ਨਾਲ ਰੁਮਾਲੀ ਰੋਟੀ ਆਰਡਰ ਕਰਨਾ ਨਹੀਂ ਭੁੱਲਦੇ। ਇਸ ਦੀ ਪਤਲੀ ਅਤੇ ਨਰਮ ਪਰਤ ਖਾਣੇ ਦਾ ਸੁਆਦ ਦੁੱਗਣਾ ਕਰ ਦਿੰਦੀ ਹੈ। ਹਾਲਾਂਕਿ, ਜਦੋਂ ਇਸ ਨੂੰ ਘਰ ਵਿੱਚ ਬਣਾਉਣ ਦੀ ਗੱਲ ਆਉਂਦੀ ਹੈ, ਤਾਂ ਅਸੀਂ ਇਹ ਸੋਚ ਕੇ ਪਿੱਛੇ ਹਟ ਜਾਂਦੇ ਹਾਂ ਕਿ ਬਿਨਾਂ ਤੰਦੂਰ ਦੇ ਇਹ ਕਿਵੇਂ ਬਣੇਗੀ?

ਹੁਣ ਤੁਹਾਨੂੰ ਨਿਰਾਸ਼ ਹੋਣ ਦੀ ਕੋਈ ਲੋੜ ਨਹੀਂ ਹੈ। ਤੁਸੀਂ ਆਪਣੀ ਰਸੋਈ ਵਿੱਚ ਮੌਜੂਦ ਇੱਕ ਸਾਧਾਰਨ ਕੜਾਹੀ ਦੀ ਵਰਤੋਂ ਕਰਕੇ ਘਰ ਵਿੱਚ ਹੀ ਬਿਲਕੁਲ ਵਧੀਆ, ਪਤਲੀ ਅਤੇ ਨਰਮ ਰੁਮਾਲੀ ਰੋਟੀ ਬਣਾ ਸਕਦੇ ਹੋ। ਆਓ ਜਾਣਦੇ ਹਾਂ ਇਸ ਨੂੰ ਬਣਾਉਣ ਦਾ ਸਭ ਤੋਂ ਆਸਾਨ ਤਰੀਕਾ।

ਰੁਮਾਲੀ ਰੋਟੀ ਬਣਾਉਣ ਲਈ ਕੀ-ਕੀ ਚਾਹੀਦਾ ਹੈ?

1 ਕੱਪ ਮੈਦਾ

ਅੱਧਾ ਕੱਪ ਕਣਕ ਦਾ ਆਟਾ

ਅੱਧਾ ਕੱਪ ਹਲਕਾ ਗਰਮ ਦੁੱਧ (ਆਟਾ ਗੁੰਨ੍ਹਣ ਲਈ)

1 ਚਮਚ ਤੇਲ ਜਾਂ ਘਿਓ

1 ਚਮਚ ਨਮਕ

ਥੋੜ੍ਹਾ ਜਿਹਾ ਨਮਕ ਮਿਲਾਇਆ ਹੋਇਆ ਪਾਣੀ (ਕੜਾਹੀ ’ਤੇ ਛਿੜਕਣ ਲਈ)

ਰੁਮਾਲੀ ਰੋਟੀ ਬਣਾਉਣ ਦਾ ਆਸਾਨ ਤਰੀਕਾ

ਸਭ ਤੋਂ ਪਹਿਲਾਂ ਇੱਕ ਵੱਡੇ ਬਰਤਨ ਵਿੱਚ ਮੈਦਾ, ਕਣਕ ਦਾ ਆਟਾ ਅਤੇ ਨਮਕ ਚੰਗੀ ਤਰ੍ਹਾਂ ਮਿਲਾ ਲਓ। ਹੁਣ ਇਸ ਵਿੱਚ ਥੋੜ੍ਹਾ-ਥੋੜ੍ਹਾ ਗਰਮ ਦੁੱਧ ਪਾਉਂਦੇ ਹੋਏ ਬਿਲਕੁਲ ਨਰਮ ਆਟਾ ਗੁੰਨ੍ਹ ਲਓ। ਦੁੱਧ ਦੀ ਵਰਤੋਂ ਨਾਲ ਰੋਟੀ ਬਿਲਕੁਲ ਹੋਟਲ ਵਰਗੀ ਨਰਮ ਬਣੇਗੀ ਅਤੇ ਠੰਢੀ ਹੋਣ ਤੋਂ ਬਾਅਦ ਵੀ ਸਖ਼ਤ ਨਹੀਂ ਹੋਵੇਗੀ।

ਗੁੰਨ੍ਹੇ ਹੋਏ ਆਟੇ ਉੱਤੇ ਥੋੜ੍ਹਾ ਜਿਹਾ ਤੇਲ ਜਾਂ ਘਿਓ ਲਗਾ ਦਿਓ ਅਤੇ ਇਸ ਨੂੰ ਇੱਕ ਸਾਫ਼, ਹਲਕੇ ਗਿੱਲੇ ਸੂਤੀ ਕੱਪੜੇ ਨਾਲ ਢੱਕ ਦਿਓ। ਇਸ ਨੂੰ ਘੱਟੋ-ਘੱਟ 30 ਤੋਂ 40 ਮਿੰਟ ਤੱਕ ਇੰਝ ਹੀ ਛੱਡ ਦਿਓ, ਤਾਂ ਜੋ ਆਟਾ ਚੰਗੀ ਤਰ੍ਹਾਂ ਸੈੱਟ ਹੋ ਜਾਵੇ।

