ਰਿਸ਼ਤੇ 'ਚ ਫਿਜ਼ੀਕਲ ਹੀ ਨਹੀਂ, ਇਮੋਸ਼ਨਲ ਇੰਟੀਮੇਸੀ ਵੀ ਹੈ ਜ਼ਰੂਰੀ, ਇਨ੍ਹਾਂ 5 ਤਰੀਕਿਆਂ ਨਾਲ ਬਣਾਓ ਪਾਰਟਨਰ ਦੇ ਦਿਲ 'ਚ ਖ਼ਾਸ ਥਾਂ

ਲਾਈਫ਼ਸਟਾਈਲ ਡੈਸਕ, ਨਵੀਂ ਦਿੱਲੀ: ਰਿਸ਼ਤੇ ਵਿੱਚ ਸਰੀਰਕ ਨੇੜਤਾ (Physical Intimacy) ਜਿੰਨੀ ਜ਼ਰੂਰੀ ਹੈ, ਉਸ ਤੋਂ ਕਿਤੇ ਜ਼ਿਆਦਾ ਜ਼ਰੂਰੀ ਭਾਵਨਾਤਮਕ ਨੇੜਤਾ (Emotional Intimacy) ਹੈ। ਇਹ ਇੱਕ-ਦੂਜੇ ਦੀਆਂ ਆਦਤਾਂ, ਵਿਵਹਾਰ ਅਤੇ ਭਾਵਨਾਵਾਂ ਨੂੰ ਸਮਝਣ ਦੇ ਨਾਲ-ਨਾਲ ਡਰ ਅਤੇ ਅਸੁਰੱਖਿਆਵਾਂ ਨੂੰ ਸਾਂਝਾ ਕਰਨ ਦਾ ਇੱਕ ਜ਼ਰੀਆ ਹੈ, ਜੋ ਕਿਸੇ ਵੀ ਰਿਸ਼ਤੇ ਵਿੱਚ ਵਿਸ਼ਵਾਸ ਵਧਾ ਕੇ ਇਸ ਨੂੰ ਮਜ਼ਬੂਤੀ ਦੇਣ ਵਿੱਚ ਮਦਦ ਕਰਦਾ ਹੈ।

ਇੱਥੇ ਕੁਝ ਅਜਿਹੇ ਤਰੀਕੇ ਦੱਸੇ ਗਏ ਹਨ, ਜਿਨ੍ਹਾਂ ਦੀ ਮਦਦ ਨਾਲ ਜੋੜੇ ਆਪਣੇ ਰਿਸ਼ਤੇ ਵਿੱਚ ਭਾਵਨਾਤਮਕ ਨੇੜਤਾ ਵਧਾ ਸਕਦੇ ਹਨ:

ਤਾਰੀਫ਼ ਅਤੇ ਲਗਾਅ ਦਿਖਾਓ:

ਇੱਕ ਛੋਟੀ ਜਿਹੀ ਤਾਰੀਫ਼ ਅਤੇ ਉਨ੍ਹਾਂ ਪ੍ਰਤੀ ਲਗਾਅ ਦੀ ਭਾਵਨਾ ਪਾਰਟਨਰ ਦਾ ਦਿਨ ਬਣਾ ਸਕਦੀ ਹੈ। ਇਹ ਉਨ੍ਹਾਂ ਨੂੰ ਰਿਸ਼ਤੇ ਵਿੱਚ ਮਿਲਣ ਵਾਲੇ ਸਪੋਰਟ ਦਾ ਅਹਿਸਾਸ ਕਰਵਾਉਣ ਦੇ ਨਾਲ-ਨਾਲ ਇਸ ਭਾਵਨਾ ਨੂੰ ਵੀ ਵਧਾਉਂਦੀ ਹੈ ਕਿ ਉਹ ਵੀ ਤੁਹਾਡੀ ਜ਼ਿੰਦਗੀ ਵਿੱਚ ਅਹਿਮੀਅਤ ਰੱਖਦੇ ਹਨ। ਜ਼ਿਆਦਾ ਕੁਝ ਨਹੀਂ ਕਰਨਾ, ਬੱਸ ਸਵੇਰੇ ਘਰੋਂ ਨਿਕਲਣ ਸਮੇਂ ਪਾਰਟਨਰ ਲਈ ਇੱਕ 'ਲਵ ਨੋਟ' ਰੱਖ ਕੇ ਜਾਓ ਜਾਂ ਕੋਈ ਪਿਆਰ ਭਰਿਆ ਮੈਸੇਜ ਭੇਜੋ।

ਤਜਰਬਿਆਂ ਨੂੰ ਸਾਂਝਾ ਕਰਨ ਦਾ ਸਮਾਂ ਕੱਢੋ:

