ਸਮਾਰਟਫੋਨ ਤੇ ਸਕ੍ਰੀਨ ਤੋਂ ਅੱਕੇ ਲੋਕ ! ਇਕੱਲੇਪਣ ਤੇ ਤਣਾਅ ਤੋਂ ਬਚਣ ਲਈ ਮੁੜ ਅਪਣਾ ਰਹੇ ਆਫਲਾਈਨ ਸੋਸ਼ਲ ਕਲੱਬ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਡਿਜੀਟਲ ਦੁਨੀਆ ਨੇ ਦੋਸਤਾਂ ਨਾਲ ਰੂ-ਬ-ਰੂ ਮਿਲਣ ਦੀ ਸੰਸਕ੍ਰਿਤੀ ਨੂੰ ਲਗਪਗ ਖ਼ਤਮ ਕਰ ਦਿੱਤਾ ਹੈ। ਰਿਸ਼ਤੇ ਹੁਣ ਸਿਰਫ਼ ਆਨਲਾਈਨ ਚੈਟ ਜਾਂ ਵੀਡੀਓ ਕਾਲ ਤਕ ਹੀ ਸੀਮਤ ਹੋ ਕੇ ਰਹਿ ਗਏ ਹਨ। ਇਸ ਕਾਰਨ ਲੋਕ ਇਕੱਲੇਪਣ, ਡਿਪ੍ਰੈਸ਼ਨ ਤੇ ਐਂਜ਼ਾਇਟੀ ਵਰਗੀਆਂ ਸਮੱਸਿਆਵਾਂ ਦਾ ਵੱਧ ਸ਼ਿਕਾਰ ਹੋ ਰਹੇ ਹਨ।

ਹਾਲਾਂਕਿ, ਇਸ ਸਬੰਧੀ ਇਕ ਚੰਗੀ ਖ਼ਬਰ ਇਹ ਹੈ ਕਿ ਲੋਕ ਹੁਣ ਇਸ ਡਿਜੀਟਲ ਦੁਨੀਆ ਤੋਂ ਅੱਕ ਕੇ ਮੁੜ ਆਫਲਾਈਨ ਜ਼ਿੰਦਗੀ ਵੱਲ ਵਾਪਸੀ ਕਰ ਰਹੇ ਹਨ।

ਆਨਲਾਈਨ ਤੋਂ ਆਫਲਾਈਨ ਮੋਡ ਵੱਲ ਪਰਤ ਰਹੇ ਲੋਕ

ਅਮਰੀਕਾ ਸਮੇਤ ਕਈ ਦੇਸ਼ਾਂ 'ਚ ਅਜਿਹੇ ਕਲੱਬਾਂ ਦੀ ਗਿਣਤੀ ਤੇਜ਼ੀ ਨਾਲ ਵਧ ਰਹੀ ਹੈ ਜਿੱਥੇ ਲੋਕ ਆਫਲਾਈਨ ਗਤੀਵਿਧੀਆਂ ਨੂੰ ਅਪਣਾ ਰਹੇ ਹਨ। ਹੁਣ ਲੋਕ ਦੋਸਤਾਂ ਨੂੰ ਮਿਲਣ, ਨਵੇਂ ਦੋਸਤ ਬਣਾਉਣ, ਪਜ਼ਲ ਹੱਲ ਕਰਨ ਤੇ ਕਿਤਾਬਾਂ ਪੜ੍ਹਨ 'ਤੇ ਧਿਆਨ ਦੇ ਰਹੇ ਹਨ। ਇਹ ਰੁਝਾਨ ਸਪੱਸ਼ਟ ਕਰਦਾ ਹੈ ਕਿ ਲੋਕ ਹੁਣ ਆਪਣੀ ਮਾਨਸਿਕ ਸਿਹਤ (Mental Health) ਪ੍ਰਤੀ ਪਹਿਲਾਂ ਨਾਲੋਂ ਵੱਧ ਜਾਗਰੂਕ ਹੋ ਰਹੇ ਹਨ।

ਗੱਲਬਾਤ ਕਰਨ ਦੇ ਲੱਭ ਰਹੇ ਹਨ ਬਹਾਨੇ

ਇਕੱਲੇਪਣ ਨਾਲ ਜੂਝ ਰਹੇ ਲੋਕ ਹੁਣ ਗੱਲਬਾਤ ਕਰਨ ਦੇ ਨਵੇਂ ਬਹਾਨੇ ਲੱਭ ਰਹੇ ਹਨ। ਕੁਝ ਲੋਕਾਂ ਦਾ ਮੰਨਣਾ ਹੈ ਕਿ ਪਜ਼ਲ ਹੱਲ ਕਰਦੇ ਸਮੇਂ ਜਾਂ ਕਿਸੇ ਵਿਸ਼ੇ 'ਤੇ ਚਰਚਾ ਕਰਦੇ ਹੋਏ ਨਵੇਂ ਦੋਸਤ ਬਣਾਉਣਾ ਕਾਫ਼ੀ ਆਸਾਨ ਹੁੰਦਾ ਹੈ।

ਇਸੇ ਤਰ੍ਹਾਂ, ਇੱਕੋ ਪਸੰਦ ਦੀ ਕਿਤਾਬ ਇਕੱਠੇ ਪੜ੍ਹਨ ਤੇ ਉਸ 'ਤੇ ਚਰਚਾ ਕਰਨ ਨਾਲ ਇੱਕੋ ਜਿਹੀ ਸੋਚ ਵਾਲੇ ਲੋਕਾਂ ਨਾਲ ਚੰਗੀ ਬਾਂਡਿੰਗ ਬਣਦੀ ਹੈ।

