ਦਿਨ ਵੇਲੇ ਗਰਮੀ ਤੇ ਸ਼ਾਮ ਨੂੰ ਸਰਦੀ! ਮੌਸਮ ਦਾ ਇਹ 'ਕਨਫਿਊਜ਼ਨ' ਕਰ ਰਿਹਾ ਹੈ ਬਿਮਾਰ, ਮਾਹਰਾਂ ਤੋਂ ਜਾਣੋ ਬਚਾਅ ਦੇ ਤਰੀਕੇ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਦੇਸ਼ ਦੇ ਕਈ ਹਿੱਸਿਆਂ ਵਿੱਚ ਅੱਜਕੱਲ੍ਹ ਮੌਸਮ ਦਾ ਮਿਜ਼ਾਜ ਪਲ-ਪਲ ਰੰਗ ਬਦਲ ਰਿਹਾ ਹੈ। ਦੁਪਹਿਰ ਦੀ ਤੇਜ਼ ਧੁੱਪ ਗਰਮੀ ਦਾ ਅਹਿਸਾਸ ਕਰਵਾਉਂਦੀ ਹੈ, ਜਦੋਂ ਕਿ ਸ਼ਾਮ ਹੁੰਦੇ ਹੀ ਚੱਲਣ ਵਾਲੀਆਂ ਠੰਢੀਆਂ ਹਵਾਵਾਂ ਸਾਰਾ ਗਣਿਤ ਵਿਗਾੜ ਦਿੰਦੀਆਂ ਹਨ। ਮੌਸਮ ਦੀ ਇਸ 'ਅੱਖ-ਮਿਚੌਲੀ' ਕਾਰਨ ਲੋਕਾਂ ਦਾ ਸਰੀਰ ਸੰਤੁਲਨ ਨਹੀਂ ਬਣਾ ਪਾ ਰਿਹਾ, ਜਿਸ ਕਾਰਨ ਸਰਦੀ-ਜ਼ੁਕਾਮ ਅਤੇ ਵਾਇਰਲ ਬੁਖਾਰ (Influenza ਤੇ RSV) ਤੇਜ਼ੀ ਨਾਲ ਫੈਲ ਰਿਹਾ ਹੈ।

ਮੈਕਸ ਹੈਲਥਕੇਅਰ, ਦਿੱਲੀ ਦੀ ਸੀਨੀਅਰ ਡਾਇਰੈਕਟਰ ਡਾ. ਮੋਨਿਕਾ ਮਹਾਜਨ ਨੇ ਇਸ ਬਦਲਦੇ ਮੌਸਮ ਵਿੱਚ ਸਿਹਤ ਦਾ ਖ਼ਿਆਲ ਰੱਖਣ ਲਈ ਕੁਝ ਅਹਿਮ ਨੁਕਤੇ ਸਾਂਝੇ ਕੀਤੇ ਹਨ:

ਤੇਜ਼ੀ ਨਾਲ ਫੈਲ ਰਿਹਾ ਹੈ ਵਾਇਰਲ ਬੁਖਾਰ

ਡਾਕਟਰ ਅਨੁਸਾਰ ਇਸ ਮੌਸਮ ਵਿੱਚ ਤੇਜ਼ ਬੁਖਾਰ, ਸਰੀਰ ਦਾ ਟੁੱਟਣਾ, ਵਗਦੀ ਨੱਕ, ਗਲੇ ਵਿੱਚ ਖ਼ਰਾਸ਼ ਅਤੇ ਖੰਘ ਹੋਣਾ ਆਮ ਗੱਲ ਹੈ। ਅਜਿਹੇ ਵਿੱਚ ਡਾਕਟਰ ਦੀ ਸਲਾਹ ਨਾਲ ਪੈਰਾਸੀਟਾਮੋਲ ਅਤੇ ਐਲਰਜੀ ਦੀਆਂ ਦਵਾਈਆਂ ਲਈਆਂ ਜਾ ਸਕਦੀਆਂ ਹਨ। ਜੇਕਰ ਤੁਸੀਂ ਜਾਂ ਬੱਚੇ ਬਿਮਾਰ ਹਨ, ਤਾਂ ਦੂਜਿਆਂ ਨੂੰ ਇਨਫੈਕਸ਼ਨ ਤੋਂ ਬਚਾਉਣ ਲਈ ਦਫ਼ਤਰ ਜਾਂ ਸਕੂਲ ਜਾਣ ਤੋਂ ਗੁਰੇਜ਼ ਕਰੋ।

ਡਾਕਟਰ ਕੋਲ ਕਦੋਂ ਜਾਣਾ ਚਾਹੀਦਾ ਹੈ?