ਹਰ ਦਿਨ ਘੱਟੋ-ਘੱਟ 15 ਮਿੰਟ ਦਾ ਸਮਾਂ ਆਪਣੇ ਪਾਰਟਨਰ ਨਾਲ ਸਿਰਫ਼ ਇਸ ਲਈ ਬਿਤਾਓ ਤਾਂ ਜੋ ਤੁਸੀਂ ਦਿਨ ਭਰ ਦੇ ਤਜਰਬੇ ਉਨ੍ਹਾਂ ਨਾਲ ਸਾਂਝੇ ਕਰ ਸਕੋ। ਇਹ ਸਾਰੇ ਤਜਰਬੇ ਇੱਕ-ਦੂਜੇ ਨੂੰ ਬਿਹਤਰ ਢੰਗ ਨਾਲ ਸਮਝਣ ਵਿੱਚ ਮਦਦ ਕਰਨਗੇ ਅਤੇ ਭਵਿੱਖ ਵਿੱਚ ਕਿਸੇ ਝਗੜੇ ਤੋਂ ਬਾਅਦ ਸਮਝਦਾਰੀ ਨਾਲ ਕੰਮ ਲੈਣ ਵਿੱਚ ਵੀ ਭੂਮਿਕਾ ਨਿਭਾਉਣਗੇ।

ਇੱਕ-ਦੂਜੇ ਦੇ ਟੀਚਿਆਂ ਨੂੰ ਸਪੋਰਟ ਕਰੋ:

ਜੇਕਰ ਪਾਰਟਨਰ ਇੱਕ-ਦੂਜੇ ਦੇ ਟੀਚਿਆਂ ਵਿੱਚ ਸਾਥ ਦਿੰਦੇ ਹਨ ਤਾਂ ਇਸ ਨਾਲ ਵੀ ਰਿਸ਼ਤੇ ਵਿੱਚ ਭਾਵਨਾਤਮਕ ਨੇੜਤਾ ਵਧਦੀ ਹੈ। ਅਸੀਂ ਸਾਰੇ ਜਾਣਦੇ ਹਾਂ ਕਿ ਰਿਸ਼ਤੇ ਸਿਰਫ਼ ਪਿਆਰ ਅਤੇ ਜ਼ਿੰਮੇਵਾਰੀ 'ਤੇ ਅਧਾਰਤ ਨਹੀਂ ਹੁੰਦੇ; ਇਹਨਾਂ ਵਿੱਚ ਸੁਪਨੇ ਅਤੇ ਇੱਛਾਵਾਂ ਵੀ ਸ਼ਾਮਲ ਹੁੰਦੀਆਂ ਹਨ।

ਗੈਰ-ਜਿਨਸੀ ਸਰੀਰਕ ਸੰਪਰਕ

ਗੈਰ-ਜਿਨਸੀ ਸਰੀਰਕ ਸੰਪਰਕ ਸੁਰੱਖਿਆ, ਆਪਣਾਪਣ ਅਤੇ ਆਰਾਮ ਦੀ ਭਾਵਨਾ ਨੂੰ ਉਤਸ਼ਾਹਿਤ ਕਰਦਾ ਹੈ। ਇਹ ਦਿਨ ਦੇ ਤਣਾਅ ਨੂੰ ਘਟਾਉਣ ਵਿੱਚ ਮਦਦ ਕਰਦਾ ਹੈ ਅਤੇ ਇੱਕ ਦੂਜੇ ਵਿੱਚ ਵਿਸ਼ਵਾਸ ਵਧਾਉਂਦਾ ਹੈ। ਇਸ ਤਰ੍ਹਾਂ ਦੇ ਸਰੀਰਕ ਸੰਪਰਕ ਵਿੱਚ ਪਾਰਕ ਵਿੱਚ ਸੈਰ ਕਰਦੇ ਸਮੇਂ ਹੱਥ ਫੜਨਾ, ਸਿਰ ਜਾਂ ਮੋਢੇ 'ਤੇ ਹੱਥ ਰੱਖਣਾ, ਜਾਂ ਜੱਫੀ ਪਾਉਣਾ ਸ਼ਾਮਲ ਹੋ ਸਕਦਾ ਹੈ।

ਆਪਣੇ ਡਰ ਅਤੇ ਕਮਜ਼ੋਰੀਆਂ ਸ਼ੇਅਰ ਕਰੋ:

ਪਾਰਟਨਰ ਨਾਲ ਹਮੇਸ਼ਾ ਚੰਗੀਆਂ ਅਤੇ ਪਾਜ਼ੇਟਿਵ ਗੱਲਾਂ ਹੀ ਸ਼ੇਅਰ ਨਹੀਂ ਕਰਨੀਆਂ ਚਾਹੀਦੀਆਂ, ਇਸ ਦੀ ਬਜਾਏ ਆਪਣੇ ਮਨ ਦੇ ਸਾਰੇ ਡਰ ਅਤੇ ਕਮਜ਼ੋਰੀਆਂ ਵੀ ਸਾਂਝੀਆਂ ਕਰਨਾ ਇੱਕ ਹੈਲਦੀ ਆਦਤ ਹੈ। ਅਜਿਹਾ ਕਰਨ ਨਾਲ ਪਾਰਟਨਰ ਦੇ ਮਨ ਵਿੱਚ ਰਿਸ਼ਤੇ ਪ੍ਰਤੀ ਵਿਸ਼ਵਾਸ ਦੇ ਨਾਲ-ਨਾਲ ਸਤਿਕਾਰ ਦੀ ਭਾਵਨਾ ਆਉਂਦੀ ਹੈ। ਨਾਲ ਹੀ, ਇਸ ਨਾਲ ਵਿਅਕਤੀ ਖ਼ੁਦ ਨੂੰ ਜੱਜ ਕੀਤੇ ਜਾਣ ਦੇ ਡਰ ਤੋਂ ਬਾਹਰ ਨਿਕਲਦਾ ਹੈ।