ਦੁਨੀਆ ਭਰ ਵਿਚ ਤੇਜ਼ੀ ਨਾਲ ਵੱਧ ਰਹੇ ਸੋਸ਼ਲ ਕਲੱਬ

ਦ ਜੌਇ ਲਿਸਟ (The Joy List) : ਨਾਮ ਤੋਂ ਹੀ ਸਪੱਸ਼ਟ ਹੈ ਕਿ ਇਹ ਖੁਸ਼ੀ ਦੇਣ ਵਾਲੀਆਂ ਗਤੀਵਿਧੀਆਂ ਨਾਲ ਜੁੜਿਆ ਹੈ। ਇਹ ਇਕ ਨਿਊਜ਼ਲੈਟਰ ਹੈ, ਜੋ ਸਭ ਤੋਂ ਵਧੀਆ ਆਫਲਾਈਨ ਸੋਸ਼ਲ ਈਵੈਂਟਸ ਬਾਰੇ ਜਾਣਕਾਰੀ ਪ੍ਰਦਾਨ ਕਰਦਾ ਹੈ।

ਰੀਡਿੰਗ ਰਿਦਮ (Reading Rhythms)

ਇਹ ਇਕ ਰੀਡਿੰਗ ਕਲੱਬ ਹੈ, ਜਿੱਥੇ ਹਰ ਮੈਂਬਰ ਆਪਣੀ ਮਨਪਸੰਦ ਕਿਤਾਬ ਲੈ ਕੇ ਆਉਂਦਾ ਹੈ ਤੇ ਸਾਰੇ ਇਕੱਠੇ ਬੈਠ ਕੇ ਉਸ ਨੂੰ ਪੜ੍ਹਦੇ ਹਨ। ਸਿਰਫ਼ ਪੜ੍ਹਦੇ ਹੀ ਨਹੀਂ, ਸਗੋਂ ਬਾਅਦ ਵਿੱਚ ਉਸ 'ਤੇ ਚਰਚਾ ਵੀ ਕਰਦੇ ਹਨ।

ਪਜ਼ਲ ਪੀਪਲ (Puzzle People)

ਨਿਊਯਾਰਕ ਸ਼ਹਿਰ ਦਾ ਇਹ ਕਲੱਬ ਪਜ਼ਲ ਹੱਲ ਕਰਨ ਦੇ ਸ਼ੌਕੀਨਾ ਲਈ ਹੈ। ਇਕ ਮੇਜ਼ 'ਤੇ 10 ਤੋਂ 15 ਲੋਕ ਇਕੱਠੇ ਬੈਠ ਕੇ ਪਜ਼ਲ ਹੱਲ ਕਰਦੇ ਹਨ ਅਤੇ ਆਪਸ ਵਿੱਚ ਦੋਸਤੀ ਦਾ ਰਿਸ਼ਤਾ ਬਣਾਉਂਦੇ ਹਨ।

ਦਿਲਚਸਪ ਗੱਲ ਇਹ ਹੈ ਕਿ ਇੱਥੇ ਤੁਹਾਨੂੰ ਆਪਣਾ ਰਸਮੀ ਜਾਣ-ਪਛਾਣ ਦੇਣ ਦੀ ਲੋੜ ਨਹੀਂ ਹੁੰਦੀ। ਤੁਸੀਂ ਪਜ਼ਲ ਹੱਲ ਕਰਦੇ-ਕਰਦੇ ਹੀ ਲੋਕਾਂ ਨਾਲ ਗੱਲਬਾਤ ਸ਼ੁਰੂ ਕਰ ਸਕਦੇ ਹੋ।

ਕ੍ਰਿਟੀਕਲ ਥਿੰਕਿੰਗ ਕਲੱਬ (Critical Thinking Club)

ਇਸ ਕਲੱਬ 'ਚ ਲੋਕਾਂ ਦੇ ਸਾਹਮਣੇ ਵੱਖ-ਵੱਖ ਸਵਾਲ ਰੱਖੇ ਜਾਂਦੇ ਹਨ, ਜਿਨ੍ਹਾਂ 'ਤੇ ਸਾਰੇ ਮਿਲ ਕੇ ਵਿਚਾਰ-ਵਟਾਂਦਰਾ ਅਤੇ ਬਹਿਸ ਕਰਦੇ ਹਨ।

ਡਾਰਨ ਇਟ (Darn It)

ਕੀ ਤੁਸੀਂ ਅਜਿਹੀ ਜਗ੍ਹਾ ਦੀ ਕਲਪਨਾ ਕਰ ਸਕਦੇ ਹੋ, ਜਿੱਥੇ ਲੋਕ ਆਪਣੇ ਫਾਟੇ ਜਾਂ ਉਧੜੇ ਹੋਏ ਕੱਪੜੇ ਸਿਰਫ਼ ਇਸ ਲਈ ਲੈ ਕੇ ਆਉਣ ਕਿ ਉਹ ਇਕੱਠੇ ਬੈਠ ਕੇ ਉਨ੍ਹਾਂ ਨੂੰ ਸੀ ਸਕਣ? ਡਾਰਨ ਇਟ ਕਲੱਬ ਦਾ ਮਕਸਦ ਵੀ ਇਹੀ ਹੈ। ਇਹ ਕਲੱਬ ਲੋਕਾਂ ਨੂੰ ਇਕੱਠੇ ਬੈਠ ਕੇ ਕੱਪੜੇ ਸਿਉਣ ਦੇ ਨਾਲ-ਨਾਲ ਆਪਸੀ ਗੱਲਬਾਤ ਅਤੇ ਰਿਸ਼ਤੇ ਮਜ਼ਬੂਤ ਕਰਨ ਦਾ ਮੌਕਾ ਦਿੰਦਾ ਹੈ।