ਜੇਕਰ ਬੁਖਾਰ ਨਹੀਂ ਉਤਰ ਰਿਹਾ, ਬਲਗਮ ਦਾ ਰੰਗ ਪੀਲਾ ਜਾਂ ਹਰਾ ਹੋ ਗਿਆ ਹੈ, ਸਾਹ ਲੈਣ ਵਿੱਚ ਦਿੱਕਤ ਜਾਂ ਛਾਤੀ ਵਿੱਚ ਦਰਦ ਹੋ ਰਿਹਾ ਹੈ, ਤਾਂ ਇਸ ਨੂੰ ਹਲਕੇ ਵਿੱਚ ਨਾ ਲਓ। ਇਹ ਨਿਮੋਨੀਆ ਦਾ ਸੰਕੇਤ ਹੋ ਸਕਦਾ ਹੈ। ਅਸਥਮਾ, ਸ਼ੂਗਰ ਅਤੇ ਦਿਲ ਦੇ ਮਰੀਜ਼ਾਂ ਨੂੰ ਖ਼ਾਸ ਸਾਵਧਾਨੀ ਵਰਤਣੀ ਚਾਹੀਦੀ ਹੈ।

ਪੇਟ ਦੀ ਇਨਫੈਕਸ਼ਨ ਅਤੇ ਪੀਲੀਆ

ਗਰਮੀ ਵਧਣ ਨਾਲ ਉਲਟੀ-ਦਸਤ ਅਤੇ ਪੀਲੀਆ (Hepatitis A ਤੇ E) ਦੇ ਮਾਮਲੇ ਵਧ ਜਾਂਦੇ ਹਨ:

ਡਾਇਰੀਆ: ਸਰੀਰ ਵਿੱਚ ਪਾਣੀ ਦੀ ਕਮੀ (Dehydration) ਨਾ ਹੋਣ ਦਿਓ। ORS, ਨਾਰੀਅਲ ਪਾਣੀ ਅਤੇ ਸੂਪ ਪੀਂਦੇ ਰਹੋ।

ਪੀਲੀਆ: ਇਹ ਗੰਦੇ ਪਾਣੀ ਅਤੇ ਬਾਹਰਲੇ ਖਾਣੇ ਨਾਲ ਫੈਲਦਾ ਹੈ। ਯਾਦ ਰੱਖੋ, ਪੀਲੀਆ ਦਾ ਇਲਾਜ ਕਦੇ ਵੀ ਦੇਸੀ ਜੜੀ-ਬੂਟੀਆਂ ਜਾਂ ਝਾੜ-ਫੂਕ ਨਾਲ ਨਾ ਕਰਵਾਓ, ਇਹ ਲਿਵਰ ਡੈਮੇਜ ਕਰ ਸਕਦਾ ਹੈ।

ਮੱਛਰਾਂ ਤੋਂ ਸਾਵਧਾਨ

ਬੇਮੌਸਮੀ ਬਾਰਸ਼ ਕਾਰਨ ਮੱਛਰਾਂ ਦਾ ਖ਼ਤਰਾ ਵੀ ਵਧ ਗਿਆ ਹੈ। ਜੇਕਰ ਤੇਜ਼ ਬੁਖਾਰ ਦੇ ਨਾਲ ਜੋੜਾਂ ਵਿੱਚ ਭਿਆਨਕ ਦਰਦ ਹੋਵੇ, ਤਾਂ ਤੁਰੰਤ ਡਾਕਟਰ ਨਾਲ ਸੰਪਰਕ ਕਰੋ।