ਮਿੱਥਿਆ ਸਮਾਂ ਪੂਰਾ ਹੋਣ ਤੋਂ ਬਾਅਦ ਆਟੇ ਨੂੰ ਇੱਕ ਵਾਰ ਫਿਰ ਹਲਕੇ ਹੱਥਾਂ ਨਾਲ ਮਲ ਲਓ ਅਤੇ ਇਸ ਦੀਆਂ ਛੋਟੀਆਂ-ਛੋਟੀਆਂ ਲੋਈਆਂ ਬਣਾ ਲਓ।

ਚਕਲੇ ’ਤੇ ਥੋੜ੍ਹਾ ਜਿਹਾ ਸੁੱਕਾ ਮੈਦਾ ਛਿੜਕੋ ਅਤੇ ਲੋਈ ਨੂੰ ਜਿੰਨਾ ਹੋ ਸਕੇ, ਓਨਾ ਪਤਲਾ ਵੇਲ ਲਓ। ਇਹ ਇੰਨੀ ਪਤਲੀ ਹੋਣੀ ਚਾਹੀਦੀ ਹੈ ਕਿ ਇਸ ਦੇ ਹੇਠੋਂ ਤੁਹਾਡੀਆਂ ਉਂਗਲਾਂ ਹਲਕੀਆਂ-ਹਲਕੀਆਂ ਦਿਖਾਈ ਦੇਣ। ਤੁਸੀਂ ਇਸ ਨੂੰ ਹੱਥਾਂ ਨਾਲ ਥੋੜ੍ਹਾ ਖਿੱਚ ਕੇ ਵੱਡਾ ਵੀ ਕਰ ਸਕਦੇ ਹੋ, ਬਿਲਕੁਲ ਉਸੇ ਤਰ੍ਹਾਂ ਜਿਵੇਂ ਢਾਬੇ ਵਾਲੇ ਕਰਦੇ ਹਨ।

ਗੈਸ ’ਤੇ ਲੋਹੇ ਜਾਂ ਐਲੂਮੀਨੀਅਮ ਦੀ ਇੱਕ ਭਾਰੀ ਕੜਾਹੀ ਨੂੰ ਪੁੱਠਾ ਕਰਕੇ ਰੱਖ ਦਿਓ ਅਤੇ ਇਸ ਨੂੰ ਤੇਜ਼ ਅੱਗ ’ਤੇ ਚੰਗੀ ਤਰ੍ਹਾਂ ਗਰਮ ਹੋਣ ਦਿਓ। ਜਦੋਂ ਕੜਾਹੀ ਗਰਮ ਹੋ ਜਾਵੇ, ਤਾਂ ਇਸ ’ਤੇ ਥੋੜ੍ਹਾ ਜਿਹਾ ਨਮਕ ਵਾਲਾ ਪਾਣੀ ਛਿੜਕੋ ਅਤੇ ਕੱਪੜੇ ਨਾਲ ਪੂੰਝ ਦਿਓ। ਦੱਸ ਦੇਈਏ ਕਿ ਇਹ ਕਦਮ ਬਹੁਤ ਜ਼ਰੂਰੀ ਹੈ। ਇਸ ਨਾਲ ਰੋਟੀ ਕੜਾਹੀ ਨਾਲ ਚਿਪਕੇਗੀ ਨਹੀਂ।

ਹੁਣ ਵੇਲੀ ਹੋਈ ਪਤਲੀ ਰੋਟੀ ਨੂੰ ਧਿਆਨ ਨਾਲ ਕੜਾਹੀ ਉੱਤੇ ਵਿਛਾ ਦਿਓ। ਰੁਮਾਲੀ ਰੋਟੀ ਬਹੁਤ ਜਲਦੀ ਪੱਕ ਜਾਂਦੀ ਹੈ। ਕੁਝ ਹੀ ਸਕਿੰਟਾਂ ਵਿੱਚ ਜਦੋਂ ਤੁਹਾਨੂੰ ਰੋਟੀ ’ਤੇ ਹਲਕੇ ਬੁਲਬੁਲੇ ਦਿਖਾਈ ਦੇਣ, ਤਾਂ ਇਸ ਨੂੰ ਇੱਕ ਸਾਫ਼ ਸੂਤੀ ਕੱਪੜੇ ਦੀ ਮਦਦ ਨਾਲ ਪਲਟ ਦਿਓ। ਕੱਪੜੇ ਨਾਲ ਹਲਕਾ-ਹਲਕਾ ਦਬਾ ਕੇ ਦੂਜੇ ਪਾਸੇ ਤੋਂ ਵੀ ਸੇਕ ਲਓ।

ਲਓ ਜੀ, ਤੁਹਾਡੀ ਗਰਮਾ-ਗਰਮ ਅਤੇ ਬਿਲਕੁਲ ਨਰਮ ਰੁਮਾਲੀ ਰੋਟੀ ਤਿਆਰ ਹੈ।